Abaselula Bayabuza

Ngaba Kuphosakele Ukuba Yindumasi?

Khetha impendulo echanileyo kwezi:

Yiyiphi into elungileyo kwezi? ․․․․․

A. kukusoloko uyindumasi?
B. kukuba yindumasi ngamaxesha athile?
C. kukungaze ube yindumasi?

IMPENDULO echanileyo “nguB.” Ngoba? Kaloku ukuduma kuthetha ukuthandwa ngabantu abaninzi—yaye akusoloko kuphosakele oko! IBhayibhile yaxela kwangaphambili ukuba amaKristu ayeya kuba ‘lukhanyiselo lweentlanga’ yaye abantu babeza kutsaleleka kuwo. (Isaya 42:6; IZenzo 13:47) Xa sicinga ngoko, sinokutsho ukuba amaKristu adumile.

Ngaba ubusazi ukuba?

UYesu wayeyindumasi. Naxa wayeselula, ‘wayekholeka kuThixo nasebantwini.’ (Luka 2:52) IBhayibhile ithi xa wayesele emdala, “izihlwele ezikhulu zamlandela zivela eGalili naseDekapoli naseYerusalem nakwelakwaYuda nangaphesheya kweYordan.”—Mateyu 4:25.

Kutheni kwakufanelekile nje oko kuduma?

Kungenxa yokuba uYesu wayengazifuneli uzuko okanye udumo ibe wayengazami ukuzithandisa kwabanye. UYesu wayesenza nje okulungileyo—isenzo esasibangela ukuba athandwe maxa wambi. (Yohane 8:29, 30) Kwangaxeshanye, uYesu wayeqonda ukuba abo bantu babenokumjikela ethubeni. Loo nto wayivuma xa wayechaza ukuba abantu babeza kumbulala!—Luka 9:22.

Eyona Into Ibalulekileyo:

Udumo lufana nobutyebi. Ukuba nalo akusoloko kuphosakele. Ingxaki zizinto ezenziwa ngabantu ukuze balufumane okanye bangaphulukani nalo.

Isilumkiso!

Abaninzi abaselula baxolele ukwenza nantoni na ukuze bafumane udumo. Abanye bazama ukukholisa izihlwele. Abanye bade banyanzele abantu ukuba babathande—kwanokuba benjenjalo kuba besoyika.a

Kwiphepha elilandelayo, siza kuqwalasela ezi ndlela zimbini zobuqhophololo abantu bazifunela udumo ngazo. Emva koko sinikele ingqalelo kweyona ndlela ifanelekileyo.

Amanye amanqaku athi “Abantu Abaselula Bayabuza” afumaneka kwiWebhusayithi ethi www.watchtower.org/ype

a IBhayibhile isichazela ngabaxhaphazi ekwakusithiwa ‘ziiNefili,’ ekubhekiselwa kuzo ngokuthi ‘ngamadoda adumileyo.’ Eyona nto zazinomdla kuyo kukuzizukisa.—Genesis 6:4.

IINDLELA ZOKUFUNA UDUMO

UKUZITHANDISA EBANTWINI

Kufuneka ndikholise abanye.
Ndimele ndiziphathe njengabo.

“Ndazama ukuzitshintsha ukuze ndifane nabanye. Ekuqaleni kwaba ngathi kuyasebenza oko. Kodwa kamva ndaqonda ukuba umntu akamele azitshintshe kuba nje efuna ukwamkeleka kwabanye.”—uNicole.

Umgaqo weBhayibhile: “Musa ukwenza into kuba ubona wonk’ umntu eyenza. . . . Ungavumeli abo bantu bakulukuhlele ekwenzeni okubi.”—Eksodus 23:2, ngokweHoly Bible—Easy to Read Version.

UMXHAPHAZI

Ndithandwa gqitha ngabanye, ibe ndifuna kuhlale kunjalo.
Ndixolele ukwenza nantoni na ukuze kuhlale kukhonya mna—nokuba oko kuthetha ukucwanya phezu kwabanye.

“Abantwana badla ngokukholelwa yonk’ into le, ngoko ekubeni abaxhaphazi bedla ngokuba nodumo, umntwana oneentloni udla ngokucinga ukuba yonk’ into abayithethayo ichanile.”—uRaquel.

Umgaqo weBhayibhile: “Kanye njengoko nifuna abantu benze kuni, yenzani ngendlela efanayo kubo.”—Luka 6:31.

INDLELA EFANELEKILEYO

Yazi imilinganiselo yakho. IBhayibhile ithi abantu abaqolileyo ‘baqeqeshwe ukuze bahlule okulungileyo nokubi.’—Hebhere 5:14.

Xa usebenzela kwezi ngongoma zintathu zisekhohlo, usenokungathandwa ngabantu abaninzi—kodwa uya kuthandwa ngabantu abafanelekileyo!
Bambelela kwizinto ozikholelwayo. Xelisa uYoshuwa owayeqinisekile wathi: “Zikhetheleni namhlanje ukuba ngubani na eniya kumkhonza . . . Ke mna nendlu yam, siya kukhonza uYehova.”—Yoshuwa 24:15.
Qiniseka ngekhondo olikhethileyo. Umpostile uPawulos wakhumbuza uTimoti oku: “UThixo akasinikanga moya wabugwala, kodwa owamandla.”—2 Timoti 1:7.