Ukubuyela Sinenjongo
1 Xa ubuyela, ufanele uzabalazele ukusebenzisa isibhalo esiya kongezelela kulwazi lwaloo mntu ngombandela weBhayibhile obuwuxubushe kwixa elidluleyo.
2 Olunye usukelo lokubuyela apho ubuhambise khona amaphephancwadi kukuqalisa umzila wamaphephancwadi. Intshumayelo elula njengale inokuba nempumelelo:
◼ “Ndiyathemba ukuba ulithandile inqaku leMboniselo ebendikushiyele lona elicacisa isizathu sokuba sifanele simoyike uThixo. Namhlanje ndikuphathele inqaku lephephancwadi uVukani! elinalo mbuzo, ‘Kutheni Ubomi Bubufutshane Kangaka?’ Ngumbuzo omhle lo, akunjalo?” Usenokuqhubeka uthi: “Amazwi kaYesu adumileyo akuYohane 3:16 asinika ithemba lobomi obungunaphakade. Zithabathele eli phephancwadi ukuze likukhuthaze ngethemba eliqinileyo elinikelwa liLizwi likaThixo.” Yandula ke ucacise ukuba uza kubuya umphathele iinkupho ezilandelayo uze mhlawumbi uxubushe ngokubhekele phaya oko uThixo akuthembise uluntu oluthobelayo. Khumbula ukuba sihlandlo ngasinye usisa amaphephancwadi, usenokufaka ingxelo yebuyelo.
3 Ukuba uhambise inqaku elithi “Ihlabathi Elingenazimfazwe—Nini?” usenokuthi:
◼ “Bebuya kuba njani ubomi kulo mhlaba ukuba bezingayi kuphinda zibekho iimfazwe? [Vumela impendulo.] Makhe ndikubonise oko uThixo athembise ukukwenza.” Funda INdumiso 37:10, 11, uze uchaze ukuba kuya kuba njani na xa ukuthanda kukaThixo kusenziwa apha emhlabeni. Khumbuza lo mntu ngoko uYesu wakufundisa abalandeli bakhe ukuba bakuthandazele njengoko kubhalwe kuMateyu 6:9, 10. Mncede acinge ngentsingiselo yamazwi kaYesu. Hambisa umrhumo weMboniselo okanye uVukani! uze ulungiselele ukubuyela ukuze nixubushe ngokubhekele phaya.
4 Ukuba ubuyela ukuze nibe nengxubusho ebhekele phaya ngongcelele lwamanqaku asekuqaleni athi “Kutheni Ubomi Bubufutshane Kangaka?” usenokuqalisa ngale ndlela:
◼ “Ngoxa bendilapha kwixa elidluleyo, sithethe ngobude bexesha eliphilwa ngumntu. Ngokungathandabuzekiyo uphawule ukuba kula manqaku kaVukani!, izazinzulu azinathemba lokusinceda siphile ngaphezu kwama-70 okanye ama-80 eminyaka. Kodwa ucinga ntoni ngoko kuthenjiswa yiBhayibhile? [Vumela impendulo.] IBhayibhile ibonisa ukuba uThixo unento elunge ngakumbi ayicingayo ngomntu.” Yandula ke ufunde uYohane 17:3, uze ucacise indlela ukungenisa ulwazi okunokusikhokelela ngayo kubomi obungunaphakade. Xa kulapha usenokumthembisa ngesifundo seBhayibhile sekhaya okanye ulungiselele enye ingxubusho yeBhayibhile.
5 Ukuqalisa isifundo seBhayibhile lusukelo olubalulekileyo kubulungiseleli bethu. Mhlawumbi uye wabuyela izihlandlo eziliqela kumntu oye wathabatha amaphephancwadi. Kutheni ungazami le ntshayelelo xa ubuyela kwixa elizayo?:
◼ “Abantu baneengcamango ezininzi ezahlukeneyo ngonqulo nokubaluleka kwalo kule mihla. Kukho iinkolelo ezibethabethanayo ngesizathu sokuba uThixo avumele ubungendawo okanye isizathu sokuba saluphale size sife. Abanye abantu bebengathanda indlela yokuthandaza ukuze baviwe nguThixo.” Vula enye yeempapasho zethu zokufundisisa iBhayibhile umbonise umbandela ovakalelwa kukuba umninimzi uya kuba nomdla kuwo, uze ngokufutshane umbonise indlela esiqhutywa ngayo isifundo.
6 UYehova nguThixo wenjongo. Masimxelise ngo-Oktobha ngokubuyela sinenjongo.