IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w97 1/1 iphe. 26-29
  • Masikwenyanye Oko Kungendawo

No video available for this selection.

Sorry, there was an error loading the video.

  • Masikwenyanye Oko Kungendawo
  • IMboniselo Evakalisa UBukumkani BukaYehova—1997
  • Imixholwana
  • Amanqaku Afanayo
  • Ukugcina Ibandla Licocekile
  • Imiphumo Engaphephekiyo
  • Xa UmKristu Ozahluleleyo Esona
  • Kuthekani Ngomntu Oxhaphaza Abantwana Ngokwesini?
  • Ukuqonda Ubuthathaka, Ubungendawo Nenguquko
    IMboniselo Evakalisa UBukumkani BukaYehova—1995
  • UYehova Uxolela Ngokukhulu
    IMboniselo Evakalisa UBukumkani BukaYehova—1992
  • Hlala Ulwamkela Uqeqesho LukaYehova
    IMboniselo Evakalisa UBukumkani BukaYehova—2006
  • Ngaba Wone Umoya Oyingcwele?
    IMboniselo Evakalisa UBukumkani BukaYehova—2007
Khangela Okunye
IMboniselo Evakalisa UBukumkani BukaYehova—1997
w97 1/1 iphe. 26-29

Masikwenyanye Oko Kungendawo

UYEHOVA nguThixo ongcwele. Kumaxesha amandulo wayebizwa ngokuba ‘ngoyiNgcwele kaSirayeli,’ yaye ngoko wayefuna uSirayeli ahlale ecocekile, engenabala. (INdumiso 89:18) Abantu bakhe abakhethiweyo wabaxelela oku: “Ize nibe ngcwele, ngokuba ndiyiNgcwele.” (Levitikus 11:45) Nabani na owayefuna ‘ukunyuka aye entabeni kaYehova’ wayefanele abe ‘nezandla ezimsulwa, nentliziyo enyulu.’ (INdumiso 24:3, 4) Oku kwakuthetha okungakumbi kunokuphepha ukwenza isono. Kwakuthetha “ukuthiya into embi.”—IMizekeliso 8:13.

Ngothando, uYehova wadlulisa imithetho eneenkcukacha ukuze uhlanga lakwaSirayeli lukwazi ukuzibona yaye luziphephe izenzo ezibi. (Roma 7:7, 12) Le mithetho yayiquka ukhokelo olungqongqo ngokuphathelele ukuziphatha okuhle. Ukukrexeza, ubufanasini, ukulala nezalamane kunye nezilwanyana zachazwa njengezinto ezingcolisayo ngokomoya nezingekho ngcwele. (Levitikus 18:23; 20:10-17) Abo babenetyala lezenzo ezibi ngolo hlobo babenqunyulwa bangabiko kolo hlanga lakwaSirayeli.

Xa ibandla lamaKristu athanjisiweyo laba ‘nguSirayeli kaThixo,’ lanikwa imilinganiselo yokuziphatha efanayo. (Galati 6:16) NamaKristu ayefanele ‘akwenyanye oko kungendawo.’ (Roma 12:9) Amazwi uYehova awawathetha kuSirayeli ayesebenza nakulo: “Nimele nibe ngcwele, ngenxa yokuba mna ndingcwele.” (1 Petros 1:15, 16) Izenzo ezingengcwele ezinjengohenyuzo, ukukrexeza, ubufanasini ukulala nezalamane kunye nezilwanyana zazingafanele zilonakalise ibandla lamaKristu. Abo bangafuniyo ukuziyeka izinto ezinjalo abayi kubufumana uBukumkani bukaThixo. (Roma 1:26, 27; 2:22; 1 Korinte 6:9, 10; Hebhere 13:4) Kule “mihla yokugqibela,” kusasebenza imilinganiselo efanayo ‘nakwezinye izimvu.’ (2 Timoti 3:1; Yohane 10:16) Ngokomphumo, amaKristu athanjisiweyo nezinye izimvu ayila uluntu olucocekileyo nolufanelekileyo, olunako ukuthwala igama loThixo walo njengamaNgqina kaYehova.—Isaya 43:10.

Ukugcina Ibandla Licocekile

Ngokwahlukileyo koko, ihlabathi liyazamkela zonke iintlobo zokuziphatha okubi. Nangona amaKristu okwenyaniso ahlukile koku, akafanele alibale ukuba abaninzi abangabakhonzi bakaYehova ngoku babekade besehlabathini. Kukho abaninzi, ababengasiboni isizathu sokuba bangayifezekisi iminqweno nokuthanda kwenyama enesono, ababentyumpantyumpeka ‘kumgxobhozo woburheletyo’ ngaphambi kokuba bamazi uThixo wethu ongcwele. (1 Petros 4:4) Emva kokuchaza izenzo ezilizothe zabantu beentlanga abonakeleyo, umpostile uPawulos wathi: “Oko koko bambi kuni babekuko.” Noko ke, wahlabela mgama esithi: “Kodwa niye nahlanjwa nahlambuluka, kodwa niye nangcwaliswa, kodwa niye navakaliswa ningamalungisa egameni leNkosi yethu uYesu Kristu nangomoya kaThixo wethu.”—1 Korinte 6:11.

Anjani wona ukuthuthuzela amazwi! Enoba umntu wayesenza ntoni na ebomini bakhe ngaphambili, uyaguquka xa iindaba ezilungileyo ezizukileyo ezingoKristu zichukumisa intliziyo yakhe. Ubonakalisa ukholo aze azahlulele kuYehova uThixo. Emva koko uye aphile ubomi obucocekileyo ngokokuziphatha, ahlambuluke emehlweni kaThixo. (Hebhere 9:14) Izono awayezenzile ngaphambili ziyaxolelwa, yaye ‘unokuzolulela phambili kwizinto ezingaphambili.’a—Filipi 3:13, 14; Roma 4:7, 8.

UYehova wamxolela uDavide owayebonakalisa inguquko emva kokubulala nokukrexeza, yaye wamxolela uManase owayebonakalisa inguquko ekunquleni izithixo nasekuphalazeni igazi elininzi. (2 Samuweli 12:9, 13; 2 Kronike 33:2-6, 10-13) Sinokuba nombulelo ngokwenene ngokuba ekulungele ukusixolela nathi ukuba sibonakalisa inguquko yaye sisondela kuye ngokunyanisekileyo nangokuthobekileyo. Sekunjalo, nangona uYehova wamxolela uDavide noManase, la madoda mabini—ndawonye noSirayeli—kwafuneka ajamelane nemiphumo yezono zawo. (2 Samuweli 12:11, 12; Yeremiya 15:3-5) Ngokufanayo, ngoxa uYehova ebaxolela aboni abaguqukayo, izenzo zabo zisenokuba nemiphumo engaphephekiyo.

Imiphumo Engaphephekiyo

Ngokomzekelo, indoda ephila ubomi bokuziphatha okubi ize ibe noGawulayo isenokuyamkela inyaniso ize ibuguqule ubomi bayo ide izahlulele ize ibhaptizwe. Ngoku ingumKristu ococekileyo ngokomoya onolwalamano oluhle noThixo nonethemba elivuyisayo ngekamva; kodwa isenaye uGawulayo. Ekuhambeni kwexesha isenokufa ngenxa yesi sifo, umphumo olusizi kodwa ongenakuphepheka ngenxa yehambo yayo yangaphambili. Kwamanye amaKristu imiphumo yehambo yangaphambili yokuziphatha okuvakalala isenokubakho ngezinye iindlela. Kangangeminyaka emva kokuzahlulela, mhlawumbi ubomi babo bonke kule nkqubo yezinto, kusenokufuneka balwe nzima nesilingo senyama yabo enesono efuna ukuba babuyele kwihambo yabo yangaphambili yokuziphatha okubi. Ngoncedo lomoya kaYehova, abaninzi bayaphumelela ekuxhathiseni. Kodwa kufuneka bahlale besilwa ngokuqhubekayo.—Galati 5:16, 17.

Abanjalo abaweli esonweni logama nje beyilawula imizimba yabo. Kodwa ukuba bangamadoda, ngobulumko basenokugqiba ekubeni ‘bangazabalazeli’ ukufumana imbopheleleko ebandleni ngoxa kusafuneka balwe neentshukumisa ezinamandla zokwenyama. (1 Timoti 3:1) Ngoba? Ngenxa yokuba bayazi ukuba ibandla liyabathemba abadala. (Isaya 32:1, 2; Hebhere 13:17) Bayaqonda ukuba kuyiwa kubadala ngemibandela e-ethe-ethe yaye kufuneka basingathe izinto ezinokuba nobuzaza. Ibingayi kuba kukubonakalisa uthando, ubulumko okanye ulwazelelelo ngomntu olwa nzima neminqweno engacocekanga yokwenyama ukuba azabalazele isikhundla sembopheleleko esinjalo.—IMizekeliso 14:16; Yohane 15:12, 13; Roma 12:1.

Kwindoda eyayixhaphaza abantwana ngokwesini ngaphambi kokuba ibhaptizwe, kusenokubakho omnye umphumo. Xa ifunda inyaniso, iyaguquka ize iyitshintshe indlela yayo yokuphila, ingangeni neso sono senkohlakalo ebandleni. Emva koko isenokwenza inkqubela entle, izoyise ngokupheleleyo iintshukumisa zayo, ide ifune ‘nokuzabalazela’ isikhundla sembopheleleko ebandleni. Noko ke, kuthekani ukuba ekuhlaleni isaziwa njengomxhaphazi wabantwana? Ngaba inokuba ‘ngongenakukhalazeleka, ibe nobungqina obuhle obuvela kubantu bangaphandle, ibe ngongenakumangaleleka’? (1 Timoti 3:1-7, 10; Tito 1:7) Hayi, bekungasayi kuba njalo. Ngoko, ibingayi kuwafanelekela amalungelo ebandleni.

Xa UmKristu Ozahluleleyo Esona

UYehova uyaqonda ukuba sibuthathaka kwanokuba nasemva kokubhaptizwa sisenokuwela esonweni. Umpostile uYohane wawabhalela oku amaKristu omhla wakhe: “Ndinibhalela ezi zinto ukuze ningenzi sono. Ukanti, ukuba nabani na uthi enze isono, sinaye umncedi kuBawo, uYesu Kristu, lowo ulilungisa. Yaye ungumbingelelo wokucamagushela izono zethu, kanti kungekhona ezethu kuphela kodwa kwanezehlabathi liphela.” (1 Yohane 2:1, 2) Ewe, ngesizinzi sedini likaYesu, uYehova uya kuwaxolela amaKristu azahluleleyo awela esonweni—ukuba aguquka ngokwenene aze alishiye ikhondo lawo lesono.

Umzekelo woku wabonwa kwibandla lenkulungwane yokuqala laseKorinte. Umpostile uPawulos weva ngetyala lomntu owayenze umbulo kwelo bandla laliselitsha, yaye wanikela umyalelo wokuba loo ndoda isuswe kubudlelane. Kamva, lo moni waguquka, yaye uPawulos wabongoza elo bandla ukuba limbuyisele. (1 Korinte 5:1, 13; 2 Korinte 2:5-9) Ngaloo ndlela, ngamandla aphilisayo obubele obunothando bukaYehova nexabiso elikhulu ledini lentlawulelo likaYesu, le ndoda yacocwa kwisono sayo. Kusenokwenzeka into efanayo nanamhlanje. Noko ke, nokuba umntu obhaptiziweyo owenze isono esinzulu uyaguquka aze axolelwe nguYehova, imiphumo yesono sakhe isenokuqhubeka ikho.—IMizekeliso 10:16, 17; Galati 6:7.

Ngokomzekelo, ukuba intombazana ezahluleleyo iwela kuhenyuzo, isenokuzisola ngokukrakra ngenxa yoko ikwenzileyo ize kamva impilo yayo yokomoya ihlaziyeke ngoncedo lwebandla. Kodwa kuthekani ukuba ikhulelwe ngenxa yokuziphatha kwayo okubi? Ngoko ubomi bayo bonke buye baguquka ngokungaphephekiyo ngenxa yesenzo sayo. Indoda ewela kukrexezo isenokuguquka ize ingasuswa kubudlelane. Kodwa iqabane layo elimsulwa linezizathu ezingokweZibhalo zokuwuqhawula umtshato wabo, yaye lisenokukhetha ukwenjenjalo. (Mateyu 19:9) Ukuba lenjenjalo, loo ndoda, nangona ixolelwe nguYehova, kuya kufuneka ijamelene naloo mphumo ubuhlungu wesono sayo ubomi bayo bonke.—1 Yohane 1:9.

Kuthekani ngendoda ethi ngokungenaluthando iwuqhawule umtshato nomfazi wayo ukuze itshate nelinye ibhinqa? Mhlawumbi ekugqibeleni iya kuguquka ize ibuyiselwe ebandleni. Ekuhambeni kweminyaka isenokwenza inkqubela ize “ixhinele ekuqoleni.” (Hebhere 6:1) Kodwa logama nje umfazi wayo wokuqala engekabi nandoda, ayisayi kukufanelekela ukukhonza kwisikhundla sembopheleleko ebandleni. Ayisiyiyo “indoda yomfazi omnye” kuba yayingenazo izizathu ezingokweZibhalo zokumala umfazi wayo wokuqala.—1 Timoti 3:2, 12.

Ngaba ezi asizozizathu zivakalayo zokuba umKristu akwenyanye okungendawo?

Kuthekani Ngomntu Oxhaphaza Abantwana Ngokwesini?

Kuthekani ukuba umKristu okhulileyo nobhaptiziweyo uxhaphaza umntwana othile ngokwesini? Ngaba loo moni ungendawo kangangokuba uYehova akasayi kuze amxolele? Eneneni akunjalo. UYesu wathi ‘ukunyelisa umoya oyingcwele’ akunakuze kuxolelwe. Yaye uPawulos wathi alikho idini lezono kumntu oqhelisela isono ngabom nangona enolwazi. (Luka 12:10; Hebhere 10:26, 27) Kodwa ayikho indawo eBhayibhileni ebonisa ukuba umKristu okhulileyo oxhaphaza umntwana ngokwesini—enoba sisalamane okanye akunjalo—akanakuxolelwa. Ngenene, izono zakhe zinokuhlanjululwa ukuba uguquka ngokunyanisekileyo ngokusuka entliziyweni aze alishiye ikhondo lakhe. Noko ke, kusenokufuneka aqhubeke esilwa nzima neentshukumisa zenyama eziphosakeleyo awazihlakulelayo. (Efese 1:7) Yaye kusenokubakho imiphumo angenako ukuyiphepha.

Kuxhomekeka kumthetho welizwe ahlala kulo, umntu oxhaphaze umntwana kusenokufuneka avalelwe entolongweni okanye ohlwaywe ngezinye iindlela nguRhulumente. Ibandla alisayi kumkhusela koku. Ukongezelela, loo ndoda izibhence njengomntu onobuthathaka ekuza kufuneka buqwalaselwe ukususela ngelo xesha. Ukuba kubonakala ukuba iguqukile, iya kukhuthazwa ukuba yenze inkqubela yokomoya, ibe nesabelo kwinkonzo yasentsimini, ide inikele neentetho kwiSikolo Sobulungiseleli Sobuthixo yaye ibe nenxaxheba kwizabelo ezingaquki ukufundisa kwiNtlanganiso Yenkonzo. Noko ke, oku akuthethi ukuba iya kukufanelekela ukukhonza kwisikhundla sembopheleleko ebandleni. Ziziphi izizathu ezingokweZibhalo zoku?

Phakathi kwezinye izinto, umdala umele abe “nokuzeyisa.” (Tito 1:8) Liyinyaniso elokuba akukho namnye kuthi onokuzeyisa ngokugqibeleleyo. (Roma 7:21-25) Kodwa umKristu okhulileyo nozahluleleyo owela kwisono sokuxhaphaza umntwana ngokwesini uzibhenca njengonobuthathaka benyama obungengobamvelo. Iingxelo zibonisa ukuba umntu omkhulu onjalo usenokubaxhaphaza nabanye abantwana. Liyinyaniso elokuba asinguye wonke umntu oxhaphaze umntwana osiphindayo eso sono, kodwa abaninzi benjenjalo. Yaye ibandla alikwazi ukuhlola iintliziyo ukuze lazi ukuba loo mntu uya kuphinda abaxhaphaze abantwana okanye angenjinjalo. (Yeremiya 17:9) Ngoko, isiluleko sikaPawulos esasisiya kuTimoti sisebenza ngendlela ekhethekileyo kwimeko yabantu abakhulu abaxhaphaze abantwana: “Ungaze ubeke izandla phezu kwakhe nawuphi na umntu ngokungxama; ungabi ngonesabelo kwizono zabanye.” (1 Timoti 5:22) Ngenxa yenkuseleko yabantwana bethu, umntu owaziwa njengowakha waxhaphaza umntwana akakufanelekeli ukukhonza kwisikhundla sembopheleleko ebandleni. Ukongezelela, akanakuba nguvulindlela okanye akhonze kolunye uhlobo lwenkonzo ekhethekileyo yexesha elizeleyo.—Thelekisa umgaqo okwiEksodus 21:28, 29.

Bambi basenokubuza, ‘Ngaba abathile abakhange benze ezinye iindidi zezono baze kamva baguquke, suke baphinde basenze eso sono kamva?’ Ewe, oko kuye kwenzeka, kodwa kukho abanye oothunywashe ekufuneka beqwalaselwe. Ngokomzekelo, ukuba umntu othile uzama ukurhwebesha omnye umntu omkhulu ukuze baziphathe kakubi, loo mntu ufanele akwazi ukukuxhathisa oko. Abantwana bakhohliseka, baqhatheke okanye boyikiswe lula ngakumbi. IBhayibhile iyathetha ngokuswela ubulumko kwabantwana. (IMizekeliso 22:15; 1 Korinte 13:11) UYesu wasebenzisa abantwana njengomzekelo wobumsulwa bokuthobeka. (Mateyu 18:4; Luka 18:16, 17) Ubumsulwa bomntwana buquka ukungabi namava ngokupheleleyo. Inkoliso yabantwana ikhululekile, bahlala bekulungele ukukholisa uthile, yaye ngoko baba zizisulu zokuxhatshazwa ngumntu omkhulu abamaziyo nabamthembayo. Ngoko, ngaphambi kukaYehova ibandla linembopheleleko yokubakhusela abantwana balo.

Abantwana abaqeqeshwe kakuhle bafunda ukubathobela nokubabeka abazali babo, abadala nabanye abantu abakhulu. (Efese 6:1, 2; 1 Timoti 5:1, 2; Hebhere 13:7) Ibinokuba sisenzo esingcole ngokothusayo ukuba omnye wabo bantu bakhulileyo ebenokusebenzisa ubumsulwa baloo mntwana ukuze amlukuhle okanye amnyanzelele ekubeni amxhaphaze ngokwesini. Abo baye baxhatshazwa ngokwesini ngokufuthi babandezeleka iminyaka bezama ukoyisa umvandedwa obangelwa koko. Ngoko ke, umntu onjalo oxhaphaze umntwana othile unokufumana isohlwayo esiqatha ebandleni aze abekelwe imiqathango. Asilodumo lwakhe njengomntu onegunya olufanele luxhalatyelwe, kodwa kunoko, bubunyulu bebandla obungenabala.—1 Korinte 5:6; 2 Petros 3:14.

Ukuba umntu owayexhaphaza abantwana uyaguquka, uya kubuqonda ubulumko bokusebenzisa imigaqo yeBhayibhile. Ukuba ukufunda ngokwenene ukukwenyanya okungendawo, uya kuyithiya into awayenzayo aze azabalazele ukukuphepha ukusiphinda isono sakhe. (IMizekeliso 8:13; Roma 12:9) Ngaphezu koko, ngokuqinisekileyo uya kumbulela uYehova ngobukhulu bothando Lwakhe, ekungenxa yalo umoni oguqukileyo, ofana naye, athi akwazi ukunqula uThixo wethu ongcwele aze abe nethemba lokuba phakathi ‘kwabathe tye’ abaya kuhlala emhlabeni ngonaphakade.—IMizekeliso 2:21.

[Imibhalo esemazantsi]

a Bona “Imibuzo Evela Kubafundi” kwinkupho yeMboniselo kaMeyi 1, 1996.

[Amagama acatshulweyo akwiphepha 28]

Ngoxa uYehova ebaxolela aboni abaguqukayo, izenzo zabo zisenokuba nemiphumo engaphephekiyo

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share