Iphumelela Kangakanani Indlela Enincokolisana Ngayo?
“ILETA Yothando Evela Kumntu Oneminyaka Engama-60 Ubudala.” Le yindlela olwabizwa ngayo ukhuphiswano olwenziwa yibhanki yaseJapan kwiminyaka embalwa edluleyo. Olu khuphiswano lunamabhaso lwabongoza abemi baseJapan abaneminyaka engaphezu kwama-50 nengama-60 ubudala ukuba bathethe bophele “ngendlela abavakalelwa ngayo” ngamaqabane abo. Omnye owayekolu khuphiswano wabhala wathi: “Usenokundihleka, kodwa ndiza kuzisola ukuba andikuxelelanga le nto: Enkosi ngokutshata nam.”
Ukuvakalisa indlela ubani avakalelwa ngayo bekusoloko kungqubana nezithethe ezininzi kuquka nezabantu abathile baseMpuma. Kodwa ngabantu abangaphezu kwama-15 000 abaye bangenelela kolu khuphiswano. Lwaba ngundaba-mlonyeni kangangokuba, kwaphinda kwenziwa olunye kwaza kwapapashwa iincwadi ezazisekelwe kwezo leta. Oku kubonisa ukuba abantu bakufuna ngamandla ukuchaza indlela abawathanda ngayo amaqabane abo ngokusuka kwimbilini yabo. Noko ke, abanye abakwenzi oko. Kutheni? Kusenokwenzeka ukuba kufuna umgudu nobuchule ukuze abantu abancokola nabo—kwanamaqabane abo—bayiqonde indlela abavakalelwa ngayo.
UHitoshi Kato obhale incwadi ethetha ngomhlala-phantsi uthi, kubantu abadala abatshatileyo, ubukhulu becala uqhawulo-mtshato luphenjelelwa ngabafazi ngenxa yokuba nenqala elendele kangangeminyaka. Uthi: “Kodwa, kwenziwa nayinto yokuba abantu abatshatileyo abazithethi iingxaki abajamelana nazo.”
Xa ithabatha umhlala-phantsi, indoda inokubamb’ ongezantsi xa umfazi wayo eyinika amaphepha oqhawulo-mtshato. Kwiminyaka emininzi kusenokwenzeka ukuba aba batshatileyo abazange bakhe bathethe ngeemvakalelo zabo. Indoda nomfazi basenokuncokola ngendlela abavakalelwa ngayo kodwa bengakwazi ukugcina loo ncoko iyeyakhayo. Kunokuba bakhe ulwalamano olusondeleyo, bazifumanisa bexambulisana rhoqo.
Amadoda nabafazi banokukusingatha njani ngoxolo ukwahluka kwabo ngezimvo baze bathethe ngeemvakalelo zabo ngemvisiswano? Kusenokubangel’ umdla ukwazi ukuba amacebiso asebenzisekayo afunyanwa kungekhona kwincwadi yakutshanje yomntu ocebisa ngemitshato, kodwa kwincwadi yakudala eye yagqalwa njengexabisekileyo—iBhayibhile.