Unokuzifumana Phi Iimpendulo?

NGABA ukhe ucatshukiswe yimbambano eqhubekayo ephathelele indalo nendaleko? Ukuba kunjalo, asinguwe wedwa ocatshukiswayo yile mbambano.

Kaloku kukho izazinzulu nezifundiswa ezidla ngokusebenzisa ulwimi olungaqondakaliyo ezithi umntu ofundileyo okrelekrele ufanele ayamkele ingcamango yendaleko. Kwelinye icala, kukho iinkokeli zonqulo ezinekratshi ezisebenzisa iintetho ezichuliweyo ezithi ukuba ngokwenene unokholo, ufanele uvumelane neemfundiso ezahlukahlukeneyo eziphathelele indalo.

Ezi ngcamango zibangela ukuba abantu abaqiqayo bangafuni nokuva ngalo mbandela. Imbambano ngokuphathelele ubukho bukaThixo asingombandela ofanele uxutyushwe ngabantu abaneenkani abazikhukhumalisayo. Khumbula ukuba lo asingombandela nje ekumele kuphikiswanwe ngawo okanye umbandela ongenamsebenzi. Ngumbandela ochaphazela ubomi nekamva lakho.

Impazamo Edla Ngokwenziwa Zizazinzulu

Njengoko sele sibonile, ziliqela izazinzulu ezihlonelwayo nezifundileyo ezithi kukho ubungqina obaneleyo bokuba kukho uMyili okanye uMdali. Ezimbalwa azipheleli nje ekukholelweni kubukho bakhe. Zide zikuthandabuze ukunyaniseka kwezazinzulu ezibukhaba ngaw’ omane ubukho bukaThixo.

Ngokomzekelo, ingcali ngobume bomhlaba uJohn R. Baumgardner ithi: “Ekubeni kukho ubungqina obungaka, sisiphi isazinzulu esinyanisekileyo esinokuthi izidalwa ezintsonkothe ngolu hlobo zazivelela? Ngokokubona kwam, ukuvumelana nale ngcamango phezu kwabo nje ubungqina obukhoyo kuyaphikisana nenzululwazi.”

Ingcali yamachiza eyaziwayo uRichard Feynman iveza enye ingongoma ebalulekileyo kwinzululwazi. Xa yayithetha kwitheko lothweso-zidanga kwenye iyunivesithi yakhankanya “uhlobo olukhethekileyo lokunyaniseka.” Yathi oku kuquka “ukuzivelela zonke iinkalo ukhangela impazamo osenokuba uyenzile.” Yathi leyo “yimbopheleleko yethu njengezazinzulu ukuvuma iimpazamo zethu kwezinye izazinzulu nakubantu ngokubanzi.”

Kukangaphi usiva abantu abathi izinto zazivelela besebenzisa amabinzana afana nelithi “mhlawumbi siyaphazama” xa bethetha ngeengcamango zabo? Okubuhlungu kukuba zimbalwa ezithobeke kangako. Enyanisweni, ngenxa yokuthobeka nokunyaniseka, izazinzulu ezininzi zimele zivume ukuba inzululwazi, eyenza uphando ngendalo ebonakalayo kuphela, ayinakukwazi ukuphendula imibuzo ephathelele ubukho boMdali. Noko ke, kuthekani ngeenkokeli zonqulo ezithi izinto zadalwa?

Ingxaki Eqhelekileyo Yeenkokeli Zonqulo

Nazo iinkokeli zonqulo azithobekanga kangako yaye azinyanisekanga. Ngapha koko, ngaba kukunyaniseka ukufundisa izinto ezingekhoyo eBhayibhileni? Ngaba kukuthobeka ukubalaselisa iingcamango zobuqu namasiko athandwayo ngaphezu kweBhayibhile? Oku koko kanye kuye kwenziwa ngabantu abaninzi abathi izinto zadalwa.

Ngokomzekelo, abantu abaxhasa ingcamango yokuba izinto zadalwa badla ngokuthi zonke izinto zadalwa kwiintsuku ezintandathu zokoqobo ezineeyure ezingama-24 ubude kwiminyaka engama-6 000 eyadlulayo. Ezi mfundiso azivumelani noko kuthethwa yiBhayibhile ethi “ekuqaleni”—kwixesha elingachazwanga ubude balo, ngaphambi kokuqalisa kwezona ‘ntsuku’ zokudala—uThixo wadala amazulu nomhlaba. (Genesis 1:1) Okuphawulekayo kukuba, ingxelo yeGenesis ibonisa ukuba ibinzana elithi ‘usuku’ lisetyenziswa ngeendlela ezahlukahlukeneyo. KwiGenesis 2:4, kubhekiselwa kwiintsuku ezintandathu ezichazwe kwisahluko esingaphambi kweso njengosuku olunye. Ngoko kusengqiqweni ukuthi ezi yayingezontsuku zokoqobo ezineeyure ezingama-24 ubude, kodwa yayilixesha elide. Kuyabonakala ukuba xesha ngalinye lalithabatha amawaka eminyaka.

Okubuhlungu kukuba, nabafundisi bonqulo balucacisa ngendlela ephosakeleyo ukholo. Kubonakala ngathi bambi bathi ukholo kukukholelwa kwinto engenabungqina. Kubantu abaninzi abasebenzisa ingqiqo, oko kuvakala ngokungathi kukuba nguvuma-zonke. IBhayibhile iluchaza ngokwahlukileyo ukholo, ithi: “Ukholo lululindelo oluqinisekisiweyo lwezinto ezithenjiweyo, ubungqina obucacileyo bezinto zokwenene nangona zingabonwa.” (Hebhere 11:1) Ngoko ukuba nokholo lokwenene asikokuba nguvuma-zonke. Kukukholelwa kwizinto ezinobungqina obunokuthenjwa, ulindelo oluqinisekisiweyo.

Ngoko ukholo kuThixo lusekelwe kubuphi ubungqina? Zimbini izinto eziqulethe ubungqina yaye zinokuthenjwa.

Ukuthelekisa Ubungqina

Umpostile uPawulos washukunyiselwa ukuba abhale athi ‘iimpawu zikaThixo ezingabonakaliyo zibonwa ngokucacileyo ukususela ekudalweni kwehlabathi kuse phambili, ngenxa yokuba ziqondeka ngezinto ezenziweyo, kwanamandla angunaphakade nobuThixo bakhe.’ (Roma 1:20) Kangangamawaka eminyaka, amadoda namabhinqa anobulumko aye abubona ubungqina bobukho bukaThixo ngokujonga kwindalo.

Njengoko siye sabona, inzululwazi inokuba luncedo kule nkalo. Okukhona sifunda ngokuntsonkotha nokulungelelana kwendalo, kokukhona sifumana izizathu zokumoyika uMyili wayo. Ezinye izazinzulu ziyabamkela obo bungqina yaye ziyabukholelwa. Ngokungathandabuzekiyo, zinokuthi inzululwazi iye yazinceda zafunda ngoThixo. Kubonakala ngathi kungakhathaliseki ukuba ungeza nobungqina obungakanani, zimbi izazinzulu ngekhe zikholelwe. Kuthekani ngawe?

Ukuba uyafuna ukuhlola ubungqina ngalo mbandela, sikhuthaza ukuba wenjenjalo. Incwadi ethi Is There a Creator Who Cares About You? yenzelwe ukukunceda kweli phulo libalulekileyo lokufuna iimpendulo.a Ngapha koko, iya kukunceda uhlole enye incwadi equlethe ubungqina bobukho bukaThixo: iBhayibhile.

IBhayibhile iqulethe ubungqina obuninzi bokuba yaphefumlelwa ngumntu okrelekrele onamandla angaphaya kwawomntu. Ngokomzekelo, iqulethe iziprofeto ezininzi okanye izinto ezabhalwa ngaphambi kokuba zenzeke. Ezinye zazo zithetha ngezinto ezenzeka kwixesha esiphila kulo! (Mateyu 24:3, 6, 7; Luka 21:10, 11; 2 Timoti 3:1-5) Abantu abanako ukuchaza ikamva ngendlela enokuthenjwa. Ngubani ngaphandle koThixo onako ukwenjenjalo?

Noko ke, iBhayibhile ayipheleli nje ekuphenduleni imibuzo ephathelele ubukho bukaThixo. Isifundisa negama lakhe, ichaza ubuntu bakhe, isixelela nendlela aye wabonisa ngayo umdla ebantwini kuyo yonke le minyaka. Isichazela noko aza kukwenza kwixa elizayo. Kuzo zonke ezi nkalo, inzululwazi ayinako ukusinceda sifumane iimpendulo. Ngokwenene, inzululwazi ayinako ukusenza sibe nethemba ebomini. Ingenako nokumisela imilinganiselo yokuziphatha esifanele siphile ngayo.

Isiseko Semilinganiselo Yokuziphatha

Ngelishwa, kukhangeleka ngathi kubantu abaninzi namhlanje, inzululwazi iyisingela phantsi imilinganiselo yokuziphatha. Isazi ngebhayoloji esithi akakho uThixo uRichard Dawkins sathi: “Kwihlabathi elinabantu abangaqiqiyo, ekungekho mithetho ilawula indalo nokuveliswa kwenzala, abanye abantu baza kwenzakala bambi babe nethamsanqa yaye akukho nto inokuhamba kakuhle.” Ngaba ikamva alikho mfiliba kwihlabathi elinjalo? Ngaba akucingi ukuba kufanele kubekho imilinganiselo yokuziphatha abantu abafanele baphile ngayo?

Ngulowo ke umahluko phakathi kweBhayibhile nabaxhasi bendaleko. ILizwi likaThixo libethelela ingongoma yokuba abantu banendima ebalulekileyo kwindalo; indaleko ifundisa ukuba abantu bazivelela. IBhayibhile ithi abantu benziwe ngomfanekiso kaThixo onobulungisa nonothando yaye banako ukuphila ngendlela efanelekileyo baze bonwabe; bona abaxhasi bendaleko bathi esiphilayo sesinamandla, abathethi nto ngeempawu zabantu eziluthando novelwano.

Ingcamango yendaleko ayinako ukwenza abantu babe nethemba lokwenene okanye baphile ubomi obunenjongo. EBhayibhileni kukho isithembiso esivela kuMdali esiphathelele injongo yakhe ezukileyo ngekamva. Uyichaza ngokucacileyo injongo yakhe: “Ndiza kuninika ikamva nethemba.”—Yeremiya 29:11, Contemporary English Version.

Funda NgoMdali

Umdumisi owayesisilumko washukunyiselwa ukuba athi: “Yazini ukuba uYehova nguThixo. Nguye owasenzayo, asisithi.” (INdumiso 100:3) Oku kubangela ukuba abantu abaninzi abaqiqayo babone ukuba bubuvuvu ukuthi ubomi bazivelela.

Inzululwazi yezi mini ikhuthaza ingcamango ephenjelelwa likratshi yokuba abantu basebenzise nje ingqiqo nolwazi lwabo. Okubuhlungu kukuba, unqulo ludla ngokwenza impazamo efanayo. Noko ke, ulwazi lwabantu lulinganiselwe yaye kuya kusoloko kunjalo. Umpostile uPawulos wayethobekile nangona wayenolwazi oluphangaleleyo ngezinto zokomoya. Wathi: “Into esiyibonayo ngoku yimbonakalo eluzizi ngokungathi sikhangele esipilini . . . Ukwazi kwam ngoku akugqibelelanga.”—1 Korinte 13:12, IBhayibhile YesiXhosa Yowe-1996.

Kakade ke, ukholo lokwenene kuThixo aluxhomekekanga kwinzululwazi yezi mini. Kodwa inzululwazi inokulomeleza ukholo lomntu oqiqayo. Ukholo lokwenene nothando ngezinto zokomoya lubalulekile ukuze umntu aphile ubomi obanelisayo ngokonwaba. (Mateyu 5:3) Ukuba ufunda iBhayibhile ngenjongo yokuba nolwazi oluphangaleleyo ngoYehova neenjongo zakhe ngoluntu nomhlaba, uya kuphila ubomi obunenjongo uze ube nethemba eliqinileyo.

[Umbhalo osemazantsi]

[Ibhokisi/Imifanekiso ekwiphepha 17]

Oko kuthethwa zizazinzulu

Izazinzulu ezininzi aziyifihli into yokuba ziyakholelwa kuMdali. Nangona ezinye zazo zingenalwazi lungako ngoThixo, ziyavuma ukuba ubungqina bubonisa ukuba kukho uMyili okrelekrele. Zivele ngokwakho oko zikuthethayo:

“Njengesazinzulu, xa ndibona ukuntsonkotha kwezinto ezisingqongileyo ndiziva ndinyanzelekile ukuba ndivume ukuba kukho umntu okrelekrele owadala zonke ezi zinto.”—UANDREW MCINTOSH, INGCALI YEZIBALO YASEWALES, EUNITED KINGDOM

“Ukuntsonkotha kwendalo kubonisa ukuba kukho uMdali. Ukuntsonkotha kwemithetho elawula indalo kucaca ngakumbi xa iqondwa kakuhle.”—UJOHN K. G. KRAMER, INGCALI YEMICHIZA, YASEKHANADA

“Ukulungelelana kwendalo kubonwa nanguthathatha. Kwamiselwa ngumntu onaMandla angaphaya kwawemvelo endimbiza ngokuba nguThixo. Yile nkalo kanye oluvumelana ngayo ukholo nenzululwazi. Kunokuba luphikisane nenzululwazi, ukholo luyangqinelana nayo, lusenza siyiqonde ngakumbi indalo.”—UJEAN DORST WASEFRANSI, OSISAZI NGEBHAYOLOJI

“Andiqondi ukuba indalo nabantu babenokubakho ngaphandle kokudalwa ngumntu wokomoya okrelekrele ‘nonothando’, onolwazi olungaphezulu kolwezazinzulu nemithetho yazo.”—UANDREY DMITRIYEVICH SAKHAROV WASERHASHIYA, OSISAZI NGENUCLEAR PHYSICS

“Silwanyana ngasinye sidalwe ngendlela yokuba sikwazi ukuphila kwindawo yaso yaye ndikholelwa ukuba nguMdali kuphela owayenokwenza oko, kwakungenakwenzeka ngamabona-ndenzile.”—UBOB HOSKEN, INGCALI YEMICHIZA YASEOSTRELIYA

[Ibhokisi/Imifanekiso ekwiphepha 18]

Ukuqhwatyelw’ izandla kwengxelo yeGenesis

UGerald Schroeder, owayesakuba ngunjingalwazi we-“nuclear physics” wabhala wathi: “Kwiindinyana nje ezingamashumi amathathu ananye, iBhayibhile ibalisa ngamazwi angamakhulu ambalwa iziganeko ezenzeka kwisithuba seminyaka elishumi elinesithandathu lamawaka ezigidi. Izazinzulu ziye zabhala izigidi zamazwi ngezi ziganeko. IBhayibhile ishwankathela ingxelo ephathelele ukudalwa kwezilwanyana kwizivakalisi nje ezisibhozo. Xa ucinga ngobufutshane bengxelo yeBhayibhile, iyamangalisa indlela ingxelo yeGenesis 1 evumelana ngayo nenzululwazi yezi mini, ingakumbi xa ucinga ukuba ingxelo yeBhayibhile yabhalwa kwiinkulungwane nditsho nakumawaka eminyaka eyadlulayo ngoko ayizange nangayiphi indlela iphenjelelwe yinzululwazi yezi mini. Yinzululwazi yezi mini eye yavumelana nengxelo yeBhayibhile ephathelele imvelaphi yethu.”—THE SCIENCE OF GOD—THE CONVERGENCE OF SCIENTIFIC AND BIBLICAL WISDOM.

[Imifanekiso]

IBhayibhile ithetha ngamaxesha amathandathu okudala

[Umfanekiso okwiphepha 20]

IBhayibhile iqulethe ubungqina obunamandla bokuba yaphefumlelwa nguThixo