“Uza Kufa!”

NGOKUBALISWA NGULEANNE KARLINSKY

Ukufuna kwam olona nyango lusemgangathweni ngaphandle kokusebenzisa igazi eSpeyin

UKUBA bekuya kufuneka uhambele kuyo nayiphi na indawo ehlabathini, ubuya kukhetha ukuya phi? Kum impendulo yayilula. Ndifundisa iSpanish esikolweni, yaye sinomyeni wam, uJay nonyana wam uJoel, sikwibandla lamaNgqina kaYehova leSpanish eGalax, eseVirginia, eUnited States. Ngoko ke, ndandinqwenela ukuya eSpeyin. Ngoko ke unokuyithelekelela indlela endaba nemincili ngayo xa abazali bam bathi baza kuya nam apho! Nangona umyeni nonyana wam bengazange bakwazi ukuhamba nathi, iphupha lam lalisele liza kuzaliseka njengoko mna nabazali bam sasithe zava kwinqwelo-moya eya ngqo eMadrid. Ukufika kwethu ngoAprili 21, sagqiba ekubeni siqhube inqwelo-mafutha siye e-Estella, idolophu encinane yaseNavarre, kumantla eSpeyin. Ndathi zava kwisihlalo esingasemva ndaza ngokukhawuleza ndathi yoyi.

Into endiyikhumbulayo emva koko kukuthi natya ebaleni, ilanga lindihlab’ emehlweni. ‘Ndiphi? Ndize njani apha? Ngaba ndiyaphupha?’ Njengoko le mibuzo yayiphakama engqondweni yam, ndaya ndiyiqonda eyona nto yokwenene ibuhlungu indehleleyo. Kwakukho undonakele othile, yaye elo yayingelophupha. Ndandonzakele engalweni yasekhohlo, yaye ndandingakwazi ukushukumisa iingalo okanye imilenze yam. Kamva, ndafumanisa ukuba inqwelo-mafutha yethu iye yaya kuntlitheka kwiintsimbi ezisecaleni kwendlela yaye iye yandityekeza njengoko ibhukuqa kwelo thambeka lingangeemitha ezingama-20. Ndinombulelo kuba sinabazali bam akukho unombono waloo ngozi.

Ndacela uncedo, yaye umqhubi welori weza kum ngokukhawuleza. Wandula ke wehlela mgama kwelo thambeka esiya kuloo nqwelo-mafutha, apho abazali bam babevaleleke khona. Wakhwaza iqabane lakhe wathi: “Chazela inqwelo yezigulana ukuba ikhawuleze! Aba bantu bakwinqwelo-mafutha bakwimeko embi!” Wandula ke wabuyela kuloo ndawo ndandithe tywa kuyo, yaye eneenjongo ezintle wazama ukolula umlenze wam. Ndatsho esofelweyo ndisentlungwini, okokuqala ndiqonda indlela endonzakele ngayo.

Kungekudala ndandisele ndikwigumbi lonyango olungxamisekileyo kwisibhedlele salapho eLogroño. Ngobubele amapolisa axelela amaNgqina kaYehova ngaloo ndawo ndikuyo nangoko kwenzekileyo. Kungekudala, ecaleni kwebhedi yam kwakusele kungungelene amaninzi evela kumabandla ase-Estella naseLogroño, kunye neKomiti Yokunxibelelana Nezibhedlele yalapho. Enyanisweni, ukutyhubela eso silingo ndasifumana kweso sibhedlele, amaKristu athandekayo angamadlelane endandingazange ndidibane nawo ngaphambili ayesele elungile yaye ezimisele ukunyamekela iintswelo zam, ngalo naliphi na ixesha. Ngothando anyamekela nabazali bam, abathi bachacha kakuhle kangangokuba bakhululwa esibhedlele malunga neveki emva kwaloo ngozi.

Malunga nentsimbi yoku-1:00 kusasa ngoLwesithathu, oogqirha beza kutyanda ithanga lam elaphukileyo. Ndaxelela omnye ugqirha ukuba andifuni kufakwa gazi.a Wavuma engavumi kwaphela, kodwa wandixelela ukuba kusenokwenzeka ukuba ndife. Ndasinda kolo tyando, kodwa ndamangaliswa kukuba amanxeba am ayengahlanjwanga, kwanamabhandeji am akazange atshintshwe kamva.

NgoLwesihlanu igazi lam lehla laya kutsho kumlinganiselo we-4,7 yaye ndandiphelelwa ngamandla. Ugqirha wavuma ukundinika olunye unyango endaweni yegazi—inaliti ye-erythropoietin (EPO), ethi xa idibene neiron nezinto ezikhulisa igazi, ivuselele iiblood cells ezibomvu.b Ngelo xesha uJay noJoel babesele befikile. Hayi indlela ekwaba mnandi ngayo ukubona umyeni nonyana wam!

Malunga nentsimbi ye-1:30 kusasa, omnye ugqirha waxelela uJay ukuba isibhedlele sele sifumene umyalelo wenkundla wokuba kusetyenziswe igazi ukuba imeko yam iba maxongo. UJay wamxelela ukuba iminqweno yam yeyokuba ndingatofelwa-gazi phantsi kwazo naziphi na iimeko. Loo gqirha waphendula wathi: “Ukuba kunjalo ke uza kufa!”

UJay wathetha neKomiti Yokunxibelelana Nezibhedlele ngokuba indithumele kwenye indawo—eyayiza kuyihlonela iminqweno yam. Asinguye wonk’ ubani okweso sibhedlele owayechasene nathi. Ngokomzekelo, omnye ugqirha wandiqinisekisa ukuba wayeya kwenza konke okusemandleni akhe ukuze aqinisekise ukuba ndifumana unyango ngentlonelo. Kodwa kungekudala abanye oogqirha bandipheka bendophula. Babuza besithi: “Ngaba ufuna ukufa uze ushiye intsapho yakho ngasemva?” Ndabaqinisekisa ukuba ndandifuna olona nyango lusemgangathweni lufumanekayo ngaphandle kokusebenzisa igazi. Kodwa oko akuzange kubashukumisele ukuba bancede abo gqirha. Omnye watsho ngokuphandle esithi: “Uza kufa!”

IKomiti Yokunxibelelana Nezibhedlele yafumana isibhedlele esivumayo ukundinyanga ngaphandle kwegazi eBarcelona. Onjani wona umahluko phakathi kwezo zibhedlele zibini! EBarcelona abongikazi ababini bandihlamba kakuhle baza bandenza ndakhululeka. Xa babetshintsha amabhandeji am, omnye wabo bongikazi wabona ukuba aluhlaza yaye anegazi elomileyo. Wathi ubuhlungu yinto yokuba abantu belizwe lakhe beye bandiphatha ngaloo ndlela.

Kungekudala ndandifumana unyango lwamayeza ekwakufanele ukuba ndilufumene kwasekuqaleni kwisibhedlele saseLogroño. Imiphumo yayibangel’ imincili. Kwiintsuku nje ezingephi amalungu am abalulekileyo ayengasekho sengozini, yaye umlinganiselo wam wegazi wawunyuke waya kutsho kwi-7,3. Xa ndandishiya eso sibhedlele, wawusele unyuke waya kutsho kwi-10,7. Xa ndandifuna utyando olungakumbi kwisibhedlele saseUnited States, wawusele unyuke waya kutsho kwi-11,9.

Ndinombulelo ngemigudu yoogqirha nabongikazi abazimiseleyo ukwamkela iminqweno yezigulana zabo, enoba bayavumelana nayo okanye abavumelani. Xa abasebenzi basesibhedlele behlonela iinkolelo zomguli, banyamekela loo mntu ephela—yaye ngaloo ndlela banikela olona nyango lusemgangathweni lufumanekayo.

[Imibhalo esemazantsi]

[Umfanekiso okwiphepha 26]

Ndikunye nomyeni wam nonyana wethu

[Umfanekiso okwiphepha 27]

Amalungu amabini eKomiti Yokunxibelelana Nezibhedlele