Iklasi Ye-101 YaseGiliyadi—Inenzondelelo Ngemisebenzi Emihle
UMDALI wethu, uYehova uThixo, unenzondelelo ngemisebenzi emihle, yaye kukwanjalo nangoNyana wakhe, uYesu Kristu. Esibekela umzekelo omhle, uYesu wabonakalisa inzondelelo ngokusiphumeza isabelo awayesinikwe nguThixo, esasiquka ukuba ‘azinikele ngenxa yethu ukuze azihlambululele iqela labantu abangabakhe ngokukhethekileyo, abazondelela imisebenzi emihle.’ (Tito 2:14) Amalungu angama-48 eklasi ye-101 yeSikolo seBhayibhile seWatchtower saseGiliyadi ayibonakalise ngokwenene inzondelelo ngemisebenzi emihle. Ucwangciso lokuvuyisana naba bavangeli basemazweni lwalungomhla kaSeptemba 7, 1996, kwiZiko Lemfundo leWatchtower elisePatterson, eNew York.
Isiluleko Esisebenzisekayo Sokulondoloza Inzondelelo
Usihlalo wocwangciso lokuvuyisana nabo yayinguCarey Barber, ilungu leQumrhu Elilawulayo, elineminyaka engaphezu kwama-70 likubulungiseleli bexesha elizeleyo. Kumagqabaza akhe okuvula, uMzalwan’ uBarber wathetha ngomsebenzi wokushumayela nowokufundisa owawusenziwa nguYesu, ‘owayelukhanyiselo lwehlabathi.’ (Yohane 8:12) Wabonisa ukuba uYesu akazange aligodle elo lungelo lomsebenzi kodwa wabongoza nabafundi bakhe ukuba bakwenze kukhanye ukukhanya kwabo. (Mateyu 5:14-16) Eli lungelo lenkonzo libenza bube nentsingiselo ngakumbi ubomi bomKristu yaye libeka imbopheleleko enzima emagxeni abo bonke ‘abahamba njengabantwana bokukhanya.’—Efese 5:8.
Emva kwaloo magqabantshintshi okuvula, kwabizwa uDon Adams osebenza kwiiOfisi zeQumrhu Elilawulayo kwikomkhulu eliseBrooklyn. Wathetha phantsi komxholo othi “Ukusinga Phambili, Kungekhona Ngasemva.” UMzalwan’ uAdams ngokuyintloko wathetha ngeSikolo saseGiliyadi nenjongo yaso—ukusa iindaba ezilungileyo kwamanye amazwe. Wathetha ngenkqubela yentlangano kaThixo, epapashe uncwadi lweBhayibhile ehlabathini lonke ngeelwimi ezingaphezu kwama-300. Incwadi ethi Ulwazi Olukhokelela Kubomi Obungunaphakade, epapashwe ngowe-1995, ifumaneka ngeelwimi ezili-111 yaye kukho amalungiselelo okuba ishicilelwe ngeelwimi ezingakumbi. Sele incede abafundi bakaYesu abatsha ukuba bafikelele kwinqanaba lozahlulelo nobhaptizo kwisithuba nje seenyanga ezimbalwa. Ngoko aba bavangeli basemazweni batsha baza kusebenza ngeempapasho ezintsha eziluncedo ekufundisiseni iBhayibhile.
Emva koko, uLyman Swingle, ilungu leQumrhu Elilawulayo, wathetha phantsi komxholo osekelwe kwiSityhilelo 7:15 othi “Qhubekani Ninikela Inkonzo Engcwele KuYehova.” Ekubeni uYehova enguThixo owonwabileyo, ukumkhonza ngokuqhubekayo kwenza umntu onwabe. (1 Timoti 1:11) Ngenxa yale nkonzo ivuyisayo, ukhonzwa sisihlwele esikhulu sabantu abaphuma kuyo yonke imimandla yomhlaba. Ukutyhubela iminyaka, abo baye baqeqeshwa kwiSikolo saseGiliyadi baye banenxaxheba ekuncedeni uninzi lwabo bantu ukuba bafumane ulwazi oluchanileyo lwenyaniso. Ngoko ke, sinezizathu ezininzi zokukholelwa ukuba uYehova uya kuqhubeka ebasikelela abo bathunyelwa ukuya kuhlanganisa amalungu angakumbi esihlwele esikhulu esandayo.
Umxholo awayethetha phantsi kwawo uDaniel Sydlik, okwalilungu leQumrhu Elilawulayo wawusithi “Ukubonakalisa Uvuyo LukaYehova.” Wabonisa ukuba bonke abakhonzi bakaThixo, kuquka aba bavangeli basemazweni batsha, banelungelo lokufundisa abantu ngendlela esa ebomini obungunaphakade nendlela yokuphila ubomi obuvuyisayo ngoku. UMzalwan’ uSydlik wathi: “Ukufundisa ngumsebenzi obangela ulwaneliseko. Luye lubonakale ebusweni babantu abafundisayo nasebusweni babo bafundayo.” (INdumiso 16:8-11) Wacaphula omnye umvangeli wasemazweni wase-Estonia owathi, “Sithwele esona sigidimi sibalulekileyo emhlabeni, yaye oko kubonakala kwinkangeleko yethu yobuso.” Inkangeleko yethu yobuso isenokwenza abantu baphulaphule yaye babe nomdla. Abantu banomdla wokwazi into eyenza abakhonzi bakaYehova bonwabe. UMzalwan’ uSydlik waluleka ngelithi: “Ngoko ibalulekile inkangeleko yakho yobuso. Abantu bayakuthanda ukubona abantu abonwabileyo.”
U-Ulysses Glass, obengomnye wabahlohli baseGiliyadi ukususela kwiklasi ye-12 ngowe-1949, wathetha nabaphulaphuli phantsi kwalo mxholo “Yilindeni Ngomonde Imiphefumlo Yenu.” Yintoni umonde? Udlulisela ingcamango yokulindela okuthile uzolile, ubonakalise ukunyamezela nakuba ucatshukiswa okanye uxinezelekile. Umntu onomonde uhlala ezolile; ongenamonde uyangxama aze acaphuke. UMzalwan’ uGlass wathi, “Abaninzi bacinga ukuba umonde luphawu lobuthathaka okanye lokungakwazi ukwenza izigqibo,” kodwa umonde “kuYehova luphawu lwamandla nenjongo.” (IMizekeliso 16:32) Yiyiphi imivuzo yokuba nomonde? Elinye iqhalo lamaTshayina lithi: “Ukubonakalisa umonde kwisenzo esicaphukisayo kuya kukusindisa kwimbandezelo yemihla elikhulu.” UMzalwan’ uGlass wathi: “Umonde uyabuphucula ubuntu bukabani. Ngaloo ndlela, ugcina nezinye iimpawu zakhe ezintle zikumgangatho ophezulu. Wenza ukholo lunqweneleke, uxolo luhlale luhleli nothando lungagungqi.”
UMark Noumair, owakhonza njengomvangeli wasemazweni eKenya iminyaka eli-11 nongumhlohli waseGiliyadi ngoku wathi: “Kulilungelo ukufumana isabelo esivela kuYehova uThixo ngentlangano yakhe.” Njengoko wayethetha phantsi komxholo othi “Ngaphandle Kokuba Nokholo, Akusayi Kunyamezela Ixesha Elide,” uMzalwan’ uNoumair wanikel’ ingqalelo kumzekelo kaKumkani wakwaYuda uAhazi. UIsaya wamqinisekisa lo kumkani ukuba uYehova uya kumxhasa kwisabelo sakhe, kodwa uAhazi akazange abe nokholo Kuye. (Isaya 7:2-9) Emva koko uMzalwan’ uNoumair wabonisa ukuba abavangeli basemazweni—eneneni, sonke—sifanele sibe nokholo kuYehova ukuze sihlale sinyamezele kwizabelo zethu zobuthixo. Ucelomngeni lwesabelo sokuba ngumvangeli wasemazweni lufuna ukholo olunamandla. UMzalwan’ uNoumair wathi: “Hlala ukhumbula ukuba ayikho imeko egqibeleleyo kule nkqubo yezinto.”
Amava Akhuthaza Ukusebenza Ngenzondelelo
Ebudeni boqeqesho lwabo lwaseGiliyadi, ngempela-veki nganye abafundi babechitha ixesha elithile kubulungiseleli basesidlangalaleni, obuya kuba yinxalenye ephambili yezabelo zabo njengabavangeli basemazweni. UWallace Liverance, olilungu labasebenzi baseGiliyadi, wadlan’ indlebe nabafundi abali-15, abathi babalisa amava. ULeon Weaver weKomiti yeSebe Lenkonzo noLon Schilling weBethel Operations Committee badlan’ indlebe namalungu eekomiti zamasebe asuka eAfrika naseMzantsi Merika, nawathi abalisa amava angomsebenzi wobuvangeli basemazweni aza anikela amacebiso amahle kubavangeli basemazweni ekwakuvuyiswana nabo. Kwaboniswa ukuba, abantu abamalunga nama-90 ekhulwini kubantu abaye babhaptizwa eSierra Leone ebudeni bonyaka wenkonzo wowe-1995 babencedwe ngabavangeli basemazweni. Enjani ukuba ntle ingxelo yomsebenzi wenzondelelo!
Ekugqibeleni, uMilton Henschel, umongameli woMbutho, wathetha nabaphulaphuli ababengama-2 734 phantsi komxholo othi “Intlangano KaYehova Ebonakalayo Yahlukile.” Yintoni eyenza kungabikho nanye into enokuthelekiswa nentlangano kaThixo? Asibobukhulu okanye amandla ayo kodwa sisibakala sokuba ikhokelwa ngemithetho nangemimiselo yobulungisa kaThixo. Kumaxesha amandulo yayingabantu bakaYehova, uhlanga lakwaSirayeli, olwalunikwe ilungelo lokuthwala izibhengezo zakhe ezingcwele, nto leyo eyayilwenza lwahluke olo hlanga. (Roma 3:1, 2) Namhlanje, intlangano kaYehova imanyene njengoko isebenza ngaphantsi kokhokelo lukaYesu Kristu. (Mateyu 28:19, 20) Iyakhula yaye iyanda. Ngaba ikho enye intlangano emhlabeni eneQumrhu Elilawulayo elihlola iLizwi likaThixo, iBhayibhile, ngaphambi kokwenza izigqibo ezibalulekileyo? Ngeendlela ezininzi, intlangano kaYehova ebonakalayo yahluke ngokupheleleyo.
Olu ncuthu locwangciso lwaqukunjelwa ngokudluliselwa kweziqinisekiso nokufundwa kweleta evela kuloo klasi ivakalisa uxabiso ngoqeqesho olukhethekileyo elufumeneyo.
[Ibhokisi ekwiphepha 22]
Inkcazelo Engabafundi
Inani lamazwe abavela kuwo: 9
Inani lamazwe ababelwe kuwo: 12
Inani labafundi: 48
Umlinganiselo wobudala: 31,7
Umlinganiselo weminyaka besenyanisweni: 13,8
Umlinganiselo weminyaka bekubulungiseleli bexesha elizeleyo: 9,8
[Umfanekiso okwiphepha 23]
Abaphumelele Kwiklasi Ye-101 YeSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.