კვირკვე

მუშ სიტყვეფით დო საქმეეფით იესო სრულყოფილო გიმირჩქინანდჷ თიცალ აზროვნებას დო გრძნობეფს, მუნერით მუშ ზეციერ მუმას უღუდ (იოან. 14:9). მუს ბგურაფლენთ იესოშ კეთებულ სასწაულეფშე? იესო დო იეჰოვას მანგარო ვუჸორთ. მუჟამსით იესო დედამიწას რდჷ, მუშ ძალას თინეფიშ მახვარებელო ირინუანდჷ, მით იტანჯებუდ, თეშნერო ოძირანდჷ, ნამდა უჸორდჷ ადამიანეფ. ართშა, თის თოლს ვარწყედუნ ფერ ჟირ კოჩიქ თხუ მოხვარა (მათ. 20:30—34). ყურადღება ქიმიაქცით, ნამდა იესოს „ეცოდ თინეფქ“ დო დასქილიდუ. თაქ გიმორნაფილ ბერძნულ ზმნა, ნამუთ თარგმნილ რე, მუჭოთ „ეცოდ“, ნიშნენს შხვეფიშ გაჭირებაშ გურშა მეღალაშ შინაგან ძალიერ გრძნობას. თე ძალიერ გრძნობაშ გიმორჩქინათ იესო ოძირანდჷ, ნამდა უჸორდჷ ადამიანეფ. ათეშენ, ოსქილიდუანდჷ კეთროვანეფს დო ოჭკუმალს არზენდჷ შქირენულეფს (მათ. 15:32; მარ. 1:41). ჩქი დარწმუნებულეფ ვორეთ, ნამდა იეჰოვას, ნამუთ შხვეფიშ გაჭირებაშ გურშა მიმაღალარ ღორონთ რე, დო თიშ სქუა იესოს მანგარო ვუჸორთ დო გინაფლენა ჩქინ ჭუას (ლუკ. 1:78; 1 პეტ. 5:7). თინეფს შურ ოლნა, მუჟამ ჩუთხინუანა კაცობრიობას თი არძა პრობლემას დო ოწუხებელს, მუთ უღნა. w23.04 3 ¶4, 5

თეშო საჭირო რე, გეგნობდგათ პრაქტიკულ ნაბიჯეფ. მაგალითო, ირნერო ოკო ვეცადათ, დუდ აურიდათ თიცალ მუდგარენეფიშ კითხირს ვარდა მორჩქილაფას, მუთ სატანაშ ქვეყნიერებას პოპულარულ რე, მარა ჩქინ გონებას გლახა ფიქრეფით გეიოფშანს. თეშ გინაწონს, ბიბლიაშ კითხირით დო გიმორკვიებათ შემლებნა გონება ჯგირ ფიქრეფით გევოფშათ. კრებაშ შეხვალამეფშა დასწრება დო მსახურებას მონაწილებაშ მეღება ხოლო მიმეხვარებნა, არასწორ ფიქრეფშე დოფთხილუათ ჩქინ აზროვნება. მუჟამსით თე ირფელს გუვაკეთენთ, იეჰოვა მოპირნა, ნამდა „ვა დუშვენს თიცალ ცდუნებას, ნამდგაშა გარზება [ვეშმალებენა]“ (1 კორ. 10:12, 13). ამდღა, განსაკუთრებულო თე ბოლო დღალეფს, თითოულს მოსაჭირნა ლოცვა, ნამდა ვა ვოდინუათ იეჰოვაშ ართგურობა. თის ოკო, ნამდა გურ გეგნუფაჩათ ლოცვას (ფსალმ. 62:8). გინოჭყვიდილ მაფდან, თე დროს განვადიდათ იეჰოვა დო მადლობა ვუწუათ თი ირფელშო, მუდგას ჩქინო ორთჷ. თეს გეძინელ, ქოფთხუათ გაბედულება მსახურებაშო დო მოხვარა, ნამდა გავურზათ სირთულეეფს დო ვევაჸუნათ ცდუნებეფს. მითინს დო მუთუნს ვემეჩათ უფლება გეცილან, რეგულარულო დურაგადუათ იეჰოვას ლოცვაშ საშვალებათ. w23.05 7 ¶17, 18

მუშენ ვოსწრუთ კრებაშ შეხვალამეფს? მთავარ მიზეზ თინა რე, ნამდა განვადიდენთ იეჰოვას (ფსალმ. 26:12; 111:1). თეს გეძინელ, შეხვალამეფს თიშენ ვოსწრუთ, ნამდა გურშა ელვუკინათ დო გუვამანგარათ ართიან, თე ბოლო პერიოდის (1 თეს. 5:11). თაშ ნამდა, კრებას კომენტარეფიშ კეთებათ ქოთ იეჰოვას განვადიდენთ დო ქოთ გურშა ელვუკინანთ ართიანს. მარა კომენტარეფიშ კეთებაწკუმა დაკავშირებით შილებე სირთულეეფს ქეშეფხვადათ. მაგალთო, შილებე მანგარო მიჭირდან კომენტარეფიშ კეთება, მუშენდა ბნერვიანენთ ვარდა ირ ხეშ ეჭოფუაშ დროს ვა ბკითხან კომენტარ. მუჭო შემლებნა გივორჯგინათ თე სირთულეეფს? პავლექ თქუ, ნამდა ჩქი მთავარ ყურადღება ართიანიშ გურიშ ელაკინაშა ოკო მაფდან გინოღალირ. ათეშენ, მუჟამსით მარჩქილენა, ნამდა ჩქინ კეთებულ ჭიჭე კომენტარს ხოლო შეულებ გურშა ელუკინას თანაქრისტიანს, თენა მიმეხვარებნა, გივორჯგინათ ნერვიანობას დო ქოფთქუათ კომენტარ. მარა თიმწკუმა ხოლო, მუჟამსით იზმათ ხშირას ვა მორაგადაფუანა კომენტარს, მუზმათ მოკონა, შემლებნა თე დროს ხოლო ვორდათ ბედნერეფ დო მოხიოლდან, ნამდა შხვა და დო ჯიმალეფს ხოლო ერზიებნა კომენტარეფიშ კეთებაშ საშვალება (1 პეტ. 3:8). w23.04 20 ¶1—3

მეფექ განცხადება აკეთ! თიქ თქუ, ნამდა იუდეველეფ, მით 70 წანას ბაბილონს ტყვეობას რდეს, გეთავისფალეს დო შეულებდეს, დირთესკო მუნეფიშ მშობლიურ ქიანაშა — ისრაელშა (ეზრ. 1:2—4). არგამა რდჷ, თე ირფელს იეჰოვა მიკურდჷ დო ირფელქ თიშ ჭყოლოფათ მოხვად, მუშენდა, მუჭოთ წესინ, ბაბილონს ტყვეეფს ვათავისფალენდეს (ეს. 14:4, 17). მარა თიმ პერიოდის ბაბილონ დონთხაფილ რდჷ დო ახალ მეფექ უწუ იუდეველეფს, ნამდა შეულებდეს დირთესკო მუნეფიშ ქიანაშა. იუდეველეფქ, განსაკუთრებულო ოჯახიშ დუდეფქ, გადაწყვეტილებაშ წოხოლე ქიგედირთეს. თინეფქ ოკო გინოჭყვიდესკო, დიტენდესო ბაბილონს დოვარ დოსქიდუდეს თექ. თეშ გინოჭყვიდუაქ შილებე ადვილქ ვეჸუკო თინეფშო. ნამთინე იუდეველ ხანშამიშულირ რდჷ. ათეშენ შილებე გუჭირდკო თეშმაშორა შარაშ ულა. უმენტაშიქ ხოლო ბაბილონს დებად, თექ ირდჷ დო შხვა ქიანას დღას ვა უცხოვრებ. თინეფშო ისრაელ მშობლიურ ქიანა ვარინ, მუნეფიშ ჯვეშეფიშ ნოხორ რდჷ. ნამთინე იუდეველს ბაბილონს ირფელ ჯგირო აფუდ ენწყილ. ათეშენ, თინეფშო ადვილ ვეჸუაფუდ, ქიდიტესკო კომფორტულ ჸუდეეფ, მუნეფიშ საქმე დო გეგნორთესკო თიცალ ქიანაშა, სოდეთ დღას ვა უცხოვრებნა. w23.05 14 ¶1, 2

ღორონთიშ სიტყვა ელამჩანა, გუვავითარათ მოთვინება, შხვეფიშ გაჭირებაშ გურშა მეღალა დო ჸოროფა. მაგალთო, ლუკაშ 21:19-ს ბკითხულენთ: „მოთვინებათ გინისქილიდუანთ დუდის“. კოლოსელეფიშ 3:12-ს ჭარჷ: „გურშა მიღით შხვაშ გაჭირება“ დო 1 თესალონიკელეფიშ 4:9 დო 10-ის ბკითხულენთ: „ღორონთ გოგურუანა ართიანიშ ჸოროფას . . . მარა იშენით ელაიჩანთ, ჯიმალეფ, ნამდა ხოლო უმოსო გემანგარათ ჸოროფა“. თე სიტყვეფქ თი მოწაფეეფშო იჸუ ჭარილქ, მით უკვე გიმირჩქინანდეს თე ძვირფას თვისებეფს, მარა, მუჭოთ იძირე, იშენით ოსაჭირდეს თინეფიშ გაუჯგუშება. ჩქი ხოლო ზუსტას თაშ ოკო მიფქცუათ. ათეშენ, დეფიქრით, მუჭო გიმირჩქინანდეს პირველ საუკუნეს თე თვისებეფს დო მუჭო შემლებნა მივაჸუნათ თინეფიშ მაგალითის დო ქუვოძირათ, ნამდა მზათ ვორეთ „დიდ გაჭირებაშო“. თეს გაკეთენთ-და, მუჟამსით „დიდ გაჭირება“ ქიდიჭყაფ, ვა გაიჭირდუნა მოთვინებაშ გიმორჩქინა დო გინოჭყვიდილ გაჸინა, ვადინუათ ართგურობა. w23.07 3 ¶4, 8

ვა უღჷ მნიშვნელობა, ცხებულეფ ვორეთ დო ვარ „შხვა შხურიშ“ წარმომადგენელეფ, ჩქი ოკო ვეგნურთათ თე შარას, ნამდგაქ სულიერ სამოთხეშა მომიჸონეს დო მეპჸუნთ ღორონთიშ სამეფოშ მომავალ კურთხევეფშა (იოან. 10:16). 1919 წანაშე მოჸუნაფილ, მილიონობით ადამიანქ გეგშართჷ „დიდ ბაბილონშე“ — ტყურა რელიგიაშ მსოფლიო იმპერიაშე დო ქიგიოდირთჷ თე სიმბოლურ შარას. მუჟამსით იუდეველეფქ ბაბილონ ქიდიტეს, იეჰოვაქ ირფელ თეშ გაკეთ, ნამდა შარას მუთუნნერ დაბრკოლებაქ ვეშეხვადკო თინეფს (ეს. 57:14). მუშ რაგად შილებე თანამედროვე დროშე? 1919 წანაშახ საუკუნეეფით ადრე, იეჰოვაქ მუშ ართგურ ქომოლკათა გიმირინუ, ნამდა „დიდ ბაბილონშე“ გიშმაულარ შარა მასუფთესკო (ქეშუდარით ესაიაშ 40:3). თე ქომოლკათაქ ქიდიჭყჷ სულიერ შარაშ მომზადება, მუდგაშ ჭყოლოფათ, უმოს გვიანო, ალალ გურიშ კათაქ ქიდიტუ „დიდ ბაბილონ“ დო გემშართჷ სულიერ სამოთხეშა, სოდეთ ღორონთის თიშ მოსაწონო ცენა თაყვანს. w23.05 15, 16 ¶8, 9

იეჰოვას ოკო, ხიოლით ვემსახურათ დო ვართ ხოლო ნანძალუო (2 კორ. 9:7). თაშ ნამდა, სურვილ ვამღუნან-და, იშენით ოკო იმჭუათო მიზანშა? მორთ გუვარჩუათ პავლე მოციქულიშ მაგალით. თიქ თქუ: „ვასაჯენქ დო მონათ გინვოშქვანქ ჩქიმ სხეულს“ (1 კორ. 9:25—27). პავლე მოციქულ ანძალენდჷ მუშ დუდის, გაკეთკო თინა, მუდგას იეჰოვა ითხინდჷ თიშე, თიმწკუმა ხოლო, მუჟამსით თეშ სურვილ ვა უღუდ. იწონუანდუო იეჰოვა თეს? მუშო ოკო რაგად, ქო. თიქ დაჯილდოვ პავლე მუშ მონდომაშენ (2 ტიმ. 4:7, 8). იეჰოვას ოხიოლ, მუჟამსით ორწყე, მუჭო ვოცადუთ თიცალ მუდგარენიშ კეთებას, მუდგაშ სურვილ იშენდოიშენ ვა მიღნა. მუშენდა ჯგირო უჩქჷ, მუდგარენ საქმეს ირიათო თიშ კეთებაშ სურვილით ვარინ, იეჰოვაშ ჸოროფათ ვორთუთ. იეჰოვა აუცილებერო აკურთხენს ჩქინ მონდომას, მუჭოთ თენა პავლეშ შემთხვევას აკეთ (ფსალმ. 126:5). მუჟამსით თეს ჩქინ დუდშა გეგმოფცადუნთ, უმოსო მაღვენუნა თიშ სურვილ, გუვაკეთათ თიცალ მუდგარენ, მუდგაშ კეთება კონკრეტულ მომენტის შილებე ვა მოსიამოვნუდან. w23.05 29 ¶9, 10

იეჰოვაშ დღას ვეგნუსქიდნან თი კათა პავლე მოციქულქ ლურენჯ კოჩის შეადარ. ლურსინ თი კოჩ აზრის ვა რე, მუ ხვადუ მუშ გოხოლუას, ვართ დროშ მიკულას გინაფლენს დო მუდგაინ მნიშვნელოვანქ მოხვადასინ ხოლო, რეაქცია ვა უღჷ. ამდღა ხალხიშ უმენტაშის სულიერო ლურს (რომ. 11:8). თინეფს ვა ჯერა, ნამდა „ბოლო დღალეფს“ ფცხოვრენთ დო „დიდ გაჭირება“ მონჭაფილ რე (2 პეტ. 3:3, 4). მარა ჩქი მარჩქილენა, ნამდა პავლეშ რჩევა, ვორდათ კურცხას, დღაშ მიკულაწკუმა ართო უმოსო დო უმოს მნიშვნელოვანო გინმირთუ (1 თეს. 5:6). მუჟამსით მშვიდას იპჸით დო ვა ვოდინუანთ სტაბილურობას, ვემშურთ პოლიტიკურ დო სოციალურ საკითხეფშა. მუთ უმოს ხოლოს რე იეჰოვაშ დღა, თით უმოს რთულ იჸუაფ ზეწოლაშა გარზება, ნამდა მივოდინუათ ნეიტრალურ პოზიცია თე საკითხეფს. მარა წუხებაშ მუთუნნერ მიზეზ ვა მიღნა თიწკუმა დაკავშირებით, მუ ფთქუათ დო მუჭო მიფქცუათ, მუშენდა ღორონთიშ წმინდა შურ მიმეხვარებნა, ვორდათ მშვიდას, ვა ვოდინუათ სტაბილურობა დო მიბღათ სწორ გადაწყვეტილებეფ (ლუკ. 12:11, 12). w23.06 10 ¶6, 7

მუჟამსით სამსონიშ სახელ გარჩქილენა, ალბათ პირველო გონებაშა თიშ დიდ ძალა მუგალენა. ნამთინეს შილებე გაშინედას თი გლახა შედეგეფ, მუთ სამსონს მუშ არასწორ გადაწყვეტილებაქ მოუღ. მარა თე არასწორ გადაწყვეტილებაშ უმკუჯინუო, იეჰოვაქ თინა იშენით ართგურ პიროვნებათ მირჩქინ დო თიშ ისტორია ბიბლიას ინაჭარაფუ, ნამდა დიბგურეთკო თიშე. იეჰოვაქ ბრელშა გიმირინუ სამსონ დო ოკეთებაფუ სარკო საქმეეფ მუშ გიშაგორილ ხალხიშ, ისრაელეფიშ, მახვარებელო. სამსონიშ ღურაშე საუკუნეეფიშ უკულ, იეჰოვაქ მოციქულ პავლეს თიშ სახელ თი ქომოლკათაშ შქას ინაჭარაფუ, მიდგას ღორონთიშ ძალიერ რწმენა უღდეს (ებრ. 11:32—34). სამსონიშ მაგალითშე ბრელ მუდგარენს ბგურაფლენთ. თინა მანგარ რთულ სიტუაციას ხოლო იეჰოვაშა რდჷ მენდებულ. თიშ ისტორიას ჩქინ გურიშელაკინა შეულებ. w23.09 2 ¶1, 2

მოთვინებაშ გამანგარებას ჩქინ ოწუხებელიშ გურშენ იეჰოვაწკუმა ხშირას დო ალალას დორაგადაფა მიმეხვარებნა (1 თეს. 5:17). შილებე ამდღა სერიოზულ პრობლემეფ ვაიღნა, მარა ქოგორუნთო იეჰოვაშ ხემძღვანელობას, მუჟამსით გურგოტახილ რეთ ვარდა ვაიჩქუნა, მუჭო მიქცუათ? იეჰოვას ამდღა ჭიჭე პრობლემეფშე ხოლო მოხვარას რეგურალურო ქოთხინთ-და, თეშ კეთება ვართ მომავალს გაიჭირდუნა, მუჟამსით უმოს დიდ სირთულეეფს ქეშეხვადუთ. თეშ უკულ დარწმუნებულ იჸით, ნამდა იეჰოვას ზუსტას უჩქჷ, მუჟამ დო მუჭო იმოქმედას თქვან საჯგირობუოთ (ფსალმ. 27:1, 3). ამდღარ პრობლემეფს მოთვინებათ ვურზუთ დო იეჰოვაშ ართგურ ქოფსქიდუთ-და, შემლებნა დარწმუნებულ ვორდათ, ნამდა „დიდ გაჭირებაშ“ დროს უმოს ადვილო გეგნიბღანთ სირთულეეფს (რომ. 5:3). მუშენ იფჩიებუთ თეს? ბრელ და დო ჯიმაქ მუშ დუდშა გიმოცად, ნამდა ირ რწმენაშ გამოცდაქ, ნამდგას მოთვინებათ გურზეს, მამზად თინეფ მომავალ სირთულეეფშო. მუშენდა თე სიტუაციეფიშ დროს ქოძირეს, ნამდა იეჰოვა ირიათო მზათ რე თინეფიშ მახვარებელო. შედეგო, ხოლო უმოსო გემანგარ თინეფიშ რწმენაქ დო თეშნერო შეიალებუეს, გაურზესკო ირ უკულიან განსაცდელს (იაკ. 1:2—4). w23.07 3 ¶7, 8

თანდაბლობა დო ჭყოლოფა რე თი თვისებეფ, მუთ აღძრენს იეჰოვას, გეგმირჩქინას გონიერება. მაგალთო, მუჟამსით თიქ სოდომს უბადო ხალხიშ განადგურება გინოჭყვიდ, მუშ ანგელოზეფიშ საშვალებათ გაფრთხილ მართალ ლოტ, ქიდიტუკო თექიანობა დო ინტუკო გვალამ ადგილშა. მარა ლოტის ოშქურუდ თექ ულაშა, ათეშენ იეჰოვას თხუ, ნამდა უფლება ქიმეჩკო, მუშ ოჯახწკუმა ართო ჭიჭე ქალაქ ცოარშა ინტუკო, ნამდგაშ განადგურება ხოლო იეჰოვას უკვე გინოჭყვიდილ აფუდ. იეჰოვას შეულებუდ მოთხუკო ლოტის, დემორჩილკო თიშ მითითებეფს. მარა თეშ მანგიორო, თანდაბლობა გეგმირჩქინ დო ქუდაჸუნ ლოტიშ ოთხუალს, მუთ თის ნიშნენდჷ, ნამდა იეჰოვა მუშ გადაწყვეტილებაშ უმკუჯინუო, ვა განადგურენდჷ ცოარს (დაბ. 19:18—22). საუკუნეეფიშ უკულ, იეჰოვაქ ხოლო ართ თვისება, ჭყოლოფა გიმირჩქინ ნინევეს მახორუ ხალხიშ მიმართ. თიქ მუშ წინასწარმეტყველ იონა მიდაშქვჷ, ნამდა გაცხადკო თე ქალაქიშ დო თექ მახორუ უბადოეფიშ განადგურებაშ გურშენ. მარა მუჟამსით ნინეველეფქ მინანის, იეჰოვას ეცოდ თინეფქ, იჭყოლოფუ, დოთირუ მუშ გადაწყვეტილება დო ვა განადგურ ნინევე (იონ. 3:1, 10; 4:10, 11). w23.07 21 ¶5

მუშ გურაფა შემლებნა იეჰოაშიშ შემთხვევაშე? თინა მოგენდჷ ჯას, ნამდგას ჩხვიჩხვეფ ტომბას ვაფჷ გოდგუმილ დო მიკომარგებულ რე ბარჯგის. მუჟამსით იეჰოიადაქ დოღურ, იეჰოაშიქ, თაშ ქოფთქუათინ, ბარჯგიშ უმშო ქუდოსქიდ დო მუჟამსით განდგომილებაშ ბორიაქ დუმბარ, მიოდინუ ღორონთიშ ართგურობა, შხვა სიტყვეფით ქოფთქუათინ, ეკირთჷ. თე შემთხვევაშე ჯგირო იძირე ართ მუდგარენ — იეჰოვას ხვალე თიშენ ოკო ვა ვომორჩილდათ, ნამდა თაშ ჩქინ თანაქრისტიანეფ ვარდა ოჯახიშ წევრეფ იქციებნა. სულიერო კურცხას ქუდოფსქიდათ დო იეჰოვაწკუმა ხოლოშიან ურთიერთობა ვა ვოდინუათინ, საჭირო რე, პირადო იბზრუნათ თიშო, ნამდა გუვავითარათ ღორონთიშ მიმართ ჯანსაღ შიშ დო ჸოროფა. თეშ კეთებას მიმეხვარებნა ღორონთიშ სიტყვაშ რეგულარულ გიმორკვიება, თიშე ფიქრ დო ლოცვა (იერ. 17:7, 8; კოლ. 2:6, 7). იეჰოვა ჩქინდე ქიანაშის ვეთხინს. მუდგას თინა ჩქინდე ითხინს, ეკლესიასტეშ 12:13-ს რე ეკოძინელ, სოდეთ ბკითხულენთ: „ღორონთშა გოშქურდას დო მიაჸუნ თიშ მცნებეფს, მუშენდა თენა რე ადამიანიშ ვალდებულება!“. ღორონთიშ შიშ მიმეხვარებნა, გაბედულო შეფხვადათ მომავალ რწმენაშ გამოცდეფს. შედეგო, მუთუნს ვეშიალებე გილამლუან იეჰოვაწკუმა ურთიერთობა. w23.06 19 ¶17—19

მა-5 მუხლ თეცალ სიტყვეფით იჭყაფ: „ტახტის გეხედუნ თიქ თქუ“ (გამოცხ. 21:5ა). თე სიტყვეფს განსაკუთრებულ მნიშვნელობა უღჷ, მუშენდა თენა რე წიგნ „გამოცხადებას“ მოჩამილ სუმ შემთხვევაშე ართ-ართ, სოდეთ პირადო იეჰოვა იჩიებ. მუჭოთ ვორწყეთ, იეჰოვაქ მუშ დუნაპირებუშ შესრულებაშ საფუძვლიან მიზეზეფ ძალიერ ანგელოზიშ ვარდა გათელებურ იესოშ საშვალებათ ვარინ, პირადო მუქ გამცხადეს. თე ფაქტ ამტკიცენს, ნამდა ღორონთიშ დუნაპირებ სანდო რე დო აუცილებერო შისრულებ. ბიბლიაშე თის ხოლო ბგებულენთ, ნამდა „გამორიცხულ რე, [ღორონთიქ] ტყურა ქოთქუას“ (ტიტ. 1:2). იეჰოვაშ გურშენ რაგადებულ თე სიტყვეფ უმოს სანდოთ გინაშქვანს თიშ დუნაპირებუს, ნამუთ გამოცხადებაშ 21:5, 6-ის რე მოჩამილ. გუვარჩუათ მა-5 მუხლის მოჩამილ სიტყვა „ქიდეკვირ“. თე ბერძნულ სიტყვა წიგნ „გამოცხადებას“ ბრელ დიხას რე გიმორნაფილ. მართალ რე, სამოთხეწკუმა დაკავშირებულ ღორონთიშ დუნაპირებ მომავალს შისრულებ, მარა თიშ გურშენ ჩიებაშ დროს იეჰოვა თიცალ სიტყვეფს ირინუანს, ითამ თინა უკვე შესრულებურ რდას (ეს. 46:10). w23.11 3, 4 ¶7, 8

მოციქულ პეტრე მუშ სისუსტეეფს ობრძოლუდ. მორთ გუვარჩუათ მუსხირენ მაგალით. მაგალთო, მუჟამსით იესოქ მოწაფეეფს უწუ, ნამდა წინასწარმეტყველებაშ თანახმას, ბრელ ოტანჯებელ აჸიდ გინაღალარ დო ბოლოს დოჸვილუნდეს, პეტრექ გუდღან თის (მარ. 8:31—33). ართშა პეტრე შხვა მოწაფეეფწკუმა ართო თიშე ნირზენდჷ, მი რდჷ თინეფ შქას არძაშ უდიდაშ (მარ. 9:33, 34). თეს გეძინელ, იესოშ ღურაშ წოხოლენ სერს თიქ ემოციეფს გეიაჸუნ დო ჸუჯ ქელათოლ მღვდელმთავარიშ მონას (იოან. 18:10). კინ თიმ სერს პეტრექ შიშის ქინოლ დო სუმშა ივარუ, ნამდა იჩინენდჷ იესოს დო თიშ მეგობარ რდჷ (მარ. 14:66—72). პეტრექ მუშ საქციელიშ გურშენ თიცალ გლახათ იგინ დუდ, ნამდა ნგარაქ გეუოლ. თე ირფელიშ უმკუჯინუო, იესოს ვემუტებ მუშ ძვირფას მოციქულ პეტრე, მით მანგარ გურგოტახილ რდჷ დო ვა უფიქრებ, ნამდა თიშე მუთუნ ვეგშეშ. გათელებაშ უკულ თიქ პეტრეს შესაძლებლობა ქიმეჩ, ნამდა ჸოროფა დუმტკიცკო. იესოქ თის მუშ შხურიშ ჭყიშუა დავალ (იოან. 21:15—17). პეტრე მზათ რდჷ თე დავალებაშ შეიოსრულებერო, ათეშენ, თინა თი მოწაფეეფ შქას რდჷ, მიდგაშა ჟარნეჩდომავითა დღაშ დღახუს წმინდა შურქ გეგნორთჷ. w23.09 22 ¶6, 7

მოციქულ პეტრექ მუშ თანაუხუცესეფს ელუჩ, დოჭყიშესკო ღორონთიშ ოჭყიშალ (1 პეტ. 5:1—4). უხუცესეფ, ჩქი ბჯერა, ნამდა მთელ გურით გიჸორა და დო ჯიმალეფ დო გოკონა, იზრუნათ თინეფშე. მარა მინშა შილებე ბრელ საქმე გიღდან დო მანგარო გეგნოშურდათ, მუდგაშ გურშენ გაიჭირდან თქვან პასუხიშმგებლობაშ შესრულებაქ. მუშ კეთება შეილებნა თე დროს? ლოცვას, ალალას ქუდურაგადეთ იეჰოვას თქვან ოწუხებელიშ გურშენ დო ქუწით, მუს გინაფლენთ. ირიათო რშუდან პეტრეშ სიტყვეფ: „მით მსახურენს, ღორონთიშ ძალაშა დაიმენდებულქ იმსახურას“ (1 პეტ. 4:11). მინშა და დო ჯიმალეფ თიცალ პრობლემეფს ხვადუნა, მუდგაშ მოგვარება თქვა ვეშეილებუნა დო ხვალე ახალ ქვეყნიერებას მიგვარებ. დარწმუნებულ რდათჷ, „უნჩაშ ჭყიშ“, იესო, გაკეთენს თის, მუდგაშ კეთება თქვა ვეშეილებუნა დო იზრუნენს მუშ ჭყიშშა, მუჭოთ ამდღა, თეშ ახალ ქვეყნიერებას ხოლო. ათეშენ, იეჰოვა თქვანდე უბრალოთ თის ითხინს, ნამდა გიჸორდან და დო ჯიმალეფ, დოჭყიშუათ დო მაგალით რდათჷ თინეფშო. w23.09 29, 30 ¶13, 14

საკითხეფს ადამიანიშ თოლით ჯინა ქუდუჭყით-და, შილებე მუთუნო ვემიფრჩქინათ იეჰოვაშ დოდგინელ კანონეფ დო ოჭიშ ქურთინუათ ჩქინ ძვირფას ღორონთის (1 კორ. 3:19). „ქვეყნიერებაშ სიბრძნე“ ხშირ შემთხვევას მანგარო მოქმედენს ადამიანშა დო ხორციელ სურვილეფს ურჩქინანს. მაგალთო, ჯვეშ დროს, პერგამონს დო თიატირას მახორუ ნამთინე ქრისტიანიშ აზროვნებაშა მანგარო იმოქმედ თე ქალაქეფს მახორუ კათაქ, მით კერპეფს ცენდეს თაყვანს დო უზნეო ცხოვრებას მეჸუნდეს. იესოქ ქოთ პერგამონიშ დო ქოთ თიატირაშ კრებას მკაცრ რჩევა ქიმეჩ თიშ გურშენ, ნამდა პრობლემათ ვემირჩქინანდეს უზნეობას (გამოცხ. 2:14, 20). ჩქინ შემთხვევას ხოლო ადამიანეფ ირნერო ოცადნა, მუდგარენ საკითხეფწკუმა დაკავშირებით თიცალ აზრ მიღდან, მუნერით მუნეფს უღნა. ოჯახიშ წევრეფქ დო ნაჩინებუეფქ შილებე მიწუან, ნამდა მუდგარენეფს ნაბეტან მკაცრაშე უჯინეთ დო აღბძრან, გინურთათ იეჰოვაშ კანონეფს. მაგალთო, შილებე ირნერო ეცადან, დუმოჯერუან, ნამდა ზნეობაწკუმა დაკავშირებით ბიბლიურ ნორმეფ მოჯვეშებულ რე დო შუროთ ვა რე მნიშვნელოვან ზნეობრივ სიწმინდეშ დაცვება. მინშა შილებე იფიფქრათ, ნამდა იეჰოვაშე მეღებულ მითითებეფ იშენდოიშენ არგამათ გაგებელ ვა რე დო შილებე თიშ ცდუნებაშ წოხოლე ხოლო ქიგებდირთათ, ნამდა „გინურთათ ჭარილს“ (1 კორ. 4:6). w23.07 16 ¶10,11

მარიამს, იესოშ დიდას მოხვარა ოსაჭირუდ. თინა თე დროს დაქორწინებულ ვა რდჷ. ხვალე თენა ვარინ, ბაღანეფიშ რდუალაშ გამოცდილება ხოლო ვა უღუდ, მუშენდა სქუალეფ დღას ვა ნოჸვე დო ასე გებულენს, ნამდა ოკო გეიორჩქინას დო მორდას ბაღანაბოშ, მით მომავალს მესია იჸუაფ. წერმიდგინით, მუ რთულ სიტუაციას მოხვად მარიამქ. თის სქესობრივ კავშირ მითინწკუმა ვა ნოღვე დო ასე, მუშ საქომონჯოშა ორაგადე აფუდ, ნამდა ორსულო რდჷ (ლუკ. 1:26—33). მარიამქ შხვეფშე ითხუ მოხვარა. მაგალთო, თიქ მუშა მეშქუმალირ ანგელოზის, გაბრიელს, ქოთხუ უმოს დეტალეფშა ქეჩუკო მუშ დავალებაშ გურშენ (ლუკ. 1:34). თეშ უკულ, მუსხირენ დღაშა მარიამქ იუდეაშ „გვალამ მხარეშა“ მიდართჷ დო მუშ ნათესე ელისაბედის ქიმიაკითხუ. ელისაბედიქ ქაცქუ თის დო ღორონთიშ წმინდა შურქ წინასწარმეტყველურ სიტყვეფ ქარაგადაფუ მარიამიშ დიო დაბადებულ ვა რდუნ ფერ სქუაშ გურშენ (ლუკ. 1:39—45). მარიამს მანგარო ელუკინ გურშა თე სიტყვეფიშ მორჩქილაფაქ დო იეჰოვაშ გურშენ თქუ, ნამდა „დიდებულ საქმეეფს ორთუდ მუშ ძალიერ კილეთ“ (ლუკ. 1:46—51). არგამა რე, გაბრიელიშ დო ელისაბედიშ საშვალებათ იეჰოვაქ გამანგარ მარიამ. w23.10 14, 15 ¶10—12

იესოშ მოწაფეეფშე ნამთინექ წმინდა შურით იჸუ ცხებულქ დო მიაჩეს საშვალებაქ, იეჰოვაწკუმა უღდან განსაკუთრებულ ურთიერთობა. თენეფ რენა 144 000 ქრისტიან, მით იესოწკუმა ართო მღვდელეფო იმსახურენა ზეცას (გამოცხ. 14:1). თინეფს ღორონთ დიო ხოლო დედამიწას რენან თეშ, წმინდა შურით გიშეგორუნს დო მუშ სქუალეფო ღებულენს. თაშ ნამდა, წმინდა, ნამუთ კარავს რდჷ, განასახიერენს თი განსაკუთრებულ ურთიერთობას, ნამუთ ცხებულეფს იეჰოვაწკუმა უღუნა (რომ. 8:15—17). კარავიშ წმინდათაწმინდა განასახიერენს ზეცას, სოდეთ იეჰოვა მკვიდრენს დო „ფარდა“, ნამუთ „წმინდას“ „წმინდათაწმინდაშე“ გიშართუნდჷ, განასახიერენს იესოშ ხორციელ სხეულს. იესოს ხორციელ სხეულით ვეშიალებედ, გეშართუკო ზეცაშა, მუჭოთ სულიერ ტაძარიშ მღვდელმთავარქ. მუჟამსით იესოქ კაცობრიობაშ ცოდაშე გიშაჸიდირალო მუშ სიცოცხლე გაწირ, თეთ ზეცას ოცხოვრებელო შარა გოუნწყჷ არძა ცხებულ ქრისტიანს. ცხებულ ქრისტიანეფქ ხოლო ზეციურ ჯილდოშ მიოღებელო ხორციელ სხეულ ოკო დათმან (ებრ. 10:19, 20; 1 კორ. 15:50). w23.10 28 ¶13

მუჟამსით თის ეფრემელეფქ გაკრიტიკება ქუდუჭყეს, გედეონს გურმულირო ვა უპასუხებ თინეფშა, თეშ გინაწონს, გემუანო ეჩუ (მსაჯ. 8:1—3). თიქ თანდაბლობა გიმირჩქინ, ბოლოშა ქუმურჩქილუ თე გურმულირ კათას დო უკულ გემუანო დო მშვიდას უპასუხ, მუდგაშ ჭყოლოფათ სიტუაციაქ გეგშენწყუ. უხუცესეფ ხოლო გედეონიშ მაგალითიშ მეჸუნათ გონიერებას გეგმირჩქინანა, მუჟამსით ყურადღებათ ქუმურჩქილუანა შხვეფს დო გურ ვა მალენა კრიტიკაშე (იაკ. 3:13). თეშნერ მოქციებათ თინეფ კრებას მშვიდობას დო ართობას შეუნწყუნა ხეს. მუჟამსით გედეონქ მიდიანელეფს გიორჯგინ, თე გამარჯვება მუშ დუდშა ვემუჭარაფ. თიქ ყურადღება იეჰოვაშა გეგნიღ დო მთელ დიდება თის მეუძღვინ (მსაჯ. 8:22, 23). მუჭო შეულებნა უხუცესეფს, მიაჸუნან გედეონიშ მაგალითის? ჯგირ იჸუაფ, თქვა ხოლო დიდება იეჰოვას მეუძღვინათ თი ირფელშო, მუთ ჯგირო გიშქალენა (1 კორ. 4:6, 7). მაგალითო, მუჟამსით შხვეფ თიშე გოცქვანა, ნამდა გურაფაშ ჯგირ უნარეფ გიღნა, შეილებნა უწუათ, ნამდა თე ირფელქ ღორონთიშ სიტყვაშე დო თიშ ორგანიზაციაშე მეღებულ მითითებეფიშ ჭყოლოფათ შეგალებუეს. ჯგირ იჸუაფ, მინშა დეფიქრათ, მუჭო ოგურუანთ. თეშ ხომ ვეგშურს, ნამდა მთელ ყურადღება თქვან დუდშა გინოიღნა დო ვართ ხოლო იეჰოვაშ განდიდებაშა?! w23.06 4 ¶7, 8

მუჟამსით ვა ბღებულენთ თიშ პასუხის, მუთ იეჰოვას ლოცვას ფთხით, შემლებნა დეფიფქრათ, ქორენო ჩქიმ ოთხუალ სწორ? ხშირას ფიფქრენთ, ნამდა მიჩქნა, მუ რე არძაშ უჯგუშ ჩქინო, მარა შილებე თენა შურო ვა რდას თაშ. მუჟამსით მუდგარენ საკითხშენ ბლოცულენთ, შილებე პრობლემაშ მოგვარებაშ თიშე უჯგუშ შარა არსებენდას, ვინემ ჩქი ფიფქრენთ დო ფთხინთჷ იეჰოვას. თეს გეძინელ, თინა ხოლო ოკო ფშუდან, ნამდა ნამთინე ჩქინ ოთხუალ შილებე იეჰოვაშ ნებაწკუმა ვა რდასჷ შეთანხმებულ (1 იოან. 5:14). ქიგიფშინათ მშობლეფიშ შემთხვევა, მით იეჰოვას თხინა, მუნეფიშ სქუაქ ჭეშმარიტებაშ შარას ვეგნურთას. თე ოთხუალს ართ მეჯინათ გლახა მუთუნ ვა რე. მარა, მუჭოთ მიჩქნა, იეჰოვა მითინს ვანძალენს მუშ მსახურებას. თის ოკო, ნამდა თიშ მსახურება არძაშ, თინეფ შქას ბაღანეფიშ ხოლო, პირად გადაწყვეტილება რდას (კან. 10:12, 13; 30:19, 20). ათეშენ, უჯგუშ იჸუაფ, მშობლეფქ იეჰოვას თინა თხუან, ნამდა ქიმეხვარას თინეფს, ქინანჭან მუნეფიშ სქუაშ გურს. შედეგო, შილებე ბაღანაქ ქიჸოროფუას იეჰოვა დო გინირთას თიშ მეგობარო (იგავ. 22:6; ეფეს. 6:4). w23.11 21 ¶5; 23 ¶12

შხვეფშა გურიშექექაფა ჸოროფაშ გიმოხანტუაშ ართ-ართ მნიშვნელოვან საშვალება რე. მუშენ? ართ ბიბლიურ ნაშრომიშ თანახმას, სიტყვა „გურიშექექაფა“, ნამუთ პავლე მოციქულქ გიმირინუ, ნიშნენს „მიდგაინიშ ხასლას ელარნას, მუჟამსით თინა მანგარ რთულ სიტუაციას რე“. თაშ ნამდა, მუჟამსით თანაქრისტიანს, მიდგას სერიოზულ პრობლემეფ უღჷ, გურშა ეუქექუანთ, თეშნერო ვოხვარუთ, გამწოდირთას დო გაგრძელას სიცოცხლეშ შარას ულა. ხვალე თენა ვარინ, ირო, მუჟამსით ჩქინ დას ვარდა ჯიმას გურშა ეუქექუანთ დო ვარზენთ საშვალებას, თავისფალო გეგმოხანტას მუშ გრძნობეფ, ვოძირანთ, ნამდა მანგარო მიჸორა თინა (2 კორ. 7:6, 7, 13). მუჟამსით პიროვნებას გურშა მეუღ თი ადამიანიშ გაჭირება, მით იტანჯებ, სურვილ ურჩქინდუ, გურშა ეუქექუას თის დო მუთ შეულებ ირნერო ქიმეხვარას. თაშ ნამდა, დიო გურშა მემღუნა შხვაშ გაჭირება დო უკულ მირჩქინდუნა სურვილ, ეუქექუათ თის. ყურადღება ქიმიაქცით, ნამდა პავლე მოციქულ იეჰოვას ეჭარუნს მუჭოთ, „Შხვეფიშ გაჭირებაშ გურშა მიმაღალარ მუმას დო ირნერო გურიშ ემაქექაფალ ღორონთის“ (2 კორ. 1:3). w23.11 9, 10 ¶8—10

ქრისტეშ არძა მიმაჸუნალ ოკო ელდას, ნამდა მუ ამდღა მუ ჭუმე, განსაცდელეფს ქეშეხვადუ. თაშ მოხვად პავლე მოციქულიშ შემთხვევას ხოლო. თიქ თესალონიკელ ქრისტიანეფს მეჭარ: „თქვანწკუმა ვორდითინ წინასწარ გირაგადუდით, ნამდა გაჭირება მაღვენუდეს, მუდგაქ ქოთ თაშ ქუმოხვად“ (1 თეს. 3:4). თიქ კორინთელეფს ხოლო მეჭარ: „მოკონა გიჩქუდან ჯიმალეფ, მუ გაჭირება გინიბღით. გინოსქილადაშ იმენდ ხოლო ვა მიღდეს“ (2 კორ. 1:8; 11:23—27). ქრისტიანეფ ამდღა ხოლო ხვადუნა შხვადოშხვა განსაცდელს (2 ტიმ. 3:12). თიშ უკულ, მუთ ქრისტეშ მიმართ რწმენა გავითარით დო თიშ მიმაჸუნალო გინირთით შილებე მეგობრეფ დო ნათესეეფ არდებულო დო უპატიცემულოთ გოქცუდეს. ვარდა სამუშას ხომ ვა გაშის პრობლემეფქ თიშ გურშენ, ნამდა ნებისმიერ საკითხის ოცადუდით, პატიოსნურო მიქცითკო? (ებრ. 13:18). მთავრობაშე თხოზინს დო წინააღმდეგობას ხომ ვეშეხვადით ქადაგებაშ დო თქვან იმენდიშ გაცხადებაშ გურშენ? მნიშვნელობა ვა უღჷ, მუნერ სირთულეს ფხვადუთ, მუჭოთ პავლეშ სიტყვეფშე იძირე, თე დროს ხოლო ოკო ვა ვოდინუათ ხიოლ. w23.12 10, 11 ¶9, 10

იაკობიქ ბრელ სირთულეს შეხვად. იაკობიშ ჟირ ქომოლსქუაქ, სიმონქ დო ლევიქ, ონჯღორე ქაძირეს ოჯახის დო შეურაცხყოფა მიორინეს იეჰოვაშ სახელს. თეს გეძინელ, იაკობიშ საჸოროფო ოსურქ, რახელქ მაჟია ბაღანაშ მშობიარობაშ დროს დოღურ. თე ირფელ დასაბაღ ვარდუკონ თეშ, მუჟამსით უკვე ხანშამიშულირ რდჷ, შქირენაშ გურშენ იაკობის მუშ ქიანაქ აჸუ დატებელქ დო ეგვიპტეშა იდჷ (დაბ. 35:16—19; 37:28; 45:9—11, 28). მართალ რე, იაკობის ქიანაშ პრობლემა უღუდ, მარა იეჰოვაშ დო თიშ დუნაპირებუეფიშ მიმართ რწმენა დღას ვა უდინუაფ. იეჰოვაქ ხოლო ბრელშა ოძირუ, ნამდა ჭყოლოფას ვარკენდჷ თის. მაგალთო, იეჰოვაშ ჭყოლოფათ იაკობიქ მანგარ ქონებიერო გინირთჷ. ხვალე თენა ვარინ, ართ წუთის წერმიდგინით, მუნერ მარდულ იჸუაფუდ თინა იეჰოვაშ, მუჟამსით მუშ სქუას, იოსების, ნამუთ წანეფიშ დინახალე ღურელ მიორჩქუდ, ქოძირუნდჷ დო გურშა ქიხუტოლუანდჷ. თე ართგურ მსახურს, ხოლოშიან ურთიერთობა უღუდ ღორონთწკუმა, მუთ არზენდჷ ძალას, გიორჯგინკო სირთულეეფს (დაბ. 30:43; 32:9, 10; 46:28—30). მუჟამსით იაკობცალო ჩქი ხოლო ხოლოშიან ურთიერთობას გუვავითარენთ იეჰოვაწკუმა, შემალებენა გივორჯგინათ ნებისმიერ სირთულეს. w23.04 15 ¶6, 7

დავითიშ ართ-ართ ობირეშშე, ნამუთ 23-ა ფსალმუნს რე მოჩამილ, იძირე, მუჭო რე თინა ბოლოშა დარწმუნებულ, ნამდა იეჰოვა ზრუნენს თიშე დო მთელ გურით უჸორს. დავით თე ფსალმუნს თის ხოლო ეჭარუნს, მუნერ ხოლოშიან ურთიერთობა უღჷ მუშ ჭყიშწკუმა, იეჰოვაწკუმა. თიშ ხელმძღვანელობაშ მეჸუნა დავითის დუდის თხილერო ოგინაფუანდჷ, ათეშენ ბოლოშა რდჷ თიშა მენდებულ. დავითის თინა ხოლო ჯერდჷ, ნამდა სიცოცხლეშ ბოლოშა ქიგინანდ თეცალ ჸოროფას. მუშენ რდჷ თინა თე ირფელშა დარწმუნებულ? დავით ირიათო გინაფლენდჷ, ნამდა იეჰოვა ირიათო ზრუნენდჷ თიშე, მუშენდა აუცილებერს მუთუნს ვარკენდჷ. დავითშა ხიოლ თიშ რჩქინას ხოლო მოუღუდ, ნამდა იეჰოვაშ მეგობარ რდჷ დო თიშ მოწონა უღუდ. ათეშენ რდჷ თინა ბოლოშა დარწმუნებულ, ნამდა მომავალს მუდგაქ ვა მოხვადუკონ, იეჰოვა ირიათო ქიზრუნენდ თიშ საჭიროებეფშე. თინა თიშმანწარას რდჷ დარწმუნებულ იეჰოვაშ ჸოროფაშა, ნამდა სირთულეეფიშ დროს ხოლო ხიოლს დო კმაყოფილებას ვადინუანდჷ (ფსალმ. 16:11). w24.01 29 ¶12, 13

მაჟია მსოფლიო ომშე მოჸუნაფილ იეჰოვაშ მოწმეეფ თავისფალო ქადაგენა შხვადოშხვა ქიანას, მუდგაშ შედეგო ბრელქ გეჩინებაფუ იეჰოვა. ამდღა ხოლო ხემძღვანელ საბჭოშ ჯიმალეფ ქრისტეშ ხემძღვანელობას მეჸუნა. თინეფს ოკონა, ნამდა თი მითითებეფშე, ნამდგას და დო ჯიმალეფს არზენა, იძირედას იეჰოვაშ დო იესოშ აზროვნება შხვადოშხვა საკითხეფშენ. კრებეფიშ ოხემძღვანელებერო თინეფ რაიონულ ზედამხედველეფს დო უხუცესეფს ირინუანა. ცხებულ უხუცესეფ დო თინეფწკუმა ართო, შხვა უხუცესეფ ხოლო იესოს „უკინებ მარძგვან ხეს“ (გამოცხ. 2:1). მოსე, იესო ნავეშ სქუა დო მოციქულეფცალო თე უხუცესეფ ხოლო არასრულყოფილეფ რენა დო მინშა ჩირთუნა (რიცხ. 20:12; იეს. 9:14, 15; რომ. 3:23). მარა არგამა რე, ნამდა იესო ყურადღებათ ოკვირ დო ხემძღვანელენს ართგურ დო გონიერ მონას დო წმინდა შურით დანიშნულ უხუცესეფს დო თაშ გაკეთენს. თაშ ნამდა, შემლებუნა ვენდათ დო მივაჸუნათ თი მითითებეფს, ნამდგას იესო ხემძღვანელობაშო დორინაფილ ჯიმალეფიშ საშვალებათ მარზენა. w24.02 23, 24 ¶13, 14

იეჰოვაშ გურს ვახარენთ, მუჟამსით თიშ გურშენ ჩიებაშ დროს ჩქინ სიტყვეფშე ჸოროფა დო მარდულობა იძირე. მსახურებაშ დროს ირიათო ფშუნა ჩქინ მთავარ მიზან — ქიმვეხვარათ ადამიანეფს, დეახლოვან იეჰოვას დო მოჸოროფე ზეციერ მუმას ჩქინ თოლით უჯინან (იაკ. 4:8). ხიოლით ვეჩიებუთ ადამიანეფს, მუნერ პიროვნებათ მოჩინებაფუანა ბიბლია იეჰოვას, მუჭო მოძირანა თიშ ჸოროფას, სამართლიანობას, სიბრძნეს, ძალას დო შხვა ბრელ სქვამ თვისებას. იეჰოვაშ განდიდებაშ დო თიშ გურიშ გახარებაშ ხოლო ართ საშვალება რე, ირნერო ვეცადათ თიცალ თვისებეფიშ გიმორჩქინას, მუნერით თის უღჷ. ზუსტას თე ჯგირ თვისებეფით ვორეთ გიშართილ თე უბადო ქვეყნიერებაშე, მუდგას ხალხ ორწყე დო მინშა უკვენა, მუშენ ვორეთ თეცალეფ (მათ. 5:14—16). ირდღას, შხვადოშხვა სიტუაციას, საშვალება მერზიებუნა, გეუნწყათ ადამიანეფს, მუშენ იფქციებუთ თაშ. შედეგო, ალალ გურიშ ადამიანეფს ვოხვარუთ ღორონთწკუმა დაახლოებას. მუჟამსით თეშნერო განვადიდენთ იეჰოვას, გურს უხარენთ თის (1 ტიმ. 2:3, 4). w24.02 10 ¶7

სულიერ მოწიფულობას ქიმიოჭირინუათინ, აუცილებერ რე, გავითარათ თიცალ უნარეფ, ნამუთ ირდღაშიან ცხოვრებას გიმგოდირთუნა. თე უნარეფიშ გავითარება მიგეხვარებნა, ჯგირო შეასრულათ თქვანდა მენდებულ პასუხიშმგებლობეფ, ქიშუათ სამუშა, ეიჯუმუათ მუჭოთ თქვან დუდ, თეშ ოჯახ დო გიღდან ჯგირ ურთიერთობა შხვეფწკუმა. ქიდიგურეთ ჯგირო კითხირ დო ჭარუა. ბიბლია იჩიებ, ნამდა ბედნერ დო ხეგომორძგვილ რე კოჩ, მით ირდღას კითხულენს ღორონთიშ სიტყვას დო ფიქრენს თიშე (ფსალმ. 1:1—3). ბიბლიაშ ირდღაშიან კითხირით პიროვნება ქინანჭუ იეჰოვაშ აზროვნებას, მუთ მეხვარებ, მუქ ხოლო გავითარას სწორ აზროვნება დო ცხოვრებას გეგმირინუას ნაგურეფ (იგავ. 1:3, 4). და დო ჯიმალეფ ბიბლიაშა გერსხილ რჩევეფიშ დო მითითებეფიშ მიოღებელო თიცალ ჯიმალეფშა მეულა, მიდგას გურაფაშ უნარ უღუნა. თაშ ნამდა, კითხირ დო ჭარუას ჯგირო ქიდიგურუანთ-და, შეგალებენა მამზადათ აზრიან დო რწმენაშ გუმამანგარებელ მოხსენებეფ დო კომენტარეფ. თეშნერო გემანგარენთ რწმენას დო შეგალებენა შხვეფს ხოლო ელუკინათ გურშა. w23.12 26, 27 ¶9—11

მუჟამსით სირთულეეფიშ დროს შქურნაფილ რეთ, დეფიქრით თი ირფელშე, მუდგას იეჰოვა მომავალს გაკეთენს, მუჟამსით სატანა მისპუ. 2014 წანაშ რეგიონულ კონგრესიშ ართ-ართ ინსცენირებას ძირაფილ რდჷ, მუმა, ნამუთ მუშ ოჯახიშ წევრეფს ყურადღებას უმახვილენს 2 ტიმოთეშ 3:1—5-შა დო ოძირანს, მუნერ იჸუაფუდ თე მუხლეფ, თექ ინოჭარილ სიტყვეფ სამოთხეშე ქორდუკო ნაწინასწარმეტყველებინ. მუმაქ თე მუხლეფ თაშ წეკითხ: „გიჩქუდას, ნამდა ახალ ქვეყნიერებას მანგარ ბედნერ დრო ქუდოდირთუ. ადამიანეფ იჸუაფუნა შხვეფიშ მოჸოროფეეფ, ჭეშმარიტებაშ მოჸოროფეეფ, მოკრძალებურეფ, თანდაბალეფ, ღორონთიშ მადიდებელეფ, მშობლეფიშ მორჩილეფ, მარდულეფ, ართგურეფ, კეთილეფ, დუგაჸუნუნან ფერეფ, შხვეფიშ გურშენ ჯგირიშ მორაგადეეფ, დუდშეკება ვა უჭირან ფერეფ, ლიბ ხასიათ უღნან ფერეფ, ჯგირიშ მოჸოროფეეფ, სანდოეფ, დათმობაშა მეულან ფერეფ, დუდშე დიდ წარმოდგენა ვა უღუნან ფერეფ, სიამოვნებაშ მანგიორო ღორონთიშ მოჸოროფეეფ, ღორონთიშ შიშით მოქმედენან ფერეფ. თეცალეფწკუმა ხოლოს რდა“. ოჯახიშ წევრეფ დოვარ თანაქრისტიანეფწკუმა ქიჩიებუთო, მუნერო გაფუნა წარმოდგენილ ცხოვრება ახალ ქვეყნიერებას? w24.01 6 ¶13, 14

მუ სასიამოვნო რე თიშ რჩქინა, ნამდა ვორეთ თი ხალხ შქას, ნამდგას იეჰოვა იწონუანს. ბიბლიას ჭარჷ: „იეჰოვა ხარენს მუშ ხალხით“ (ფსალმ. 149:4). მარა ნამთინეს მინშა თეშ უტირხუ გურ, ნამდა შილებე იფიქრას: პირადო მა ქომღუნო იეჰოვაშ მოწონა? ულირს ხოლო ღორონთიშ ბრელ ართგურ მსახურს უფიქრებ თენა (1 სამ. 1:6—10; იობ. 29:2, 4; ფსალმ. 51:11). ბიბლიაშე არგამათ იძირე, ნამდა არასრულყოფილ ადამიანეფს შეულებუნა იეჰოვაშ მოწონაშ მეღება. მუ ოკო ვაკეთათ თეშო? ოკო გეგმიფრჩქინათ რწმენა იესოშ მიმართ დო დიმნათათ (იოან. 3:16). თეშნერო ირკოჩიშ წოხოლე ვაცხადენთ, ნამდა ბნარღენთ ჩქინ ცოდეფს დო პირობას ბდვანთჷ, ნამდა შევასრულენთ ღორონთიშ ნებას (საქ. 2:38; 3:19). მუჟამსით თე ნაბიჯეფს გინობდგუნთ, ნამდა იეჰოვაშ მეგობრეფო გინიფრთათ, თის გურ ხიოლით აფჷ ეფშა. დოდვალირ აღთქმას ვეგნურთანთ-და, ირიათო მაღვენუნა იეჰოვაშ მოწონა დო თიშ ხოლოშიან მეგობრეფ იპჸუაფუთ (ფსალმ. 25:14). w24.03 26 ¶1, 2

ჩქი შემლებნა მივაჸუნათ მოციქულეფიშ მაგალითის დო ვემვოტუათ ქადაგება თიმწკუმა ხოლო, მუჟამსით ხელისუფლებაშ წარმომადგენელეფ თეს მივარიენა. შემლებნა დარწმუნებულ ვორდათ, ნამდა თინა ქიმმეხვარებნა ჩქინ დავალებაშ შესრულებას. შემლებნა ლოცვას ღორონთის გაბედულება დო სიბრძნე ქოფთხუათ. ქოთხით იეჰოვას მოხვარა, ნამდა გაურზათ სირთულეეფს. სირთულეეფს არძა ფხვადუთ. ნამთინეს ფიზიკურ ვარდა ემოციურ პრობლემეფ მიღნა. შილებე საჸოროფო პიროვნებაქ მიღურეს, ოჯახის რთულ სიტუაცია მიღნა, რწმენაშ გურშენ ფთხოზნა ვარდა შხვა პრობლემეფს ფხვადუთ. პანდემიეფიშ დო ომეფიშ შედეგო, ხოლო უმოს რთულ რე, ქუგურზე თე სირთულეეფს. ათეშენ, მუჭოთ ხოლოშიან მეგობარს დურაგადუანდით, თეშ გეგნუფაჩით იეჰოვას გურ დო ქოუწით, ირფელ მუდგას გინაფლენთ. თაშ ქიმიქციებუთ დო იეჰოვას ქიმიენდებუთ-და, რჯერდან, „თინა ქიმოქმედენს“ (ფსალმ. 37:3, 5). ჩქინ ოწუხებელშე, თაშ ქოფთქუათინ, დაჩემებულო ქიბლოცენთ-და, თენა მიმეხვარებნა, ქუგურზათ სირთულეეფს (რომ. 12:12). იეჰოვას ჯგირო უჩქჷ დო ორწყე, მუშა აფნა გარზებელ მუშ მსახურეფს. თინა ირჩქილე ჩქინ ხვეწინს, მუჟამსით რსხებას ფთხინთ (ფსალმ. 145:18, 19). w23.05 5, 6 ¶12—15

მნიშვნელოვან გადაწყვეტილებაშ წოხოლე ქიგვორეთ-და, ოკო გეგმიბრკვიათ, მუ რე იეჰოვაშ ნება დო თიშ თანახმას მიფქცუათ (ეფეს. 5:17). მუჟამსით ბგორუნთ თი ბიბლიურ პრინციპეფს, ნამუთ ჩქინ სიტუაციას მეურე, ვოცადუთ, ქიგებგათ, მუ დამოკიდებულება უღჷ იეჰოვას კონკრეტულ საკითხშე. გიმორკვიებულ პრინციპის გეგმიბრინუანთ-და, უმოსო შემალებენა სწორ გადაწყვეტილებეფიშ მეღება. ბიბლიას მოშინაფილ „უბადო“, ნამუთ ჩქინ ნტერ, სატანა რე, ირნერო ოცად, თეშ ვორდათ გინოჸუნელ ქვეყნიერებაშ საქმეეფს, ნამდა იეჰოვაშ მსახურებაშო დროქ ვადმოსქიდან (1 იოან. 5:19). გვალო ადვილო შილებე ქრისტიანშო იეჰოვაშ მსახურებაშე უმოს მნიშვნელოვანო ფარაქ, განათლებაქ ვარდა კარიერაქ გინირთას. მუშო ოკო რაგად, თის ვეფჩიებუთ, ნამდა თე ირფელ იშენდოიშენ გლახა რე, მარა იეჰოვაშ მეტ მუთუნს ოკო ვემეფჩათ საშვალება, ჩქინ ცხოვრებას პირველ ადგილ ქიდეკინას. w24.03 24 ¶16, 17