Abo Baphumelele EGiliyadi Bakhuthazwa Ukuba Bathethe “Izinto Zobungangamela”

KWAKUKHO isihlwele esikhulu sabantu abangama-6 635 abavela kumazwe angama-52 kucwangciso lwabaphumelele kwiklasi ye-115 yeSikolo seBhayibhile seWatchtower saseGiliyadi ngoSeptemba 13, 2003.

Beva ukhuthazo olusekelwe eBhayibhileni olwaludluliselwa kubafundi abangama-48 bale klasi lokuba base “izinto zobungangamela zikaThixo” kubantu abakumazwe ali-17. (IZenzo 2:11) Kulapho ngoku abo baphumeleleyo babeza kusebenza khona njengabavangeli basemazweni.

Kumazwi akhe okuvula, uStephen Lett, olilungu leQumrhu Elilawulayo lamaNgqina kaYehova nowayengusihlalo kolu cwangciso, wakhumbuza abafundi esithi: “Xa nisiya kwizabelo zenu, enoba niyaphi na okanye nizifumana nikweyiphi imeko, baninzi abakunye nani kunabo banxamnye nani.” Esebenzisa isahluko 6 sencwadi yeSibini yooKumkani, uMzalwan’ uLett wakhumbuza abafundi ukuba banokuthembela kuncedo lukaYehova uThixo nolwezigidi zeengelosi njengoko bevakalisa “izinto zobungangamela zikaThixo.” (2 Kumkani 6:15, 16) AmaKristu enkulungwane yokuqala ajamelana nenkcaso nabantu abangenamdla kumsebenzi wawo wokushumayela nokufundisa, yaye namhlanje amaKristu angabavangeli basemazweni ajamelana neemeko ezifanayo. Noko ke, banokuthembela kuncedo oluvela ezulwini nakwintlangano kaYehova yasemhlabeni.—INdumiso 34:7; Mateyu 24:45.

Thetha “Izinto Zobungangamela ZikaThixo”

Emva kwamazwi okuvula kasihlalo, uHarold Corkern, olilungu leKomiti yeSebe eUnited States wanikela intetho enomxholo othi “Ulindelo Olusengqiqweni—Eyona Nto Ibangela Uvuyo Nempumelelo Enkonzweni.” UMzalwan’ uCorkern wathi amathemba angazalisekiswayo anokukhokelela kudano, njengoko ibonisa IMizekeliso 13:12. Noko ke, udano ludla ngokubangelwa kukungazaliseki kolindelo olungekho ngqiqweni. Abo baphumeleleyo bafanele babe nembono elungeleleneyo nesengqiqweni ngabo nangabanye. Bafanele balindele ukuba baza kuzenza iimpazamo, kodwa oko akufanele kubenze babe buhlungu ngokugqithiseleyo njengoko bezabalazela ukunceda abanye baqonde “izinto zobungangamela zikaThixo.” UMzalwan’ uCorkern wakhuthaza abavangeli basemazweni abatsha ukuba bathembele kuYehova, “umvuzi wabo bamfuna ngenyameko.”—Hebhere 11:6.

Owalandelayo kolu cwangciso yaba nguDaniel Sydlik, ilungu leQumrhu Elilawulayo, owayenentetho enomxholo othi “Ithemba LamaKristu—Liyintoni?” Wathi: “Ithemba luphawu olufanelekileyo amaKristu afanele abe nalo. Lingumlinganiselo ofanelekileyo owenza ubani abe nolwalamano oluhle noThixo. Akunakwenzeka ukuba umntu ongengomKristu abe nethemba elifana nelethu.” UMzalwan’ uSydlik wachaza iinkalo ezahlukahlukeneyo zobuKristu ezinokunceda ubani ahlale eqinile phezu kwazo nje iingxaki zobomi. “Xa sinethemba sinokujamelana nobomi ngenzondelelo nangoloyiso.” Ithemba umKristu analo limnceda ukuba amjonge uYehova njengoThixo onenjongo aze amkhonze ngovuyo.—Roma 12:12.

UWallace Liverance, ongunobhala weSikolo saseGiliyadi, wakhuthaza abafundi ukuba ‘Baqhubeke Behamba Ngokomoya.’ (Galati 5:16) Wabonisa indlela uBharuki, unobhala kaYeremiya, awaphantse wayeka ngayo ukuhamba ngokomoya. Ngesinye isihlandlo, uBharuki wadinwa waza waqalisa ukuzifunela izinto ezinkulu. (Yeremiya 45:3, 5) Wandula ke uMzalwan’ uLiverance wathi abanye bayeka ukulandela uYesu baza bayigatya inyaniso yokomoya, nto leyo efunekayo ukuze ubani asindiswe. Oko kwakungenxa yokuba babengakuqondi oko wayekufundisa, yaye babedanile kuba zazingazaliseki izinto ababezilindele ngelo xesha. (Yohane 6:26, 27, 51, 66) Yintoni abanokuyifunda kule ngxelo abavangeli basemazweni abanomsebenzi wokwenza abantu banikele ingqalelo kuMdali nakwiinjongo zakhe? Abafundi bakhuthazwa ukuba bangaxhalabeli izikhundla, ukuzukiswa ngabantu, okanye basisebenzisele inzuzo yabo isabelo sobuthixo.

“Ngaba Uza Kupha Okanye Uza Kuphiwa?” lowo yayingumbuzo owabuzwa ngumqeqeshi waseGiliyadi uMark Noumair. Intetho yakhe yayisekelwe kwincwadi yaBagwebi 5:2, ethetha ngamaSirayeli athile awanconywayo ngokuya kukhonza ngokuzithandela kumkhosi kaBharaki. Abafundi baseGiliyadi banconywa ngomoya wabo wokusabela kubizo lukaBharaki Omkhulu, uYesu Kristu, ukuze babe nenxaxheba engakumbi kumlo wokomoya. Amajoni kaKristu afanele abe nomdla wokukholisa lowo bamsebenzelayo. UMzalwan’ uNoumair wakhumbuza abafundi esithi: “Xa siqalisa ukunikel’ ingqalelo ekukholiseni iziqu zethu, siyayeka ukulwa notshaba. . . . Inkonzo yobuvangeli basemazweni akuyenzeli wena. Uyenzela uYehova, ulongamo lwakhe nokuze kufezwe ukuthanda kwakhe. Asingabo abavangeli basemazweni kuba sifuna uYehova asenze sonwabe, simkhonza kuba simthanda.”—2 Timoti 2:4.

Kwalandela umqeqeshi waseGiliyadi uLawrence Bowen owaba ngusihlalo wenxalenye ethi “Bangcwalise Ngayo Inyaniso.” (Yohane 17:17) Wathi abafundi beklasi ye-115 bangabalungiseleli bakaThixo abangcwalisiweyo. Ngoxa bebesesikolweni bebesiya entsimini, befuna abo bantliziyo zinyanisekileyo nabathanda inyaniso. NjengoYesu nabafundi bakhe bokuqala, aba bafundi abakhange bathethe ‘ngokwentshukumisa yabo.’ (Yohane 12:49, 50) Ngenzondelelo bathethe ngelizwi lenyaniso eliphefumlelweyo nelinika ubomi. Imiboniso namava aba bafundi abonise indlela iBhayibhile enamandla ngayo kwabo badibene nabo.

Amacebiso Namava Alukhuthazo

UAnthony Pérez noAnthony Griffin, amalungu eSebe Lenkonzo kwisebe laseUnited States, benza udliwano-ndlebe namalungu eKomiti yeSebe avela ehlabathini lonke. La madoda athetha ngeemeko ezilucelomngeni abaye badibane nazo abavangeli basemazweni abatsha aza anikela namacebiso asebenzisekayo asekelwe kumava awo. Ezinye zezinto ezilucelomngeni ziquka ukwahluka kwezithethe, imozulu eshushu ngokugqithiseleyo unyaka wonke okanye unqulo nemeko yezobupolitika eyahlukileyo kuleyo bayiqhelileyo abafundi. Yintoni enokunceda abavangeli basemazweni bajamelane ngokuphumelelayo nezi meko zintsha? Luthando ngoYehova, ukuthanda abantu, ukungajongi emva nokungenzi izinto ngokungxama. Elinye ilungu lekomiti yesebe lathi: “Abantu abakwizabelo zethu bebehlala apho kangangeenkulungwane ezininzi ngaphambi kokuba sifike. Ngokuqinisekileyo sinokuhlala kwezo ndawo size siziqhele. Ngalo lonke ixesha sidibana neengxaki, sizijonga njengento enokusinceda siphucule ubuntu bethu. Thembela ngomthandazo nangomoya kaYehova, yaye uya kuyibona inyaniso yamazwi kaYesu athi, ‘Ndinani.’”—Mateyu 28:20.

USamuel Herd, olilungu leQumrhu Elilawulayo, wenza olu cwangciso lwafikelela kwincopho ngentetho yakhe ethi, “Qhubeka Uthetha Ngezinto Zobungangamela ZikaThixo.” Ukuthululwa komoya oyingcwele ngomhla wePentekoste yowama-33 C.E. kwanika abafundi bakaYesu amandla okuthetha ‘ngezinto zobungangamela zikaThixo.’ Yintoni enokunceda abavangeli basemazweni abatsha bathethe ngenzondelelo efanayo ngoBukumkani bukaThixo? Ngumoya oyingcwele ofanayo. UMzalwan’ uHerd wakhuthaza abafundi abaphumeleleyo ukuba ‘bavuthe emoyeni,’ baxakeke zizabelo zabo, bangaze balulibale uqeqesho abalufumeneyo. (Roma 12:11) UMzalwan’ uHerd wathi: “IBhayibhile yinto yobungangamela bukaThixo. Ningaze nikuthabathe lula ukuxabiseka kwayo. Isigidimi sayo siphilile. Ihlaba intliziyo. Yisebenziseni ekulungelelaniseni izinto ebomini benu. Yivumeleni iguqule indlela enicinga ngayo. Londolozani amandla enu okucinga ngokufundisisa, ukufunda nokucamngca ngeZibhalo . . . Zenzeleni usukelo nize nizimisele ukusebenzisa uqeqesho enilufumene eGiliyadi ukuze niqhubeke nithetha ‘izinto zobungangamela zikaThixo.’”

Emva kokuba kufundwe imibuliso evela ehlabathini lonke baza abaphumeleleyo banikwa iidiploma, omnye wabafundi wafunda ileta yale klasi ebulela ngoqeqesho abalufumeneyo. Wandula ke uMzalwan’ uLett waqukumbela esi sihlandlo sovuyo ngokufunda eyesi-2 yeziKronike 32:7 neDuteronomi 20:1, 4. Enxulumanisa amazwi akhe okuvala nawokuvula, waqukumbela esithi: “Ngoko ke nina baphumeleleyo bathandekayo, khumbulani ukuba njengoko nisiya phambili kwidabi lokomoya kwizabelo zenu ezitsha, uYehova uya kube ehamba nani. Ningaze nilibale ukuba baninzi abakunye nani kunabo banxamnye nani.”

[Ibhokisi ekwiphepha 25]

INKCAZELO ENGABAFUNDI

Inani lamazwe abavela kuwo: 7

Inani lamazwe ababelwe kuwo: 17

Inani labafundi: 48

Umlinganiselo wobudala: 33,7

Umlinganiselo weminyaka besenyanisweni: 17,8

Umlinganiselo bekwinkonzo yexesha elizeleyo: 13,5

[Umfanekiso okwiphepha 26]

Iklasi Ye-115 Yabaphumelele KwiSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.