Ntakihe Nthiti na Yeesu Nteko Woolaleerya

1. Eseeni enwiiriha arumeyi a Yehova okhala oovirikana ni atthu aniihima okhala Makiristau?

ETTHU enaavirikaniha arumeyi a Yehova ni atthu aniihima okhala Makiristau ori okhalela nthitia nteko woolaleerya. (Tito 2:14) Masi ivaara dhikina, pooti wooliperya odhiveliwa orowa nteko woolaleerya. Woonawene moonelo nnyu onnoolikana ni wa ntokweene mmodha awiivahererya, yoowo olontte wiira: “Ivaara dhikina khonkidhivela nteko woolaleerya.”

2. Eseeni ekhale oniiriha ivaara dhikina ohihakalala ni nteko woolaleerya?

² Hiyo pooti onidhivela ovara miteko dhikina dha omunepani, ohiya nteko woolaleerya. Seeni eniiraneya awa elo? Okhala wiira okathi ninvara nhu miteko dhikina dha omunepani nkhama okhalihera otekiwa aahiidho okociheriwa Mampa a Omwene, ninniwerya waakhalihera ni waalipiha anna ni arokora dhaaphwanye ihasara dha ephattu. Ndho vaavo ninoona nhu wiira wiilipihera wihu wookhumihera nreerelo, elo enniiriha woona saana ni ohakalala. Nitho okathi owo, makhalelo a opuro owo ankhala ootepa ooreera, okhala wiira ninvara mwa nrettele, ninnoona opheta wa anna ni arokora ni ninnikhupali wiira awo annivaha efaita nikhalihero nihu. Ohiya-vo, woonawene hiyo pooti olaleerya iyaakha dhawaatta nttetthe ninkhala nhu masi nihikoona mireerelo dhinkhumelela aahiidho atthu ekakhootta wiiwa nhupi ninlaleya nhu. Nitho hiyo noodhuwela wiira vaavo ninaattamela nhu wookhidherani wa olumwinku ola, ninonyookhiwa ni ottharatthariwa mwaha wa olaleya ihapari dhooreera. (Math. 10:22) Ndho, eseeni en’ya onikhalihera ohihiya oluttuweliwa ni okhalela nthiti nteko woolaleerya?

3. Nlikanyiho niri Luka 13:6-9 ninnihudhihani voohima dha nthiti na Yeesu?

³ Hiyo ninoowerya okhalela nthiti nteko woolaleerya nittharaka ntakihero na Yeesu. Okathi Yeesu avara iye nteko woolaleerya, khanatake ohiya nthiti aariiyene nivukuwa. Masi owo aaniilipihera okhalela nthiti nteko woolaleerya. (Munsome Luka 13:6-9.) Nlikanyiho nimodha Yeesu aalontte iye, aalikanyihaka nteko woolaleerya ni wiilipihera wa nlopwana mmodha aakhapelela ematta ya ewuuva. Nlopwana owo aahiviriha iyaakha tthaaru akhapelelaka nttaikho wa efiiku yoowo wahaaima. Mwa enamuna emodharu, Yeesu aahiviriha iyaakha tthaaru aalaleeryaka ayuuda, masi ayuuda awaatta yaahikhootta owiriyana nhupi aalaleya iye. Ndho nkhama dhiidhale nlopwana ole ahaahin’ye iye okhapelela nttaikho wa efiiku wahaaima, Yeesu khaahin’ye okhalela nthiti ni olaleerya voohakalala. Ohiya-vo, owo aahiivahererya wiira aakhalihere atthu waakhulela ihapari dhooreera.

4. Itthu seeni sese nin’ya othokorerya mwaha ola, dhikhanle onikhalihera otthara ntakihero na Yeesu?

⁴ Yoosoma ela, nin’ya woona moopora Yeesu oonihenre iye nthiti nteko woolaleerya, otepasawene miyeeri 6 dhookhidhera dha ekumi-ye valaponi. (Luka 10:1.) Ohudha ni otakiha itthu Yeesu aahudhiha iye onoonikhalihera okhalela nthiti nteko woolaleerya. Mwaha ola, ninoothokorerya itthu sese dhin’ya onikhalihera otthara ntakihero na Yeesu: (1) Owo aahilakela opaka yootthuna ya Yehova, (2) owo anuupuwela iprofesiiya dha mbiibiliyani, (3) owo aaniroromela nikhalihero na Yehova, ni (4) owo aahikhalana moonelo wooloka voohima dha atthu akina.

YEESU AAHILAKELA OPAKA YOOTTHUNA YA YEHOVA

5. Yeesu oonihenre dhai wiira aahilakela opaka yootthuna ya Muluku?

⁵ Yeesu aahilaleya ni nthiti ‘ihapari dhooreera dha Omwene’ okhala wiira aanidhuwela wiira elo etthu Muluku aatthuna iye wiira apake. (Luka 4:43) Yeesu aanivaha efaita yuulupale nteko woolaleerya mweekumini-mwe. Hata aahalana miyeeri vakhaani wiira amalihe nteko-ye woolaleerya valaponi, owo khaahin’ye ‘weetta ipooma dhootheene ni mittetthe dhootheene’ aahudhihaka atthu. (Luka 13:22) Nitho Yeesu aahaahudhiha atthu akina wiira evare nteko woolaleerya vamodha nuuwo.—Luka 10:1.

6. Miteko ninvara nhu mmutthekesoni mwa Yehova, dhinkhalihera dhai nteko woolaleerya? (Moone-tho efootu.)

⁶ Olelo-va, olaleerya ihapari dhooreera, nteko wootepa ootthuneya Yehova ni Yeesu antthuna awa wiira nivare. (Math. 24:14; 28:19, 20) Olotta eekhweeli, miteko dhootheene nininvarela nhu Yehova dhinkhalihera nteko woolaleerya. Mwa ntakihero, ninniteka Mampa a Omwene wiira atthu anaakhulela ihapari dhooreera ekhalena opuro woonkokhorela Yehova. Ohiya-vo, miteko dhootheene dhinvariwa oBeteeli dhirina yoolakela emodharu ya okhalihera nteko woolaleerya. Nitho vaavo ninaakhalihere nhu anna dhaaphwanye ihasara dha ephattu yoolakela nhu kahiyo pahi waavaha itthu dha veerutthuni dhinaathowa, masi nintthuna waakhalihera otthikela okhalana nkhalelo wooreera wa omunepani, ohela mpuwa ovara nteko woolaleerya. Ndho, vaavo nnuupuwela nhu wiira olaleerya nteko wootepa otthuneya Yehova ontthuna iye wiira nivare, elo enooniiriha opaka itthu dhootheene ninwerya nhu wiira nikhalihere nteko owo. Ntokweene mmodha aHungria onniitthaniwa János, onlotta wiira: “Okathi wootheene kinnuupuwela wiira khiwaavo nteko wootepa ootthuneya nininvarela nhu Yehova oxira nteko woolaleerya. Owo nteko muulupale nithanleliwe nhu.”

7. Seeni Yehova ontthuna iye wiira nihihiye okhalela nthiti nteko woolaleerya? (1 Timootheyo 2:3, 4)

⁷ Odhuwela moopora Yehova onwoonela iye atthu onooniiriha otepa okhalela nthiti nteko woolaleerya. Yehova ontthuna wiira atthu awaatta yiiwe ni yaakhulele ihapari dhooreera wiira yoopowe. (Munsome 1 Timootheyo 2:3, 4.) Tivondho, owo oninihudhiha moopora nikhale nhu waalaleerya atthu ihapari idho. Mwa ntakihero, ebroxuura Waapheta Atthu—Onawookhaliherani Waapaka Ahudheri, enninivaha malakihero oovareleya nteko a moopora woopacera ovaanela ni atthu ni enninitumererya okhalana yoolakela ya opaceriha dhoosoma dha Biibiliya. Hata atthu awo ehirowaka opacera onrumeela Yehova nenna-va, woonawene pooti okhalana eparakha yoopaka elo wookhidherani wa maxakha muulupale. Ndho itthu ninaahudhiha nhu nenna-va, pooti waakhalihera nhoolo othanla onrumeela Yehova. Masi elo enooweryaneya akhala wiira khaninne nihiye okhalela nthiti nteko woolaleerya.

YEESU AANUUPUWELELA IPROFESIIYA DHA MBIIBILIYANI

8. Odhuwela iprofesiiya dha mbiibiliyani waankhalihenre dhai Yeesu orumeela saana okathi?

⁸ Yeesu aanidhuwela moopora iprofesiiya dhikina dha mbiibiliyani dhaaya awa waakhwanela. Mwa ntakihero, owo aanidhuwela wiira nteko woolaleerya aaya iye ovara, waaya ooviriha iyaakha tthaaru ni emeya. (Dan. 9:26, 27) Nitho aanidhuwela eprofesiiya yaalotta voohima dha nihiku ni moopora aaya iye okhwa. (Luka 18:31-34) Tivondho owo aahirumeela okathi-ye mwa miruku, alaleeryaka wiira aakhwanihere yoothanleliwa-ye.

9. Odhuwela iprofesiiya dha mbiibiliyani onnitumererya dhai olaleerya ni nthiti?

⁹ Akhala wiira ninawiiwasasa iprofesiiya dha mbiibiliyani pooti oniiriha okhalela nthiti nteko woolaleerya. Hiyo noodhuwela wiira onhala okathi vakhaani wiira opwetesiwa olumwinkhu ola wootakhala. Olelo-va, ninniwerya woona wiira itthu dhiniiraneya moolumwinkuni ni mweettelo wa atthu onnaakhwanihera iprofesiiya dha mbiibiliyani voohima dha mahiku ookhidhera. Nitho ninnoona ohiiwanana wa Epotensiya ya Olumwinku Wootheene ya Anglo-Americana ni Rússia vamodha ni atthu aninkhalihera. Elo enaakhwanihera eprofesiiya yaalotta wiira mwene a osuuli ni mwene a onoorti yaanwana nkina ni nkhwe ‘mahiku ookhidhera.’ (Dan. 11:40) Nitho ninnidhuwela wiira manawu a elatarato ya eprofesiiya eri Daniyeli 2:43-45 anthoonyera Epotensiya ya Olumwinku Wootheene ya Anglo-Americana. Hiyo ninnikhupali ni nrima wootheene wiira moohilekela Omwene wa Muluku onoopwetesa ikuveernu dhootheene dha apinaatamu. Iprofesiiya idha dhinninikhalihera odhuwela okathi ninkhala nhu ni dhinninitumererya olaleya ni nvai ihapari dhooreera.

10. Inamuna seeni dhikina, iprofesiiya dha mbiibiliyani dhikhala awa dhinnitumererya okhalela nthiti nteko woolaleerya?

¹⁰ Iprofesiiya dha mbiibiliyani dhinhela mpuwa nhupi onvaha nlipelelo yoowo ninreerela nhu waaleela atthu akina. Nrokora Carrie yoowo onkhala oRepública Dominicana, onlotta wiira: “Vaavo kinuupuwelaka itthu dhootepa oreera Yehova on’ya iye opaka nhoolo, elo ennikiiriha otthuna waaleela atthu akina. Okhala wiira atthu a olumwinku wootheene annihaawa ni annikumanana mixankiho dhoovirikana, ndho elo ennoonihera wiira annitthuneya odhuwela dhoolaihera dha Yehova.” Ohiya-vo, iprofesiiya dha mbiibiliyani dhinnoonihera wiira Yehova onninikhalihera ovara nteko woolaleerya. Leila, yoowo onkhala oHungria, onlotta wiira: “Yawaatikiwa ya Yesaya 11:6-9 ennikuupusera wiira khuta ntthu onoowerya opaka marukunuso mweekumini-mwe akhaliheriwaka ni Yehova. Tivondho, koolakela waalaleerya ihapari dhooreera atthu ootheene waahela mpuwa ale mphwana nkhama wiira khantthuna okiwiriyana.” Nitho munna Christopher yoowo onkhala oZâmbia, onnaacerera airaka: “Yawaatikhiwa ya Marko 13:10 enlotta wiira ihapari dhooreera dhanlaleiwa olumwinku wootheene, ndho eparakha yuulupale okhalihera waakhwanela eprofesiiya ela.” Ankhi nyuwo? Eprofesiiya seeni ya mbiibiliyani enootumereryani okhalela nthiti nteko woolaleerya?

YEESU AANIROROMELA NIKHALIHERO NA YEHOVA

11. Seeni Yeesu aatthuneya iye onroromela Yehova wiira ahihiye oleleerya ni nthiti? (Luka 12:49, 53)

¹¹ Yeesu aaniroromela wiira Yehova ammukhalihera wiira ahihiye olaleerya ni nthiti. Nnaamwi Yeesu aalotta mwa nttittimiho ni aathanlela saana moolumo, owo aanidhuwela wiira ihapari dhooreera dha Omwene dhaankhumihera ohiiwanana ni ottharatthariwa wuulupale. (Munsome Luka 12:49, 53.) Ndho mwaha wa Yeesu ovara nteko woolaleerya, elo yaahiwiiriha ahooleli a itiini otthuna omwiipha. (Yohani 8:59; 10:31, 39) Masi hata eri dhiidho, Yeesu khaahin’ye olaleerya okhala wiira aanidhuwela wiira Yehova aari nuuwo. Owo alontte wiira: ‘Nkikhanle meekhaaka, masi Tiithi, yoowo okirumme, ori ni miyo. . . . Owo khakihin’ye meekhaaka, okhala wiira okathi wootheene kinnipaka itthu dhimmudhivela.’—Yohani 8:16, 29.

12. Itthu seeni Yeesu aaleenle iye ahudheri-ye dhaaya waakhalihera okathi woottharatthariwa ohihiye olaleerya?

¹² Yeesu aahiwuupusera ahudheri-ye wiira yaahaana ororomela nikhalihero na Yehova. Ivaara dhawaatta, Yeesu aanaalaihera wiira Yehova amwaakhalihera, hata okathi woottharatthariwa. (Math. 10:18-20; Luka 12:11, 12) Ndho Yeesu aahaalopola awo okhalana ephoole. (Math. 10:16; Luka 10:3) Owo aahaavaha malakihero wiira yaahaana oxaka waakhanyerera atthu waakhulela nhupi wa Omwene. (Luka 10:10, 11) Nitho aahaaleela wiira waakhumelela nxankiho onvekela okhuma opuro owo, awo yaahaana otthawa. (Math. 10:23) Nnaamwi Yeesu aari anthiti ni aanroromela Yehova, owo aanixaka wiikhumihera maxakha.—Yohani 11:53, 54.

13. Seeni munreerela nnyu okhupali wiira Yehova onawookhaliherani?

¹³ Nitho hiyo olelo-va nintthuneya okhaliheriwa ni Yehova wiira nivikanihe olaleerya ni nthiti vaavo ninttharatthariwa nhu. (Wiis. 12:17) Seeni munreerela nnyu okhupali wiira Yehova onawookhaliherani? Mwaha wa nivekelo Yeesu apanke iye nenno naatikhiwe Yoohaani ekapiitulu 17. Ekapiitulu ela, ennoonihera wiira Yeesu aahinvekela Yehova wiira aakhapelele arummwa. Noomala Yehova aahaakhula nivekelo nno. Eliivuru ya Miteko ennoonihera moopora Yehova aakhalihenre iye arummwa olaleerya ni nthiti, hata ettharatthariwaka. Nivekelo nna, Yeesu aahinvekela-tho Yehova wiira aakhapelele ale yaaya waakhulela nhupi yaalaleya arummwa. Nitho elo ennoohela mpuwa nyuwo. Nlelo Yehova khahin’ye waakhula nivekelo na Yeesu. Owo onawookhaliherani nkhama dhiidhaale aakhalihenre iye arummwa.—Yohani 17:11, 15, 20.

14. Eseeni ennikhupaliha wiira ninoowerya olaleerya ni nthiti hata okathi wooxankiha? (Moone-tho efootu.)

¹⁴ Vaavo ninaattamela nhu wookhiderani wa olumwinku ola, pooti okhala vooxankiha olaleerya ihapari dhooreera. Masi Yeesu oolaihera onivaha nikhalihero ninramela wiira nihihiye olaleerya ni nthiti. (Luka 21:12-15) Nintakihaka Yeesu ni arummwa-ye, hiyo ninnaahiya atthu wiira ethanle aneene akhala wiira onooniwiriyana aahiidho naari ni ninnixaka onyakulihana naawo. Hata ilapo dheidhe nteko nhu woolaleeerya onkhoottihiwa awa, anna ni arokora ankhala mapuro awo annipaka itthu dhootheene anwerya awa wiira evare nteko woolaleerya, okhala wiira aaninroromela Yehova ohiya ikuru-dha. Nkhama dhiidhaale Yehova aalipinhe iye arumeyi-ye eseekulu yoopacera, olelo-va, owo onninivaha ikuru wiira niwerye ‘ovara nteko woolaleerya moomalela’, mphaka onileela wiira voophiyera. (2 Tim. 4:17) Ndho, nhihiye onroromela Yehova, owo onawookhaliherani wiira nhihiye olaleerya ni nthiti.

YEESU KHAHIN’YE OKHALANA MOONELO WOOLOKA VOOHIMA DHA ATTHU AKINA

15. Nindhuwela dhai wiira Yeesu khaahin’ye okhalana moonelo wooloka voohima dha nteko woolaleerya?

¹⁵ Yeesu khaahin’ye okhalana moonelo wooloka voohima dha nteko woolaleerya. Ndho elo yaahinkhalihera ohihiya oluttuweliwa ovara nteko woolaleerya. Mwa ntakihero, noovira mwaakha mmodha Yeesu alaleeryaka, owo ahoona wiira atthu awaatta yaanitthuna wiiwa ihapari dhooreera. Ndho elo yaahimwiiriha waalikanyiha atthu awo ni eyooca ya mmatta eri yoolikaneene wiira epacere wuuruliwa aahiidho ohemphwa. (Yohani 4:35) Noovira mwaakha mmodha, Yeesu aahaleela ahudheri-ye wiira: ‘Mweekhweeli, eyooca khereere mmatta.’ (Math. 9:37, 38) Noovira okathi vakhaani, Yeesu aahitthikela olotta moolumo mamodharu airaka: ‘Mweekhweeli, eyooca khereere mmatta . . . Tivondho, munvekele Mwaneene ematta wiira aaruuhe ananteko.’ (Luka 10:2) Yeesu khaahin’ye okhalana moonelo wooloka okhala wiira aanikhupali wiira atthu awaatta yaamwaakhulela ihapari dhooreera, ndho vaavo oona iye elo yiireka aanihakalala vawaatta.—Luka 10:21.

16. Malikanyiho Yeesu aarumeenle iye yaakhalihenre dhai ahudheri okhalana moonelo wooloka voohima dha nteko woolaleerya? (Luka 13:18-21) (Moone-tho efootu.)

¹⁶ Yeesu aahiwoonihera arummwa-ye mareeliho yaaya okhumelela mwaha wa nhupi yaalaleya awa wiira aakhalihere ohihiya okhalela nthiti. Mwa ntakihero, nithokorerye malikanyiho maili Yeesu apanke iye. (Munsome Luka 13:18-21.) Nlikanyiho noopacera, Yeesu aahirumeele etthaka ekhaani ya mostaarta atthunaka ohudhiha wiira nhupi wa Omwene wamunnuwa mwa enamuna yootikiniha ni khiyaavo etthu yaaya okhoottihera wunnuwa iwo. Vano nlikanyiho na naaili, owo aahirumeela eferimentu wiira oonihere moopora nhupi wa Omwene waaya awa omwaramwareya ni marukunuso waaya awa waakhumihera atthu yaaya waakhulela, hata waataphulela oviriha okathi wawaatta. Ndho, Yeesu ahirumeela malikanyiho ala wiira awoonihere ahudheri wiira nhupi yaalaleya awa wamwaakhalihera atthu awaatta.

17. Nthowa seeni ninniiriha okhalana moonelo wooloka voohima dha nteko woolaleerya?

¹⁷ Vaavo ninuupuwelala nhu moopora ihapari dhooreera inaakhalihera awa atthu olumwinku wootheene, elo enniniriha olaleerya ni nthiti. Khuta mwaakha, imilyawu awaatta dha atthu anoonihera odhiveliwa ni nhupi ninlaleya nhu, annirowela nthukumano wa Wuupuwelela ni annipacera onsoma Biibiliya ni hiyo. Olelo-va, atthu awaatta annipatisiwa epacera ovara vamodha ni hiyo nteko woolaleerya. Nnaamwi nihidhuwelaka atthu akavi an’ya waakhulela nhupi ninlaleya nhu, masi hiyo ninnidhuwela wiira Yehova oopacera othukumanya nttitthi wa atthu yoowo an’ya woopowa okathi wa maxakha muulupale. (Wiis. 7:9, 14) Yehova yoowo ori Mwaneene ematta onnidhuwela wiira nlelo aakhala atthu awaatta an’ya waakhulela ihapari dhooreera. Ndho nna nthowa nuulupale ninniiriha okhalela nthiti nteko woolaleerya.

18. Eseeni nintthuna nhu wiira atthu yoone vaavo ninvara nhu nteko woolaleerya?

¹⁸ Ahudheri a Yeesu yaanidhuweliwa mwaha wa okhalela nthiti nteko woolaleerya. Mwa ntakihero, mwaha wa arummwa olaleerya moolipa nrima, atthu akina ‘yaahoona wiira awo yaaheetta ni Yeesu.’ (Mit. 4:13) Nitho olelo-va, hiyo nintthuna wiira vaavo atthu annoona awa nilaleeryaka yoone wiira ninnitakiha nthiti na Yeesu.