Kutheni Zicela Ukuxolelwa?

INGCAMANGO yokuba iicawa zimele ziguquke kuzo zonke iziphoso zazo zize zenze utshintsho ayikho ntsha. IReligioni e miti (Iinkonzo Neentsomi), incwadi yonqulo, ithi mhlawumbi ingqibelelo yecawa yamandulo yayibanika umdla abantu ebudeni bamaXesha Aphakathi yaye yabangela ukuba uninzi luguquke.

Ngowe-1523, emva kokuba uMartin Luther ehlukene neRoma, uPopu Adrian VI wazama ukuzisa uxolo ngokuthumela lo myalezo kwiDiet of Nuremberg: “Siyazi ukuba kangangeminyaka emininzi zininzi izinto ezingafanelekanga ebezisenziwa libhunga looBhishophu . . . Siza kwenza konke okusemandleni ukuguqula izinto kwiBhunga Eliphetheyo lamaRoma, ekusenokwenzeka ukuba, bonke ubungendawo buvela khona.” Noko ke, oko kuvuma kunjalo akuzange kuphumelele ekucombululeni iyantlukwano okanye ekupheliseni ukunganyaniseki kwiBhunga Eliphetheyo lamaRoma.

Kutshanje iicawa ziye zagxekwa ngakumbi ngenxa yokuba ziinkuku ezisikwe umlomo ngokuphathelele Ukubulawa Kwabantu Ngenkohlakalo. Kwakhona ziye zamangalelwa ngenxa yokungawathinteli amalungu azo ukuba abe nenxaxheba ezimfazweni. Ngowe-1941, njengokuba IMfazwe Yehlabathi II yayigquba, umfundisi ogama linguPrimo Mazzolari wabuza: “Kutheni iRoma ingakhange ithabathe amanyathelo aqatha ngenxa yokuwohloka kobuKatolika njengokuba yayiqhele ukwenjenjalo, yaye isakwenza oko, kwiimfundiso ezingenabungozi?” Iimfundiso ezingenabungozi kunantoni? Umfundisi wayethetha ngemfundiso engokuthand’ izwe ngelo xesha eyayitshabalalisa abantu.

Noko ke, isibakala sikukuba de kube kutshanje, iinkonzo zazilivuma ityala ngokuzikhethela kungekuko ukuba zazinyanzelekile. Ngowe-1832, ephendula abo babebongoza iCawa yamaKatolika ukuba ‘izihlaziye,’ uGregory XVI wathi: “Licacile elokuba bubudenge yaye kuyingozi ukucinga ‘ngokubuyisela nangokuhlaziya’ okuthile ukuze [icawa] ikhuseleke ize yande ngokungathi ifanele igqalwe njengeneentsilelo.” Kuthekani ngezinye iintsilelo ekwakunzima ukuba izikhanyele? Kwazanywa iindlela ezahlukahlukeneyo zokuzithethelela. Ngokomzekelo, abanye abefundisi baye bathi icawa ingcwele yaye ayinasono. Yona icawa kuthiwa ingcwele—ikhuselwa esonweni nguThixo. Sekunjalo, amalungu ayo anesono. Ngaloo ndlela, xa kusenziwa inkohlakalo ngemvume yecawa, yona icawa ayimele igxekwe ngoko, kodwa ngamalungu ecawa anokugxekwa. Ngaba oko kuvakala kusengqiqweni? Akunjalo ngokutsho komfundisi wamaRoma Katolika uHans Küng, owabhala wathi: “Ayikho iCawa egqibeleleyo kweli hlabathi loluntu.” Wacacisa wathi: “Ayikho iCawa engenazono efanele izivume.”

Ukumanyaniswa Nendlela Yokuziphatha

Usenokuba uyazibuza ukuba ziziphi izinto ezikhokelele iicawa ukuba zicele ngoku ukuxolelwa. Ekuqaleni, amaProtestanti namaOthodoki ayivuma imbopheleleko ngenxa ‘yeyantlukwano edluleyo’ phakathi kweemvaba ezahlukahlukeneyo. Zakwenza oku kwinkomfa yomanyano ‘Yokholo Nesithethe Sonqulo’ eyayiqhutyelwa eLausanne, eSwitzerland, ngowe-1927. ICawa yamaRoma Katolika ekugqibeleni yawulandela lo mzekelo. Ngokukodwa ukususela ngexesha leVatican II,a oobhishophu abakhulu kuquka oopopu, bacela ukuxolelwa ngokungakumbi ngenxa yeyantlukwano ekhoyo kwiNgqobhoko. Bakucela ngayiphi injongo? Kubonakala ukuba, bafuna umanyano olungakumbi kwiNgqobhoko. Umbhali-mbali wamaKatolika uNicolino Sarale wathi uJohn Paul II “kwiphulo lee-‘mea culpa,’ kukho okuthile akuzamayo, oko lumanyano.”

Noko ke, kubandakanyeke okungakumbi kunolu manyano. Namhlanje, imbali edume kakubi yeNgqobhoko yaziwa ngokubanzi. Umfundisi uHans Urs von Balthasar uthi: “AmaKatolika akanakuze ayigatye yonke le mbali. ICawa yakhe iye yenza okanye yavumela izinto esingenakuze sizamkele kule mihla.” Ngenxa yoko, upopu uye wanyula ikomishoni “yokubhenca zonke izinto ezenziwa yicawa ukuze . . . bakwazi ukucela ukuxolelwa.” Ngoko, esinye isizathu sokuvuma kwecawa ukuzigxeka sibonakala sikukuba inqwenela ukugqalwa njengephinde yaziphatha kakuhle.

Kwangendlela efanayo, umbhali-mbali uAlberto Melloni, xa egqabaza ngezicelo zecawa zokuxolelwa, ubhala athi: “Eneneni, maxa wambi eyona nto ziyicelayo kukuhlangulwa kwizityholo zokuba nenxaxheba.” Ewe, iCawa yamaKatolika ibonakala izama ukulibala umthwalo wezono ezadlulayo ukuze ikwazi ukwamkeleka ebantwini. Noko ke, ngeliphandle, kumele kuthiwe ibonakala inenkxalabo yokuba noxolo nehlabathi kunoThixo.

Isenzo esinjalo sisikhumbuza ngoSawule, ukumkani wokuqala wakwaSirayeli. (1 Samuweli 15:1-12) Wenza impazamo enzulu, yaye xa oku kwatyhilwayo, okokuqala wazama ukuzithethelela—ephika impazamo yakhe—kuSamuweli, umprofeti othembekileyo kaThixo. (1 Samuweli 15:13-21) Ekugqibeleni, lo kumkani kwakumele avume kuSamuweli athi: “Ndonile; ngokuba ndigqithile emthethweni kaYehova.” (1 Samuweli 15:24, 25) Ewe, walivuma ityala lakhe. Kodwa amazwi alandelayo kuSamuweli atyhila eyona nto yayibalulekile engqondweni yakhe: “Ndonile; wosewundizukisa phambi kwamadoda amakhulu abantu bakowethu, naphambi kwamaSirayeli.” (1 Samuweli 15:30) Kuyabonakala ukuba, uSawule wayexhalabele ngakumbi ukuma kwakhe kwaSirayeli kunokuba axolelaniswe noThixo. Esi simo sengqondo sikaSawule asizange simenze axolelwe nguThixo. Ngaba ucinga ukuba isimo sengqondo esinjalo singaphumela ekubeni uThixo azixolele iicawa?

Abavumi Bonke

Asingabo bonke abavumayo ukuba iicawa zimele zicele ukuxolelwa ekuhleni. Ngokomzekelo, uninzi lwamaRoma Katolika alithandi xa upopu ecela ukuxolelwa ngobukhoboka okanye xa ebuyisela “abaqhekeki” abanjengoHus noCalvin. Ngokutsho kwemithombo yaseVatican, uxwebhu olwathunyelwa kwiikhadinali elalicebisa “ngokuhlolisiswa kwesazela” ngaphezu kwembali yewaka leminyaka yamaKatolika yagxekwa ngabefundisi ababebhala olo xwebhu ngoJuni 1994. Noko ke, xa upopu wayefuna ukuquka okuthile kweso sicelo kwincwadi awayeyibhalela oobhishophu, ukhadinali waseItali uGiacomo Biffi wakhupha incwadi evela kumfundisi apho waqinisekisa wathi: “ICawa ayinasono.” Sekunjalo, wavuma: “Ukucela ukuxolelwa ngenxa yeempazamo zonqulo zeenkulungwane ezadlulayo . . . kusenokubangela singathenjwa.”

Umphengululi waseVatican uLuigi Accattoli uthi: “Ukuvuma isono yenye yeembambano kwiCawa yamaKatolika. Ukuba upopu uvuma iimpazamo zabavangeli, bakho abavangeli abangakuthandi ngokusuk’ entliziyweni oku.” Ukongezelela, intatheli yamaRoma Katolika yabhala: “Ukuba upopu unaloo ngcamango imasikizi ngembali yeCawa, kunzima ukusiqonda isizathu sokuba athi kwale Cawa inye ingumlweli ophambili ‘wamalungelo abantu,’ ‘umama nomfundisi’ ekuphela kwenokukhokelela uluntu kwiwaka lesithathu leminyaka eliqaqambileyo.”

IBhayibhile ilumkisa ngokubonakala ngathi uguqukile kuba uneentloni zokuba ubonwe usenza okuphosakeleyo. Uhlobo olunjalo lwenguquko alufane luhlale ithuba elide kulowo uguqukayo. (Thelekisa eyesi-2 kwabaseKorinte 7:8-11.) Inguquko ayamkelayo uThixo ikhatshwa ‘ziziqhamo ezifanele inguquko’—oko kukuthi, ubungqina bokunyaniseka kwalowo uguqukileyo.—Luka 3:8.

IBhayibhile ithi lowo uguqukayo aze azivume izono zakhe umele azishiye izenzo ezingalunganga, ayeke ukuzenza. (IMizekeliso 28:13) Ngaba oku kwenzekile? Kaloku, emva kokuvuma izono okwenziwa yiCawa yamaRoma Katolika nezinye iicawa, kuye kwenzeka ntoni kwiimbambano zakutshanje kumbindi Afrika nakwiMpuma Yurophu, apho bekubandakanyeke uninzi “lwamaKristu”? Ngaba iicawa ziye zazabalazela ukuzisa uxolo? Ngaba zonke iinkokeli zazo ziye zayikhalimela inkohlakalo ebisenziwa ngamalungu azo? Akunjalo. Kaloku, abalungiseleli bonqulo bade baba nesabelo ekubulaleni!

Umgwebo WobuThixo

Xa ethetha ngokuvuma amatyala ngokuphindaphindeneyo kukapopu uKhadinali Biffi emangalisiwe uyabuza: “Ngenxa yezono ezenziwe kudala, ngaba bekungayi kuba bhetele ukuba sonke silinde umgwebo wehlabathi lonke?” Kaloku, umgwebo woluntu lonke sele ukufuphi. UYehova uThixo uzazi kakuhle zonke iziganeko ezimbi zembali yonqulo. Kungekudala, uza kubaphendulisa bonke abanetyala. (ISityhilelo 18:4-8) Okwangoku, ngaba kungenzeka ukuba ufumane unqulo olungenalo ityala legazi, ukubulalana ngokunganyamezelekiyo nolunye ulwaphulo-mthetho olubangela iicawa zeNgqobhoko zicele uxolo? Ewe.

Sinokukwenza njani oko? Ngokusebenzisa umthetho owamiselwa nguYesu Kristu othi: “Nobaqonda ngeziqhamo zabo.” Ingxelo yembali, yolunye unqulo olufuna ilityalwe, isinceda siqonde kungekhona abo uYesu awababiza ngokuba ‘ngabaprofeti bobuxoki’ kodwa kwakhona abo baye bavelisa “isiqhamo esihle.” (Mateyu 7:15-20) Ngoobani aba? Siyakumema ukuba uzifumanele ngokuhlolisisa iBhayibhile namaNgqina kaYehova. Uze ubone ukuba ngoobani namhlanje abazama ukulandela iLizwi likaThixo kunokuba baphenjelelwe lihlabathi.—IZenzo 17:11.

[Imibhalo esemazantsi]

[Umfanekiso okwiphepha 5]

Iicawa zicela ukuxolelwa ngokubangela izenzo zenkohlakalo ezinjengezi

[Umfanekiso okwiphepha 5]

The Complete Encyclopedia of Illustration/J. G. Heck