Indlela Ingozi Eyabuguqula Ngayo Ubomi Bam

KUBALISA USTANLEY OMBEVA

Ngowe-1982 ndatshayiswa yinqwelo-mafutha eyayibaleka ngesantya esiphezulu. Ndanyangwa yaye kungentsuku zatywala emva koko, ndaqhubeka nobomi bam njengesiqhelo, kodwa ndandikhe ndizive iintlungu ezazibangelwa kukuphuma kwethambo lomqolo eliphakathi kwentamo nesifuba endaweni yalo. Noko ke, emva kweminyaka eli-15 ndiye ndajamelana nolona celo-mngeni luye lwavavanya ukholo lwam.

NGAPHAMBI kwaloo ngozi, nakancinane emva kwayo ndandingabikwa hlaba. Ndandisenza umthambo, ndibaleka umgama weekhilomitha ezili-10 ukusa kwezili-13 ngempelaveki, ndidlala i-squash ndisenza nomsebenzi onzima. Ndandincedisa ekwakheni iiHolo zoBukumkani zamaNgqina kaYehova yaye ndancedisa naxa kwakusakhiwa iHolo enkulu yeeNdibano eNairobi, eKenya apho sihlala khona.

Kwathi ngowe-1997, iintlungu endandiziva esifubeni zathi chatha yaye zazingisa. Xa ndandixilongwa, kwafunyaniswa ukuba kukho ithambo lomqolo eliphumileyo endaweni yalo yaye licinezela umnqonqo. Kwathiwa unozala woku yile ngozi ndiyikhankanye ekuqaleni.

Ngaphambi kokuba impilo yam ibe nkenenkene ndandisebenza njengomthengisi. Ndandine-inshorensi yokuhlawula iindleko zonyango zentsapho. Kwakubonakala ngathi izinto ziza kundihambela kakuhle kwezoshishino. Kodwa phakathi ngowe-1998, ndava ubundindisholo obungaqhelekanga ukususela esifubeni ukusa ezinyaweni. Suku ngalunye impilo yam yaya iwohloka ngokuwohloka.

Kungekudala emva koko, ndaphulukana nomsebenzi nazo zonke iingenelo ezazihambisana nawo. Ngelo xesha, intombi yethu uSylvia yayineminyaka eli-13 ubudala ngoxa enye, uWilhelmina yayineminyaka eli-10 ubudala. Ekubeni ndandingasebenzi, sasixhomekeke kumvuzo womfazi wam uJoyce. Kwanyanzeleka ukuba sitshintshe indlela esiphila ngayo size sisebenzise imali kwizinto ezibalulekileyo kuphela. Noko ke, sasingalali singatyanga.

Amaxesha Okudandatheka

Ndimele ndivume ukuba ukubona imeko endandikuyo kwandenza ndadandatheka, ndangafuni bantu ndaza ndaba ngumntu ocaphuka msinya. Maxa wambi ndandisiba nomsindo ndize ndibe buhlungu ngokugqithiseleyo yaye ndandisoloko ndiphikisana nabanye abantu. Ndandihlala ndidandathekile. Oku kwakubangela ukuba onke amalungu entsapho adandatheke. Umfazi wam neentombi zethu babeqala ukujamelana nemeko enje yaye babengayazi eyona nto mabayenze.

Ngelo xesha, ndandingaboni nto iphosakeleyo kwindlela endandivakalelwa ngayo. Ndasuka ndatyeba ngokugqithiseleyo. Isisu sam sasingasebenzi kakuhle yaye nomchamo wawusuke uziphumele. Oku kwakundenza ndibe neentloni. Ndandidla ngokuthi khunubembe ekoneni ndilile. Ndandidla ngokuba ligqabi ngumsindo kangangokuba maxa wambi wawunokude undihleke. Ndandisazi ukuba le asiyondlela ibhetele yokujamelana nemeko yam.

Njengomdala kwibandla lamaKristu lamaNgqina kaYehova, ndandidla ngokululeka amanye amaKristu nxamnye nokubek’ ityala uYehova ngenxa yokubandezeleka. Ukanti ndandidla ngokuzibuza—izihlandlo eziliqela—‘Kutheni uYehova evumele ukuba ndehlelwe yinto enje?’ Nangona ndandidla ngokomeleza ndize ndikhuthaze abanye abantu ndisebenzisa izibhalo ezifana neyoku-1 Korinte 10:13, ndandivakalelwa kukuba intlungu endikuyo ayinyamezeleki!

Ucelo-mngeni Lokufumana Unyango

Kwakunzima ukufumana unyango olufanelekileyo. Ndandidla ngokuya kwingcali yamathambo, kwi-chiropractor nakwi-acupuncturist ngosuku olunye. Iintlungu zazithomalala nje ithutyana. Ndaya koogqirha abaninzi, kuquka i-orthopedic nesazi ngemithambo-luvo. Bonke babevumelana ngento enye: Ukuze kuthomalaliswe iintlungu kususwe nethambo lomqolo eliphumileyo endaweni yalo, kwakuza kufuneka ndityandwe. Ngenxa yeenkolelo zam ezisekelwe eBhayibhileni, ndazicacisela iingcali zonyango ukuba andilwamkeli utofelo-gazi nokuba sele kumnyam’ entla.—IZenzo 15:28, 29.

Ugqirha wokuqala wandixelela ukuba uza kundityanda emqolo. Wandicacisela ukuba utyando olunjalo lusenokuba yingozi. Sekunjalo, lo gqirha wathi kusenokufuneka ndithiwe igazi. Andizange ndibuyele kuye.

Owesibini wathi ukuze aye kufika kumnqonqo wam, kuza kufuneka andityande entanyeni. Oku kwakuvakala kumasikizi. Nangona wayengenangxaki xa ndisithi andilwamkeli utofelo-gazi, wafuna ukuba olu tyando lwenziwe ngokukhawuleza yaye akazange azichaze zonke iinkcukacha. Naye andizange ndibuyele kuye.

Noko ke, ngoncedo lwamaNgqina kaYehova akhonza kwiKomiti Yokunxibelelana Nezibhedlele yasekuhlaleni, ndakwazi ukufumana ugqirha owathi angalwenza utyando ngaphandle kwegazi. Ugqirha wesithathu wathi angenza utyando olufanayo nolo lwaluza kwenziwa ngugqirha wesibini; wayeza kulwenza entanyeni. Wathi zimbalwa iingozi zolu tyando.

Ukwazi indlela olwaluza kwenziwa ngayo olo tyando kwandenza ndatyhwatyhwa luloyiko. Eyona nto yayindoyikisa kakhulu kukwazi ukuba olu tyando luza kwenziwa kumalungu abuthathaka njengentliziyo nemiphunga. Ngaba andizi kufela apho? Kakade ke, ukucinga ngaloo ndlela kwandenza ndoyika ngakumbi.

NgoNovemba 25, 1998, ndatyandwa iiyure ezine kwisibhedlele saseNairobi yaye olo tyando lwaba yimpumelelo. Kolo tyando kwasikwa intwana yehleza. Eli thambo lafakwa kwindawo endandenzakele kuyo laza laqiniswa ngenkcenkce nezikrufu. Oku kwanceda. Kodwa iingxaki zam azizange zithi shwaka. Ndandisahamba kabuhlungu. Nangoku ndisabuva ubundindisholo.

Isimo Sengqondo Esihle

Njengoko sele nditshilo, ndandichitha ixesha elininzi ndizikhathaza yaye ndikhalaza ngemeko yam engentle. Kodwa okumangalisayo kukuba, abongikazi noogqirha abaninzi babendincoma besithi ndikhangeleka ndiyamkele imeko yam yaye ndinesimo sengqondo esihle. Yintoni eyayibenza bavakalelwe ngaloo ndlela? Babebona ukuba nangona ndikule ntlungu, ndiyathetha nabo ngokholo endinalo kuThixo.

Nangona ndandikhe ndibe nomsindo ndize ndibe buhlungu ngemeko endikuyo, ndaqhubeka ndithembele kuYehova. Kuzo zonke izinto endandityhubela kuzo wayendixhasa—kangangokuba maxa wambi ndandisiba neentloni ngendlela endivakalelwa ngayo. Ndenza isigqibo sokufunda izibhalo endandisazi ukuba ziza kundithuthuzela ndize ndicamngce ngazo. Nazi ezinye zazo:

ISityhilelo 21:4: “[UThixo] uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona.” Ukucinga ngesithembiso seBhayibhile sehlabathi elitsha apho kungayi kubakho kukhala nantlungu kwandithuthuzela kakhulu.

AmaHebhere 6:10: “UThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe.” Nangona ndandingasakwazi ukwenza izinto ezininzi, ndandisazi ukuba uYehova uyawuxabisa umgudu endiwenzayo enkonzweni yakhe.

UYakobi 1:13: “Makungabikho nabani na, xa esesilingweni othi: ‘Ndilingwa nguThixo.’ Kuba uThixo akanakulingwa ngezinto ezimbi yaye naye akalingi namnye.” Hayi indlela ayinyaniso ngayo loo mazwi! Nangona uYehova wayekuvumele ukubandezeleka kwam, wayengengonobangela wako.

AbaseFilipi 4:6, 7: “Musani ukuxhalela nantoni na, kodwa ezintweni zonke zaziseni izibongozo zenu kuThixo ngomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.” Umthandazo wandinceda ndaba noxolo lwengqondo endandilufuna, yaye oko kwenza ukuba ndikwazi ukuhlangabezana nemeko yam.

Ndandidla ngokuzisebenzisa ezi zibhalo xa ndikhuthaza abanye abasentlungwini—yaye nam zandinceda kakhulu! Ndatsho ndaqonda ukuba bendingakuqondi ukuxabiseka kwazo. Ukugula kwandenza ndafunda ukuthobeka nokuthembela ngokupheleleyo kuYehova.

Ezinye Izinto Ezandomelezayo

Abantu abaninzi bathi abazalwana abangamaKristu baziintsika nesixhaso ngamaxesha anzima. Kodwa hayi indlela ekulula ngayo ukungabaxabisi abazalwana noodade abangamaKristu! Liyinyaniso elokuba, basenokungakwazi ukusinceda ngezinto ezinkulu, kodwa basoloko bekulungele ukunceda. Kwaba njalo nakum. Babedla ngokundityelela esibhedlele, yaye maxa wambi babefika ngenj’ ixukuxa. Bancedisa nasekuhlawuleni iindleko zonyango. Ndinombulelo ongazenzisiyo kwabo baye bachukunyiswa yintlungu yam baza bandinceda.

AmaNgqina akwibandla endikulo ayazi ukuba andisakwazi ukwenza izinto ezininzi. Ngoku ndikhonza njengomveleli owongamelayo yaye ndisebenza kunye nabadala abangamaKristu abanenkxaso. Andizange ndikhe ndixhiphulise kumsebenzi wokushumayela. Ngexesha endandigula gqitha ngalo, ndiye ndanceda abantu ababini bahlulela ubomi babo kuYehova. Omnye wabo ukhonza njengesicaka solungiselelo kwibandla lamaNgqina kaYehova eliseNairobi.

Ndinombulelo ongazenzisiyo kwinkosikazi yam eye yandixhasa kuyo yonke intlungu endiye ndatyhubela kuyo. Iye yanyamezela umsindo, ukuqumba ngaphandle kwesizathu, ukungabikho ngqiqweni nokudandatheka kwam. Nanini na ndisentlungwini yaye ndikhala, yayindomeleza ize indithuthuzele. Iyamangalisa indlela eye yomelela neye yayinyamezela ngayo le ntlungu. Izingqine ‘iliqabane lokwenyaniso ngamaxesha onke.’—IMizekeliso 17:17.

Iintombi zethu ziye zafunda indlela yokuhlangabezana nemeko yam. Zenza konke okusemandleni ukuze zindincede. Ziyazazi izinto endizifunayo yaye zinikela uncedo ngokukhawuleza, ziyandinyamekela xa unina engekho. USylvia ubesoloko “eyintonga” yam xa ndingenamandla, endinceda ndizulazule phakathi kwekhaya.

Kuthekani ngoMina, untondo wethu? Ndikhumbula ngeny’ imini ndiwile endlwini yaye ndingakwazi ukuphakama. Kwakukho yena kuphela ekhaya. Wakhupha onke amandla akhe, wandiphakamisa waza wandithantamisa wandisa egumbini lam. Nanamhlanje akazi ukuba wawathabatha phi amandla okundiphakamisa. Andisokuze ndisilibale eso sihlandlo awasebenzisa ngaso ubulumko.

Ukunyamezela le ngozi yeyona mfazwe inzima ndikhe ndayilwa. Ndisalwa nanamhlanje. Ayikho enye into enzima ngolu hlobo ekukhe kwafuneka ndijamelane nayo. Ndifunde lukhulu ngokuthobeka, ukusebenzisa ingqiqo nokuba novelwano. Ukuthembela nokwayama ngokupheleleyo ngoYehova kuye kwandinceda ndakwazi ukujamelana nale ntlungu.

Ndiye ndafunda ubunyani bamazwi ompostile uPawulos athi: ‘Sinobuncwane esibuphethe ngezitya zodongwe, ukuze amandla angaphaya koko kuqhelekileyo abe ngakaThixo, angabi ngawethu.’ (2 Korinte 4:7) Kundithuthuzela gqitha ukufunda ngesithembiso sikaThixo ‘samazulu amatsha nomhlaba omtsha.’ (2 Petros 3:13) Ndithandazela ukuba uYehova aqhubeke endixhasa de ndiye kungena kwihlabathi elitsha kuba ndibuthathaka yaye akukho nto ingako ndinokuyenza ngamandla am.

[Imifanekiso ekwiphepha 28]

Ukwenza imisebenzi yobuKristu kunye nentsapho yam kuye kwandinceda ndakwazi ukunyamezela