Yeesu Nankuttho nhu Muulupale Onnidhuwela Saana

1-2. (a) Eseeni yaamwiirinhe Yehova onruma Mwane ora valaponi? (b) Eseeni nin’ya nhu woona yoosoma ela? (aHeeberi 5:7-9)

IYAAKHA 2.000 dhivinre ottuli, Yehova aahinruma Mwane onimpheta iye vawaatta ora valaponi. Mwaha wa seeni? Nthowa nuulupale naamwiirinhe ora valaponi, aarenle owoopola apinaatamu mwa etampi ni okhwa ni omaliha mixankiho dhootheene dhikumiheriwe ni Satana. (Yohani 3:16; 1 Yoh. 3:8) Nitho Yehova aahidhuwela wiira Yeesu ora valaponi nkhama pinaatamu waammwiiriha okhala Nankuttho Muulupale onnidhuwela saana ni onnoonela othunku. Yeesu opacenre waakhwanihera nritti owo nuumala opatisiwa mwaakha wa 29 Nuumala Kiriistu Ora.a

² Yoosoma ela, nin’ya woona moopora ekumi ya Yeesu valaponi enkhalihenre awa okhala Nankuttho Muulupale onnidhuwela saana. Etthu yootthuneya wiiwasasa mwaha owo okhala wiira elo enoonikhalihera otepa omwaattamela Yehova saasaasa vaavo ninriipiwa nhu nrima mwaha wa dhoovonya dhihu.—Munsome aHeeberi 5:7-9.

MWAANA YOOWO MULUKU ONIMPHETA IYE VAWAATTA AAHUURA VALAPONI

3-4. Eseeni Yeesu aatthuneya iye oleva wiirimu wiira are valaponi, ni mixankiho seeni dhaankhumelenle valaponi?

³ Woonawene ootheene nhu aataka onikhumelela marukunuso mweekumini mwihu. Mwa ntakihero, nkhama othaama opuro waanidhivela, waahiya amudhi ni axirikha nhu. Ivaara dhikina khonkhweya opaka marukunuso nkhama awo. Masi khaavo nnakhala pinaatamu mmodha otanke opaka marukunuso muulupale nkhama Yeesu. Owo aari nlaikha noopacera ni nuulupale wiirimu. Okathi wootheene Yeesu aaniphetiwa vawaatta ni Atiithye ni aanihakalala ovara vamodha naawo. (Esal. 16:11; Mir. 8:30) Masi hata eri dhiidho, aFilipi 2:7 onlotta wiira Yeesu ‘aahileva itthu dhootheene,’ ahiyaka eparakha aariiyena wiirimu wiira are valaponi akhale ni apinaatamu oohimalela.

⁴ Nkahaya muupuwele mixankiho dhaakhumelenle mweekumini mwa Yeesu miyaakha dhoopacera ari valaponi. Yeesu aayariwe ettheko yoohaawa. Hiyo ninnidhuwela elo mwaha wa nkuttho anaan’yari-ye yaavanhe awa nuumala owo oyariwa. (Onam. 12:8; Luka 2:24) Nuumala Eroodi mwene yoowo aari ootakhala odhuwela oyariwa wa Yeesu, aaheehererya inamuna dhootheene wiira amwiiphe. Ndho wiira enkhapelele Yeesu, anaan’yari-ye yaahitthawela Weexiitu ni yaahikhala weiwo okathi vakhaani. (Math. 2:13, 15) Moohaakanyera, ekumi ya Yeesu valaponi, yaari yoovirikana ni ele aariiyena wiirimu!

5. Itthu seeni Yeesu oonne iye okathi aari iye valaponi, ni idho dhinkhalihenre dhai okhala Nankuttho Muulupale onnidhuwela saana? (Moone-tho efootu.)

⁵ Okathi Yeesu aariiye valaponi, aanoona mixankiho yaaviriha apinaatamu. Moohaakanyera, owo aaniriipiwa nrima okhweliwa atthu aapheta iye, woonawene waahela mpuwa apaapaye a weerutthuni, Yooseefi. Okathi aalaleerya iye, Yeesu aaniwoona atthu yaarina maretta, yahoona, oorakala ni anaan’yari yaariipiwe nrima mwaha wa okhweliwa ana. Ndho Yeesu aaniwoonela othunku atthu awo. (Math. 9:2, 6; 15:30; 20:34; Mar. 1:40, 41; Luka 7:13) Ekhweeli wiira Yeesu okathi aari iye wiirimu aaniwerya woona mixankiho dhaaphwanya apinaatamu. Masi okathi aari iye valaponi nkhama pinaatamu, owo aaniwerya wiiwasasa saana owereya onaaphwanya apinaatamu vaavo anviriha awa mixankiho. (Yes. 53:4) Mixankiho Yeesu ovirinhe iye okathi aari iye valaponi, dhoonkhalihera odhuwela saana moonelo wa apinaatamu, itthu inaakhulumula ni owereya anoona awa. Nitho nkhama apinaatamu ootheene, Yeesu aanikhulumuwa, oxanka ni oriipiwa nrima.

YEESU ONNIWOONELA OTHUNKU APINAATAMU

6. Malikanyiho Yeesaaya aarumeenle iye annihudhihani voohima dha othunku wa Yeesu? (Yesaya 42:3)

⁶ Okathi aalaleerya iye, Yeesu aaniwoonela othunku vawaatta atthu yaahadhuliwa. Ndho mwaha wa opaka elo, ahaakhwanihera eprofesiiya emodha. Dhawaatikhiwa dha eHeeberi, dhinnaalikanyiha atthu arina waamini woolipa nkhama exardi yooreera ni mittaikho dhuulupale ni dhoolipa. (Esal. 92:12; Yes. 61:3; Yer. 31:12) Masi ale aniidhoona okhala oohiphareleleya ni anthokoreriwa moohixariya, anlikanyihiwa ni ntathi wunten’ye ni ntthampo nintthuwa mwiisi, aahiidho itthu ihaana efaita yuulupale. (Munsome Yesaya 42:3; Math. 12:20) Uupuseriwaka ni Yehova, Yeesaaya aahipaka malikanyiho ala wiira alotte opheta ni othunku Yeesu aaya iye owoonihera atthu yaathanyiwa ni yahaavahiwa efaita.

7-8. Yeesu aakhwanihenre dhai eprofesiiya ya Yeesaaya?

⁷ Matheeyo ohoonihera wiira Yeesu ohaakhwanihera eprofesiiya ya Yeesaaya, mpakha waatikha wiira: ‘Khanre asinse ntathi wunten’ye ni khanttipiha ntthampo nintthuwa mwiisi.’ Miiriirya dhikina Yeesu aapanke iye dhaahaakhalihera atthu yaahadhuliwa, woonawene yaawo yaaidhoona nkhama ntathi wunten’ye, ni ale yahaarina nlipelelo ni yaaidhoona nkhama ntthampo nintthuwa mwiisi. Mwa ntakihero, nihiku nimodha Yeesu aahimphwanya nlopwana mmodha yoowo aari maretta-ru erutthu yootheene. Moohaakanyera, nlopwana ole khaarina nlipelelo na wiira vanihikuni aampenuwa atthikele okhala vamodha ni amudhi-ye ni axirikha-ye. (Luka 5:12, 13) Nitho Yeesu aahindhuwela nlopwana mmodha ahaaiwa ni ahaalotta. Nkahaya muupuwele, moopora nlopwana owo oonela iye vaavo aawoona iye atthu yoopaka mwaha ni etheyaka, masi owo ahiweryaka wiiwa etthu yaatheiha. (Mar. 7:32, 33) Masi kahi dheidhoru pahi mixankiho atthu yaaviriha awa.

⁸ Okathi Yeesu aari iye valaponi, ayuuda awaatta yaakhupali wiira atthu akina yaanihaawa mwaha wa opaka itampi aahiidho mwaha wa itampi dha anaan’yari-ya. (Yohani 9:2) Ndho elo yaaniwiiriha atthu yaawereiwa ni oorakala wiidhoona ohikhalana efaita. Aakhwaniheraka eprofesiiya ya Yeesaaya, Yeesu aahaapenusa atthu awo ni aahiwoonihera wiira Muluku onnaavaha efaita. Ndho elo ennihudhihani?

9. Eseeni ennikhupaliha wiira Nankuttho nhu Muulupale onniwoonela othunku apinaatamu oohimalela? (aHeeberi 4:15, 16)

⁹ Munsome aHeeberi 4:15, 16. Nikhupali ni nrima wootheene wiira Yeesu khanre ahiye onoonela othunku. Elo entaphulelani? Nuulumo na ekereku nitaphuleliwe nawi “odhuwela” nri aHeeberi 4:15, nintaphulela oriipiwa nrima vawaatta ni woona owereya atthu akina anoona awa. (Nlikanyihe ni aHeeberi 10:34, eveersu ela Paaulu oorumeela nuulumo nimodharu na ekereku nenno nintaphulela ‘owoonela othunku). Vaavo ninsoma nhu mbiibiliyani miiriirya Yeesu aapanke iye, ninniwerya woona wiira owo aaniwoonela othunku vawaatta atthu. Owo khaapaka elo mwaha wookhanyereriwa. Masi okhala wiira aanaavaha efaita atthu ni aatthuna waakhalihera. Mwa ntakihero, ekhweeli wiira Yeesu aanwerya ompenusa nlopwana ole aarina maretta anttaivenle, masi owo aahithanla amwaattamenle ni omphara wiira ampenuse. Woonawene dhaahivira iyaakha dhawaatta nlopwana ole ahiphariwe ni ntthu! Nitho muupuwele okathi Yeesu aampenunse iye nlopwana ole ahaaiwa. Mooreera nrima Yeesu aahinkusa nlopwana ole anroiha wiipiini opuro ohaavira-viriwa. Ohiya-vo, okathi nfarisi mmodha ahaanthokorenrye iye mooreera nrima nthiyana mmodha aattharunwe itampi-dhe yoowo aarapinhe manawu a Yeesu ni maithori-ye uukuttha ni maihi-ye, mwawaakuveya Yeesu aahimwaakiha. (Math. 8:3; Mar. 7:33; Luka 7:44) Yeesu khaathanya atthu yaawereiwa nnakhala ale yaapanke etampi yuulupale. Ohiya opaka elo, Yeesu aatthuna wiira atthu awo ekamwaattamela, ni aaniwoonihera opheta wuulupale. Ndho nikhupali ni nrima wootheene wiira nlelo Yeesu onniwoonela othunku apinaatamu nkhama khalai.

HIYO NINNITTHARA NTAKIHERO NA NANKUTTHO NHU MUULUPALE

10. Itthu seeni nikhanle nhu orumeela wiira naakhalihere atthu ale ahiniiwa ni ahinoona? (Moone-tho ifootu.)

¹⁰ Nkhama atthareli a Yeesu, hiyo ninnipaka itthu dhootheene ninwerya nhu wiira nitthare ntakihero-ne nooniheraka opheta ni othunku. (1 Ped. 2:21; 3:8) Ekhweeli wiira khaninwerya waapenusa atthu ahiniiwa ni ale ahinoona, masi ninoowerya waakhalihera nkhalelo wa omunepani. Mwa ntakihero, olelo-va iliivuru dhihu dhinintthokihera Biibiliya dha ilottelo dha matata dhinniphwanyaneya ilottelo dhinxira 100. Ni wa atthu ahinoona dhinniphwanyaneya iliivuru dha ebraili ilottelo dhinxira 60 vamodha ni aaudiyu anxira ilottelo 100 anleelihera iviidiyu dhihu, yaawo anaakhalihera atthu ahinoona odhuwela etthu eniiraneya nviidiyuni. Itthu dhootheene idho dhinnipakiwa wiira ekhaliheriwe atthu ahiniiwa ni ahinoona wiira ekhale axirikha a Yehova vamodha ni Mwane, Yeesu.

11. Ntthenkeso wa Yehova onwoonihera dhai othunku atthu, nkhama Yeesu aaira iye? (Miteko 2:5-7, 33) (Moone-tho ifootu.)

¹¹ Ntthenkeso wa Yehova onniilipihera waakhalihera atthu a makhalelo ootheene. Nhiliyale wiira nuumala Yeesu ohihimusiwa, aahaavaha munepa wawaarya atthu ootheene yaathukumanne Efeesta ya Pentekoosti wiira khuta ntthu aari opuro ole, awerye wiiwa ihapari dhooreera ‘ni elottelo-ye.’ (Nsome Miteko 2:5-7, 33.) Ntthenkeso nhu ohooleliwaka ni Yeesu, onnikhumihera iliivuru dhinintthokihera Biibiliya ilottelo dhinxira 1.000, ohela mpuwa idhe dhinlottiwa ni atthu vakhaani. Mwa ntakihero, ilottelo dhoopacera dha wAmérica dhinlottiwa ni atthu vakhaani ankhala wAmérica do Norte ni wAmérica do Sul. Masi hata eri dhiidho, dhinniphwanyaneya iliivuru ilottelo dhinxira 160 wiira atthu anlotta ilottelo idho ewerye wiiwa ihapari dhooreera ni elottelo-ya. Nitho dhinniphwanyaneya iliivuru dhihu ilottelo dhinxira 20 dha eRomani. Ndho atthu awaatta anlotta ilottelo idho anninrumeela Yehova.

12. Itthu seeni ikina ntthenkeso wa Yehova ompaka awa olelo-va wiira waakhalihere atthu akina?

¹² Ohiya pahi waakhalihera atthu wiiwa ihapari dhooreera, ntthenkeso wa Yehova onnakhalihera ale dhaaphwannye ihasara dha ephattu. Tivondho, Anamoona a Yehova awaatta anniivahererya wiira yaakhalihere atthu dhaaphwannye ihasara idho. Nitho ntthenkeso wa Yehova onniteka mampa oohaattiheriwa itthu wiira atthu ekathukumanamo wiira ehudhere voohima dha opheta wa Yehova ni onkokhorela.

NANKUTTHO NHU MUULUPALE ONOOWERYA WOOKHALIHERANI

13. Inamuna seeni ikina Yeesu onrumeela iye wiira anikhalihere?

¹³ Yeesu nkhama makampusi nhu ooreera nrima, onnidhuwela mixankiho dha omunepani khuta mmodha a hiyo onviriha iye. (Yohani 10:14; aEefe. 4:7) Ivaara dhikina, mixankiho dha mweekumini pooti oniiriha wiidhoona nkhama ntthampo ninhala vakhaani ottipha aahiidho ntathi wunten’ye. Woonawene hiyo pooti okhulumuwa mwaha wa eretta enniwereya, etampi yuulupale nipanke nhu aahiidho akhala wiira khaniniiwanana ni munna aahiidho nrokora mmodha. Ndho oriipiwa nrima onkhumiheriwa ni itthu idho, pooti oniiriha woona olipa wuupuwelela nlipelelo nihu na nhoolo. Masi nhiliyale wiira Yeesu onnoona mixankiho dhootheene munviriha nnyu ni onnidhuwela miyuupuwelo dhinyu. Mwaha wa othunku ni opheta onwooniheraiyeni, owo ontthuna opaka etthu wiira ookhalihereni. Mwa ntakihero, owo pooti orumeela munepa wawaarya wiira oovaheni ikuru vaavo munkhulumuwa nnyu. (Yohani 16:7; Tito 3:6) Ohiya-vo, Yeesu pooti orumeela ‘dhoovaha dha alopwana,’ niire dho asitokweene, nitho anna ni arokora wiira yoolipiheni ni wookhaliherani.—aEefe. 4:8.

14. Eseeni nihinreerela nhu oliyala vaavo ninkhulumuwa nhu?

¹⁴ Akhala wiira ntthampo ninyu nihanle vakhaani ottipha aahiidho akhala wiira mookhulumuwa, nhiliyale wiira Yeesu Nankuttho nhu Muulupale. Nitho muupuwele wiira Yehova khaanrumme Yeesu ora valaponi wiira avahe ekumi-ye pahi nkhama nkuttho, masi owo oonruma Yeesu wiira ankhalihere odhuwela mixankiho ninviriha nhu nkhama apinaatamu oohimalela. Vaavo ninkhulumuwa nhu mwaha wa itampi dhihu aahiidho dhoovonya dhihu, Yeesu ori oolikana ene onikhalihera ‘okathi wooreerela.’—aHeb. 4:15, 16.

15. Eseeni yaankhalihenre Stefano otthikela mmulokoni?

¹⁵ Yeesu onniweettiha ale aniilipihera owaadhya ni waakhalihera atthu ahin’ye onrumeela Yehova. (Math. 18:12, 13) Moone ele yaamwiiraneenle Stefano.b Nuumala ovira iyaakha 12 akhumihiwe mmulokoni, owo aahilakela orowela mithukumano. Owo onlotta wiira: “Khiyaari etthu yookhweya, masi miyo kaanitthuna otthikela wiirela mphantta emudhi yoopheta ya Yehova. Asitokweene yaathokorenrye mwaha aka yaahikileela wiira kikhale ootaphuwa. Mwaha wa ohiya onrumeela Yehova, ivaara dhikina kaaniriipiwa nrima ni nkaatthuna otthikela wa veene. Masi anna awo yaahikuupusera wiira Yehova ni Yeesu antthuna wiira kivilele. Nuumala miyo otthikela mmulokoni, anna ni arokora ootheene yaahikikhupaarela miyo vamodha ni amudhi aka yooniheraka wiira yaahinaakhela. Nuuvira okathi, amwaaraka yaahipacera onsoma Biibiliya, ni nenna-va ninninrumeela Yehova vamodha nkhama ettheko.” Voohaakanyera, Nankuttho nhu Muulupale onnidhuwela saana, onnihakalala vawaatta vaavo onwoona iye atthu attharunwe ekhaliheriwaka wiira etthikele mmulokoni!

16. Eseeni enwiirihani oxukhurela mwaha wa okhalana Nankuttho Muulupale onnidhuwela saana?

¹⁶ Okathi Yeesu aari iye valaponi, aanaakhalihera atthu okathi wooreerela. Nitho hiyo olelo-va, nikhupali ni nrima wootheene wiira owo akaannivaha nikhalihero okathi ninramela nhu. Moohilekela, Yeesu onoomaliha etampi ya apinaatamu ni onawaakhalihera okhalana ekumi yoomalela. Ndho ninninxukhurela vawaatta Yehova, mwaha wa onoonihera opheta wuulupale ni onimorela ikharari anivahaka Mwane, yoowo ori Nankuttho Muulupale onnidhuwela saana, Yeesu!