Ukufuna Izifundo ZeBhayibhile Ngenyameko
1 Kukho ubungqina obandayo bokuba eli hlabathi lidala lisondela esiphelweni. (2 Tim. 3:1-5) Kuthetha ntoni oku? Kuthetha ukuba ubomi babantu busengozini. Noko ke, sinawo amandla okunceda abathile basinde. (IMize. 3:27) Ngenxa yoku sifanele senze umgudu wokuqalisa nokuqhuba izifundo zeBhayibhile ngenyameko.
2 Kuninzi okuye kwaphunyezwa kukusasazwa koncwadi lwethu olusekelwe eBhayibhileni. Kodwa oko abantu bakufuna kakhulu kukuncedwa ngesifundo seBhayibhile sekhaya esiqhutywa rhoqo. Singabanceda njani bakubone oko?
3 Sinokuphakamisa imibuzo exhalabisa inkoliso yabantu. Loo mibuzo inokusekelwa kwimibandela enjengesizathu sokuba imilinganiselo yokuziphatha iwohloke, isizathu sokuba ubomi bentsapho bungazinzi, isizathu sokuba ugonyamelo nolwaphulo-mthetho lusisisongelo, isizathu sokuba uThixo oluthando avumele ezi meko zikhoyo, njalo njalo. Yazi imibandela neziganeko abanomdla ngokukhethekileyo kuzo abantu abakwintsimi yakho. Nikela iimpendulo ezicacileyo zeBhayibhile kule mibuzo. Babonise indlela uncwadi esiluhambisayo olunokubanceda ngayo bafunde oko iBhayibhile ikuthethayo ngale mibuzo nangeminye imibandela ebalulekileyo esichaphazelayo sonke.
4 Kubalulekile ukumbandakanya umninimzi kwincoko. Kuphaphele ukuqonda oko kumxhalabisayo. Yakha incoko yakho ngezinto anomdla kuzo nezimxhalabisayo. Tsalel’ ingqalelo kwincwadi, kwincwadana enemifanekiso, kwiphephancwadi, okanye kwiphecana elichaza isicombululo seBhayibhile kwiingxaki zoluntu. Ngaphambi kokuba uhambe, phakamisa umbuzo omnye okanye emibini okholelwa ukuba iya kumbangela alulangazelele utyelelo lwakho olulandelayo. Xa ubuyela, qiniseka ukuba uyamkhumbuza ngale mibuzo, wandule usebenzise uncwadi ukuze umncede afumane iimpendulo zeBhayibhile.
5 Ukuqalisa kwethu izifundo zeBhayibhile nokuziqhuba rhoqo kunokubuguqula ubomi babantu. Simele sibonakalise umdla wokwenene kwabo sidibana nabo entsimini okanye sinikela kubo ubungqina obungacwangciswanga. Kufuneka ulungiselele kakuhle ukuze uvuse umdla wabo ngokuqhubekayo. Kufuneka umonde ukuze uqhubeke ubuyela de ufikelele ekubeni ngobondla ngokuthe rhoqo ngokomoya. Kufuneka ube nomdla onothando ebantwini. Simele ngokunyanisekileyo sifune ukubanceda basinde kwintshabalalo esondelayo. Umsebenzi wethu wezifundo zeBhayibhile ufanele ube yinto esiyithandazela ngokuthe rhoqo nangenyameko.—1 Tes. 5:17.
6 Siceba ukupapasha izinto eziliqela zokunikhumbuza kuBulungiseleli Bethu BoBukumkani ebudeni beenyanga ezimbalwa ezizayo eziya kunceda abavakalisi ngokubhekele phaya ekuqhubeni izifundo zeBhayibhile ezinenkqubela. Ncedani nikhumbule ukuba, nanini na kunokwenzeka, izifundo zeBhayibhile zifanele ziqhutywe kwincwadi ethi Unokuphila Ngonaphakade. Impapasho elandelayo efanele ifundwe yincwadi ethi Ukumanyana Ekunquleni. (Ncedani nibone iSingxobo Semibuzo, kmXO 5/86.)
7 Kukhuthaza kakhulu ukubona ukuba abantu abamalunga nesigidi baye bangabafundi ababhaptiziweyo kwiminyaka emithathu edluleyo. (Mat. 28:19, 20) Ngoku siqhuba izifundo zeBhayibhile ezimalunga nezigidi ezine ezinesiqingatha nyanga nganye, yaye oku kubonisa inkxalabo yethu ngobomi babanye abantu. Kuthekani ngawe? Ngaba ubusenza umgudu ngenyameko ukuze ube nesabelo kulo msebenzi wezifundo zeBhayibhile zamakhaya? Khumbula, ubomi bethu nobabanye abantu buxhomekeke ekuthembekeni kwethu kule nkalo.—Hez. 3:17-19.