Hambisa Incwadi Ethi Ulonwabo Lwentsapho Kubantu Abakubudala Obahlukahlukeneyo
1 Inkwenkwana eneminyanka eli-11 ubudala yaseKhalifoniya yavakalisa uxabiso lwayo ngencwadi ethi Imfihlelo Yolonwabo Lwentsapho. Yabhala yathi: “Ndinongazenzisiyo umbulelo ngayo, yaye ndikhuthaza nezinye iintsapho ukuba ziyifunde le ncwadi kuba iluncedo. Kwakhona . . . inceda intsapho yakowethu ukuba ibe noxolo nolonwabo ekhaya.” La mava eli tyendyana afanele asikhuthaze ukuba sihambise incwadi ethi Ulonwabo Lwentsapho kubantu abakubudala obahlukahlukeneyo. Nanga amacebiso ambalwa onokuwazama kubulungiseleli bakho ebudeni bukaFebruwari.
2 Xa udibana nomntu oselula, usenokuthi:
◼ “Uninzi loontanga bakho lucinga ngomtshato. Kodwa ungayifumana phi inkcazelo enokuthenjwa ngalo mbandela? [Vumela impendulo.] Abantu abaselula badla ngokuthi abakaqiniseki enoba bawulungele umtshato kusini na. Makhe ndabelane nawe ngoko kuthethwa yile ncwadi ngalo mbandela.” Tyhila kwiphepha 14 kwincwadi ethi Ulonwabo Lwentsapho, uze ufunde isiqendu 3. Wandule ke ukumbonisa umxholwana ngamnye okwesi sahluko. Hambisa incwadi enoqweqwe olulukhuni nge-R5,00 enoqweqwe oluthambileyo ibe zii-R3,75 uze ulungiselele ukubuyela.
3 Xa uthetha nomzali, usenokuthi:
◼ “Sabelana nabazali ngokhokelo olusebenziseka ngokwenene ekukhuliseni abantwana. La macebiso ahlanganiswe kule ncwadi ithi Imfihlelo Yolonwabo Lwentsapho.” Tyhila kwiphepha 55. Funda isiqendu 10, uze ulandelise ngeDuteronomi 6:6, 7, ekwisiqendu 11. Yandula ke ubalaselise izivakalisi ezikekelisiweyo kwisiqendu 12 ukusa kwese-16. Hlabela mgama, uthi: “Le ncwadi iye yanceda abaninzi ukuba baphumelele njengabazali.” Hambisa incwadi ngomnikelo oqhelekileyo.
4 Xa uthetha nomntu osele ekhulile, usenokuthi:
◼ “Emva kokuba ndifunde esi sicatshulwa sifutshane, ndicela undixelele oko ukucingayo.” Tyhila incwadi ethi Ulonwabo Lwentsapho kwiphepha 169, uze ufunde izivakalisi ezibini zokuqala zesiqendu 17. Yandula ke umvumele athethe. Kuxhomekeke kwimpendulo, unokufunda izicatshulwa ezingakumbi kule ncwadi ngaphambi kokuba uyihambise.
5 Xa ubuyela emva kokuhambisa incwadi ethi Ulonwabo Lwentsapho, cinga ngokuzama ukuqalisa isifundo seBhayibhile. Isifundo 8 kwincwadana ethi Okufunwa NguThixo okanye isahluko 15 kwincwadi ethi Ulwazi zinokuba zezifanelekileyo ukuqalisa isifundo. Ebudeni beli phulo, masizabalazele ukunceda abantu abakubudala obahlukahlukeneyo ukuba bakhe ubomi bentsapho yobuKristu obonwabisayo.