Sonke Masizukise UYehova NoNyana Wakhe
Indlela Abanokungenelwa Ngayo Bonke Abeza ESikhumbuzweni NgoAprili 8
1 Ngoobani namhlanje abanikwe ilungelo elikhethekileyo? Ngabo banemisebenzi ehlonelwayo lihlabathi. Noko ke, amaxesha amaninzi, imisebenzi yabo ikhawuleza ilityalwe. Kodwa kuthekani ngezenzo ezenza kungenelwe lonke uluntu? Siza kunikela ingqalelo kwesona senzo sibalaseleyo njengokuba sibhiyozela iSidlo SeNkosi Sangokuhlwa, emva kokutshona kwelanga ngoAprili 8, 2001.
2 Ngubani ofanelwe yeyona mbeko? IBhayibhile iyaphendula: “Ufanele, Yehova, . . . ukwamkela uzuko nembeko namandla, ngenxa yokuba wadala zonke izinto.” (ISityhi. 4:11) NjengoMdali, uYehova nguMlawuli onguMongami wendalo iphela. Ukufanelekela kwakhe ukuzukiswa akusayi kuze kuphele!—1 Tim. 1:17.
3 UYesu Kristu, uNyana kaThixo, wenza imisebenzi eya kuzisa iintsikelelo ezingasayi kuze ziphele kuluntu. Wamxelisa ngokugqibeleleyo uYise. (Yoh. 5:19) Ukuthobela kwakhe okungenachaphaza nenkonzo yokuthembeka zamenza ‘wakufanela ukwamkela amandla nobutyebi nobulumko nokomelela nembeko nozuko nentsikelelo.’ (ISityhi. 5:12) UYise wamzukisa ngokummisela njengoKumkani. (INdu. 2:6-8) Thina siza kuba nethuba lokuzukisa uYise noNyana njengokuba sibhiyozela iSidlo Senkosi Sangokuhlwa ngoAprili 8, 2001.
4 Kulusizi ukuthi, liqaqobana elingephi labantu embalini eliye lanika uYehova noNyana wakhe uzuko olubafaneleyo. Maxa wambi, kwanabantu bakaThixo bamandulo, amaSirayeli, inkonzo yabo kuYehova yayiba nguphela-sonwabe. Oku yayikukungabi nantlonelo okugqithiseleyo. (Mal. 1:6) Intlonelo efanelekileyo ifuna intobelo esekelwe eluthandweni nokubonisa uxabiso ngako konke oko asenzele kona uYehova noNyana wakhe. Ukunikela imbeko nentlonelo elolo hlobo kuthetha ukuba sibonisa uloyiko lobuthixo nentlonelo, ukuthobela uYehova noYesu kuzo zonke iindlela zethu. Ibandla lamaKristu lizabalazela ukufundisa nokunceda abanye benze okufanayo.
5 Isihlandlo Esikhethekileyo Sokubonisa Imbeko: Ukubhiyozela iSikhumbuzo yeyona ntlanganiso ibalulekileyo yabantu bakaYehova nyaka ngamnye. Wonke ubani onomnqweno wokukhonza nokuzukisa uYehova ufanele abekho. (Luka 22:19) Sicinga ukuba ukongezelela kumaNgqina akhutheleyo azizigidi ezi-6, abantu abanomdla baya kulandisa inani labaza kubakho libe ngaphezu kwezigidi ezili-14. Elinjani ukuba lihle ithuba lokuzukisa uBawo wethu wasezulwini! Ngoxa lo mbhiyozo ujoliswe kuYesu, imbeko nentlonelo ngoko akufezayo zizukisa uYise, owamthumayo.—Yoh. 5:23.
6 Yintoni esinokuyenza ukuze sixhase esi siganeko sikhethekileyo? Sinokunceda abasandul’ ukuba nomdla bangenelwe ngakumbi. Babongoze beze, yaye xa kuyimfuneko, bancede ukuze beze. Chaza injongo yale ntetho. Bazise kwabanye. Oko bakubonayo nabakuvayo kunokubashukumisela ukuba basithelele ekuzukiseni uYehova.
7 Musa ukuleya igalelo lolu cwangciso. Omnye umfundi waseyunivesithi wathi: “Ndiye ndaya eMithendelekweni amaxesha amaninzi ecaweni yam, kodwa lo wahluke mpela. Ndiyabona ukuba lo yile nto ixelwa yiBhayibhile, yaye ndicinga ukuba ninenyaniso.” Waqalisa ukuya rhoqo ezintlanganisweni yaye kungekudala wabhaptizwa.
8 Nceda Abasebatsha Benze Inkqubela: Baphawule abasebatsha abeza eSikhumbuzweni, uze ubatyelele ngokukhawuleza emva koko, ukuze wenze impinda ngezinto ezihlaziyayo abaye bazifunda nabaziphawulileyo. Baxelele ngezinye iintlanganiso, ezinokwandisa ulwazi lwabo lweBhayibhile. Ukwenza impinda yesahluko 17 sencwadi ethi Ulwazi, kumxholo othi “Fumana Unqabiseko Phakathi Kwabantu BakaThixo,” kuya kubabonisa uthotho lwamalungiselelo okomoya anikelwa libandla, malungiselelo lawo abanokuwafumana lula. Lungiselela ukuba babone ividiyo ethi Our Whole Association of Brothers ukuze bazibonele umanyano, uvuyo nenzondelelo yabantu bakaYehova!
9 Kubalulekile ukuba abo banomdla bafunde indlela yokubonisa uzuko nembeko kuYehova. Bachazele ukuba imithandazo esuka entliziyweni iyamkholisa uYehova yaye isoloko ilukhuthazo ngokomoya. (1 Yoh. 5:14) Usebenzisa isahluko 8 ukusa kwese-12 sencwadana enemifanekiso ethi Okufunwa NguThixo, chaza uhlobo lwehambo ezukisa uYehova. Ngokuxubusha oko kukwincwadana enemifanekiso ethi AmaNgqina KaYehova, iphepha 30-1, khuthaza abasebatsha bacinge ngamathuba okuzukisa uYehova ngokuthi babe nesabelo kumsebenzi wokushumayela.
10 Ukubonisa uxabiso ngedini likaYesu nangelungelo lokukhonza njengabafundi bakhe kuzukisa uYise yaye kuzisa iintsikelelo kwabanye. UYesu wathembisa: “Ukuba nabani na unga angandilungiselela, uBawo uya kumbeka yena.”—Yoh. 12:26.