UYehova Usoloko Esenza Okulungileyo

“UYehova ulilungisa kuzo zonke iindlela zakhe.”—INDUMISO 145:17.

1. Usabela njani xa ubani esenza izigqibo eziphosakeleyo ngawe, yaye yintoni esinokuyifunda kumava anjalo?

NGABA umntu othile wakha wenza izigqibo ezingachananga ngawe, mhlawumbi wakucingela engenazo zonke iinkcukacha? Ukuba kunjalo, kusenokwenzeka ukuba wakhathazeka—yaye kwakufanelekile. Sinokufunda into ebalulekileyo koku: Kububulumko ukuba singakhawulezi senze izigqibo singenazo zonke iinkcukacha.

2, 3. Abanye basabela njani kwiingxelo zeBhayibhile ezingenazinkcukacha zaneleyo ukuphendula yonke imibuzo, yaye iBhayibhile isixelela ntoni ngoYehova?

² Simele singakulibali oko xa sifanele senze isigqibo ngoYehova uThixo. Ngoba? Ngenxa yokuba kukho iingxelo ezithile zeBhayibhile ezisenokubonakala ekuqaleni zidida. Mhlawumbi ezi ngxelo—ezingezinto ezenziwa ngabanye babanquli bakaThixo okanye imigwebo kaThixo yexesha elidluleyo—zisenokungabi nazo zonke iinkcukacha ukuphendula yonke imibuzo esinayo. Okulusizi kukuba, abanye bayazigxeka iingxelo ezinjalo, bethandabuza enoba uThixo ulilungisa yaye usesikweni. Kanti iBhayibhile isixelela ukuba “uYehova ulilungisa kuzo zonke iindlela zakhe.” (INdumiso 145:17) Kwakhona iLizwi lakhe lisiqinisekisa ukuba “akenzi ngobungendawo.” (Yobhi 34:12; INdumiso 37:28) Usenokuyithelekelela indlela aziva ngayo xa abanye befikelela kwizigqibo eziphosakeleyo ngaye!

³ Makhe siqwalasele izizathu ezihlanu zokuba sifanele siyamkele imigwebo kaYehova. Siya kwandule ke, sicinga ngezo zizathu, sihlolisise iingxelo ezimbini zeBhayibhile abanye abanokukufumanisa kunzima ukuziqonda.

Kutheni Sifanele Samkele Imigwebo KaYehova?

4. Kutheni sifanele sithozame xa siqwalasela izenzo zikaThixo? Zekelisa.

⁴ Okokuqala, ekubeni uYehova esazi zonke izinto, sifanele sithozame xa sihlola izenzo zikaThixo ekubeni thina singazazi zonke izinto ezibandakanyekileyo. Ngokomzekelo: Masithi umantyi othile owaziwa ngokungakhethi uye wawisa isigwebo kwityala elithile. Ubuya kucinga ntoni ngomntu othi engazazi zonke iinkcukacha okanye engayiqondi nakakuhle imithetho ebandakanyekileyo agxeke isigqibo esenziwe nguloo mgwebi? Bekuya kuba bubudenge ngomntu owisa isigwebo engawazi ngokupheleleyo umbandela. (IMizekeliso 18:13) Yaye bekuya kuba bubudenge obungakumbi ngabantu ukugxeka “uMgwebi womhlaba wonke”!—Genesis 18:25.

5. Yintoni esifanele singayilibali xa sifunda iingxelo zeBhayibhile ngokuphunyezwa kwemigwebo kaThixo kubantu abathile?

⁵ Isizathu sesibini sokwamkela imigwebo kaThixo sikukuba ngokungafaniyo nabantu, uThixo uyakwazi ukubona oko kusentliziyweni. (1 Samuweli 16:7) ILizwi lakhe lithi: “Mna, Yehova, ndiyayigocagoca intliziyo, ndizihlolisise izintso, ukuze ndinike ngamnye ngokweendlela zakhe, ngokwesiqhamo sezenzo zakhe.” (Yeremiya 17:10) Ngenxa yoko, xa sifunda iingxelo zeBhayibhile ngendlela uThixo abagweba ngayo abantu abathile, masingalibali ukuba amehlo akhe abona yonk’ into, abona iingcinga neentshukumisa ezifihlakeleyo, neenjongo ezingabhalwanga kwiLizwi lakhe.—1 Kronike 28:9.

6, 7. (a) UYehova ubonise njani ukuba ubambelela kwimilinganiselo yakhe yokusesikweni nobulungisa naxa eza kulahlekelwa gqitha? (b) Yintoni esifanele siyikhumbule ukuba sifunda into ethile eBhayibhileni ebangela sithandabuze enoba uThixo wenze ngobulungisa nangokufanelekileyo?

⁶ Phawula isizathu sesithathu sokwamkela imigwebo kaYehova: Ubambelela kwimigaqo yakhe yobulungisa naxa eza kulahlekelwa lukhulu. Phawula lo mzekelo. Ngokunikela ngoNyana wakhe ukuba abe yintlawulelo yokukhulula abantu abathobelayo kwisono nasekufeni, uYehova wayezalisekisa imigaqo yakhe yokusesikweni neyobulungisa. (Roma 5:18, 19) Sekunjalo, ukubona uNyana wakhe amthandayo ebandezeleka aze afe kwisibonda sentuthumbo kumele ukuba kwamenza buhlungu gqitha uYehova. Oku kusixelela ntoni ngoThixo? Ngokuphathelele ‘intlawulelo ngoKristu Yesu,’ iBhayibhile ithi: “Oku kwakungokokuze [uThixo] abonise ubulungisa bakhe.” (Roma 3:24-26) Enye inguqulelo yabaseRoma 3:25 ifundeka ngokuthi: “Oku kwabonisa ukuba uThixo usoloko esenza oko kulungileyo nokusesikweni.” (New Century Version) Ewe, indlela uYehova awayezimisele ngayo ukulahlekelwa ukuze anikele intlawulelo ibonisa ukuba ukuxabisa gqitha “oko kulungileyo nokusesikweni.”

⁷ Ngoko ke, ukuba sifunda okuthile eBhayibhileni okusenza sithandabuze enoba uThixo wenza okusesikweni nokufanelekileyo, sifanele sikhumbule oku: Ngenxa yokunyaniseka kwakhe kwimilinganiselo yakhe yobulungisa nokusesikweni, uYehova wanikela nangoNyana wakhe ukuze afe kabuhlungu. Ngaba ebeya kuyityeshela loo migaqo kweminye imibandela? Inyaniso ikukuba, uYehova akaze ayityeshele imilinganiselo yakhe yobulungisa nokusesikweni. Ngoko ke sinesizathu esivakalayo sokuqiniseka ukuba usoloko esenza okulungileyo nokusesikweni.—Yobhi 37:23.

8. Kutheni kuyimposiso ngabantu ukucinga ukuba uYehova akanayo imvo yokusesikweni nobulungisa?

⁸ Khawucinge ngesizathu sesine esibangela ukuba siyamkele imigwebo kaYehova: UYehova wamdala umntu ngokomfanekiso Wakhe. (Genesis 1:27) Ngenxa yoko abantu bajizekwe ngeempawu ezifana nezikaThixo, kuquka imvo yokusesikweni nobulungisa. Siya kube siphosisile ukuba imvo yethu yokusesikweni neyobulungisa isenza sicinge ukuba uYehova yena akanazo ezo mpawu. Ukuba sididwa yingxelo ethile yeBhayibhile, sifanele sikhumbule ukuba ngenxa yesono esisizuz’ ilifa, imvo yethu yokusesikweni nokulungileyo ayifezekanga. UYehova uThixo, esenziwe ngokomfanekiso wakhe, ugqibelele ngokusesikweni nangobulungisa. (Duteronomi 32:4) Kuya kuba yinto engafanelekanga kwaukucinga ukuba abantu banokuba sesikweni yaye babe ngamalungisa ngaphezu kukaThixo!—Roma 3:4, 5; 9:14.

9, 10. Kutheni uYehova enganyanzelekanga ukuchaza okanye ukuzithethelela ebantwini ngento ayenzileyo?

⁹ Isizathu sesihlanu sokwamkela imigwebo kaYehova sikukuba ‘ungOyena Uphakamileyo phezu komhlaba wonke.’ (INdumiso 83:18) Ukongezelela, akanyanzelekanga ukuba achaze okanye azithethelele ebantwini ngento ayenzileyo. UnguMbumbi Omkhulu, yaye sinjengodongwe lokwenza ingqayi, ukuze enze ngendlela athanda ngayo. (Roma 9:19-21) Singoobani ke thina—udongwe lwezandla zakhe—ukuthandabuza izigqibo okanye izenzo zakhe? Xa usolusapho uYobhi engazange ayiqonde indlela uThixo asebenzisana ngayo nabantu, uYehova wamlungisa, ngokumbuza: “Eneneni, ngaba uya kukutshitshisa ukuba sesikweni kwam? Ngaba uya kundivakalisa ndingendawo ukuze wena ube ngolungileyo?” Eqonda ukuba uthethe engaqondi, uYobhi kamva wazisola. (Yobhi 40:8; 42:6) Ngamana singangaze senze impazamo yokumfumanisa uThixo enetyala!

¹⁰ Ngokucacileyo, sinezizathu ezivakalayo zokukholelwa ukuba uYehova usoloko esenza okufanelekileyo. Sinolu lwazi ngeendlela zikaYehova, masiqwalasele iingxelo ezimbini zeBhayibhile abanye abazifumanisa zidida. Eyokuqala, ibandakanya izenzo zomnye umkhonzi kaThixo, enye ukuphunyezwa komgwebo nguThixo ngokwakhe.

Kwakutheni Ukuze ULote Afune Ukunikela Ngeentombi Zakhe Kwihlokondiba Elalineengcwangu?

11, 12. (a) Balisa oko kwenzekayo xa uThixo wathuma eSodom iingelosi ezimbini ezaziguqula imizimba yenyama. (b) Le ngxelo iye yabangela yiphi imibuzo ezingqondweni zabanye?

¹¹ KwiGenesis isahluko 19, sifunda ngoko kwenzekayo xa uThixo wathumela iingelosi ezimbini ezaziguqula zayimizimba yenyama eSodom. ULote wazibongoza ezi ndwendwe ukuba zihlale emzini wakhe. Noko ke, ngobo busuku, ihlokondiba lamadoda esixeko layirhangqa indlu yakhe laza lafuna ukuba zikhutshwe ezo ndwendwe ukuze libe neentlobano zesini kunye nazo. ULote wazama ukulibongoza elo hlokondiba kodwa watsho phantsi. Efuna ukukhusela iindwendwe zakhe, uLote wathi: “Khanincede, bantakwethu, musani ukwenza ububi. Yini kodwa, ndineentombi ezimbini apha ezingazange zibe neentlobano zokwazana nandoda. Makhe ndinizisele zona. Nenze kuzo njengoko kulungileyo emehlweni enu. Ke kula madoda musani ukwenza nto, kuba angene ngenxa yoko emthunzini wophahla lwam.” Eli hlokondiba alizange liphulaphule yaye laphantsa lalophula ucango. Ekugqibeleni, iindwendwe ezaziziingelosi zalibetha ngobumfama elo hlokondiba liphambeneyo.—Genesis 19:1-11.

¹² Kubonakala ukuba kuye kwakho imbuzwano eninzi ezingqondweni zabanye ngale ngxelo. Bayabuza: ‘Kwakutheni ukuze uLote afune ukunikela ngeentombi zakhe kwihlokondiba eliziphethe kakubi kuba nje ekhusela iindwendwe zakhe? Ngaba yayingekho mbi le nto wayeyenza, yaye yayingebobugwala?’ Ngenxa yale ngxelo, kutheni uThixo waphefumlela uPetros ukuba ambize uLote ‘njengelungisa’? Ngaba uLote wakwenza oku evunyelwe nguThixo? (2 Petros 2:7, 8) Makhe sithethe ngalo mbandela ukuze singafikeleli kwizigqibo ezingafanelekanga.

13, 14. (a) Yintoni efanele iphawulwe ngengxelo yeBhayibhile ngokuphathelele isenzo sikaLote? (b) Yintoni ebonisa ukuba uLote akazange abonakalise ubugwala?

¹³ Okokuqala, kufanele kuphawulwe ukuba iBhayibhile ayikuthetheleli okanye ikugxeke oko kwenziwa nguLote, kodwa ichaza nje okwenzekayo. Kwakhona iBhayibhile ayisixeleli into eyayicingwa nguLote okanye into eyambangela ukuba enjenjalo. Mhlawumbi ‘kuvuko lwamalungisa’ uya kutyhila iinkcukacha.—IZenzo 24:15.

¹⁴ ULote wayengelilo igwala. Kuphela nje wayesengxakini. Ngokuthi iindwendwe zingene “emthunzini” wophahla lwakhe, uLote wayebonisa ukuba uziva enyanzelekile ukuzikhusela. Kodwa oku kwakungeyonto ilula. Umbhali-mbhali ongumYuda uJosephus uthi abemi baseSodom “yayingabantu abanolunya, yaye bengamhloneli uThixo . . . Babebathiyile abantu basemzini, yaye amadoda edlwengula amanye amadoda.” Ukanti, uLote akazange awoyike loo madoda awayezaliswe yintiyo. Kunoko, waphuma waza wathetha naloo madoda awayelugcalagcala. Wade “waluvala ucango emva kwakhe.”—Genesis 19:6.

15. Kutheni kunokuthiwa uLote wayesenokuba wayebonakalisa ukholo?

¹⁵ ‘Sekunjalo,’ abanye basenokubuza, ‘kwakutheni ukuze uLote afune ukunikela ngeentombi zakhe kweli hlokondiba?’ Kunokusuka nje sithi wayeneentshukumisa ezimbi, kutheni singacingi ngezinye izinto ezinokuba zenzeka? Okokuqala, kusenokwenzeka ukuba uLote wayebonakalisa ukholo. Ngoba? Alithandabuzeki elokuba uLote wayesazi ukuba uYehova wamkhusela uSara, umfazi ka-Abraham, umalume kaLote. Khumbula ukuba ngenxa yokuba uSara wayemhle gqitha, uAbraham wamcela ukuba amchaze njengomntakwabo, kungenjalo abanye babeza kumbulala ukuze bamthabathe.a Ngenxa yoko, uSara wathatyathwa wasiwa kwindlu kaFaro. Noko ke, uYehova wangenelela, ethintela uFaro ukuba angamoni uSara. (Genesis 12:11-20) Kusenokwenzeka ukuba uLote wayenokholo lokuba iintombi zakhe zinokukhuselwa ngendlela efanayo. Okuphawulekayo kukuba, uYehova esebenzisa iingelosi wangenelela, yaye la mantombazana asinda.

16, 17. (a) Kusenokwenzeka ukuba uLote wayezama njani ukothusa okanye ukudida amadoda aseSodom? (b) Enoba yintoni eyayicingwa nguLote, yintoni esinokuqiniseka ngayo?

¹⁶ Khawucinge ngenye into esenokuba yenzeka. Kusenokwenzeka ukuba uLote wayezama ukuwothusa okanye ukuwadida la madoda. Kusenokwenzeka ukuba wayecinga ukuba esi sihlwele sasingayi kuzinqwenela iintombi zakhe ekubeni eSodom kwakuxhaphake amafanasini. (Yude 7) Ukongezelela, la mantombazana ayeganwe ngamadoda esi sixeko, ngoko izalamane, abahlobo, okanye amadoda awayeshishina namadoda awayeza kuba ngabakhwenyana bakhe kusenokwenzeka ukuba ayephakathi kweso sihlwele. (Genesis 19:14) Kusenokwenzeka ukuba uLote wayecinga ukuba ngenxa yolwalamano olunjalo, amadoda athile kweso sihlwele ayeya kuzikhusela iintombi zakhe. Ngenxa yokuba eso sihlwele sasingavisisani sasingayi kuba yingozi kangako.b

¹⁷ Enoba wayecinga ntoni okanye yintoni eyambangela ukuba uLote enze oku, sinokuqiniseka ngoku: Ekubeni uYehova esoloko esenza okulungileyo, kusenokuba wayenesizathu esihle sokumgqala uLote ‘elilungisa.’ Yaye xa siqwalasela oko kwenziwa lihlokondiba elinempambano laseSodom, ngaba kuyathandabuzeka ukuba uYehova wayenesizathu esivakalayo sokubagweba abemi beso sixeko singendawo?—Genesis 19:23-25.

Kwakutheni Ukuze UYehova Ambulale U-Uza?

18. (a) Yintoni eyenzekayo xa uDavide wayezama ukuzisa iTyeya eYerusalem? (b) Le ngxelo ibangela wuphi umbuzo?

¹⁸ Enye ingxelo esenokubadida abanye iphathelele ixesha xa uDavide wayezama ukuzisa ityeya yomnqophiso eYerusalem. ITyeya yayikhweliswe enqweleni, eyayikhokelwa ngu-Uza nomntakwabo. IBhayibhile ithi: “Beza kufikelela esandeni sikaNakon, waza u-Uza wolulela isandla sakhe kwityeya kaThixo oyinyaniso wayibamba, ngokuba iinkomo zaziyigungqisa. Wavutha ke umsindo kaYehova ku-Uza yaye uThixo oyinyaniso wambetha apho ngenxa yeso senzo sokungahloneli Thixo, wafela apho kufuphi netyeya kaThixo oyinyaniso.” Kwiinyanga ezithile kamva, ilinge lesibini laphumelela xa iTyeya yahanjiswa ngendlela uThixo awayeyalele ngayo, ibekwe emagxeni abaLevi abangoonyana bakaKohati. (2 Samuweli 6:6, 7; Numeri 4:15; 7:9; 1 Kronike 15:1-14) Bambi basenokubuza: ‘Kwakutheni ukuze uYehova amohlwaye ngokuqatha ngale ndlela? U-Uza wayezama nje ukukhusela iTyeya.’ Ngaphambi kokuba sifikelele kwizigqibo ezingachananga, makhe siqwalasele ezinye zeenkcukacha eziluncedo.

19. Kutheni uYehova engenakuze enze ngokungekho sikweni?

¹⁹ Sifanele sikhumbule ukuba akunakwenzeka ukuba uYehova enze ngokungekho sikweni. (Yobhi 34:10) Ukwenjenjalo bekuya kuba kukungabi naluthando, yaye siyazi ngokusuka kufundisiso lwethu lweBhayibhile iyonke ukuba “uThixo uluthando.” (1 Yohane 4:8) Ukongezelela, iZibhalo zisixelela ukuba “ubulungisa nomgwebo yindawo emisiweyo yetrone [kaThixo].” (INdumiso 89:14) Ngoko ke, uYehova unokuyenza njani into engekho sikweni? Ukuba ebeya kwenjenjalo, ebeya kuba utyeshela iziseko zolongamo lwakhe.

20. Ziziphi izizathu ezibangela ukuba u-Uza abe wayesazi ngemithetho ephathelele iTyeya?

²⁰ Khumbula ukuba u-Uza wayefanele ukuba uyawazi uMthetho. ITyeya yayinxulumene nobukho bukaYehova. UMthetho watsho ngokucacileyo ukuba nabani na ongagunyaziswanga akafanele ayichukumise, yaye watsho ngokucacileyo ukuba nabani na owutyeshelayo wayeya kohlwaywa ngokufa. (Numeri 4:18-20; 7:89) Ngoko ke, ukufuduswa kwaloo bhokisi ingcwele kwakungeyonto efanele ithatyathwe lula. Kubonakala ukuba u-Uza wayengumLevi (nangona wayengenguye umbingeleli), ngoko ke wayefanele ukuba wayewazi uMthetho. Ngapha koko, kwiminyaka ethile ngaphambilana iTyeya yayifuduselwe kwindlu kayise ukuze igcinwe khona. (1 Samuweli 6:20–7:1) Yayihleli apho kangangeminyaka enokuba ngama-70, de uDavide wakhetha ukuyifudusa. Ngoko ke, ukususela ebuntwaneni, kufanele ukuba u-Uza wayeyazi imithetho ephathelele iTyeya.

21. Kwimeko kaUza, kutheni kubalulekile ukukhumbula ukuba uYehova ubona oko kusentliziyweni?

²¹ Njengokuba kuchazwe ngaphambilana, uYehova uyakwazi ukubona okusentliziyweni. Ekubeni iLizwi lakhe lisithi okwenziwa ngu-Uza ‘sisenzo sokungamhloneli,’ kusenokwenzeka ukuba uYehova wabona uphawu lokuzingca olungachazwanga ngokungqalileyo kule ngxelo. Ngaba u-Uza wayengumntu okhukhumeleyo, owayeqhele ukugabadela? (IMizekeliso 11:2) Ngaba ukukhokela iTyeya phambi kwabantu eyayigcinwe kokwabo abantu bengazi kwamenza wanekratshi wazibona ebalulekile? (IMizekeliso 8:13) Ngaba u-Uza wayengenalukholo kangangokuba wacinga ukuba uYehova wayengenakukwazi ukuzinzisa ityeya engcwele eyayifuzisela ubukho Bakhe? Enoba imeko yayinjani na, sinokuqiniseka ukuba uYehova wenza okufanelekileyo. Kusenokwenzeka ukuba wabona nto ithile entliziyweni kaUza eyambangela ukuba amgwebe ngelo xesha.—IMizekeliso 21:2.

Isizathu Esiqinileyo Sokuba Nentembelo

22. Ubulumko bukaYehova bubonwa njani kwisibakala sokuba iLizwi lakhe maxa wambi lizishiya iinkcukacha ezithile?

²² Ubulumko bukaYehova obungenakulinganiswa bubonakala kwinto yokuba maxa wambi eLizwini lakhe azichazwa ezinye iinkcukacha. Ngaloo ndlela uYehova usinika ithuba lokubonakalisa ukuba nentembelo kuye. Ukusuka koko sikufundileyo, ngaba alicaci elokuba sinezizathu ezivakalayo zokuyamkela imigwebo kaYehova? Ewe, xa sifunda iLizwi likaThixo ngentliziyo enyanisekileyo sinengqondo ephangaleleyo, sifunda okuninzi gqitha ngoYehova ukuze siqiniseke ukuba usoloko esenza okusesikweni nokulungileyo. Ngenxa yoko, ukuba ezinye iingxelo zeBhayibhile zisibangela sibe nemibuzo esingakwaziyo ukuyiphendula ngokucacileyo okwangoku, masibe nentembelo epheleleyo kuYehova yokuba wenza okufanelekileyo.

23. Sinokuba nayiphi intembelo ngoko uYehova aza kukwenza kwixesha elizayo?

²³ Sinokuba nentembelo efanayo ngokuphathelele izinto uYehova aza kuzenza kwixesha elizayo. Ngenxa yoko, sinokuqiniseka ukuba xa egweba ngembandezelo enkulu esondela ngokukhawuleza, akasayi “kulitshayela ilungisa kunye nongendawo.” (Genesis 18:23) Uthando analo ngobulungisa nokusesikweni alusayi kuze lumvumele ukuba enjenjalo. Kwakhona sinokuba nentembelo epheleleyo yokuba kwihlabathi elitsha elizayo, uya kuzanelisa zonke iintswelo zethu ngeyona ndlela ifanelekileyo.—INdumiso 145:16.

[Imibhalo esemazantsi]

Ngaba Usakhumbula?

• Ziziphi izizathu esinazo ezibangela ukuba siyamkele imigwebo kaYehova?

• Yintoni enokusinceda ukuze sikuphephe ukufikelela kwizigqibo ezingachananga ngokunikela kukaLote ngeentombi zakhe kwihlokondiba elalinomsindo?

• Ziziphi iinkcukacha ezinokusinceda siqonde isizathu sokuba uYehova ambulale u-Uza?

• Sinokuba nayiphi intembelo ngoko uYehova aza kukwenza kwixesha elizayo?