Ukuma Emgubasini Womsebenzi Othe Kratya

XA BABECHAZA abo babefunda nabo kwiklasi ye-105 yeSikolo seBhayibhile seWatchtower saseGiliyadi, uRichard noLusia bathi: “Kwakungakhuphiswana. Mntu ngamnye wayephezu kokuba nomnye aphumelele. Asifani sonke, kodwa kuthi, mfundi ngamnye uxabisekile.” Omnye owayefunda nabo, uLowell, wavumelana nabo phofu esalek’ umsundulo ngelithi: “Ukungafani kwethu kwasenza intlaka nexolo.”

Iklasi ephumelele ngoSeptemba 12, 1998, ibinabantu abangafani tu kwaphela. Abanye abafundi bebengoovulindlela kwimimandla enemfuneko enkulu yabavakalisi boBukumkani; abanye ke bebekhonza ngokuthembeka kufutshane namakhaya abo. Eny’ imbinana ke, njengoMats noRose-Marie, ibisebenza iiyure ezininzi yaye isiwa ivuka ngelokuphucula isiNgesi sayo ngaphambi kokuza kwesi sikolo. Kuninzi lwaba bafundi, inkonzo yobuvangeli basemazweni ibisoloko inkenteza kwasebuntwaneni babo. Esinye isibini siye safaka isicelo izihlandlo ezili-12; kaloku savuya okwabantwana xa samenyelwa kule klasi ye-105!

Ezo veki zingama-20 zoqeqesho olucokisekileyo zakhawuleza zaphela. Yaba ngathi nguqhwanya nje, kwaba sekufuneka aba bafundi babhale iimviwo zabo zokugqibela, banikele iintetho zabo zokugqibela lwaza lwafika ke nosuku lokuba kuvuyiswane nabaphumeleleyo.

Usihlalo wolo cwangciso, uAlbert Schroeder, olilungu leQumrhu Elilawulayo lamaNgqina kaYehova, wakhumbuza loo klasi ukuba “imi emgubasini womsebenzi othe kratya kwicala lemfundo yeBhayibhile,” ilandela abangaphezu kwama-7000 abasele bevela apho eGiliyadi. Wayithi rhithi nento yokuba ebudeni behlobo, aba bafundi baye banandipha ilungelo elikhethekileyo lokudl’ amathol’ eendaba namakhwahla abavangeli basemazweni ngoxa ayetyelele ikomkhulu lehlabathi eze kwiindibano zezizwe ngezizwe.

Emva koko uMzalwan’ uSchroeder wabiza uMax Larson weBethel Operations Committee. Wagwadla phantsi komxholo othi “Imfundo Ekhokelela Kubomi Obungunaphakade.” UMzalwan’ uLarson wacaphula IMizekeliso 1:5, (NW), ethi: “Umntu osisilumko uya kuphulaphula aze angenise uyalelo olungakumbi, kwaye umntu onokuqonda ngulowo uzuza ulwalathiso lobuchule.” Ubuvangeli basemazweni obu bufuna ubuchule ukuze umntu aphumelele kubo. Ngabantu abanobuchule ke abanokuma phambi kookumkani. (IMizekeliso 22:29, NW) Emva kokuphekwa kangangeenyanga ezintlanu, abafundi baquliswa kusenzelwa ukuba maze bamele iingqanga zooKumkani, uYehova uThixo noKristu Yesu.

Kulandele uDavid Olson weSebe Lenkonzo ethetha phantsi komxholo othi “Ukuba Negalelo Ekuvuyiseni Intliziyo kaYehova.” Wabuza lo mbuzo: “Banokwenza ntoni abantu abangafezekanga ukuze bavuyise intliziyo kaThixo?” Waphendula wathini? Banokumkhonza ngokuthembeka, ngokunyaniseka, yaye bevuya. UYehova ufuna abantu bakhe bakunandiphe ukumkhonza. Xa sikunandipha ukwenza ukuthanda kukaThixo, siyayivuyisa intliziyo yakhe. (IMizekeliso 27:11) UMzalwan’ uOlson wafunda ileta evela kwesinye isibini esingabavangeli basemazweni esaphumelela eGiliyadi kwiklasi ye-104. Ngaba sasisinandipha isabelo saso esitsha? Sathi xa sasibhala sichaza ibandla elikuso: “Sinabavakalisi abanokuba li-140 nabantu abeza kwiintlanganiso abakumlinganiselo wama-250 ukusa kuma-300. Eyona nto ihamba phambili yinkonzo yasentsimini. Ngamnye kuthi unezifundo ezine ibe ezinye kuzo sele zisiza kwiintlanganiso.”

ULyman Swingle, weQumrhu Elilawulayo, wanikela intetho enomxholo othi “Ixesha Lokuthi Xhaa Uze Ubale Iintsikelelo Zakho.” Uqeqesho lwaseGiliyadi luzise iintsikelelo ezininzi. Luye lwanika abafundi ulwazi oluthe kratya, lwakhulisa uxabiso lwabo ngentlangano kaYehova lwaza lwabanceda bahlakulela iimpawu ezibalulekileyo, njengokuthobeka. “Ukuza apha uze uchith’ ixesha ufundiswa kukwenza uthobeke,” watsho njalo uMzalwan’ uSwingle, waza walek’ umsundulo ngelithi: “Umk’ apha sel’ uqule waligangatha ulungele ukudumisa uYehova.”

UDaniel Sydlik, okwalilungu leQumrhu Elilawulayo wanikela intetho enomxholo othi, “Unezizathu Ezininzi Zokuvuya—Ukhathazwa Yintoni Ke?” Wabongoza ngelithi, xa uvelelwa ziingxaki, funa ukhokelo lweZibhalo. UMzalwan’ uSydlik wakhetha iindinyana ezithile kwisahluko sesithandathu sencwadi kaMateyu, ezama ukubonisa indlela enokwenziwa ngayo le nto. Ukuswel’ ukholo kunokusenza sizikhathaze ngezinto ezisisiseko, njengokutya nesinxibo. Noko ke, uYehova uzazi kakuhle izinto esizifunayo. (Mateyu 6:25, 30) Ukuzikhathaza kuthi chatha kwiinkathazo zamihla le. (Mateyu 6:34) Kweliny’ icala ke, kufuneka umntu acebe. (Thelekisa uLuka 14:28.) UMzalwan’ uSydlik wathi: “UYesu akathi makungacingisiswa ngobulumko ngekamva, kodwa uthi masingathi ngobudenge sizikhathaze ngalo. Ukusebenza kuyenye indlela yokuphelisa ixhala. Xa sixhalabile, kucetyiswa ukuba siqalise ukuthetha ngenyaniso.”

Amazwi Okuvala Avela Kubahlohli

Kwalandela iintetho ezintathu ezanikelwa ngamalungu eqela labahlohli baseGiliyadi. Kwaqala uKarl Adams, owayethetha phantsi komxholo othi “Uya Kumbuyisela Ngantoni UYehova?” Intetho yakhe yayisekelwe kwiNdumiso ye-116, ekusenokwenzeka ukuba uYesu wayivuma ngobusuku obungaphambi kokufa kwakhe. (Mateyu 26:30, umbhalo osemazantsi weNW) Wayecinga ntoni uYesu xa wayevuma la mazwi: “Ndingambuyisela ngantoni na uYehova konke ukundiphatha kwakhe kakuhle”? (INdumiso 116:12) Kusenokwenzeka ukuba wayecinga ngomzimba ofezekileyo awayewulungiselelwe nguYehova. (Hebhere 10:5) Ngemini elandelayo, wayeza kunikela ngaloo mzimba ube lidini, ebonisa indlela olunzulu ngayo uthando lwakhe. Abafundi beklasi ye-105 bakubone kakuhle ukulunga kukaYehova kwezi nyanga zintlanu zidluleyo. Ngoku baza kubonisa indlela abamthanda ngayo uThixo ngokuzibhokoxa kwizabelo zabo zobuvangeli basemazweni.

UMark Noumair, owaba sisithethi sesibini esingumqeqeshi waseGiliyadi, wacebisa abafundi ukuba “Baqhubeke Besenza Okulungileyo.” Emva kokuba ethengiswe njengekhoboka eYiputa, uYosefu wanyamezel’ umvambo iminyaka eli-13 ephethw’ okwesifologu. Ngaba wavumela iziphoso zabanye ukuba zimphazamise? Akazange enjenjalo, waqhubeka esenza okulungileyo. Kwathi ke, ngexesha likaThixo elifanelekileyo, uYosefu wophulwa kwezo zilingo. Ngequbuliso, waphuma entolongweni waya kuthi gcobho ebhotwe. (Genesis, isahluko 37-50) Lo mqeqeshi waphakamisa lo mbuzo kubafundi: “Ukuba izinto azihambi ngale ndlela benicinga ngayo kwizabelo zenu zobuvangeli basemazweni, ngaba niya kuyeka? Ngaba niya kuphelelwa lithemba? Okanye ngaba niya kunyamezela, kanye njengoYosefu?”

Ekugqibeleni, umamkeli wabafundi kwiSikolo saseGiliyadi, uWallace Liverance wasingatha ingxubusho ebangel’ umdla namalungu eklasi phantsi komxholo othi “Bhengezani uKumkani noBukumkani.” Abanye abafundi babalisa amava abawafumana ngoxa babeshumayela kwindlu ngendlu, kwiivenkile ngeevenkile nasezitratweni. Abanye babalisa ngendlela abenza ngayo xa babenikela ubungqina kubantu abathetha ezinye iilwimi. Abanye babonisa nendlela yokushumayela kubantu beenkonzo ezahlukeneyo. Bonke abo baphumeleleyo babezimisele ukuba nesabelo ngokuzeleyo kubulungiseleli njengabavangeli basemazweni.

Abavangeli Basemazweni Abangamakhwahla Nabonwabileyo

Intetho elandelayo enomxholo othi “Iziqhamo Ezivuyisayo Zenkonzo Yobuvangeli Basemazweni,” yanikelwa nguRobert Wallen ibe kuyo kwadliwan’ indlebe nabazalwana abane abasebenza kwikomkhulu nabathe kutshanje badl’ amathol’ eendaba besakhiwa ngabavangeli basemazweni abangamagqala. Abo bavangeli basemazweni batsho zisuka nje ukuba akuzange kube lula kubo ukufunda ulwimi olutsha, ukuqhelana namasiko enye indawo, okanye ukuqhelana nemozulu abangayaziyo. Kwakusafuneka ke banyamezel’ umvambo wokukhumbul’ amakhaya. Maxa wambi impilo yayikhe ibalahl’ elukhukweni. Kodwa kuyo yonke loo nto, aba bavangeli basemazweni baba nesimo sengqondo esihle, ibe bajizekwa iintsikelelo ngenxa yokunyamezela kwabo. Abanye bancede abantu abaninzi gqitha bazi ngoYehova. Abanye babe negxalaba ngeendlela ezahlukeneyo kulwando lomsebenzi woBukumkani kumazwe abakuwo.

Kwaza kuqwela ke ngoku uCarey Barber, olilungu leQumrhu Elilawulayo. Wenza impinda yeengongoma ebeziphambili kucwangciso lwendibano “Yokuphila Ngendlela KaThixo.” Wababuza oku abaphulaphuli: “Ucwangciso lwale ndibano luluchaphazele njani ulwalamano lwenu noYehova?” Esi sithethi sathelekisa iintsikelelo zokulandela indlela kaThixo nentlekele eyehlela abo balandela indlela yehlabathi. Xa wayethetha ngesiphoso esenziwa nguMoses eMeribha walumkisa ngelithi: “Nokuba umntu ukhonze ngokunyaniseka kangangeminyaka emininzi, uYehova akakuqwabazel’ iliso ukushwaqazwa kwemithetho Yakhe esesikweni, enoba kuncinane kangakanani na.” (Numeri 20:2-13) Ngamana bonke abakhonzi bakaThixo emhlabeni wonke bangalibamba baliqinise ilungelo labo elixabisekileyo lenkonzo!

Lafika lona ixesha lokuba abafundi bafumane iziqinisekiso zabo. Emva koko ke, ummeli weklasi wafunda ileta ebonisa uxabiso ngoqeqesho olufunyenwe ngaba bafundi. Emva kwengoma yokuqukumbela nomthandazo osuk’ entliziyweni, lwaphela ke ucwangciso lokuvuyisana nabaphumeleleyo. Kodwa, kule klasi ye-105, yayisesisiqalo nje eso, njengoko aba bavangeli basemazweni batsha “babemi emgubasini womsebenzi othe kratya.”

[Ibhokisi ekwiphepha 23]

Inkcazelo Engabafundi

Inani lamazwe abavela kuwo: 9

Inani lamazwe ababelwe kuwo: 17

Inani labafundi: 48

Inani lezibini ezitshatileyo: 24

Umlinganiselo wobudala: 33

Umlinganiselo weminyaka besenyanisweni: 16

Umlinganiselo weminyaka bekubulungiseleli bexesha elizeleyo: 12

[Ibhokisi ekwiphepha 24]

Bekhetha Ukuba Kwinkonzo Yexesha Elizeleyo

UBen, owayephumelele kule klasi ye-105 uthi: “Ndisakhula ndandingazimiselanga kuba nguvulindlela.” Walek’ umsundulo esithi: “Ndandicinga ukuba ukuze ube nguvulindlela kufuneka ube nobuchule obukhethekileyo nezinto zikuhambele kakuhle. Kodwa ndafunda ukuyithanda inkonzo yasentsimini. Yaba nye imini ndaqonda ukuba ubuvulindlela buthetha ukuba nesabelo esithe chatha kubulungiseleli. Ngelo xesha ke ndaqonda ukuba ndinokuba nguye uvulindlela.”

ULusia uthi xa ebalisa: “Ekhaya babexatyiswa gqitha abantu abakwinkonzo yexesha elizeleyo.” Ukhumbula indlela ekwakuba yimincili ngayo ebandleni labo sihlandlo ngasinye abavangeli basemazweni beze kutyelela. Uthi: “Ndisakhula yayicacile into yokuba inkonzo yexesha elizeleyo iya kuba phakathi kwezinto endiceba ukuzenza.”

UTheodis wafelwa ngunina xa wayeneminyaka eli-15 ubudala. Uthi: “Ibandla landixhasa ngokwenene xa ndandikuloo meko, loo nto ke yenza ndazibuza ukuba, ‘Yintoni endinokuyenza ukubonisa uxabiso ngaloo nto?’” Wangena ngolo hlobo ke kwinkonzo yexesha elizeleyo ibe ngoku ungumvangeli wasemazweni.

[Umfanekiso okwiphepha 25]

Abaphumelele Kwiklasi Ye-105 Yesikolo SeBhayibhile SeWatchtower SaseGiliyadi

Kuludwe olungezantsi, kuqalwa ukusuka kuluhlu olungaphambili ukuya kolungasemva yaye amagama adweliswe ukusuka ngasekhohlo ukuya ngasekunene kuluhlu ngalunye

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S (3) Baker, L.; Pellas, M.; Woggon, E.; Böhne, C.; Asplund, J.; Haile, J (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.