Abantu Abaselula ‘Abathembela KuYehova’
UBUHLE abukho kubantu abaselula kuphela, ingengobantu abakhulileyo kuphela abanobulumko. (Thelekisa IMizekeliso 11:22; INtshumayeli 10:1.) Kunoko, abo banobuhle obuhlala buhleli nabanobulumko bokwenene ngabo bathembela kuYehova baze ngentliziyo epheleleyo bathi ngaye: “UnguThixo wam wena.”—INdumiso 31:14; IMizekeliso 9:10; 16:31.
Kulo lonke ihlabathi kukho isihlwele esandayo sabantu abahle, abaselula nabakhulileyo, ababonakalisa ubulumko babo ngokukhonza uThixo nangokushumayela iindaba ezilungileyo zoBukumkani bukaThixo. Ngokomzekelo, cinga ngoSabrina oneminyaka esibhozo ubudala.
USabrina uhlala eJamani yaye ufunda ku-sub-B. Ungowokuqala kumaNgqina kaYehova ukungena kweso sikolo. Okubuhlungu kukuba, wayelixhoba lokugculelwa ngabantwana besikolo awayefunda kuso de kwayimini umfundisi-ntsapho awacela abafundi ukuba beze neyona ncwadi bayithandayo eklasini. USabrina wagqiba ekubeni eze nencwadi ethi Incwadi Yam Yamabali EBhayibhile. Kubusuku obungaphambi kolo suku, nakubeni wayesoyika, walungiselela kakuhle ukuze eme phambi kweklasi. Ekubeni kwakukho abafundi abangama-26 eklasini yakhe, wayesazi ukuba wayesenokungafumani xesha laneleyo. Kodwa wayezimisele ukuba akasayi kuvumela nabani na aphazamise intetho yakhe ibe wayeqinisekile ukuba uYehova wayeya kumnceda. Ngosuku olwalumisiwe, umfundisi-ntsapho wabuza ukuba ngubani owayeze nencwadi nowayefuna ukuba ngowokuqala ukuyibonisa. Okwamangalisayo kukuba, yayinguSabrina kuphela owayeze nayo. Wema phambi kweklasi waza waqalisa ukuthetha, ukufunda nokubonisa imifanekiso esencwadini ibe wacacisa ukuba konke oko kwakusekelwe eBhayibhileni. Ekuqukumbeleni wabuza: “Ngubani onomdla wokufumana le ncwadi?” Omnye umbhalo wawunika umfundisi-ntsapho, ibe ebudeni beentsuku ezimbalwa ezalandelayo, wanika abathile kwabo afunda kunye nabo iincwadi ezingakumbi ezilishumi. Ekuphela kwento awayithethayo umfundisi-ntsapho ngale ntetho wathi: “Andizange ndiyibone into enje.” Wanika uSabrina awona manqaku aphezulu ngomsebenzi wakhe.
Enyanisweni, amaNgqina aselula amaninzi angabavakalisi abonwabileyo beendaba ezilungileyo esikolweni. Omnye umzekelo ngokaErika, umvakalisi oneminyaka eli-11 ubudala eMexico. Wayefundiswe kwasebusaneni ukuthanda uYehova. Umsebenzi wakhe wesikolo usemagqabini. Omnye wezabelo awayezinikiwe yayikukulungiselela umbandela ongoGawulayo nokukhotyokiswa licuba notywala. Walungiselela kakuhle, esebenzisa iphephancwadi uVukani!, ibe wafumana awona manqaku aphezulu. Umfundisi-ntsapho wakhe wambuza apho wayeyifumana khona loo nkcazelo ibe wanikwa amaphephancwadi awayequlethe loo mbandela. Kamva, umfundisi-ntsapho wasebenzisa loo maphephancwadi ukuxubusha le mibandela kunye neklasi iphela. Ngenxa yehambo kaErika, intlonelo yakhe kubafundisi-ntsapho, amanqaku akhe aphezulu, uye wakufanelekela ukufumana izipho, iidiploma nokuhlawulelwa inxalenye yemali yokuqhubeka nezifundo efunyanwa ngabafundi. Noko ke, uvakalelwa kukuba ezona zinto zibalaseleyo aziphumezileyo kukuba uye wazazisa njengomnye wamaNgqina kaYehova, uye wakwazi ukuhambisa uncwadi lweBhayibhile yaye uye wadumisa igama likaThixo.
Kukwakho noShannon, inkwenkwana eneminyaka elishumi ubudala ehlala eNew Zealand. Ubona ngeliso elinye kuphela; elinye waphulukana nalo ngenxa yomhlaza xa wayeselusana. Xa uShannon wayeneminyaka esixhenxe ubudala, unina waqalisa ukufundisisa iBhayibhile namaNgqina kaYehova. Noko ke, kungekudala emva kokuba eqalise izifundo zeBhayibhile, waqalisa ukuhlala nendoda angatshatanga nayo waza wagqiba ekubeni ayeke izifundo zakhe. UShannon wacela ukuba esakhe isifundo seBhayibhile siqhubeke. Umnqweno wakhe wamkelwa. AmaNgqina aqhubeka esiza, ibe ekugqibeleni bobathathu kule ndlu bafundisisa iBhayibhile baza benza inkqubela ngokomoya. Emva kokutshata ngokwasemthethweni, unina kaShannon noyise womtshato wesibini babhaptizwa.
Ngenye imini uShannon nenkosikazi yomveleli wesiphaluka babekwinkonzo yasentsimini kunye. Umninimzi wabuza uShannon: “Kwenzeka ntoni kwiliso lakho?” Waphendula: “Laba nomhlaza, laza lakhutshwa. Kungekudala uYehova uza kundinika elitsha eParadisi, ibe oko koko size kukuxelela kona.”