IGiliyadi Ithumela Abavangeli Basemazweni “Kwezona Nxalenye Zikude Zomhlaba”
SELE kudlule isiqingatha senkulungwane ngoku iSikolo SeBhayibhile SeWatchtower SaseGiliyadi sithumela abavangeli basemazweni. NgoSeptemba 11, 1999, iklasi ye-107 yaseGiliyadi iye yaphumelela. Ibinabafundi abangama-48 abasuka kumazwe ali-11, ibe aba bafundi baye babelwa ukuya kukhonza kumazwe angama-24 ahlukeneyo. Baza kuthelela amawaka abanye abavangeli basemazweni, abaye banendima ebalulekileyo ekuzalisekiseni amazwi okugqibela awathethwa nguYesu ngaphambi kokunyukela ezulwini. Waxela kwangaphambili ukuba abafundi bakhe babeza “kuba ngamangqina [akhe] . . . kuse nakwezona nxalenye zikude zomhlaba.”—IZenzo 1:8.
Ucwangciso lwetheko labaphumeleleyo, olwaluqhutywa kwiZiko Lemfundo LeWatchtower elihle elisePatterson, eNew York, lwaba sisihlandlo esibalaseleyo. Abafundi abaphumeleleyo babuvuyela kakhulu ubukho bezalamane, abahlobo abasenyongweni kunye neendwendwe phakathi kwabo babekho. Oku kuquka nabo babephulaphule yaye bebukele bekwizakhiwo zaseBrooklyn naseWallkill ngenxa yokunxityelelaniswa ngesandisi lizwi nangevidiyo, bebonke babengama-4 992.
Khonza UYehova Nommelwane Ngokuthembeka
“Ngubani Ongakwicala LikaYehova?” Lowo yayingumxholo wengabula-zigcawu eyenziwa nguCarey Barber, ilungu leQumrhu Elilawulayo nowayengusihlalo wocwangciso lwetheko labaphumeleleyo. Wacacisa ukuba lo yayingumbuzo awayejamelene nawo amaSirayeli omhla kaMoses. Abafundi abaphumeleleyo nabo babezile bakhunjuzwa ukuba uninzi lwamaSirayeli lwaphulukana nobomi balo entlango kuba lungazange luqhubeke lunyanisekile ngakwicala likaYehova. Emva kokuwela kunqulo-zithixo, “bahlala phantsi abantu, badla basela, besuka bema, badlala.” (Eksodus 32:1-29) UYesu walumkisa amaKristu ngengozi efanayo: “Nikelani ingqalelo kuni ngokwenu ukuba iintliziyo zenu zingaze zisindwe kukuzingxala ngokutya nokusela kakhulu namaxhala obomi, ize ngequbuliso loo mini inifikele ngephanyazo.”—Luka 21:34-36.
Isithethi esilandelayo, uGene Smalley, weSebe Lokubhala, wabuza lo mbuzo kubafundi abaphumeleleyo: “Ngaba Niya Kuba Zii-paregorics?” Wacacisa ukuba igama lesiGrike elithi paregoria liye lakhiwa kwiinkulungwane zakutshanje ngokusuka kwigama leyeza elithomalalisa iintlungu. Noko ke, umpostile uPawulos wasebenzisa eli binzana licacisayo lesiGrike kweyabaseKolose 4:11 xa echaza abasebenzi abangamadlelane naye. KwiNew World Translation, eli gama liguqulelwe ngokuthi “uncedo olomelezayo.”
Abavangeli basemazweni abaphumeleleyo banokuba ziiparegorics ngokuthi, ngokuthobeka nangokuthozama, babe luncedo olomelezayo kubazalwana noodade beendawo abaza kwabelwa kuzo nangokuba nomoya wentsebenziswano nothando kunye nabanye abavangeli basemazweni.
UDaniel Sydlik, ilungu leQumrhu Elilawulayo, walandela nomxholo othi “Umthetho Omkhulu Omele Uphile Ngawo.” Wachaza ukuba umgaqo obalaseleyo owabekwa nguYesu kuMateyu 7:12 othi, “Zonke izinto . . . enifuna abantu bazenze kuni, nani nimele nenze ngokunjalo kubo,” uquka ukwenzela abanye izinto ezintle, kungekuphela nje ukuphepha ukubavisa ubuhlungu.
Ukuze uphumelele ekwenzeni oku, zintathu izinto eziyimfuneko: iliso elibukhali, intliziyo enovelwano nesandla esincedayo. Ekuqukumbeleni, wathi: “Xa siziva sifuna ukunceda, masincede ngoko nangoko. Simele sizixhamle ukuze senzele abanye oko besiya kuthanda ukuba basenzele kona.” Oko kuyinyaniso ngokukodwa kubavangeli basemazweni abaza kuya kwamanye amazwe ukuya kunceda abantu babe ngamaKristu okwenyaniso.
Abahlohli Banikela Izikhumbuzo Ngothando
Umhlohli waseGiliyadi uKarl Adams wakhuthaza abavangeli basemazweni abaphumeleleyo esithi “Qhubekani Nikhula.” Ngayiphi indlela? Okokuqala, ngolwazi nangobuchule bokulusebenzisa kakuhle. EGiliyadi, abafundi babefunde indlela yokwenza uphando ukuze bafumane ingcombolo nemeko yeengxelo zeBhayibhile. Babekhuthazwe ukuba bahlolisise indlela ingxelo nganye emele ibuchaphazele ngayo ubomi babo. Bafanele baqhubeke bekwenza oko.
“Okwesibini, qhubekani nikhula eluthandweni. Uthando yintw’ apha ethi yakondliwa, ikhule. Lwakutyeshelwa, luyafa,” watsho uMzalwan’ uAdams. (Filipi 1:9) Ngoku, njengabavangeli basemazweni, kwakuza kufuneka bakhule eluthandweni phantsi kweemeko ezahlukeneyo. Yaye okwesithathu: “Qhubekani nikhula ebubeleni obungasifanelanga naselwazini lweNkosi noMsindisi wethu uYesu Kristu.” (2 Petros 3:18) Esi sithethi sathi: “Obu bububele obungummangaliso obubonakaliswe nguYehova ngoNyana wakhe. Njengoko sisiya sibuxabisa ngakumbi obo bubele obungasifanelanga, siya kuyoliswa nangakumbi kukwenza ukuthanda kukaThixo nakukuphumeza oko asabele ukuba sikuphumeze.”
Omnye umhlohli waseGiliyadi, uMark Noumair, wathetha ngomxholo othi “Zamkeleni Ngothando, Ibe Niya Kukwazi Ukuzinyamezela.” Wabongoza esithi: “Fundani ukuzamkela ngothando iimeko ezilucelomngeni kubomi bobuvangeli basemazweni, ibe niya kukwazi ukuzinyamezela. UYehova uqeqesha kuphela abo abathandayo. Kwanokuba uvakalelwa ukuba isiluleko esithile asinikelwanga ngandlela, uyasukelwa okanye udlelw’ indlala, ukuthanda uYehova kunye nolwalamano lwakho naye luya kukunceda usinyamezele.”
UMzalwan’ uNoumair walitsolisa elokuba inkonzo yobuvangeli basemazweni ibandakanya umsebenzi omninzi. “Kodwa umsebenzi owenziwa ngaphandle kothando uya kunishiya ninganelisekanga. Xa ningenaluthando, imisebenzi yenu yasekhaya—enjengokupheka, ukuthenga, ukuhlamba iziqhamo, ukubilisa amanzi—inokuba yindinisa. Khawukhe uthi xhaa uzibuze, ‘Kutheni ndisenza lo msebenzi nje?’ Uyabona ke, ukuba impendulo yakho ithi, ‘Ngokwenjenje ndiza kufak’ isandla kwimpilo nakulonwabo lwabanye abavangeli basemazweni,’ akuyi kuba nzima ukuwenza.” Xa equkumbela, wabongoza esithi: “Enoba kukwamkela uqeqesho, ukuphumeza iimbopheleleko zenu zobuvangeli basemazweni okanye kukulungisa ukungaqondani, ukwenjenjalo ngothando kuya kunenza nikwazi ukunyamezela kwisabelo senu. ‘Uthando aluze lusilele.’ ”—1 Korinte 13:8.
Umhlohli waseGiliyadi uWallace Liverance walandela nengxubusho eyayinemiboniso yamava amnandi ababebe nawo abafundi ngoxa babesebenza namabandla asekuhlaleni. Ukongezelela ekuyeni kwindlu ngendlu, basebenzisa ingqeqesho ababeyifumene njengabavangeli basemazweni ekufuneni abantu kwiindawo ekuma kuzo iilori, kwiindawo ekuhlanjwa kuzo iimpahla, kwizikhululo zikaloliwe nakwezinye iindawo.
Abavangeli Basemazweni Abanamava Bayabaqinisekisa
Xa abavangeli basemazweni besiya kwintsimi yasemzini, ngaba ikho imfuneko yokuba baxhalabe? Ngaba banako ukuhlangabezana nocelomngeni lwesabelo esikwilizwe lasemzini? Yintoni eyenziwa ziiofisi zamasebe ukuze zincede abo basandul’ ukufika ukuze baphumelele? Ukuze kuphendulwe le mibuzo kunye neminye, uSteven Lett weSebe Lenkonzo, kunye noDavid Splane, weSebe Lokubhala, badlan’ indlebe nabazalwana ngoko ababekwisikolo samalungu eekomiti zamasebe esasiqhutywa kwiZiko Lemfundo. Aba bazalwana bakhonza kwiikomiti zamasebe eSpeyin, eHong Kong, eLiberia, eBenin, eMadagascar, eBrazil naseJapan.
Aba bakhonzi banamava bakaYehova, uninzi lwabo olwalukhonze njengabavangeli basemazweni kangangamashumi eminyaka, babaqinisekisa abafundi abaphumeleleyo kunye nabazali nezalamane zabo ezazikho. Ngokusuka kumava abo obuqu nawabanye abavangeli basemazweni, babonisa ukuba iingxaki nezinto ezixhalabisayo zazinokusingathwa ngempumelelo. Isenokuba nkulu yona ingxaki abajamelana nayo, “kodwa inako ukuconjululwa, kwaye uMbutho uyasinceda,” waqinisekisa ngelitshoyo uRaimo Kuokkanen, umvangeli wasemazweni oseMadagascar. UÖsten Gustavsson, ngoku okhonza eBrazil wathi: “Asizange sizikhethele isabelo, sasinikwa. Ngoko senza konke okusemandleni ethu ukuze sihlale kuso.” UJames Linton, okhonza eJapan, wathi into eyamncedayo “bubukho babazalwana ababesele bekhonza kwisabelo sobuvangeli basemazweni.” Inkonzo yobuvangeli basemazweni iyindlela eyonwabisayo neyanelisayo yokukhonza uYehova neyokunyamekela izimvu zakhe.
Ukuphepha Isifo Esibulala Ubumoya
UTheodore Jaracz, ilungu leQumrhu Elilawulayo, owaphumelela kwiklasi yesixhenxe yaseGiliyadi ngowe-1946, wanikela intetho yokuqukumbela eyayinomxholo othi “Ucelomngeni Lokuzigcina Uphilile Ngokomoya.” Waqala ngokuvuma ukuba kwiindawo ezahlukeneyo zehlabathi kukho izinto ezoyikekayo ezenzekayo, waza wachaza ukuba enyanisweni kukho izihelegu ezimanyumnyezi nangakumbi ezenzeka kuluntu.
Ebhekisela kwiNdumiso 91, uMzalwan’ uJaracz wachaza “indyikitya yokufa” ‘nesifo esibhubhisayo’ eziye zagulisa zaza zabulala ngokomoya izigidi zabantu abasingqongileyo. UMtyholi nenkqubo yakhe engendawo uye wasebenzisa inkcazelo egqwethiweyo efana nendyikitya yokufa, esekelwe kwimfundo nakwizinto eziphathekayo, ukuze enze abantu babe buthathaka aze ababulale ngokomoya, kodwa uYehova uyasiqinisekisa ukuba esi sifo asiyi kusondela kuye nabani na “ohleli esitheni lOsenyangweni.”—INdumiso 91:1-7.
UMzalwan’ uJaracz wathi: “Kulucelomngeni ukuzigcina uphilile elukholweni, uhlale ukwindawo enqabisekileyo. Asikwazi kufana nabagculeli ‘abangenabo ubumoya.’ Oku kuyingxaki namhlanje. Yingxaki esiphethe kakubi sonke thina sisentlanganweni. Inokunifikela nani kwisabelo senu sobuvangeli basemazweni.” (Yude 18, 19) Kodwa abavangeli basemazweni abaphumelelayo baxelelwa ukuba babenako ukuphumelela ekuzigcineni bephilile ngokomoya kwizabelo zabo. Ngokomzekelo, babongozwa ukuba bacinge ngendlela abazalwana bethu abanyamezela ngayo eRashiya, eAsia nakumazwe aseAfrika—phezu kwako nje ukuvalwa komsebenzi, inkcaso ekrakra, ukugculelwa, inkcazelo egqwethiweyo yokungakholelwa kubukho bukaThixo, nakwizityholo zobuxoki. Yaye, kwiimeko ezininzi, kuye kubekho neengxaki zokoqobo ezibangelwa yimilo yobuzwe kunye nokunqongophala kwezinto eziyimfuneko.
Xa ubumoya busihla, “kufuneka unikele ingqalelo kuloo ngxaki uze wenze into ngaloo nto, usebenzisa isiluleko seLizwi likaThixo.” Kwanikelwa imizekelo yeBhayibhile. UYoshuwa wakhuthazwa ukuba afunde umbhalo woMthetho ngesandi esiphantsi imihla ngemihla. (Yoshuwa 1:8) Xa incwadi yoMthetho yafunyanwayo ngomhla kaYosiya, uYehova wakusikelela ukugcinwa kwemiyalelo yakhe ngokuthembeka. (2 Kumkani 23:2, 3) UTimoti wayeyazi imibhalo engcwele ukususela ebusaneni. (2 Timoti 3:14, 15) AbaseBhereya babenganeli kuphulaphula ngenyameko kuphela; babegqalwa ‘njengabachubekileyo’ kuba babehlolisisa iZibhalo imihla ngemihla. (IZenzo 17:10, 11) Kwaye uYesu Kristu ungowona mzekelo uphambili womntu owayelazi yaye elisebenzisa iLizwi likaThixo.—Mateyu 4:1-11.
Ekuqukumbeleni, uMzalwan’ uJaracz wababongoza ngothando abo babeza kuba ngabavangeli basemazweni esithi: “Ngoku nikulungele ukuphumeza isabelo senu sobuvangeli basemazweni. Kwaye niza kuya kwamanye amazwe, masithi, niya kwiindawo ezininzi ezahlukeneyo zomhlaba. Ukuba siyahlangabezana nocelomngeni lokuzigcina siphilile ngokomoya, ayikho into enokusiphazamisa ekuphumezeni oko sizimisele ukukuphumeza. Niza kushumayela ngenzondelelo, nishukumisele abanye ukuba baxelise ukholo lwenu, kwaye siza kunithandazisa ukuze uYehova abagcine bephilile abo nibafundisayo. Kwaye ngenxa yoko basebaninzi abaseza kusaba kwintlekele yokomoya sithethanje egquba ehlabathini. Baza kungena kumanani ethu aqhubeka esanda ukuze senze ukuthanda kukaYehova. Kwaye ngamana uYehova anganisikelela kuloo nto.”
Emva kokuba usihlalo efunde imibuliso evela kumazwe ahlukeneyo asehlabathini, kwafika ixesha lokuba abafundi abaphumeleleyo bafumane iidiploma. Emva koko kwafundwa ileta evakalisa uxabiso eyayibhalwe ngabafundi. Hayi indlela ababenombulelo ngayo kuYehova nakwintlangano yakhe ngoqeqesho olukhethekileyo ababelufumene nangezabelo zabo njengabavangeli basemazweni abaya “kwezona nxalenye zikude zomhlaba”!—IZenzo 1:8.
[Ibhokisi ekwiphepha 29]
Inkcazelo Engabafundi
Inani lamazwe abavela kuwo: 11
Inani lamazwe ababelwe kuwo: 24
Inani labafundi: 48
Inani lezibini ezitshatileyo: 24
Umlinganiselo wobudala: 34
Umlinganiselo weminyaka besenyanisweni: 17
Umlinganiselo weminyaka bekubulungiseleli bexesha elizeleyo: 12
[Umfanekiso okwiphepha 26]
IKlasi Ye-107 Yabaphumelele KwiSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye.
1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.