Iintsikelelo Ezingaphezu Kobutyebi

ZAZIMHAMBELA kakuhle izinto emsebenzini uJon, njengomcebisi eUnited States. Nangona wayeselula, wayekhenketha ihlabathi yaye efumana izityhwentywe zemali. Yena nomfazi wakhe babenendlu entle yaye bephila kamnandi. Abantu abaninzi babesithi basikelelekile.

Phakathi kwabantu abangama-5 000 ababefuna ukufumana uqeqesho kwibhanki ephambili eYurophu, uKostasawayephakathi kwabangama-80 abakhethwayo. Kwiminyaka nje embalwa, wonyuselwa isikhundla, yaye ekugqibeleni waba ngumphathi kwisebe eliphambili kuloo bhanki. Ukushiya kwakhe loo msebenzi ukuze azivulele eyakhe inkampani, imali awayeyenza ngonyaka yayingaphezu kwemali abantu abaninzi abayifumanayo kubomi babo bonke. Wayeziva esikelelekile.

Sekunjalo, omabini la madoda aqinisekile ukuba zikho ezinye iintsikelelo ezingaphezu kobutyebi. Ngokomzekelo, namhlanje uJon ulitsha-ntliziyo njengomfundisi weBhayibhile yaye unceda abantu basondele kuThixo. UJon uthi: “Ndiye ndabona ukuba ubutyebi abumenzi onwabe umntu. Xa usiwa uvuka uzama ukufumana imali awubi nathuba lakwenza nantoni na enye. Kwelinye icala, ukuphila ngemigaqo yeBhayibhile kuzisa iintsikelelo ezininzi, njengokuba nomtshato owonwabileyo, uxolo lwengqondo nesazela esicocekileyo.”

UKostas naye uthetha into efanayo: “UThixo akafuni siphile kubunewunewu. Ndivakalelwa kukuba nantoni na asinika yona engaphezu kwezinto eziyimfuneko kwimihla ngemihla, sifanele siyisebenzise ngokuvumelana nokuthanda kwakhe.” Kutshanje, uKostas nentsapho yakhe baye baqalisa ukufunda olunye ulwimi ukuze bafundise abantu abangakumbi imigaqo yeBhayibhile. Uthi: “Siye safunda ukuba ukupha kusenza sonwabe ngakumbi kunokwamkela.”—IZenzo 20:35.

Eneneni, uJon noKostas baye bafunda ukuba iintsikelelo zokomoya zixabiseke kakhulu kunezo zokwenyama. UDaniel Gilbert, unjingalwazi eHarvard, uthi iingcali zengqondo “ziye zachitha amashumi eminyaka zifunda ngonxulumano olukhoyo phakathi kobutyebi nolonwabo, yaye ziye zagqiba kwelokuba ubutyebi benza umntu onwabe xa ebekade elihlwempu aze aphile ubomi obuqhelekileyo.” Kodwa wongezelela ngelithi’ “Emva koko abumenzi umntu onwabe.”

Ukufunda Kabuhlungu

Omnye umntu wathi: “Ukuba umntu akalohlwempu, akonwatyiswa kukufumana imali engakumbi.” Ngasekuqaleni kwenkulungwane edluleyo, enye intatheli yakuqonda oku xa yayinodliwano-ndlebe noAndrew Carnegie, owayeyingcaphephe kwishishini leentsimbi, yaye ngelo xesha wayengomnye wabantu abazizityebi emhlabeni. UCarnegie wathi kuyo: “Abantu mabangandimoneli. Bungandinceda njani ubutyebi bam? Ndineminyaka engama-60 ubudala, yaye ukutya akwehli. Bendinokuphisa ngabo bonke ubutyebi bam ukuba bendinokuphinda ndibe mtsha ndize ndibe sempilweni.”

Le ntatheli yongezelela ngelithi: “UMnu uCarnegie wajika, waza wathi ngelizwi eliphantsi yaye edanile, ‘Ndingathengisa yonke into ukuze ndifumane ubomi bam kwakhona.’” Omnye usozigidi, owayeneshishini leoli, uJ. Paul Getty, naye uthetha into efanayo: “Imali ayinanto yakwenza nolonwabo. Mhlawumbi ingakwenza ungonwabi.”

Usenokuvumelana nombhali weBhayibhile owacela esithi: “Musa ukundinika ubuhlwempu okanye ubutyebi. Mandidle ukutya endikumiselweyo, ukuze ndingabi nakwanela ndize ndikukhanyele ndithi: ‘Ngubani na uYehova?’ nokuze ndingabi nakuhlwempuzeka ndize ndibe, ndilihlasele igama loThixo wam.”—IMizekeliso 30:8, 9.

UKumkani uSolomon wakwaSirayeli wamandulo wathi: “Ndaba mkhulu ngakumbi ndaza ndanda ngaphezu kwakhe nabani na owakha wakho phambi kwam eYerusalem.” Kodwa wongezelela esithi: “Yonk’ into yayingamampunge nokusukelana nomoya.” Kwakhona uSolomon wathi: “Intsikelelo kaYehova—yiyo etyebisayo, yaye akongezi ntlungu kuyo.”—INtshumayeli 2:9-11; 5:12, 13; IMizekeliso 10:22.

Indlela Esa Kwiintsikelelo Zikanaphakade

Licacile elokuba, sinokufumana ulonwabo lokwenene noluhlala luhleli emva kokwanelisa intswelo yethu yokomoya. Ukuba uThixo uza kuqala ebomini bethu, siya kufumanisa ukuba bonke ubomi bethu buba nomvuzo.

Sinombulelo kuba asisayi kuhlala sixhalabele imali. IBhayibhile isiqinisekisa ukuba kuya kupheliswa ngonaphakade ukunyoluka norhwebo olungafanelekanga. (1 Yohane 2:15-17) Kwinkqubo entsha kaThixo kuza kubakho imigaqo yakhe elungileyo. Ihlabathi liza kuba yiparadesi ekubeni yayiyinjongo kaThixo xa wabeka isibini sokuqala kuwo. Iya kuba ziintsikelelo zokwenene xa wonke umhlaba uzele lulonwabo, uxolo nothando!—Isaya 2:2-4; 2 Petros 3:13; 1 Yohane 4:8-11.

Ubomi abusayi kuba yindinisa ngelo xesha. Siza kufumana iintsikelelo zokwenyama nezokomoya, njengoko uThixo ezalisekisa injongo yakhe yantlandlolo yokuba abantu baphile ngonaphakade kwiparadesi esemhlabeni. Singaqiniseka ukuba kuya kube kukuninzi ukutya, indawo yokuhlala nomsebenzi owanelisayo. Ubuhlwempu buya kupheliswa ngokupheleleyo.—INdumiso 72:16; Isaya 65:21-23; Mika 4:4.

Wonke ubani onokholo kuYehova, uThixo weBhayibhile, akayi kudimazeka. (Roma 10:11-13) Ngoko ke, siya kuba senza ngobulumko xa sisukela kwangoku iintsikelelo ezingaphezu kobutyebi!—1 Timoti 6:6-10.

[Umbhalo osemazantsi]

[Amagama acatshulweyo akwiphepha 8]

Ukuba uThixo simbeka kwindawo yokuqala, ubomi bethu buya kuba nomvuzo

[Umfanekiso okwiphepha 8]

Xa siyisebenzisa kakuhle imali siya konwaba