Nceda Abanye “Bazigcine Izinto Ezibhaliweyo”
1 ‘Ukuweva’ amazwi eziprofeto zencwadi yeSityhilelo akwanele. Ukuze angenelwe ngokuzeleyo, ubani umele ‘agcine’ okubhaliweyo kuzo. (ISityhi. 1:3) Ukunikela uncwadi linyathelo nje lokuqala lokwenza abafundi. Sakuba sibafumene abanomdla abakulungeleyo ukuphulaphula, sifanele sibuyele ngokukhawuleza sibancede bafunde okungakumbi. Singathetha ngantoni xa sibuyela?
2 Ukuba kutyelelo lwakho lokuqala ubuthethe ngabakhweli-mahashe abane, usenokuqalisa incoko yakho ngale ndlela:
◼ “Ngaphambili sithethe ngencwadi yeSityhilelo nendlela iziprofeto zayo ezizaliseka ngayo namhlanje kwiziganeko zehlabathi. ISityhilelo isahluko 6 saxela kwangaphambili ngokuphalisa kwabakhweli-mahashe abane bokomfuziselo, okwakuya kuphumela kugonyamelo nokubandezeleka okukhulu emhlabeni. Oku sikubonile kusenzeka sijongile. Abaninzi bazibuza ukuba oku kubandezeleka kuya kuphela nini ukuze sinandiphe ubomi kwihlabathi elitsha elinoxolo. Luthini olwakho uluvo? [Vumela impendulo.] Abafundi bakaYesu babenomdla kwimpendulo yalo mbuzo.” Funda uMateyu 24:3, apho kubuzwa lo mbuzo, kunye nendinyana 34, apho uYesu aphendula khona. Ukuba usabela kakuhle, mcacisele ngokubhekele phaya ngemihla yokugqibela.
3 Ukuba kutyelelo lokuqala ubuxubushe ngoBukumkani bukaThixo, usenokugqiba kwelokuba uqhubeke ngokubuza lo mbuzo:
◼ “Ngokoluvo lwakho, luhlobo olunjani lorhulumente ofunekayo oya kwanelisa iintswelo zoluntu? [Vumela impendulo. Funda uYeremiya 10:23.] Njengokuba ubona, uThixo wayengafuni ukuba umntu alawule iimeko zakhe. Inkoliso yeengxaki zethu ibangelwa kukuzama ukwenza oko ngaphandle koncedo lukaThixo. UBukumkani bukaThixo kuphela korhulumente onokusinika esikufunayo.” Tyhila kwiphepha 89 kwincwadi ethi Ukuqiqa, uze uxubushe izibhalo phantsi komxholwana wesine. Qhubeka nengxubusho ngokucacisa isizathu sokukholosa ngokupheleleyo ngoThixo.
4 Usenokuthanda ukuzama oku ukuze uqalise incoko esekelwe eZibhalweni:
◼ Bonisa umfanekiso okwiphepha 302 lencwadi ethi Incopho YeSityhilelo, uze uwuchaze ngokuthi: “Uluntu luya kuhlala kwiimeko ezinje xa ukuthanda kukaThixo kusenziwa emhlabeni njengasezulwini. Noko ke, abanye boyikela ukuba iimeko ezimbi zingabuya zibekho. Akunakwenzeka oko kuba bonke abangendawo baya kube bengekho.” Funda INdumiso 37:10, 11. Cela umninimzi alisebenzise ngokuyingenelo ucwangciso lwethu lwesifundo seBhayibhile ukuze afunde okungakumbi.
5 Ukuba ubushiye iphecana elithi “Ubomi Kwihlabathi Elitsha Elinoxolo,” thetha ngomfanekiso ongaphandle uze ufunde isiqendu 1 phantsi komxholwana othi “Ubomi Kwihlabathi Elitsha LikaThixo.” Yandula ke uthi:
◼ “Ukuba sifuna ukuphila kwihlabathi elinje, kukho into ebalulekileyo esimele siyenze.” Funda isiqendu sokugqibela, uze uhambise incwadi ethi Incopho YeSityhilelo.
6 Ekubeni injongo yethu ikukuqalisa izifundo zeBhayibhile, kufuneka senze amabuyelo aphumelelayo. Wacwangcisele ixesha, uze ulungiselele kakuhle. Ngale ndlela ngokwenene sinokubanceda abantliziyo zinyanisekileyo.—ISityhi. 22:6, 7.