Abaphumelele Kwiklasi Ye-126 YaseGiliyadi

Indlela Yokuba Ngumthunywa Wevangeli Ophumelelayo

INYAMBALALA yabantu abanemincili yathontelana kwiZiko Lemfundo LeWatchtower elisePatterson, eNew York. UMgqibelo, kaMatshi 14, 2009, wawulusuku lokuthwesa izidanga abafundi abaphumelele kwiklasi ye-126 yeSikolo seBhayibhile seWatchtower saseGiliyadi. Aba bafundi babeza kuthunyelwa kumazwe angama-22 ukuze baye kushumayela iindaba ezilungileyo zoBukumkani bukaThixo.—Mateyu 24:14.

Babesandul’ ukugqiba uqeqesho lweenyanga ezintlanu lokufundiswa iBhayibhile olwenzelwe ukubanceda babengabathunywa bevangeli abaphumelelayo. Usuku lothweso zidanga lwabanika ithuba lokugqibela lokuphulaphula njengeqela iziluleko zokubanceda baphumelele.

UAnthony Morris, olilungu leQumrhu Elilawulayo lamaNgqina kaYehova nowayengusihlalo wocwangciso wachaza ukuba iSikolo saseGiliyadi saqala ukuqeqesha abathunywa bevangeli ngowe-1943. Ukususela ngoko abathunywa bevangeli baye baba negalelo elikhulu kumsebenzi wokushumayela iindaba ezilungileyo.

Usihlalo wathi nangona ababhali nabaFarisi babebajongela phantsi abafundi bakaYesu besithi “babengafundanga yaye bengazinto,” abo bachasi baqonda ukuba ukuthetha kwabo phandle kwakubangelwa kukuba babehamba noYesu. (IZenzo 4:13 King James Version) Uqeqesho olufunyanwa ngabo baphumeleleyo lubenza bakwazi ukuthetha phandle.

URobert Ciranko oncedisa iKomiti Yokubhala yeQumrhu Elilawulayo wathetha ngomxholo othi “Ungakhethi Buso.” Wathi abafundi babeza kudibana nabantu beenkcubeko namasiko angafaniyo nawabo. Kodwa ukushumayela kwabo bantu akuyi kuba yingxaki ukuba abafundi baxelisa uYehova. IZenzo 10:34 zithi “uThixo akakhethi buso” into ethetha ukuba akukho mntu ubhetele kunabanye emehlweni akhe. (IZenzo 10:35) UMzalwana uCiranko wathi “niya kuphumelela ukuba nixelisa uThixo nize nijonge wonke umntu okwintsimi yenu njengonokwamkeleka kuye.”

“Ninazo Izinto Ezifunekayo Ukuze Niphumelele”

Ingabula zigcawu yentetho kaSamuel Herd weQumrhu Elilawulayo yayisithi “abanye bathi inkamela imbi, kodwa ke inayo yonke into efunekayo ukuze iphile entlango.” Ngendlela efanayo abathunywa bevangeli banayo yonke into efunekayo ukuze baphumelele kwizabelo zabo. Kukho izinto ezintlanu eziya kubanceda.

1. Ukuthanda uYehova. (Mateyu 22:37, 38) Abafundi sele bebonisile ukuba bayafuna ukukhonza uYehova.

2. Ulwazi abanalo ngeLizwi likaThixo. Inkamela isebenzisa iqhuma layo elisemqolo njengovimba wokutya kwayo. Nakuba kunjalo ayiyeki ukutya kuba ithembele ekutyeni ekugcinileyo. Nabathunywa bevangeli abafanelanga bathembele kwizinto abazifunde kwisikolo saseGiliyadi kuphela kodwa bafanele baqhubeke bezondla ngokomoya.

3. Ukuthanda abantu. (Mateyu 22:39) Abafundi banovelwano ebantwini.

4. Ukuzincama. (INdumiso 110:3) Xa abathunywa bevangeli bediniwe uYehova ubanika amandla.—Isaya 40:29.

5. Amandla Obutsha. Kanye njengokuba inkamela ithwala abantu abanqumla intlango, umthunywa wevangeli kusenokufuneka “athwale” omnye uKristu onokholo olubuthathaka. Loo nto ifuna babenamandla, kodwa ke abathunywa bevangeli basenawo amandla obutsha.

Ezinye Iimbalasane Zocwangciso

UMichael Burnett ongumhlohli waseGiliyadi wathi iiamangile zezinye zezipho uYakobi awazithumela kumlawuli waseYiputa. (Genesis 43:11) Iiamangile zinesondlo. Abafundi baye bafunda izinto ezininzi eziza kondla ukholo lwabo njengeeamangile. Phakathi kwezinto abafanele bangazilibali abafundi kukubaluleka kokwaneliseka zizinto ezilungiselelwe nguYehova nokuthanda iindawo ezintsha abaza kuhlala kuzo.

UMark Noumair naye ongumhlohli waseGiliyadi, wafanisa iLizwi likaThixo ‘nengxowa ezele ubulumko.’ (Yobhi 28:18) Kufuneka sizisebenzise izinto ezikuyo. Ukuba izinto azibahambeli njengoko bebelindele abafundi bafanele bacinge ngompostile uPawulos. Abafundi bakaYesu bamthumela kwidolophu yakowabo iminyaka esithoba. Kunokucinga ukuba ‘njengesitya esinyuliweyo’ wayefanele akhonze kwiindawo ezithile, uPawulos wayezibhokoxa kuzo zonke iindawo awayesabelwa kuzo. (IZenzo 9:15, 28-30) Kusenokubanzima maxa wambi ukwenza izinto esizikhethelwa nguYehova. Omnye umntu owasamkelayo isabelo sakhe nguYonatan. Wamxhasa uDavide esakuqonda ukuba wayekhethwe nguYehova ukuba abe nguKumkani.

Kwintetho ethi “Abakhonzi bakaThixo Bathetha Ngesibindi,” nalapho abafundi babelinganisa amava abawafumana xa babeshumayela ngoxa besesikolweni. Abaninzi kubo baqalisa izifundo zeBhayibhile. Kwalandela intetho enomxholo othi “Niqeqeshwe Yintlangano KaYehova” ekwakudliwan’ indlebe kuyo nabathunywa bevangeli abathathu abangamagqala. Ngamnye kubo wachaza indlela aqeqeshwe ngayo ukuze akwazi ukusebenzisana nentlangano kaThixo.

“Yiba Ngumthunywa Wevangeli Owonwabileyo”

UGerrit Lösch, naye olilungu leQumrhu Elilawulayo, walandela ngentetho eyayingundoqo kolo cwangciso ethi, “Yiba Ngumthunywa Wevangeli Owonwabileyo.” Wathi izinto ezininzi ezithandwa ngabantu azibenzi bonwabe. (IMizekeliso 14:13; INtshumayeli 2:10, 11) Ulonwabo lokwenene lufumaneka ngokwenza ukuthanda kukaThixo, nakuba kungasoloko kulula. Abafundi bekufuneka bazibhokoxe kwesi sikolo saseGiliyadi, kodwa baye bafumana ulwaneliseko.

Ziliqela izinto eziwenza onwabe amaKristu. Anqula uThixo owonwabileyo. (INdumiso 33:12; 1 Timoti 1:11) Aphila kwiparadesi yokomoya, yaye iBhayibhile ithembisa ukuba kungekudala wonke umhlaba uza kuba yiparadesi yokoqobo. Ayayazi injongo yobomi—ekukukhonza uYehova nokumdumisa. Ukongezelela koko, ayathandwa nguYehova noYesu.

Isithethi solek’ umsundulo sisithi: “Niya konwaba, ukuba nifunda ukwaneliseka.” Enye into enokunenza nonwabe kukuthanda abantu nokuthandwa ngabo. Zibetheni ngoyaba iimpazamo zabanye kunokuba zibe yeyona nto nithetha ngayo. Benzeleni izinto ezintle abanye nincede ababuthathaka nize nibabalisele ngezinto ezintle ezenzeka kubomi benu. (INdumiso 41:1, 2; IZenzo 20:35) Ulonwabo lufumaneka ngokuzibhokoxa kumsebenzi wokushumayela.—Luka 11:28.

Umzalwan’ uLösch waqukumbela ngelithi: “Hambani niye kuba ngabathunywa abonwabileyo, nizonwabise ngomlinganiselo ofanelekileyo kodwa nikhumbula ukuba eyona nto ibalulekileyo kukudumisa uThixo wethu onoyolo, uYehova nokwenza abanye bonwabe.”

Emva kokudlulisela imibuliso evela kumazwe amaninzi, uAnthony Morris wabanika iidiploma zabo abafundi. Emva koko, omnye wabafundi wafunda ileta ababeyibhalele iQumrhu Elilawulayo, bebulela ilungelo lokufunda kwesi Sikolo saseGiliyadi.

Xa wayequkumbela usihlalo wathi “amalungu nemisipha” adibanisa umzimba afuzisela amalungiselelo asetyenziswa “likhoboka elithembekileyo neliyingqondi” ukuze londle yaye lalathise abantu bakaYehova. (Kolose 2:18, 19; Mateyu 24:45) Ukuba abo baphumelele kwesi sikolo saseGiliyadi bayasebenzisana nabameli abamiselwe nguThixo, baya kubufeza ngokupheleleyo ubulungiseleli babo.—2 Timoti 4:5.

[Ibhokisi ekwiphepha 30]

INKCAZELO NGABAFUNDI

Inani lamazwe abavela kuwo: 6

Inani lamazwe abathunyelwe kuwo: 22

Inani labafundi: 56

Inani lezibini ezitshatileyo: 28

Umlinganiselo wobudala: 32.8

Umlinganiselo weminyaka besenyanisweni: 17.9

Umlinganiselo weminyaka bekwinkonzo yexesha elizeleyo: 13.5

AMAZWE ABATHUNYELWE KUWO

Abafundi abaphumeleleyo bathunyelwe eBenin, eBolivia, eBulgaria, eBurkina Faso, eCameroon, eCosta Rica, eGhana, eGuatemala, eHonduras, eKenya, eLiberia, eMadagascar, eMozambique, eMzantsi Afrika, eNicaragua, ePanama, eParaguay, ePeru, eRomania, eSierra Leone, eTogo, naseUganda.

[Umfanekiso okwiphepha 31]

Abafundi Abaphumelele Kwiklasi Ye-126 YeSikolo SeBhayibhile SeWatchtower SaseGiliyadi

Kuqalwa ukusuka kuluhlu olungaphambili ukusa kolungasemva, yaye amagama adweliswe ukusuka ekhohlo ukusa ekunene kuluhlu ngalunye.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.