“Ukuba Noxolo Nabantu Bonke”
1. Sisiphi isiluleko seBhayibhile esifanele sisisebenzise xa sidibana nabaninimzi abangayithandiyo into yokuba size emizini yabo?
1 Abantu bakaYehova bayaluthanda uxolo, kwaye nobulungiseleli bethu boboxolo. (Isa. 52:7) Noko ke, maxa wambi siye sidibane nabantu abangayithandiyo into yokuba siye emizini yabo. Yintoni eya kusinceda sibe seluxolweni kwiimeko ezinjalo?—Roma 12:18.
2. Kutheni kubalulekile ukuba sibe nengqiqo?
2 Yiba Nengqiqo: Nangona abanye besiba nomsindo kuba bengayifuni inyaniso, abanye basenokuba bacatshukiswa yenye into engenanto yakwenza nesigidimi sethu. Mhlawumbi size ngexesha elingafanelekanga. Umninimzi usenokuba unento emphazamisileyo. Kwanokuba ziindaba ezilungileyo ezimcaphukisayo, sifanele sikhumbule ukuba usenokuba ulahlekisiwe. (2 Kor. 4:4) Ukuba nengqiqo kuya kusinceda sihlale sizolile singacatshukiswa yindlela asabela ngayo.—IMize. 19:11.
3. Singabonisa njani ukuba simphatha ngembeko umninimzi?
3 Yiba Nembeko: Abantu abaninzi kwintsimi esishumayela kuyo baneenkolelo ezendeleyo. (2 Kor. 10:4) Banelungelo lokukhetha enoba baza kusiphulaphula okanye abazi kusiphulaphula kusini na. Enoba sele kutheni asifuni kube ngathi sizijongela phantsi iinkolelo zabo okanye sibenze bazive bebancinane. Ukuba sicelwa ukuba sihambe, simele sithobele.
4. Kuthetha ukuthini ukuthetha kakuhle?
4 Thetha Kakuhle: Enoba abantu bathetha rhabaxa, sifanele siphendule ngobulali nangembeko. (Kol. 4:6; 1 Pet. 2:23) Kunokuba sibe sixambulisana, masizame ukufumana izinto esivumelana ngazo. Mhlawumbi singazama ukuqonda izizathu zokuba bachase. Kunokuba sibe siphikisane nabo, maxa wambi kuhle ukuba siyivale incoko.—IMize. 9:7; 17:14.
5. Ziziphi iingenelo zokuba seluxolweni xa sikubulungiseleli?
5 Ukuba siseluxolweni, umninimzi unokukukhumbula oko, aze aphulaphule komnye umntu oza kushumayela kuye. (Roma 12:20, 21) Enoba uchasa kangakanani na, ngeny’ imini usenokuba ngumzalwana wethu. (Gal. 1:13, 14) Enoba umninimzi uba nomdla enyanisweni okanye akunjalo, siya kumzukisa uYehova size sizenze zithandeke iimfundiso zethu ukuba sihlala sizeyisa size sibe seluxolweni.—2 Kor. 6:3.