“Masiye Endlwini KaYehova”
1 UDavide wasabela ngolangazelelo kwisimemo esithi: “Masiye endlwini kaYehova.” (INdu. 122:1) ‘Indlu’ kaYehova, eyayifuziselwa yitempile, yayiyindawo yokuhlanganisana yabo babenomnqweno wokunqula uThixo oyinyaniso. Yayiyingcwele yonqabiseko noxolo. Namhlanje, ibandla lamaKristu ehlabathini lonke ‘liyindlu’ kaThixo, ‘liyintsika nesiseko sayo inyaniso.’ (1 Tim. 3:15) Onke amalungiselelo osindiso afumaneka ngeli jelo. Ngenxa yeso sizathu, zimele “zibe ngumsinga ukuya kuyo zonke iintlanga” ukuba zinqwenela ukunandipha iintsikelelo ezithenjisiweyo kulawulo loBukumkani bukaThixo.—Isa. 2:2.
2 Le ‘ndlu’ ibunjwe ngamabandla angaphezu kwama-69 000 kumazwe angama-229. Ehlabathini jikelele iingcango zeeHolo zoBukumkani zivuliwe, yaye kukho abasebenzi abanenzondelelo abangaphezu kwezigidi ezine abadlulisela esi simemo: “Yiza. . . . Lowo uthandayo, makawathabathe amanzi obomi ngesisa.” (ISityhi. 22:17) Abaninzi basivile esi sigidimi yaye basabela ngoxabiso. Abanye bachukumisekile kodwa abakezi endlwini kaYehova ukuze banxulumane nebandla lamaKristu. Abanjalo ‘banentswelo yokomoya’ enokwaneliswa ngamalungiselelo afumaneka ebandleni kuphela. (Mat. 5:3, NW) Siphila kumaxesha anomngcipheko, apho isiphelo sale nkqubo sisondela ngokukhawuleza. Isimo sengqondo sokungabi namdla okanye sokuzilazila sisenokuphumela kwingozi ebangelwa kukulibazisa. Kungxamisekile ukuba abantu bazabalazele ‘ukusondela kuThixo’ ngokusondela kwintlangano yakhe. (Yak. 4:8) Sinokubanceda njani?
3 Yalathisela Abanomdla Entlanganweni: Xa siqala ukudibana nabantu abanomdla, sifanele salathisele ingqalelo yabo entlanganweni. Ngoxa sisenokukwazi ukuzifumana izibhalo size sicacise iimfundiso ezisisiseko, olo lwazi aluveli kuthi. Yonke into esiyifundileyo ivela entlanganweni, ngejelo lodidi lomkhonzi osinika “ukudla ngexesha elifanelekileyo.” (Mat. 24:45-47) Kwasekuqaleni, abasebatsha bamele baqonde ukuba unqulo olunyulu aluphelelanga nje kuthi okanye kwibandla lasekuhlaleni; kukho ibutho labantu ehlabathini lonke elilungelelanisiweyo nelilelobuthixo elisebenza phantsi kolwalathiso lukaYehova.
4 Ulwalathiso esilufumanayo luvela kuYehova, othembise ukuba uya kusalathisa aze asifundise. (INdu. 32:8; Isa. 54:13) Ngokusisiseko le mfundiso isasazwa ngoncwadi lwethu. Ukuba sinokubanceda abanomdla bakhe uxabiso ngolu ncwadi, belugqala njengomthombo weemfundiso ezisindis’ ubomi, kunokwenzeka ngakumbi ukuba balufunde baze basisebenzise isigidimi salo kunokuba balulahle ngokukhawuleza. Sifanele sisoloko siluhambisa size silusebenzise olu ncwadi ngendlela eya kukhulisa intlonelo ngalo. Oku kufundisa abasebatsha ukuyixabisa intlangano nokuthembela kumalungiselelo ayo.
5 Yazisa abanomdla ukuba kukho indawo esisazulu ekuhlanganiswana kuyo kummandla wenu apho ifumaneka khona le mfundiso ngokuthe rhoqo. Banike ikhelingi yeHolo yoBukumkani namaxesha eentlanganiso. Chaza umahluko okhoyo phakathi kweentlanganiso zethu nezo zonqulo abasenokuba babekhe baya kuzo. Wonke ubani wamkelekile; akukho nkongozelo okanye ukubizwa kwemali. Nangona abalungiseleli abamiselweyo beqhuba ucwangciso, ngamnye unethuba lokuba nenxaxheba ngokunikela amagqabaza aze abe nesabelo kwiinxalenye zocwangciso. Iintsapho zamkelekile; kwiingxubusho zethu zeBhayibhile nabantwana bayaqukwa. Abalungiseleli bethu abanxibi ngubo okanye iimpahla ezikhethekileyo. IHolo yoBukumkani ilungiswe ngokufanelekileyo yaye ayinamakhandlela namifanekiso iqingqiweyo. Ngokuyintloko abo bezayo ngabemi baloo mmandla.
6 Yiba Nomdla Ngokuqhubekayo Kwizifundo ZeBhayibhile: Injongo eyintloko yesifundo seBhayibhile kukufundisa inyaniso yeLizwi likaThixo. Kwakhona sifanele sakhe uxabiso lwabo sifunda nabo ngentlangano kaYehova size sibenze bazi imbaluleka yokuba yinxalenye yayo. Umsebenzi omkhulu owenziwa nguYesu nabafundi bakhe kwinkulungwane yokuqala watsala abanyanisekileyo waza wabamanyanisa ukuba basebenze phantsi kwequmrhu elilawulayo. Kwimimandla apho kwakukho intsabelo entle, kwakubunjwa amabandla ukuze kunikelwe uqeqesho nemfundiso ngokuthe rhoqo. Abo babenxulumana nawo babesomelezwa ngokomoya, nto leyo eyayibanceda banyamezele ngamaxesha embandezelo. (Heb. 10:24, 25; 1 Pet. 5:8-10) Kumhla wethu yinjongo kaYehova “ukuba azihlanganisele zonke izinto kuye uKristu.” (Efe. 1:9, 10) Ngenxa yoko, ‘sinesizalwana’ ehlabathini lonke.—1 Pet. 2:17.
7 Isifundo seBhayibhile seeveki ngeeveki sifanele siquke imfundiso eya kunceda abo sifunda nabo bayixabise intlangano baze basebenzise amalungiselelo aya kubazisela usindiso. Chitha imizuzu embalwa veki nganye ubalisa okanye uchaza into ethile ephathelele intlangano nendlela esebenza ngayo. Usenokufumana iingongoma eziluncedo onokuthetha ngazo kwiMboniselo kaNovemba 1, 1984. Incwadana enemifanekiso ethi AmaNgqina KaYehova Kwinkulungwane Yamashumi Amabini nethi AmaNgqina KaYehova—Enza Ukuthanda KukaThixo Ngokumanyeneyo Zwenibanzi zixubusha ngeenkalo eziphambili zentlangano nendlela esinokungenelwa ngayo kuzo. Ukulungiselela ukuba abo sifunda nabo iBhayibhile babukele ivideo ethi Jehovah’s Witnesses—The Organization Behind the Name kuya kubenza bazibonele oko ikuphumezayo. Iingxelo namava akhethiweyo kwiYearbook asenokubonisa impumelelo kumsebenzi wethu kwamanye amazwe anezithethe ezingezizo ezethu. Kusenokusetyenziswa nezinye iimpapasho. Ekuhambeni kwethuba, ngokuqhubekayo chaza isizathu sokuba siye kwindlu ngendlu, injongo yeentlanganiso zethu, indlela esiwuxhasa ngayo umsebenzi wethu ngemali nendlela omi ngayo umsebenzi wethu ehlabathini lonke.
8 Ukuqhelana namanye amaNgqina kusenokubakhuthaza abasebatsha, nto leyo enokwenza banzi imbono yabo ngebandla. Ukuze oko kwenzeke, mema abanye abavakalisi ukuba babekho kweso sifundo ngamaxesh’ athile. Uthile osebandleni onemvelaphi efanayo okanye izilangazelelo ezifanayo nezo zalowo ufunda naye usenokongeza iinkalo ezintsha kwimbono yakhe. Mhlawumbi umdala usenokuhamba nawe ukuze aqhelane naye. Ukulungiselela ukuba umveleli wesiphaluka okanye inkosikazi yakhe ityelele lowo ufunda naye kusenokungqineka kuyintsikelelo yokwenene. Ukuba kukho amaNgqina ahlala kufutshane naye, ukuwaqhelanisa nalowo ufunda naye iBhayibhile kusenokumkhuthaza ngakumbi lowo ufunda naye ukuba aye kwiintlanganiso.
9 Khuthaza Abasebatsha Beze Kwiintlanganiso: Abasebatsha kufuneka baqonde indlela ekubaluleke ngayo ukubakho kwiintlanganiso. Zama ukukhuthaza umdla wabo. Bonisa amanqaku aya kugutyungelwa kwisifundo seMboniselo. Khankanya imixholo yeentetho zesidlangalala ezizayo. Balisa ngeembalasane zombandela oza kugutyungelwa kwiSikolo Sobulungiseleli Sobuthixo nakwiSifundo Sencwadi Sebandla. Vakalisa ezakho izimvo ngokuphathelele noko ukufundayo kwezi ntlanganiso nesizathu sokuba uvakalelwe kukuba kuyimfuneko ukubakho kuzo. Ukuba unako, mncede ngento yokuhamba. Ukumtsalela umnxeba ngaphambi kweentlanganiso kusenokumshukumisela ukuba abekho.
10 Xa lowo ufunda naye iBhayibhile ebakho kwiintlanganiso, menze azive amkelekile. Mazise kwabanye, kuquka nabadala. Ukuba uze kwintetho yesidlangalala, mazise kwisithethi. Mjikelezise abone iHolo yoBukumkani. Chaza injongo yekhawuntara yeencwadi neyamaphephancwadi, yeebhokisi zeminikelo, yethala leencwadi neyomxholo wonyaka. Mchazele ukuba iholo ayiphelelanga nje ekubeni yindlu yonqulo kodwa ikwasisazulu ekulungiselelwa kuso umsebenzi wokushumayela ekuhlaleni.
11 Chaza indlela iintlanganiso zethu eziqhutywa ngayo. Mbonise lowo ufunda naye iimpapasho esizisebenzisayo. Chaza ukuba iBhayibhile yincwadi yethu eyintloko esisikhokelo. Wonke ubani unokuba nenxaxheba, kuquka nabantwana abaselula. Chaza ukuba wonke umculo namazwi eengoma akumaculo ethu aqanjwa ngamaNgqina kaYehova ukuze asetyenziswe kunqulo lwethu. Tsalela ingqalelo kwiimvelaphi ezahlukahlukeneyo zabo bakhoyo. Yenza amagqabaza afanelekileyo ngomoya wobuhlobo nowokubuka iindwendwe. Lo mdla wobubele nowokunyaniseka usenokuba yeyona nkalo inamandla ekushukumiseleni lowo ufunda naye ukuba aphinde eze.
12 Isizathu Sokuba Bambi Besenokuthandabuza: Ngokufuthi, phezu kwako konke okwenzayo, bambi bayathandabuza ukusondela entlanganweni. Musa ukunikezela ngokukhawuleza. Zama ukuzibeka kwimeko yabo. Ukuza kuthi ga ngoku mhlawumbi abakayiqondi ngokwenene imfuneko yokuya kwinkonzo yonqulo ngaphandle kwaxa izizihlandlo ezikhethekileyo. Amalungu entsapho okanye izihlobo ezisondeleyo zisenokuba ziyabachasa. Basenokuba boyikiswa ngabamelwane abathetha izinto ezidimazayo. Kwakhona, basenokuba baphazanyiswa zizinto ezinxulumene nemicimbi yasekuhlaleni nokuzihlaziya. Basenokuzijonga ezi zinto njengemiqobo engenakoyiswa; kufuneka ubancede ukuze izinto bazijonge ngendlela efanelekileyo baze ‘bacikide izinto eziziincamisa.’—Fil. 1:10.
13 Nikela izizathu ezingokweZibhalo zokuzingisa. Gxininisa isibakala sokuba sonke siya kufuna ukukhuthazwa nokwakhiwa ngokomoya nto leyo esiyifumana ngokuhlanganisana kwethu. (Roma 1:11, 12) UYesu wakwenza kwacaca ukuba intshutshiso yentsapho ayisosizathu sibambekayo esinokusenza sirhoxobise. (Mat. 10:34-39) UPawulos wasikhuthaza ukuba singabi nazintloni ngokuzichaza ekuhleni njengabafundi bakaYesu. (2 Tim. 1:8, 12-14) Imisebenzi yobuqu nezinye iziphazamiso zimele zilawulwe; kungenjalo, ziba ngumgibe. (Luka 21:34-36) Abo bafuna intsikelelo kaYehova bafanele bazinikele ngomphefumlo uphela, bangaze babe mbaxa. (Kol. 3:23, 24) Ukubethelelwa koxabiso ngemigaqo yeBhayibhile elolo hlobo kusenokubavulela indlela ukuze benze inkqubela ngokomoya.
14 Iingcango Zivuliwe: Indlu kaYehova yonqulo oluyinyaniso iphakamile kunazo zonke ezinye. Nasi isimemo esivakaliswa kumazwe angama-229 jikelele ehlabathini: “Yizani . . . sinyuke siye entabeni kaYehova, . . . asiyalele iindlela zakhe, sihambe ngomendo wakhe.” (Isa. 2:3) Intsabelo efanelekileyo yabo basebatsha inokubusindisa ubomi babo. Ukwalathisela umdla wabo kwintlangano kaYehova yenye yeendlela ezibalaseleyo esinokubanceda ngazo.