Imfundiso YeBhayibhile Yakha Ukholo

OMNYE umzalwana owayekwiklasi ye-122 yeSikolo seBhayibhile seWatchtower saseGiliyadi wathi: “Bekulilungelo elingathethekiyo ukuchitha iinyanga ezintlanu sifunda ngeengcamango zoMdali wethu nokubona izinto ngendlela azibona ngayo!” Umhla kaMatshi 10, 2007, awusayi kuze ulibaleke kumalungu angama-56 ale klasi, awayeza kuqalisa inkonzo yawo yobuvangeli basemazweni kumazwe angama-26 athunyelwe kuwo.

Emva kokwamkela ngokufudumeleyo abaphulaphuli ababengama-6 205, uTheodore Jaracz, olilungu leQumrhu Elilawulayo wathi: “Siqinisekile ukuba ngokubakho kwenu kolu cwangciso niza komelezwa ngokomoya nokholo lwenu lwakheke.” Wazitshayelela kakuhle izithethi ezine ezaziza kunceda abo baphumeleleyo ngokhuthazo nesiluleko seBhayibhile ukuze baphumelele kwizabelo zabo.

Ukukhuthazwa Ukwakha Ukholo Lwabanye

ULeon Weaver, ilungu leKomiti Yesebe LaseUnited States, wanikela intetho enomxholo othi “Qhubekani Nisenza Okuhle.” Wakhumbuza abo bafundi ukuba ngamnye kubo wayechithe iminyaka eli-13 kwinkonzo yexesha elizeleyo ngokomlinganiselo, befundisa abanye imfundo yeBhayibhile eyakha ukholo. Wathi: “Lo ngumsebenzi omhle kuba uquka ukusindisa ubomi babantu, ibe okona kubaluleke ngakumbi, ngumsebenzi omhle kuba uzukisa uBawo wethu wasezulwini, uYehova.” Emva koko wakhuthaza abo baphumeleleyo ukuba baqhubeke ‘behlwayela umoya’ yaye ‘bangayeki ukwenza okuhle.’—Galati 6:8, 9.

UDavid Splane, olilungu leQumrhu Elilawulayo, wadlulisela izikhumbuzo eziluncedo njengoko wayephuhlisa umxholo othi “Qinisekisani Ukuba Nihlaba Nikhangele.” Wakhuthaza aba bavangeli basemazweni batsha esithi ukuze baqalise kakuhle kwizabelo zabo bamele benze ezi zinto zilandelayo: “Hlalani ninesimo sengqondo esihle. Ningenzi izigqibo ngokudyuduzela. Yibani nobuhlobo. Ningathandi ukugxeka. Thobekani nize nibahlonele abazalwana bezo ndawo niya kuzo.” Waza woleka esithi: “Ukwehla nje kwenu kwinqwelo-moya, ningaphozisi maseko, ibe ngamana uYehova angasikelela ezo nyawo zenu zintle njengoko nisisa ‘iindaba ezilungileyo zento elunge ngakumbi’ ebantwini.”—Isaya 52:7.

ULawrence Bowen ongumhlohli wesi sikolo saseGiliyadi wanikela intetho enomxholo othi, “Ilifa Eliqinisekisiweyo.” Wakhumbuza abo baphumeleleyo ukuba ukuqalwa kweSikolo saseGiliyadi ebudeni beMfazwe Yehlabathi II kwabangelwa kukuthembela ngokupheleleyo ekuzalisekeni kweLizwi likaYehova. (Hebhere 11:1; ISityhilelo 17:8) Ukususela ngoko, esi sikolo siye sanika abafundi ithuba lokomeleza ukholo lwabo. Ukholo olomeleleyo lwenza abo baphumeleleyo ukuba batyhalele phambili, ngenzondelelo bevakalisa inyaniso.

Omnye umhlohli waseGiliyadi, uMark Noumair, waxubusha umxholo obangel’ umdla othi “Nindikhumbuza Umntu Othile.” Wathetha ngomzekelo womprofeti uElisha, owabonisa ukholo nenkalipho kwisabelo sakhe. Esekela amazwi akhe kweyoku-1 yooKumkani 19:21, uMzalwan’ uNoumair wathi: “UElisha wayekulungele ukuhlengahlengisa ubomi bakhe, wazibekela bucala izinto awayezithanda, waza wavakalisa injongo kaYehova.” Wabancoma abo baphumeleleyo ngokuba naloo moya kaElisha waza wabakhuthaza ukuba baqhubeke benawo kwizabelo zabo ezitsha.

Ukholo Lwenza Ubani Abe Nenkululeko Yokuthetha

Ngoxa aba bavangeli batsha babesakha ukholo lwabo apho esikolweni, babeshumayela neendaba ezilungileyo kwabanye. Oku kwabangela ukuba babe namava amahle abaye bawabalisa baza balinganisa nendlela enzeka ngayo kwinxalenye eyayabelwe uWallace Liverance, naye ongumhlohli apho eGiliyadi. Umxholo wentetho yakhe owawusithi, “Sibonisa Ukholo Yaye Ke Ngoko Siyathetha,” wawubhekisela kumazwi ompostile uPawulos akweyesi-2 Korinte 4:13.

Wehla eshiyela iqonga uDaniel Barnes noCharles Woody, amalungu entsapho yaseBheteli awayedlan’ indlebe nabavangeli basemazweni nabo babesakuba ngabo. Olu dliwano-ndlebe lwabonisa indlela uYehova abanyamekela nabasikelela ngayo abo bamkhonza ngokuthembeka. (IMizekeliso 10:22; 1 Petros 5:7) Omnye umvangeli wasemazweni wathi: “Mna nomfazi wam sayibona indlela asinyamekela ngayo uYehova ngemfundo esayifumana eGiliyadi. Yalwakha ngokwenene ukholo lwethu. Ukholo lubalulekile kuba bonke abakhonzi bakaThixo, kuquka abavangeli basemazweni, bafikelwa zizilingo, iingxaki namaxhala.”

Qhubekani Nemfundo YeBhayibhile Eyakha Ukholo

Njengovutho-ndaba olufanelekileyo lolo cwangciso, uSamuel Herd, olilungu leQumrhu Elilawulayo, wathetha nabaphulaphuli ngomxholo othi “Qhubekani Nisakha Abazalwana Benu.” Yayiyintoni injongo yemfundo eyafunyanwa ngabo bafundi? UMzalwan’ uHerd wathi kubo: “Injongo ibisoloko ikukunifundisa indlela yokusebenzisa ulwimi lwenu ukudumisa uYehova, ukufundisa inyaniso yakhe kwabanye apho nithunyelwe khona, nokwakhana elukholweni.” Noko ke, wakhumbuza abo bafundi ukuba ulwimi lunokusetyenziswa nakwizinto ezingakhiyo. (IMizekeliso 18:21; Yakobi 3:8-10) Wakhuthaza abafundi ukuba baxelise umzekelo kaYesu kwindlela abalisebenzisa ngayo ulwimi lwabo. Ngesinye isihlandlo, emva kokuphulaphula uYesu, abafundi bakhe bathi: “Bezingavuthi na iintliziyo zethu . . . njengoko ebesivulela ngokupheleleyo iZibhalo?” (Luka 24:32) UMzalwan’ uHerd wathi: “Ukuba nithetha izinto ezakhayo niya kuzichukumisa iintliziyo zabazalwana noodade kwisabelo senu.”

Emva koko, banikwa izidanga zabo, kwaba sele kufundwa incwadi yabo eyayinamazwi ombulelo. Yayisithi: “Siziva sinembopheleleko enkulu yokusebenzisa oko sikufundileyo ukuze siphumeze izabelo zethu ngokuthembeka. Njengoko silungele ukuya eziphelweni zehlabathi, sithandazela ukuba imigudu yethu ibe yimpumelelo ekudumiseni uMyaleli wethu Ozukileyo, uYehova uThixo.” Abo babekho batsho ngentswahla yezandla. Ewe, olu cwangciso lwabaphumeleleyo lwakha ukholo lwabo bonke ababelapho.

[Amagama acatshulweyo akwiphepha 17]

“Ukuba nithetha izinto ezakhayo niya kuzichukumisa iintliziyo zabazalwana noodade kwisabelo senu”

[Ibhokisi ekwiphepha 15]

INKCAZELO NGABAFUNDI

Inani lamazwe abavela kuwo: 9

Inani lamazwe abathunyelwe kuwo: 26

Inani labafundi: 56

Umlinganiselo wobudala: 33,4

Umlinganiselo weminyaka besenyanisweni: 16,8

Umlinganiselo weminyaka bekwinkonzo yexesha elizeleyo: 13

[Umfanekiso okwiphepha 16]

Iklasi Ye-122 Yabaphumelele KwiSikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukusa kolungasemva, yaye amagama adweliswe ukusuka ekhohlo ukusa ekunene kuluhlu ngalunye.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.