“Ukholo Lulandela Into Eviweyo”
1 Xa sifumene umntu ‘onotyekelo olufanelekileyo ngobomi obungunaphakade,’ kuyafuneka silomeleze ukholo lwaloo mntu ngoko akuvileyo. (IZe. 13:48; Roma 10:17) Ukuze sikwenze oko, sifanele sibuyele kwabo sibahambisele amaphephancwadi ukuze sibanike awakutshanje nokuze sincokole ngokubhekele phaya. Kwakhona sifanele sikuphaphele ukuhambisa imirhumo yamaphephancwadi ethu. Noko ke, cinga ngosukelo lokuqalisa isifundo kwincwadi ethi Ulwazi Olukhokelela Kubomi Obungunaphakade. Nanga amanye amacebiso anokukunceda:
2 Xa ubuyela apho uye waxubusha inqaku elithi “Dumisani UKumkani Kanaphakade!,” usenokuqala ngale ndlela:
◼ “Ukugqibela kwethu ukuncokola, sithethe ngobunye bobungqina obeyisayo bokuba ukho uThixo ongusomandla. Noko ke, ukumqonda nje ukuba ukho akwanele. Kufuneka silazi igama lakhe. Umbiza ngeliphi igama uThixo? [Vumela impendulo.] Izigidi zabantu zimbiza nje ngokuthi ‘Nkosi’ okanye ‘Thixo,’ zibizo ezo ezingangqalanga. Ukongezelela, ufuna simazi ngegama lakhe. [Funda INdumiso 83:18.] IBhayibhile isixelela lukhulu ngoYehova uThixo, njengoko echaziwe kule ncwadi.” Mbonise umfanekiso okwiphepha 29 kwincwadi ethi Ulwazi, ufunde namagama angezantsi kwawo. Emva kokuxubusha iziqendu ezithathu zokuqala kwisahluko 3, uya kuba usiqalisile isifundo!
3 Kwabo uye waxubusha nabo inqaku elithi “Isizathu Sokuphela Konqulo Lwehlabathi,” usenokufuna ukuvuselela umdla ngokuthi:
◼ “Emva kokufunda eli nqaku, usenokuba uye wachukunyiswa sisibakala sokuba asinakuthi zonke iinkonzo ziyafana. Kukho unqulo lokwenyaniso nonqulo lobuxoki. Oku kuphakamisa umbuzo ofanelekileyo othi, Lunqulo loobani uThixo alwamkelayo? UYesu wanikela impendulo, yaye ibalaselisiwe kule ncwadi.” Tyhila kwisahluko 5 kwincwadi ethi Ulwazi, ufunde isiqendu 4, kuquka uYohane 4:23, 24. Yandula ke ubuze, “Ngaba ungakuvuyela ukuqhutyelwa isifundo seBhayibhile sekhaya sesisa?” Ukuba uyavuma, tyhila kwisahluko 1 uqalise isifundo.
4 Ukuba bekuboniswe umdla ku-“Vukani!” kaMeyi 8, xa ubuyela usenokuzama le ntshayelelo ekuqaliseni isifundo kwincwadi ethi “Ulwazi”:
◼ “Mhlawumbi uyakhumbula ukuba siye sancokola ngethemba lokubona ihlabathi lingenazimfazwe ekugqibeleni. Kunzima ukuthelekelela ukuba kuya kube kunjani ngoko. Nanku umfanekiso wako. [Mbonise umfanekiso okwiphepha 188-9 kwincwadi ethi Ulwazi.] Ngaba bekungayi kuba luyolo ukuphila kwiimeko ezinje? [Tyhila kwiphepha 4-5, mbonise umfanekiso, uze ufunde ibhokisi.] Umxholo wale ncwadi uyafana namazwi kaYesu akuYohane 17:3. [Mfunde.] Ukuba ungandivumela, ndingathanda ukukubonisa indlela le ncwadi enokusetyenziswa ngayo neBhayibhile yakho ukuze ufumane olo lwazi lusindisa ubomi.” Ukuba umninimzi uyavuma, qalisa isifundo kwisahluko sokuqala.
5 Ukuba ubudibene nomntu obexakekile kutyelelo lokuqala, xa ubuyela usenokuthi:
◼ “Kutshanje bendikutyelele ndaza ndakushiyela amaphephancwadi IMboniselo noVukani! Aba lindixesha bakhuthaza intlonelo ngeBhayibhile nokhokelo lwayo lokuziphatha okuhle. Ngenxa yokuba ndivakalelwa kukuba kubalulekile ukuba wonk’ ubani aliqonde iLizwi likaThixo, ndiye ndabuya ukuze ndikubonise into eya kukunceda wenjenjalo.” Mbonise incwadi ethi Ulwazi, umbonise iziqulatho ezikwiphepha 3. Mbuze ukuba sisiphi isahluko anomdla kakhulu kuso, sityhile, uqalise isifundo.
6 Uvuyo lwethu luya kuba lukhulu kakhulu ukuba ‘sivulela abanye umnyango wokholo’ okhokelela kubomi obungunaphakade.—IZe. 14:27; Yoh. 17:3.