Iklasi Ye-108 YaseGiliyadi Ibongozwe Ukuba Inikele Inkonzo Engcwele

EBHAYIBHILENI, ukunqula uThixo kudla ngokuchazwa ngebinzana elithi ‘inkonzo engcwele.’ Lisuka kwibinzana lesiGrike elibhekisela ekukhonzeni uThixo. (Roma 9:4) Abangama-5 562 abebephulaphule ucwangciso lokuvuyisana nabaphumelele kwiklasi ye-108 yeSikolo SeBhayibhile SeWatchtower SaseGiliyadi baye beva izithethi zinikela amacebiso asebenzisekayo abeza kunceda abo baphumeleleyo ukuba banikele inkonzo engcwele neyamkelekileyo kuYehova uThixo.a

UTheodore Jaracz, ilungu leQumrhu Elilawulayo lamaNgqina kaYehova, ebengusihlalo. Ucwangciso luqalise ngengoma yama-52, ethi “Igama LoBawo Wethu.” Umgca wesibini waloo ngoma uthi: “Sinqwenela ukungcwalisa igama elikhulu lakho.” Loo mazwi awuchaze ngokuchanileyo umnqweno osuka entliziyweni wabafundi baloo klasi iphumeleleyo (abebevela kumazwe ali-10) wokusebenzisa oko bakufundileyo kwizabelo zabo zobuvangeli basemazweni, kumazwe ahlukahlukeneyo ali-17.

Kwintshayelelo yakhe, uMzalwan’ uJaracz utsalele ingqalelo kwiinyanga ezintlanu zofundisiso olunzulu lweBhayibhile olwenze abafundi balungela ukukhonza kwintsimi yasemzini. Oku kuye kwabanceda ‘baqiniseka ngezinto zonke,’ ngamany’ amazwi, baphicotha oko bebesele bekufundile ngeLizwi likaThixo, baza ‘babambelela nkqi koko kuhle.’ (1 Tesalonika 5:21) Uye wabakhuthaza ukuba banamathele ngokuthembeka kuYehova, kwiLizwi lakhe nakwizabelo abaziqeqeshelweyo. Yintoni eza kubanceda ukuze benze yonke loo nto?

Icebiso Elisebenzisekayo Lokunikela Inkonzo Engcwele

ULon Schilling, ilungu leKomiti Yomsebenzi WaseBheteli, uxubushe umxholo othi “Ngaba Niya Kuluphumelela Uvavanyo Lokuba Nengqiqo?” Ugxininise ukubaluleka kokuba nengqiqo, nto leyo ebonakalisa ubulumko bobuthixo. (Yakobi 3:17) Ukuba nengqiqo kubandakanya ukuyekelela, ukungakhethi buso, ukuba ngcathu, ukuba nolwazelelo nokunyamezela. “Abantu abanengqiqo bayalungelelana xa beqhubana nabanye. Ababheneli ekubaxeni izinto,” uye watsho uMzalwan’ uSchilling. Yintoni enokunceda umvangeli wasemazweni ukuba abe nengqiqo? Kukuzithoba, ukuxhakamfula amathuba okuphulaphula nokufunda kwabanye, nokukulungela ukuqwalasela iimbono zabanye ngoxa kungalalaniswa imigaqo yobuthixo.—1 Korinte 9:19-23.

“Ningalibali Ukutya!” lowo ibingumxholo obangel’ umdla wentetho elandelayo kolo cwangciso, ebinikelwa nguSamuel Herd, elinye ilungu leQumrhu Elilawulayo. Ugxininise ukubaluleka kokuzondla ngokutya kokomoya okunesondlo ukuze ubani aqhubeke ekulungele ukunikela inkonzo engcwele. UMzalwan’ uHerd uthe: “Umsebenzi wenu wokomoya uza kwanda kungekudala njengoko nisiya nizinikela kwisabelo senu sokushumayela nokufundisa. Ngoko ke, kuza kufuneka nitye ukutya kokomoya ngokuthe chatha ukuze nilungelelanise amandla enu.” Ukuzondla rhoqo ngokutya kokomoya kunokunceda umvangeli wasemazweni aphephe ukudandatheka ngokomoya nokukhumbula ikhaya. Kufak’ isandla kulwaneliseko nakuzimiselo lukabani lokuhlala kwisabelo sakhe senkonzo engcwele.—Filipi 4:13.

Omnye umhlohli waseGiliyadi, uLawrence Bowen, ukhuthaze abafundi abaphumeleleyo esithi “Buyelani Apho Naniqalise Khona.” Ebetheth’ ukuthini xa atshoyo? Uye wacela bonke abebezile ukuba batyhile iMizekeliso 1:7, ethi: “Ukoyika uYehova kukuqalisa kolwazi.” Esi sithethi sithe: “Nantoni na esisingela phantsi isibakala sokuba uYehova ukho soze ifaneleke njengolwazi lokwenene ingayi kuze kananjalo ibangele ubani aqonde izinto kakuhle.” UMzalwan’ uBowen uthelekise iinkcukacha zeLizwi likaThixo, iBhayibhile, namasuntswana omfanekiso asetyenziswa kumdlalo wepuzzle. Xa la masuntswana edityaniswa, kuyilwa umfanekiso. Okukhona emaninzi loo masuntswana, kokukhona uya kuba mkhulu yaye ucace nangakumbi loo mfanekiso kwaye kokukhona eya kuwuqonda nangakumbi umntu. Oku kunokunceda bonke banikele inkonzo engcwele kuThixo.

UWallace Liverance, umgcini weengxelo zeSikolo SaseGiliyadi, uye waluqukumbela olo ngcelele lweentetho. Umxholo wakhe ubusithi “Yenza Imibulelo Yakho Ibe Ngumbingelelo KuThixo.” Uye watsalela ingqalelo kwingxelo engokuphilisa kukaYesu abantu abalishumi ababeneqhenqa. (Luka 17:11-19) Mnye kuphela owabuya eze kudumisa uThixo yaye ezokubulela uYesu. “Alithandabuzeki elokuba nabanye babekuvuyela ukuhlambuluka. Babeyivuyela into eyayenzeke kubo, kodwa kubonakala ngathi eyona nto babeyifuna yayikukuvakaliswa njengabahlambulukileyo ngumbingeleli,” ugqabaze ngelitshoyo uMzalwan’ uLiverance. Ukuhlambulula kokomoya okubangelwa kukufunda inyaniso, xa kudibene nokuba nombulelo, kufanele kushukumisele ubani ukuba ambulele uThixo ngokulunga kwakhe. Abafundi beklasi yaseGiliyadi ye-108 bakhuthazwe ukuba bacamngce ngayo yonke imisebenzi kaThixo nangokulunga kwakhe ukuze benze inkonzo kunye nokuzincama kwabo kube yimbonakaliso yokuba nombulelo kuThixo.—INdumiso 50:14, 23; 116:12, 17.

Amava Nodliwano-ndlebe Ngendlela Yokwenza Oko

UMark Noumair, omnye umhlohli waseGiliyadi, uqhube inxalenye elandelayo yocwangciso. Kuyo kuthethwe ngamava ale klasi enkonzo yasentsimini ebudeni bexesha ebiqeqeshwa ngalo. Aba bafundi, ngokomlinganiselo, bebechithe malunga neminyaka eli-12 kwinkonzo yexesha elizeleyo ngaphambi kokuba baye eGiliyadi. Xa bebesesikolweni, baqalise izifundo zeBhayibhile ezininzi nabantu abaneemvelaphi ezahlukeneyo, nto leyo ebonisa ukuba aba bafundi bebekwazi ‘ukuba zizinto zonke kubantu bazo zonke iintlobo.’—1 Korinte 9:22.

Emva kwamava abafundi, uCharles Molohan noWilliam Samuelson baye badlan’ indlebe namalungu entsapho yaseBheteli nabaveleli abahambahambayo abakhe bafuthwa eGiliyadi. Omnye wabazalwana ekuye kwadliwan’ indlebe nabo, uRobert Pevy, wakhonza kwiiPhilippines emva kokuphumelela kwiklasi yama-51 yaseGiliyadi. Uye wakhumbuza le klasi esithi: “Nanini na kukho ingxaki, wonk’ umntu unikela amacebiso akhe ngendlela yokuyicombulula. Kusoloko kukho umntu olumke ngaphezu kwakho, umntu oza kuza necebo elibhetele. Kodwa ukuba ukhangela eBhayibhileni uze uzame ukufumana indlela uThixo azibona ngayo izinto, akukho mntu unokudlula apho. Eso iya kusoloko isisicombululo esilungileyo.”

Ukuqukumbela olo cwangciso luhle lokomoya, uJohn Barr, ilungu leQumrhu Elilawulayo, uxubushe umxholo othi “Nikelani Inkonzo Engcwele Eyamkelekileyo KuYehova.” Ubonise indlela inkonzo engcwele enokubonakaliswa ngayo kubulungiseleli basentsimini ukuze kuncedwe abantliziyo zilungileyo banqule uThixo ngendlela eyamkelekileyo. Emva kokuqwalasela amazwi kaYesu akuMateyu 4:10, uMzalwan’ uBarr uthe, “Ukuba sifuna ukunqula uYehova kuphela, simele siziphephe zonke iindidi ezifihlakeleyo zonqulo-zithixo, ezinjengokubawa, ukunqwenela ukuba sisityebi nokuthanda ukuzizukisa. Hayi indlela ekuvuyisa ngayo ukucinga ukuba abavangeli basemazweni bethu baye bazenzela igama elihle kulo mba ukususela ebutsheni beminyaka yee-1940 ukuza kuthi ga ngoku! Kwaye siqinisekile ukuba nina baphumelele kwiklasi ye-108 yaseGiliyadi niza kuwulandela umzekelo wabo omhle. Niza kunikela inkonzo engcwele kuYehova, ekukuphela kwakhe emfaneleyo.”

Leyo ibiyincopho evuyisayo yocwangciso olwakhayo. Emva koko kulandele ithuba lokuva imibuliso evela ehlabathini jikelele yabo babanqwenelela okuhle, kwadluliselwa iidiploma kwaza kwafundwa ileta ebhalwe yiklasi, ivakalisa uxabiso ngoqeqesho eye yalufumana. Le klasi iphumeleleyo iye yabongozwa ukuba ibonakalise uphawu lokuthembeka kwizabelo zayo nasekukhonzeni uYehova. Bonke abebezile, kuquka iindwendwe ezivela kumazwe angama-25, baye bathelela ekuqukumbeleni olo cwangciso ngengoma nangomthandazo.

[Umbhalo osemazantsi]

[Ibhokisi ekwiphepha 23]

INKCAZELO ENGABAFUNDI

Inani lamazwe abavela kuwo: 10

Inani lamazwe ababelwe kuwo: 17

Inani labafundi: 46

Umlinganiselo wobudala: 34

Umlinganiselo wemi-nyaka besenyanisweni: 16

Umlinganiselo weminyaka bekubulungiseleli bexesha elizeleyo: 12

[Umfanekiso okwiphepha 24]

Iklasi Ye-108 Yabaphumelele KwiSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.