‘Abo Banotyekelo Olufanelekileyo’ Bayasabela
“Bonke abo babenotyekelo olufanelekileyo ngobomi obungunaphakade baba ngamakholwa.”—IZE. 13:48.
1, 2. AmaKristu enkulungwane yokuqala asabela njani kwisiprofeto sikaYesu sokuba iindaba ezilungileyo zaziya kushunyayelwa kumhlaba omiweyo uphela?
INCWADI yeBhayibhile yeZenzo inengxelo echukumisayo ngendlela amaKristu enkulungwane yokuqala awasabela ngayo kwisiprofeto sikaYesu sokuba iindaba ezilungileyo zoBukumkani ziya kushunyayelwa kuwo wonke umhlaba omiweyo. (Mat. 24:14) Abavakalisi abanenzondelelo babamisela umzekelo omhle bonke abo babeza kubalandela. Ngenxa yokunikel’ ubungqina ngenzondelelo kwabafundi bakaYesu eYerusalem, amawaka abantu, kuquka “isihlwele esikhulu sababingeleli,” athontelana ukungena kwibandla lenkulungwane yokuqala.—IZe. 2:41; 4:4; 6:7.
2 Abavangeli benkulungwane yokuqala banceda abantu abaninzi bamkela ubuKristu. Ngokomzekelo, uFilipu waya eSamariya, apho wathetha ephulaphulwe zizihlwele. (IZe. 8:5-8) UPawulos wahamba iindawo ezininzi nabantu abahlukahlukeneyo, beshumayela isigidimi sobuKristu eSipro, kwiinxalenye zaseAsia Minor, eMakedoni, eGrisi naseItali. Kwizixeko awayeshumayela kuzo indimbane yamaYuda namaGrike yaba ngamakholwa. (IZe. 14:1; 16:5; 17:4) Yena uTito waqhubeka eshumayela eKrete. (Tito 1:5) UPetros wayexakeke eBhabhiloni, yaye xa wayebhala ileta yakhe yokuqala, malunga nowama-62-64 C.E., umsebenzi wokushumayela owawusenziwa ngamaKristu wawusele usaziwa ePonto, eGalati, eKapadokiya, eAsiya, naseBhithiniya. (1 Pet. 1:1; 5:13) Kwakumnandi ngokwenene ngaloo maxesha. Abo bashumayeli bangamaKristu benkulungwane yokuqala babenenzondelelo ngokwenene kangangokuba iintshaba zabo zabatyhola ngelithi “bawubhukuqile umhlaba omiweyo.”—IZe. 17:6; 28:22.
3. Yiyiphi imiphumo efunyanwa ngabavakalisi boBukumkani kumsebenzi wokushumayela namhlanje, yaye uvakalelwa njani koko?
3 Nanamhlanje, ibandla lamaKristu liye landa ngendlela ephawulekayo. Ngaba akukukhuthazi ukufunda ingxelo yonyaka yamaNgqina kaYehova uze ubone imiphumo efunyenwe ehlabathini lonke? Ngaba akuvuyiswa kukwazi ukuba abavakalisi boBukumkani baqhube izifundo zeBhayibhile ezingaphezu kwezigidi ezithandathu kunyaka wenkonzo wama-2007? Ngaphezu koko, kwiSikhumbuzo sokufa kukaYesu Kristu sonyaka odluleyo, bekuze abantu abangengomaNgqina kaYehova abamalunga nezigidi ezilishumi abebenomdla kwiindaba ezilungileyo. Oku kubonisa ukuba kusekho umsebenzi omkhulu omele wenziwe.
4. Ngoobani abasabelayo kwisigidimi soBukumkani?
4 Njengakwinkulungwane yokuqala, namhlanje ‘bonke abo banotyekelo olufanelekileyo ngobomi obungunaphakade’ bamkela isigidimi senyaniso. (IZe. 13:48) NguYehova obatsalela kwintlangano yakhe. (Funda uHagayi 2:7.) Sisiphi isimo sengqondo esifanele sibe naso kubulungiseleli bamaKristu ukuba sifuna ukubandakanyeka ngokupheleleyo kulo msebenzi wokuhlanganisa?
Shumayela Ngokungenamkhethe
5. UYehova ukholiswa ngabantu abanjani?
5 AmaKristu enkulungwane yokuqala ayeqonda ukuba “uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZe. 10:34, 35) Umntu ofuna ukuba nolwalamano oluhle noYehova kufuneka abe nokholo kwidini lentlawulelo likaYesu. (Yoh. 3:16, 36) Yaye kukuthanda kukaYehova ukuba “zonke iintlobo zabantu zisindiswe zize zifikelele elwazini oluchanileyo lwenyaniso.”—1 Tim. 2:3, 4.
6. Yintoni abamele bayilumkele abavakalisi boBukumkani, yaye ngoba?
6 Abavakalisi beendaba ezilungileyo abafanele bagwebe abantu ngokobuhlanga, iwonga, imbonakalo, imvelaphi yonqulo, nokunye. Khawunqumame ucinge ngoku: Ngaba akuvuyiswa kukuba umntu wokuqala owathetha nawe ngenyaniso yeZibhalo engazange abe nobuhlanga? Ngoko kutheni ubandeza abanye abantu abasenokusiphulaphula isigidimi sosindiso?—Funda uMateyu 7:12.
7. Kutheni simele singabagwebi abantu esishumayela kubo?
7 UYehova umisele uYesu njengoMgwebi; ngenxa yoko, asikokwethu ukugweba nabani na. Oko kunjalo, kuba—ngokungafaniyo noYesu—thina sinokugweba kuphela nje ‘ngembonakalo esemehlweni [ethu]’ okanye “ngento eviwe ziindlebe [zethu],” ngoxa uYesu esazi oko kusentliziyweni yomntu.—Isa. 11:1-5; 2 Tim. 4:1.
8, 9. (a) USawule wayengumntu onjani ngaphambi kokuba abe ngumKristu? (b) Sifanele sifunde ntoni kumzekelo kampostile uPawulos?
8 Abantu bazo zonke iintlobo baye baba ngabakhonzi bakaYehova. Umzekelo obalaseleyo ngokaSawule waseTarso, kamva owaziwa ngokuba ngumpostile uPawulos. USawule owayengumFarisi, wayengafuni nokuwabona amaKristu. Kangangendlela awayeqiniseke ngayo ukuba unqulo lwawo luphosakele, wada walitshutshisa ibandla lamaKristu. (Gal. 1:13) Kusenokwenzeka ukuba akukho mntu wayeyicinga into yokuba angaze abe ngumKristu. Sekunjalo, uYesu wabona okuthile okuhle entliziyweni kaSawule waza wamnyula ukuze aphumeze uthumo olukhethekileyo. Ngenxa yoko, uSawule waba ngomnye wabakhutheleyo nababenenzondelelo ngendlela engathethekiyo kwibandla lamaKristu lenkulungwane yokuqala.
9 Sifunda ntoni kumava kampostile uPawulos? Mhlawumbi kwintsimi yethu kukho abantu ababonakala bengafuni nokuva ngesigidimi sethu. Nangona sisenokuthandabuza ukuba bangaze babe ngamaKristu, simele singabancami. Maxa wambi nkqu nabo sicinga ukuba abasoze babe nomdla bayasiphulaphula isigidimi sethu. Sithunywe ukuba siqhubeke sishumayela kubo bonke “ngaphandle kokuyekelela.”—Funda IZenzo 5:42.
Abo Bashumayela “Ngaphandle Kokuyekelela” Balindelwe Ziintsikelelo
10. Kutheni simele siqhubeke sishumayela nakubantu ababonakala besoyikeka? Balisa amava asekuhlaleni.
10 Imbonakalo inokusikhohlisa. Ngokomzekelo, uIgnacio,a waqalisa ukufunda iBhayibhile namaNgqina kaYehova ngoxa wayesentolongweni kwilizwe elikuMzantsi Merika. Abantu babemoyika ngenxa yokuba ndlongondlongo kwakhe. Amabanjwa awayesenza izinto ezithile aze azithengise ayecela uIgnacio ukuba aye kuwafunela imali yawo kulawo angahlawuliyo. Noko ke, njengoko uIgnacio wayesenza inkqubela ngokomoya yaye esebenzisa oko akufundayo, wayeka ukuba nogonyamelo nokuvuyelela abanye waza waba ngumntu onobubele. Akusekho mntu ucela yena ukuba aye kufuna imali yamatyala, yaye uyavuyiswa kukuba inyaniso yeBhayibhile nomoya kaThixo uye wabutshintsha ubuntu bakhe. Uvuyiswa nakukungabi namkhethe kwabavakalisi boBukumkani abenza umgudu wokumqhubela isifundo.
11. Kutheni siqhubeka sisiya ebantwini?
11 Esinye sezizathu ezibangela ukuba siqhubeke sisiya kubantu esikhe sathetha nabo ngeendaba ezilungileyo kukuba iimeko nezimo zengqondo zabantu ziyatshintsha. Mhlawumbi emva kokuba siye kubo, abanye baye bagula ngendlela engaginyisi mathe, baphelelwa yimisebenzi okanye bafelwa ngabantu ababathandayo. (Funda INtshumayeli 9:11.) Iziganeko zeli hlabathi zisenokubangela ukuba abantu bacinge nzulu ngekamva labo. Zisenokwenza umntu obekade engenamdla—mhlawumbi obesichasa—abe nomdla. Ngenxa yoko, asimele siyeke ukushumayela iindaba ezilungileyo ngawo onke amaxesha afanelekileyo.
12. Simele sibajonge njani abantu esishumayela kubo, yaye ngoba?
12 Abantu bayathand’ ukucalula nokugweba abanye. Kodwa uYehova yena ujonga umntu ngamnye. Uyakwazi ukubona iimpawu ezintle kuloo mntu. (Funda eyoku-1 kaSamuweli 16:7.) Nathi simele sizabalazele ukwenza okufanayo xa sisentsimini. Amava amaninzi abonisa imiphumo emihle ebakho xa sishumayela sinembono efanelekileyo ngabantu.
13, 14. (a) Kwakutheni ukuze omnye uvulindlela angazixhalabisi ngebhinqa awadibana nalo? (b) Yintoni esiyifundayo kula mava?
13 USandra, udade onguvulindlela, wayeshumayela kwindlu ngendlu kwisiqithi seCaribbean, waza wadibana noRuth owayezifake waphelela kwimibhiyozo yecarnival. URuth wagqwesa izihlandlo ezibini kukhuphiswano lwecarnival olwaluqhutywa kwelo lizwe. Waba nomdla wokwenene koko wayekuxelelwa nguSandra, kangangokuba benza amalungiselelo okuba aqhutyelwe isifundo seBhayibhile. USandra uthi: “Ndathi xa ndingena kwigumbi lakhe lokuphumla, ndabona ifoto enkulu kaRuth enxibe iimpahla zecarnival, kukho neembasa awayewongwe ngazo. Ndazenzela isigqibo esiphosakeleyo sokuba umntu odume nozifake ngolu hlobo kwimibhiyozo yecarnival akasoze abe nomdla enyanisweni. Ngoko ndayeka ukuya kuye.”
14 Ethubeni, uRuth waya kwiHolo yoBukumkani, yaye ukuphuma kweentlanganiso wabuza oku kuSandra, “Uyekele ntoni ukuza kundiqhubela isifundo?” USandra wacela uxolo waza waqala apho ebeyeke khona nesifundo. URuth wakhawuleza wenza inkqubela, wasusa iifoto zecarnival, waya kuzo zonke iintlanganiso zebandla, waza wazahlulela kuYehova. Ewe, uSandra waqonda ukuba ekuqaleni wenza into ephosakeleyo.
15, 16. (a) Waba yintoni umphumo xa omnye umvakalisi washumayela kwisalamane sakhe? (b) Kutheni sifanele sishumayele kwizalamane zethu enoba ziphila ubomi obunjani na?
15 Bakho nabanye abaye bafumana imiphumo encumisayo ngoxa beshumayela kumalungu eentsapho zabo angakholwayo, nakuba ebebonakala engenamdla. Khawucinge nje ngoJoyce, udade ongumKristu waseUnited States. Umlanya wakhe wayephum’ engena entolongweni ukususela ekukhuleni kwakhe. UJoyce uthi, “Abantu babesithi ungungantweni nje kuba wayekushishino lweziyobisi, elisela yaye esenza nezinye izinto ezimbi. Nakuba kwakungelula, ndaqhubeka ndimchazela ngenyaniso yeBhayibhile kangangeminyaka engama-37.” Umonde awaba nawo uJoyce enceda esi salamane sakhe wavuzwa xa ekugqibeleni saqalisa ukufunda iBhayibhile namaNgqina kaYehova saza senza utshintsho olukhawulezileyo kwindlela esasiphila ngayo. Kutshanje, eneminyaka engama-50 ubudala, lo mlanya kaJoyce uye wabhaptizwa kwindibano yesithili eKhalifoniya, eUnited States. UJoyce uthi: “Andizange ndikwazi ukuzibamba iinyembezi zovuyo. Indivuyisa gqitha into yokuba ndingazange ndimncame.”
16 Usenokuba mathidala ukuthetha nezinye izalamane zakho ngenyaniso yeBhayibhile ngenxa yemvelaphi yazo. Kodwa yena uJoyce akazange abe mathidala ukuthetha nomlanya wakhe. Ngaphezu koko, umntu angayazi njani into ecingwa ngomnye? Kusenokwenzeka ukuba loo mntu ebesoloko efuna unqulo lokwenyaniso. Ngoko yenza umgudu wokumnceda alufumane.—Funda IMizekeliso 3:27.
Incwadi Yokufundisisa IBhayibhile Ephumelelayo
17, 18. (a) Iingxelo eziphuma ehlabathini zibonisa ntoni ngokuba luncedo kwencwadi ethi Yintoni Ngokwenene Efundiswa YiBhayibhile? (b) Ngawaphi amava ancumisayo owafumene ngoxa usebenzisa le ncwadi?
17 Iingxelo ezivela kumazwe asehlabathini zibonisa ukuba abantu abaneentliziyo ezinyanisekileyo bayayithanda incwadi ethi Yintoni Ngokwenene Efundiswa YiBhayibhile? Omnye uvulindlela waseUnited States ogama linguPenni waqalisa izifundo ezininzi ngale ncwadi. Ezibini kwezi zifundo ngabantu asebekhulile ababengamalungu azinikeleyo ecawa. UPenni wayengaqinisekanga ngendlela abaza kusabela ngayo kwinyaniso yeZibhalo ekwincwadi ethi Okufundiswa YiBhayibhile. Sekunjalo, ubhala enjenje, “Ngenxa yendlela esengqiqweni necace ngayo inkcazelo ekule ncwadi, bayamkela ngaphandle kokuphikisa inyaniso abayifundayo.”
18 UPat, ongumvakalisi waseBritani, waqalisa isifundo seBhayibhile nebhinqa eliyimbacu elalisuka kumazwe aseAsia. Kwanyanzeleka ukuba eli bhinqa libaleke kwilizwe lalo emva kokuba umyeni noonyana balo bethatyathwe ngamajoni anemvukelo, yaye alizange liphinde libabone emva koko. Ubomi balo babusengozini, umzi walo watshiswa laza ladlwengulwa liqela lamadoda. Zonke ezi zinto zabangela ukuba lingayiboni into elisayiphilelayo, ibe lazama ukuzibulala izihlandlo ezininzi. Noko ke, isifundo seBhayibhile salenza lanethemba. UPat ubhala athi: “Indlela elula ngayo inkcazelo ekule ncwadi nemifanekiso yayo ecacileyo iyabachukumisa abantu. Esi sifundo senza inkqubela ekhawulezileyo, safanelekela ukuba ngumvakalisi ongabhaptizwanga, saza sathi sifuna ukubhaptizwa kwindibano elandelayo. Kuyavuyisa ukunceda abantu abanyanisekileyo baliqonde baze balixabise ithemba abalinikwa ziZibhalo.
“Masingayeki Ukwenza Okuhle”
19. Kutheni ungxamiseke kangaka nje umsebenzi wokushumayela?
19 Suku ngalunye, luya lungxamiseka ngakumbi uthumo lwethu lokushumayela nokwenza abafundi. Nyaka ngamnye amawaka abantu abaneentliziyo ezinyanisekileyo ayasabela kumsebenzi wethu wokushumayela. Naxa kunjalo, “imini enkulu kaYehova ikufuphi,” nto leyo ethetha ukuba abo bahleli ebumnyameni, “bagxadazelela ekubulaweni.”—Zef. 1:14; IMize. 24:11.
20. Yintoni ngamnye wethu afanele azimisele ukuyenza?
20 Lisekho ithuba lokubanceda abanjalo. Kodwa ukuze sikwazi ukwenjenjalo, kubalulekile ukuba sixelise amaKristu enkulungwane yokuqala, ‘awaqhubeka ngaphandle kokuyekelela efundisa kwaye evakalisa iindaba ezilungileyo ezingoKristu uYesu.’ (IZe. 5:42) Sinyathela emanyathelweni awo ngokuthi sinyamezele enoba kunzima, sinikel’ ingqalelo ‘kubugcisa bethu bokufundisa,’ size sishumayele kubo bonke ngaphandle komkhethe! “Masingayeki ukwenza okuhle,” kuba ukuba siyanyamezela, siya kunandipha intsikelelo yokukholeka kuThixo.—2 Tim. 4:2; funda eyabaseGalati 6:9.
[Umbhalo osemazantsi]
a Amanye amagama atshintshiwe.
Unokuphendula Uthini?
• Ngoobani abazamkelayo iindaba ezilungileyo?
• Kutheni simele sikuphephe ukubagweba abo sishumayela kubo?
• Yiyiphi imiphumo efunyenwe ngoxa kusetyenziswa incwadi ethi Yintoni Ngokwenene Efundiswa YiBhayibhile?
[Imifanekiso ekwiphepha 13]
Amawaka abantu abaneentliziyo ezinyanisekileyo ayazamkela iindaba ezilungileyo
[Imifanekiso ekwiphepha 15]
Sifunda ntoni kwindlela umpostile uPawulos awabutshintsha ngayo ubomi bakhe?
[Umfanekiso okwiphepha 16]
Abavakalisi beendaba ezilungileyo ababagwebi abantu