Okwenzeka Ehlabathini

Abantu baseJamani abangama-76.3 ekhulwini ekwathethwa nabo bathi, “akukho nto iphosakeleyo kwaphela ekuncwaseni” yaye “akuthethi kuthi lo mntu ufuna into engaphaya.” Phantse isiqingatha saba bantu sithi akukho nto iphosakeleyo xa umntu otshatileyo encwasa umntu angamaziyo.​—APOTHEKEN UMSCHAU, EJAMANI.

Uhlolisiso olwenziwe eRashiya lubonisa ukuba abantu balapha abangama-48 ekhulwini bakholelwa ukuba iintlaselo zabagrogrisi “zilindelekile” yaye “ziyinxalenye yobomi.”​—IKOMMERSANT, YASERASHIYA.

Kutshanje, abathengisi beziyobisi baseMexico baye beza necebo elingaqhelekanga lokudlula kumagosa agade umda, “elifana nendlela eyayisetyenziswa kumaxesha aphakathi”—baye benza “ixhayi elikhulu” elinesilingi esomeleleyo baza balibeka enqweleni ukuze “batsibise iziyobisi” ngaphezu kocingo lomda waseUnited States.​—IREUTERS NEWS SERVICE, YASEUNITED STATES.

“Ababini kubantu abahlanu abakhulelweyo”eNew York City bayaqhomfa. “Bekusoloko kunjalo kangangeminyaka engaphezu kwelishumi.”​—INEW YORK TIMES, YASEUNITED STATES.

Abantu ababulala izinambuzane bamangaliswa xa bafumana impungutye kumgangatho wama-72 wesakhiwo eside esasisakhiwa kumbindi weLondon. Esi silwanyana “esasiphila ngokutya okushiywe ngabakhi,” sakhutshelwa ngaphandle kufutshane nalapho.​—ITELEGRAPH, YASELONDON.

Abefundisi Becawa YobuOthodoki YaseRashiya Bavumelekile Ukuzigqatsa Kunyulo Lwepolitiki

Ijelo leendaba iRIA Novosti lithi: “ISigqeba SooBhisophu BeCawa YobuOthodoki YaseRashiya siye sabavumela abefundisi ukuba bangene kwipolitiki phantsi kweemeko ezithile ukuze bakhusele icawa.” Ngokutsho koobhisophu, ezo meko zibandakanya “ukulwa nxamnye namahlelo abawexuki nabanye abafuna ukusebenzisa ivoti ukuze balwe neCawa YobuOthodoki.”

Iingxaki Ezintsha Zezomthetho

Iindlela ezintsha zokunceda abantu abangafumani bantwana nekwakukade kucingwa ukuba azinakwenzeka, zibangela ingxaki kwezomthetho. IWall Street Journal ithi: “Nyaka ngamnye, abantwana abaninzi bazalwa kusetyenziswa amadlozi okanye iimbumba (iiembryo) ebezigcinwe kangangeenyanga okanye iminyaka. Kwezinye iimeko, omnye umzali, ngokuqhelekileyo utata, uba sele efile.” EUnited States, ezinye iinkedama zifumana imali yendodla kurhulumente. Kodwa amaphondo anemithetho engafaniyo ngokuphathelele ukuba loo mali ifanele ihlawulwe kusini na xa loo mntwana efunyenwe sele efile omnye wabazali bakhe. Igqwetha laseMinnesota, uSonny Miller, lithi: “Iingcali zezomthetho azizange zayicinga nokuyicinga into yokuba ezobugcisa zingahambela phambili kangaka.”