Wagwetywa Ndlala!
USENOKUZIBUZA, ‘yiphi indlala?’ Le yindlala yokomoya! Umprofeti wamandulo ongumHebhere wachaza kwangaphambili ngale ndlala esithi: “‘Khangela! Kuza imihla,’ itsho iNkosi enguMongami uYehova, ‘yaye ndiza kuthumela indlala elizweni, kungekhona indlala yesonka, kungekhona ukunxanelwa amanzi, kodwa kube kokokuva amazwi kaYehova.’” (Amosi 8:11) Ukuze kugwetywe indlala yokomoya, amalungu angama-48 eklasi ye-112 yeSikolo seBhayibhile seWatchtower saseGiliyadi, esisePatterson, eNew York, aya kumazwe ali-19 ahlukahlukeneyo kumazwekazi ama-5 nakwiziqithi zolwandle.
Aphethe umphako, ingeyiyo inyama okanye ingqolowa yokoqobo, kodwa ulwazi, amava noqeqesho. Kangangeenyanga ezintlanu ebexakekile efundisisa iBhayibhile ngokunzulu ukuze omeleze ukholo lwawo elungiselela umsebenzi wobuvangeli basemazweni. NgoMatshi 9, 2002, abantu abangama-5 554 ababekho kucwangciso lokunikezelwa kwezidanga baphulaphula ngomdla.
UStephen Lett, olilungu leQumrhu Elilawulayo lamaNgqina kaYehova, waluvula olo cwangciso ngodlwabevu lwentetho. Wazamkela ngokufudumeleyo ezo ndwendwe zivela kumazwe ngamazwe. Wandula ke wasebenzisa amazwi kaYesu athi, “Nilukhanyiselo lwehlabathi” kumsebenzi oza kwenziwa ngabavangeli basemazweni. (Mateyu 5:14) Wacacisa: ‘Kwizabelo zenu niya ‘kukhanyisa’ iinkalo ezahlukahlukeneyo zemisebenzi kaYehova emangalisayo, ukuze abantliziyo zinyanisekileyo babone ubuhle bukaYehova neenjongo zakhe.’ UMzalwan’ uLett wabakhuthaza abavangeli basemazweni ukuba basebenzise ukukhanya kweLizwi likaThixo ukuze babhence ubumnyama beemfundiso zobuxoki baze banikele ukhokelo kwabo bafuna inyaniso.
Impumelelo Ixhomekeke Kwisimo Sengqondo Esihle
Emva kwamazwi okuvula kasihlalo, uBaltasar Perla, ilungu leKomiti yeSebe laseUnited States, wanikela eyokuqala kungcelele lweentetho ezazilungiselelwe ukunceda abo bathweswa izidanga ukuba baphumelele kumsebenzi wabo wobuvangeli basemazweni. Intetho yakhe yayinomxholo othi “Yiba Nesibindi Yomelela, Uze Uthabathe Inyathelo.” (1 Kronike 28:20) UKumkani uSolomon wakwaSirayeli wamandulo wanikwa isabelo esinzima sokwenza into angazange ayenze ngaphambili—ukwakha itempile yaseYerusalem. USolomon wathabatha inyathelo, yaye ngoncedo lukaYehova itempile yagqitywa. Esebenzisa esi sifundo kule klasi, uMzalwan’ uPerla wathi: ‘Nifumene isabelo esitsha sokuba ngabavangeli basemazweni, yaye ngoko kufuneka nibe nesibindi nize nomelele.’ Ngokuqinisekileyo abafundi bawafumana ethuthuzela amazwi asisiqinisekiso sokuba uYehova akasayi kubashiya logama nje beya kuhlala besondele kuye. UMzalwan’ uPerla wabachukumisa abaphulaphuli ngokuqukumbela ngento ayibona ngawakhe amehlo esithi: ‘Nisenokwenza lukhulu njengabavangeli basemazweni. Mna nabazali bam sayifumana inyaniso kubavangeli basemazweni!’
UMzalwan’ uSamuel Herd, elinye ilungu leQumrhu Elilawulayo wanikela intetho enomxholo othi “Thembelani KuYehova Ukuze Niphumelele.” Abafundi baqala umsebenzi wobuvangeli basemazweni abaya kuwenza ubomi bawo bonke, yaye impumelelo yabo ixhomekeke ubukhulu becala kulwalamano lwabo noYehova. UMzalwan’ uHerd wababongoza esithi: ‘Nifumene ulwazi lweBhayibhile oluninzi kwizifundo zenu eGiliyadi. Imfundo yenu ibinivuyisa. Kodwa ngoku, ukuze niphumelele, kuza kufuneka niqalise ukudlulisela oko niye nakufunda.’ (IZenzo 20:35) Abavangeli basemazweni baya kuba namathuba okwenza oku njengoko ‘bezigalela’ ngenxa yabanye.—Filipi 2:17.
Sisiphi isiluleko sokugqibela esasiya kudluliselwa ngabahlohli kubafundi? UMark Noumair wasekela umxholo wakhe kuRute 3:18 othi, “Hlala Uzole, De Wazi Ukuba Lo Mbandela Uya Kuphelela Phi Na.” Sisebenzisa umzekelo kaNahomi noRute, esi sithethi sakhuthaza abo bafumana izidanga ukuba babenentembelo epheleleyo kumalungiselelo entlangano kaThixo yasemhlabeni baze bathobele igunya elingokobuthixo. Echukumisa iintliziyo zabafundi, uMzalwan’ uNoumair wathi: ‘Ngamanye amaxesha usenokungasiqondi isizathu sokuba kwenziwa isigqibo esithile kumbandela okuchaphazelayo okanye usenokuvakalelwa kukuba into ethile ifanele yenziwe ngendlela eyahlukileyo. Uya kwenza ntoni? Ngaba ngenkani uya kufuna ukuzenza izinto ngendlela yakho, okanye uya ‘kuhlala uzole,’ unentembelo kulwalathiso lukaThixo, uqinisekile ukuba, ekuhambeni kwexesha, uya kwenza zonke izinto ziphumelele?’ (Roma 8:28) Icebiso ‘lokunikela ingqalelo ekuhambiseleni phambili izinto ezinokuthanani noBukumkani, ubeke iliso koko kwenziwa yintlangano kaYehova, kunakubantu,’ ngokungathandabuzekiyo kuya kuba luncedo kubavangeli basemazweni abaya kwizabelo zabo.
UWallace Liverance, naye owayengumvangeli wasemazweni yaye ngoku ofundisa eGiliyadi, wanikela intetho yokugqibela kungcelele lokuvula. Umxholo wentetho yakhe wawusithi “Musani Ukubhadula, Hlalani Kwinkonzo KaThixo.” Wabonisa ukuba umprofeti uDaniyeli waqonda xa ebona iBhabhiloni isiwa noko uYeremiya wakuprofetayo ukuba ukukhululwa kwamaSirayeli ebukhobokeni sele kusemnyango. (Yeremiya 25:11; Daniyeli 9:2) UDaniyeli wayeliqonda ixesha likaYehova, yaye loo nto yamnceda wahlala enikele ingqalelo kwinjongo kaThixo njengoko ityhileka. Ngokwahlukileyo koko, abaprofeti bakwaSirayeli bomhla kaHagayi bathi: “Alikafiki ixesha.” (Hagayi 1:2) Abazange baliphaphele ixesha abaphila kulo, kodwa babethe phithi bubomi obutofotofo nokuzanelisa, baza bawushiya umsebenzi ababekhululelwe wona eBhabhiloni, ukuphinda bakhe itempile. UMzalwan’ uLiverance waqukumbela esithi: “Ngoko ke hlalani niphaphile ngokuhlala nicinga ngenjongo kaYehova ngamaxesha onke.”
Umqeqeshi waseGiliyadi uLawrence Bowen wanikela intetho enomxholo othi “UYehova Usikelela Abo Basebenzisa ILizwi Eliphilayo.” (Hebhere 4:12) Le ntetho yayingamava asentsimini abo babekule klasi, abalaselisa indlela uYehova abasikelela ngayo abo basebenzisa iBhayibhile xa beshumayela yaye befundisa. Esi sithethi sathi uYesu Kristu wabamisela umzekelo omhle bonke abakhonzi bakaThixo esithi: ‘Ngokunyanisekileyo, uYesu wayenokuthi oko wayekufundisa kwakungaphumi kuye, kodwa wayethetha iLizwi likaThixo.’ Abo bantliziyo zinyanisekileyo bayibona inyaniso baza bayamkela. (Yohane 7:16, 17) Oku kunjalo nanamhlanje.
Uqeqesho LwaseGiliyadi Lenza Ubani Awuxhobele Wonke Umsebenzi Olungileyo
Okulandelayo, amalungu angamagqala entsapho yaseBheteli uRichard Abrahamson noPatrick LaFranca badlan’ indlebe nabathandathu kwabo bathweswa izidanga eGiliyadi ngoku abakwiinkonzo ezahlukahlukeneyo ezikhethekileyo zexesha elizeleyo. Abo bathweswe izidanga beklasi ye-112 bakhuthazwa kukuva ukuba emva kweminyaka emininzi abo bathandathu, kungakhathaliseki isabelo abakuso ngoku, baqhubeka besebenzisa uqeqesho abalufumana eGiliyadi olungokufundisisa iBhayibhile, ukwenza uphando nokusebenzisana nabantu.
UTheodore Jaracz, ilungu leQumrhu Elilawulayo, wanikela intetho engumxholo yolu cwangciso. Yayinomxholo othi “Oko Kuye Kwaphunyezwa Ngokunyamezela Intiyo KaSathana.” Kwiinyanga ezintlanu ezidluleyo, abafundi bebehlala phakathi kwabantu ababathandayo nabazixabisayo izinto zokomoya. Noko ke, njengokuba kubonisiwe kwizifundo zabo, siphila kwihlabathi lotshaba. Abantu bakaYehova bayahlaselwa ehlabathini lonke. (Mateyu 24:9) Esebenzisa iingxelo ezahlukahlukeneyo zeBhayibhile, uMzalwan’ uJaracz wabonisa ukuba ‘singamaxhoba akhethekileyo kaMtyholi. Simele someleze ulwalamano lwethu noYehova size sizimisele ukujamelana neemvavanyo zakhe.’ (Yobhi 1:8; Daniyeli 6:4; Yohane 15:20; ISityhilelo 12:12, 17) UMzalwan’ uJaracz waqukumbela ngokuthi, phezu kwako nje ukuthiywa kwabantu bakaThixo, ‘akukho sixhobo esiya kuyilwa nxamnye nathi, njengoko uIsaya 54:17 esitsho, esiya kuphumelela. UYehova uya kuqinisekisa ukuba siyasindiswa ngexesha lakhe nangendlela yakhe.’
‘Bexhobe ngokupheleleyo,’ ngokuqinisekileyo abo bathweswe izidanga beklasi yaseGiliyadi ye-112 baya kwenza lukhulu ekupheliseni indlala yokutya kokomoya kumazwe abaya kusebenza kuwo. (2 Timoti 3:16, 17) Sikhangele phambili ngolangazelelo ukuva indlela abasidlulisela ngayo isigidimi esinesondlo ebantwini kuloo mazwe.
[Ibhokisi ekwiphepha 23]
INKCAZELO ENGABAFUNDI
Inani lamazwe abavela kuwo: 6
Inani lamazwe ababelwe kuwo: 19
Inani labafundi: 48
Umlinganiselo wobudala: 32,2
Umlinganiselo weminyaka besenyanisweni: 15,7
Umlinganiselo weminyaka bekwinkonzo yexesha elizeleyo: 12,2
[Umfanekiso okwiphepha 24]
Iklasi Ye-112 Yabaphumelele KwiSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.