არგუსო

ყურადღება ქიმიაქცით, მუ ჟირ მნიშვნელოვან მხარე იძირე თე ფსალმუნშე: 1) მართალ ადამიანეფ სირთულეეფს ხვადუნა დო 2) იეჰოვა მირსხენა არძანერ ოწუხებელშე. მუჭო ორთჷ იეჰოვა თეს? ართ-ართ საშვალება თინა რე, ნამდა იეჰოვა მოხვარნა, თე ქვეყნიერებას ცხოვრებას, რეალურ თოლით ვუჯინათ. მართალ რე, ღორონთ მოპირნა, თიშ მსახურება ხიოლს მომღანა, მარა ვა მარზენა თიშ გარანტიას, ნამდა მუთუნნერ სირთულეს ვა შეფხვადუთ (ეს. 66:14). თინა ელამჩანა, ყურადღება მომავალშა გეგნიბღათ, მუჟამსით მაღვენუნა ულიებ, ბედნერ ცხოვრება, ზუსტას თიცალ, მუნერით იეჰოვას ოკო ჩქინო (2 კორ. 4:16—18). მარა, ონდო თე დრო დოდირთუდას, იეჰოვა ირდღას მოხვარნა, გივორჯგინათ სირთულეეფს დო გუვაგრძელათ თიშ მსახურება (გოდ. 3:22—24). მუშ გურაფა შემლებნა, მუჭოთ ბიბლიურ, თეშ თანამედროვე დროს მახორუ ართგურ მსახურეფიშ მაგალითეფშე? თის ხოლო ქობძირუნთ, ნამდა შილებე შეფხვადათ ვეველუთინ ფერ პრობლემეფს, მარა იეჰოვას ქიმვენდებუთ-და, თინა დღას ვემმოტენა (ფსალმ. 55:22). w23.04 14, 15 ¶3, 4

ხელისუფლებაშ მორჩილებაწკუმა დაკავშირებით ბრელ მუდგარენიშ გურაფა შემლებნა მარიამ დო იოსებშე. თინეფ მზათ რდეს, დემორჩილესკო ხელისუფლებას თიმწკუმა ხოლო, მუჟამსით თეშ კეთება ვა რდჷ ადვილ (ლუკ. 2:1—6). მაგალთო, ართშა ავგუსტუსიქ, მით რომიშ იმპერატორ რდჷ, ზოჯჷ, ნამდა ეიოჭარალო არძაქ მუშ-მუშ ქალაქშა გენორთკო. მარიამ დო იოსებშო თე მითითებაშ მეჸუნა ვა რდჷ ადვილ, მუშენდა მარიამ თუთას ინორდჷ დო თინეფქ იოსებიშ მშობლიურ ქალაქშა, ბეთლემშა, გენორთესკონ, 150 კილომეტრ ოკო მიკორთესკო. მუშო ოკო რაგად, თე მგზავრობა განსაკუთრებულო რთულ იჸუაფუდ მარიამშო. თინა ნერვიანენდკონ იჸიდ, მუჭოთ მუშ, თეშ ბაღანაშ ჯამრთელობაშე. მუშო ოკო რაგად, იოსების ხოლო თე ოწუხებელ აღვენუდ. თეს გეძინელ, ჟირხოლო შილებე ფიქრენდეს, მუ ოკო ქიმნესკო, მარიამს მშობიარობა ქუდაჭყაფუდ-და. თის ხომ ქვარაშა მომავალ მესია ელუხედ. თე ირფელიშ გურშენ ხომ ვესხუნუანდეს, ვედემორჩილესკო მთავრობაშ გიშაშქუმალირ კანონს? მართალ რე, მარიამ დო იოსების ნერვიანობაშ მიზეზეფ უღდეს, მარა იშენით გეგმირჩქინეს მორჩილება დო ქიგიოდირთეს ბეთლემიშ შარას. იეჰოვაქ აკურთხჷ თინეფ გიმორჩქინელ მორჩილებაშ გურშენ. მარიამქ უსაფრთხოთ გენორთჷ ბეთლემშა, გეიორჩქინ ჯანმრთელ ბაღანა დო ხვალე თენა ვარინ, ხე შეუნწყუ ბიბლიურ წინასწარმეტყველებაშ შესრულებას (მიქ. 5:2). w23.10 8 ¶9; 9 ¶11, 12

მუშ კეთება შეილებნა ნერვიანობაშ გურშენ კრებას კომენტარიშ რაგად მანგარო ქოიჭირან-და? შილებე მანგარო მიგეხვარან ჯგირო მომზადებაქ (იგავ. 21:5). მუჟამსით კრებას გარჩიებელ მასალა ჯგირო მარჩქილენა, უმოს ადვილ რე ჩქინო, მონაწილება მიბღათ კომენტარეფს. ხოლო ართ რჩევა, მუთ მიმეხვარებნა გივორჯგინათ ნერვიანობას თინა რე, ნამდა გუვაკეთათ მოკლე კომენტარეფ (იგავ. 15:23; 17:27). მუჟამსით თეცალ მოკლე კომენტარეფს ჩქინ სიტყვეფით იფჩიებუთ თენა ოძირანს, ნამდა ჯგირო ვორეთ მომზადებულ დო მარჩქილენა გარჩიებელ მასალა. მუ ოკო ქიმინათ, მუჟამსით თე რჩევეფს ქიმიაჸუნით, მარა იშენით გიჭირა, ართ ვარდა ჟირ კომენტარშე უმოს გაკეთათ? დარწმუნებულ რდათ, იეჰოვა აფასენს თქვან მონდომას, ნამდა ორთუთ თის, მუთ შეილებნა (ლუკ. 21:1—4). რშუდან, მაქსიმუმიშ კეთება ვა ნიშნენს, ჩქინ დუდის თიშე უმოს მოფთხუათ, ვინემ შემლებნა (ფილ. 4:5). დეფიქრით მუშ კეთება შეილებნა, დაგეგმით, მუჭო მიოჭირნუანთ თის დო ქილოცით, ნამდა ვენერვიანათ დო მშვიდას რდათ. ნამთინეს შილებე მიზანო უღდას, ართ მოკლე კომენტარ გაკეთას. w23.04 21 ¶6—8

პავლე მადარენა ჯარიშკოჩეფს, მით ირ წუთის მზათ რენა ობრძოლებერო დო შესაფერისო რენა მონწყილ. ჯარიშკოჩის მეთხიებ, ირიათო მზათ რდას ობრძოლებერო ომიშ დროს. თეშნერო, ჩქი ხოლო მზათ იპჸით იეჰოვაშ დღაშო, მუჟამსით ქიმკიფქუნანთ რწმენაშ დო ჸოროფაშ ჯავშანს დო ქიგიფრთვანთ იმენდიშ მუზარადის. მუჭოთ ჯავშან თხილანს ჯარიშკოჩიშ გურს, თეშ რწმენა დო ჸოროფა თხილანს ჩქინ სიმბოლურ გურს. თე თვისებეფ მიმეხვარებნა, ვემვოტუათ ღორონთიშ მსახურება დო მივაჸუნათ იესოს. რწმენაშ ჭყოლოფათ დარწმუნებულ ვორეთ, იეჰოვა დუმაჯილდოვენა თიშ გურშენ, ნამდა მთელ გურით ბგორუნთ თის (ებრ. 11:6). რწმენა გინმოჭყვიდირაფუანა, ქუდოფსქიდათ ჩქინ უფალიშ, იესოშ ართგურეფქ თიმწკუმა ხოლო, მუჟამსით სირთულეეფშა მაფნა გარზებელ. სირთულეეფიშ გარზებელო რწმენაშ გამანგარებას მიმეხვარებნა თანამედროვე დროს მახორუ და დო ჯიმალეფიშ მაგალითეფიშ გარჩიება, მიდგაქ თხოზინიშ დო ეკონომიკურ პრობლემეფიშ უმკუჯინუო, ვადინუეს ართგურობა. თი და დო ჯიმალეფიშ მაგალითეფიშ მეჸუნა, მიდგაქ ღორონთიშ სამეფო პირველ ადგილს ქიგიორინუესკონ თიშენ ცხოვრება გემარტივეს, მიმეხვარებნა, დუდ ევუჩილითუათ მატერიალიზმიშ მახეს. w23.06 10 ¶8, 9

ლოცვას ქოთხით ღორონთის, ქიმგეხვარან დუდშეკებაშ გიმორჩქინას. მუჟამსით მარჩქილენა სიტყვა დუდშეკება, ხშირ შემთხვევას აზრშა მუმალენა, მუდგარენ გლახაშე დუდიშ არიდება. მარა, თე თვისება მოხვარნა ჯგირ მუდგარენეფიშ კეთებას ხოლო, განსაკუთრებულო თიმწკუმა, მუჟამსით თეშ კეთება ირო ვა მაფნა ადვილ ვარდა ვა მოსიამოვნუნა. დუდშეკება წმინდა შურიშ ნაყოფ რე, ათეშენ იეჰოვას ოკო ქოფთხუათ წმინდა შურ, ნამდა ქიმმეხვარან, უმოსო გიმიფრჩქინათ თე მნიშვნელოვან თვისება (ლუკ. 11:13; გალ. 5:22, 23). ვა უჯინათ იდეალურ პირობეფს. თე ქვეყნიერებას ირფელ იდეალურო დღას ვეჸუაფ, ათეშენ თეცალ დროს ქუჯინეთ-და, შილებე დღას ვემმაჭირინუან ჩქინ მიზანშა. შილებე ჩქინ მიზანიშ მენჭირნაფა რთულო მაძირედან, ათეშენ თიშ მენჭირნაფაშ სურვილ იშენდოიშენ ვა მიღდან. თქვან შემთხვევას ხოლო თაშ ქორენ-და, დუდშე შეილებნა უმოს ჭიჭე მიზნეფით ქიდიჭყათ. მაგალთო, მიზანო ნამდგაინ თვისებაშ გავითარება ქოიღნან-და, დუდშე შეილებნა ჭიჭე მუდგარენეფს გეგმირჩქინათ თინა. ვარდა თქვან მიზან ბიბლიაშ დუდშე ბოლოშა კითხირ ქორენ-და, დაჭყაფუს შეილებნა ირდღას ჭიჭე დრო გეგმურთათ თიშ კითხირს. w23.05 29 ¶11—13

იეჰოვა თე ბოლო დღალეფს მუშ ორგანიზაციაშ საშვალებათ მარზენა სულიერ საზრდოს, მუთ მოხვარნა, გილაფრთათ „სიწმინდეშ შარას“ (ეს. 35:8; 48:17; 60:17). მუჟამსით მიდგაინ ბიბლიაშ გურაფას იჭყანს, ერზიებ შესაძლებლობა, გიოდირთას „სიწმინდეშ შარას“. თინეფ შქას ნამთინე ჭიჭე ხანს გეჸუნს თე შარას დო უკულ გინურთანს თევრეშე. მარა რენა თიცალეფ ხოლო, მიდგას მტკიცას აფნა გინოჭყვიდილ, გიაჸუნან „სიწმინდეშ შარას“ დო ქიმერთან ბოლო დანიშნულებაშ ადგილშა. სოიშა მეურს თე შარა? თინეფს, მიდგას ზეციერ ცხოვრებაშ იმენდ უღნა „სიწმინდეშ შარა“ ქიმიჸონანს „ღორონთიშ სამოთხეშა“, ნამუთ ზეცას რე (გამოცხ. 2:7) დო თინეფს, მიდგას დედამიწას ცხოვრებაშ იმენდ უღნა, თე შარა ქიმიჸონანს გასრულყოფილებაშა, ნამდგას ქრისტეშ 1 000 წანიან მართველობაშ ბოლოს ქიმიოჭირინუანა. თე შარას ქიგეჸუნთ-და, უკახალე ვეკნიჯინათ. ირო წიმი იდით დო ირფელ გაკეთით, ნამდა ვეგნურთათ თის, ონდო ვემურთ ბოლო დანიშნულებაშ ადგილშა — ახალ ქვეყნიერებაშა. w23.05 17 ¶15; 19 ¶16—18

მუჟამსით ფიქრენქ თი ირფელშე, მუთ იეჰოვაქ სქანო აკეთ, გურ მარდულობათ ეგაფშაფუ დო გირჩქინდუ სურვილ, დუდ მეუძღვინე თის (ფსალმ. 116:12—14). გასაკვირ ვა რე, ნამდა ბიბლია იეჰოვას „არძანერ ჯგირ დო სრულყოფილ ძღვინიშ“ მუმაჩამალო მიშინუანს (იაკ. 1:17). არძაშ უმოს დიდ ძღვინ, მუთ იეჰოვაქ მუჩეს, თინა რე, ნამდა მუშ სქუაშ სიცოცხლე დათმჷ ჩქინ გიშაჸიდირალო. დეფიქრით, იეჰოვას თე ძღვინ ვა მუჩამუდუკონ, ვა მაღვენუდეს თიწკუმა ხოლოშიან ურთიერთობაშ საშვალება დო მარადიულ ცხოვრებაშ იმენდ (1 იოან. 4:9, 10). დუდიშ მეძღვინუათ მარდულობას გიმიფრჩქინანთ იეჰოვაშე მეღებულ კურთხევეფშო დო თი არძაშ უდიდაშ ჸოროფაშო, ნამუთ თიქ გიმირჩქინ (კან. 16:17; 2 კორ. 5:15). w24.03 5 ¶8

ჩქი თიცალ ქვეყნიერებას ფცხოვრენთ, სოდეთ ზნეობრივ ნორმეფ მუთუნო ვემიორჩქნა დო შილებე დუდის თეშ ბგინაფლენდათ, მუჭოთ მართალ ლოტ. თიშ გურშენ ბიბლიას ბკითხულენთ, ნამდა გაწამებულ რდჷ „უღორონთე კათაშ დუდეშქუმალირობათ“, მუშენდა ჯგირო არჩქილედ, ნამდა ზეციერ მუმას ჯოგჷ ირნერ გლახა საქციელ (2 პეტ. 2:7, 8). თე ართგურ კოჩის, ღორონთიშ შიშ დო ჸოროფა აღძრენდჷ, ვეიაჸუნკო თი ზნეობრივ ნორმეფს, ნამუთ თიმ დროს მახორუ ხალხის უღუდ. ჩქი ხოლო ამდღა, თიცალ ხალხ შქას ფცხოვრენთ, მით ღორონთიშ დოდგინელ მაღალ ზნეობრივ ნორმეფს ჭიჭეთ აფასენს ვარდა საერთოთ მუთუნო ვემიორჩქ თინა. თეშ უმკუჯინუო, ღორონთიშ მიმართ ჸოროფას ვა ვოდინუანთ დო ჯანსაღ შიშის გუვავითარენთ-და, შემალებენა ზნეობრივო სუფთეფ ვორდათ. იეჰოვას ჯგირო არჩქილე თე ირფელ ათეშენ, წიგნ იგავეფს ენოჭარილ გურიშემაკინალ აზრეფით მანგარო მოხვარნა. არძა ქრისტიანს, ვა უღჷ მნიშვნელობა ახალგაზრდა ვორეთ დოვარ ხანშამიშულირ, შემლებნა სრულას მიბღათ სარგებელ თექ მოჩამილ რჩევეფშე. მუჟამსით იეჰოვაშ შიშ მიღნა, კურცხას ვორეთ, ნამდა ვა ვაკათათ გლახა საზოგადოებას. w23.06 20 ¶1, 2; 21 ¶5

შილებე ხვადუქ წინააღმდეგობას ოჯახიშ წევრეფშე ვარდა მუდგარენეფქ გაჸუ დათმებელქ, ნამდა სამეფოშ ინტერესეფ პირველ ადგილს გიორინეკო (მათ. 6:33). თაშ ქორდჷ-და, რჯერდას, იეჰოვაშ თოლს ვემკოჩილათ თინა, მუთ თიშო აკეთ (ებრ. 6:10). ალბათ სქან დუდშა გიმოცად, მუჭო ისრულებ იესოშ დუნაპირებ: „მიდგაქ ჩქიმ დო სახიოლო ამბეშ გურშენ დიტუ ჸუდე, ვარდა ჯიმალეფ, ვარდა დალეფ, ვარდა დიდა, ვარდა მუმა, ვარდა სქუალეფ, ვარდა ჸვანეფ, ამდღა, თხოზინიშ დროს, ოშწილო მიღენს ჸუდეეფს, ჯიმალეფს, დალეფს, დიდალეფს, სქუალეფს, ჸვანეფს, დო მომავალს — ულიებ სიცოცხლეს“ (მარ. 10:29, 30). იეჰოვაშო მუდგა მსხვერპლ ვა მაფუდან კეთებულინ, დღას ვეგნაფორე თი კურთხევეფ, ნამუთ თიშე მაფუნა მეღებულ (ფსალმ. 37:4). w24.03 9 ¶5

იუდეას დიდ შქირენაქ ქუდოდირთჷ. სირიაშ ანტიოქიას მახორუ და დო ჯიმალეფქ „იუდეას მახორუ და დო ჯიმალეფიშ მახვარებელო მუდგარენეფიშ ჯღონუა გინოჭყვიდეს, მიდგას მუსხი შეიალებედ“ (საქ. 11:27—30). მართალ რე, იუდეა დო ანტიოქიაშ შქას შორ შარა მეძუდ, მარა თეს ვა უცილებ ანტიოქიელ ქრისტიანეფშა, ნამდა განსაცდელიშ დროს ქელუდირთესკო იუდეას მახორუ და დო ჯიმალეფს (1 იოან. 3:17, 18). ჯვეშ დროს მახორუ ქრისტიანეფცალო, ჩქი ხოლო მერზიებნა შესაძლებლობა ვოძირათ, ნამდა გურშა მემღუნა შხვეფიშ გაჭირება. მაგალთო, მუჟამსით ჩქინ თანაქრისტიანეფს შხვადოშხვა სტიქიურ უბედრობეფ გიოტირხუნა დუდის, შემლებნა გუვაკეთათ შესაწირავეფ მსოფლიო საქმეშო, ქიბლოცათ დაზარალებურ და დო ჯიმალეფშო დო ქობკითხათ უხუცესეფს, შემლებნან დო ვარ მონაწილება მიბღათ თინეფიშ მახვარებელო ნამდგაინ საქმეს. და დო ჯიმალეფს შილებე ჩქინ მოხვარაქ დესაჭირან, ნამდა უღდან აუცილებერ საჭიროებეფ. მთელ გურით მოკონა, ნამდა, მუჟამსით იესო ხალხიშ გასამართლებერო ქუმურს, ქოძირას, ნამდა გურშა მემღუნა შხვეფიშ გაჭირება დო ქომჩან პატი, დევმკვიდრათ ღორონთიშ სამეფო (მათ. 25:34—40). w23.07 4 ¶9, 10; 6 ¶12

იესო მეჸუნდჷ იეჰოვაშ გონიერებაშ მაგალითის. თინა დედამიწაშა რდჷ მოშქუმალირ, ნამდა ქუქადაგკო „ისრაელიშ დინაფილ შხურეფს“, მარა გონიერებას გიმირჩქინანდჷ მუშ დანიშნულებაშ შესრულებაშ დროს. მაგალთო, ართშა თის ართ ოსურქ, ნამუთ ებრაელ ვა რდჷ, ქოთხუ, დასქილიდუკო მუშ ძღაბ, ნამდგას დემონეფ ატანჯენდჷ. იესოქ ჭყოლოფა გეგმირჩქინ თე ოსურიშ მიმართ დო შეუსრულ ოთხუალ (მათ. 15:21—28). გუვარჩუათ ხოლო ართ შემთხვევა. მუჟამსით იესოს მსახურება ახალ დოჭყაფილ აფუდ, თეცალ სიტყვეფ თქუ: „მით ჩქიმდე ვარიას თქუანს, მახოლო ვარიას ქოფთქუანქ თიშე“ (მათ. 10:33). მარა გაკეთუო თენა, მუჟამსით პეტრექ სუმშა გინივარუ, ნამდა იჩინენდჷ თის? მუშო ოკო რაგად, ვარ! თის ოჭიშ ვა ურთინუაფ პეტრეშა, მუშენდა ჯგირო უჩქუდ, ნამდა პეტრე მანგარო ნარღენდჷ მოხვალამირს დო თინა ხოლო უჩქუდ, მუნერ ართგურ კოჩ რდჷ. გათელებაშ უკულ იესოქ დუდ ქაძირუ პეტრეს დო დარწმუნ, ნამდა აპატუ დო კინ მანგარო უჸორდჷ თინა (ლუკ. 24:33, 34). იეჰოვა დო იესო გონიერეფ რენა. მუშ რაგად შილებე ჩქინდე? ღორონთ ელჷ, ნამდა ჩქი ხოლო გონიერებას გეგმიფრჩქინანთ. w23.07 21 ¶6, 7

შხვეფ მუჭო დუვარწმუნათ თიშა, ნამდა თე დრო აუცილებერო ქუდოდირთუ? პირველ, თე დუნაპირებუს შხვა ვარინ, პირადო იეჰოვა მარზენა. წიგნ „გამოცხადებას“ ბკითხულენთ: «ტახტის გეხედუნ თიქ თქუ: „ქიდეკვირ, ვოჭყანქ ირფელს ახალს“». იეჰოვას მუშ განზრახვაშ შეიოსრულებერო ქოთ სიბრძნე, ქოთ ძალა დო ქოთ სურვილ უღჷ. მაჟია, იეჰოვა მუშ სიტყვეფშა თიცალ დარწმუნებულ რე, ნამდა, მუჟამსით თე დუნაპირებუს ირზენს, თეშ იჩიებ ითამ თინა უკვე შესრულებურ რდას. ზუსტას ათეშენ რაგადანს: „თე სიტყვეფ სარწმუნო დო ჭეშმარიტ რე . . . შისრულ!“. მასმა, იეჰოვას დოჭყაფილ საქმე ირიათო ბოლოშა მეჸუნს. ზუსტას ათეშენ თქუ თიქ: „მა ვორექ ალფა დო ომეგა“ (გამოცხ. 21:6). მალას იეჰოვა დამტკიცენს, ნამდა მუ ვარინ, სინამდვილეს სატანა რე მეტყურე დო დღას ვემიაჭირინე მუშ მიზანშა. თაშ ნამდა, მუჟამსით მიდგაინ გიწინა: „ჰამენ, თაშ ქოჸოფედას, მარა ვა ბჯერს თე დრო ქუდოდირთუნ“, შეილებნა გამოცხადებაშ 21:5, 6 მუხლეფ ხოლო წუკითხათ დო გეუნწყათ თინეფ. ქაძირეთ ადამიანეფს, მუ საფუძვლიან მიზეზეფ მუჩეს იეჰოვაქ, ნამდა ბჯერდან, თიშ დუნაპირებ აუცილებერო შისრულებ (ეს. 65:16). w23.11 7 ¶18, 19

იეჰოვაქ პირობა მეჩჷ აბრაამს, მუჟამსით თინა 75 წანერ რდჷ. ქოძირუო აბრაამქ მუშ თოლით თე დუნაპირებუშ შესრულება? ბოლოშახ ვა უძირ. ევფრატიშ გინოკვათუაშ უკულ, აბრაამს ხოლო 25 წანაქ აჸუ ოჯინექ, ონდო ისაკ ქაშიდ, ნამდგაშ დაბადება მართალო სასწაულ რდჷ. თეშ უკულ, ხოლო 60 წანას აჸუ ოჯინექ, ონდო მოთალეფ, ესავ დო იაკობ ქეშეძინებუდ (ებრ. 6:15). მართალ რე, აბრაამს მუშ თოლით ვა უძირ, მუჭო გინირთჷ მუშ გამნარყიქ დიდ ხალხო დო მუჭო დემკვიდრეს თინეფქ დუნაპირებ ქიანა, მარა თეშ უმკუჯინუო, თე ართგურ კოჩ ხარენდჷ მუშ გუმაჭყაფალწკუმა ხოლოშიან ურთიერთობათ (იაკ. 2:23). წერმიდგინით, მუნერ ბედნერ იჸუაფ აბრაამ, მუჟამსით გეთელებ დო ქიგეგენს, ნამდა მუშ გიმორჩქინელ რწმენაშ დო მოთვინებაშ ჭყოლოფათ, იეჰოვაქ აკურთხჷ არძა ერ დედამიწას (დაბ. 22:18). ჩქი მუს ბგურაფლენთ აბრაამიშ შემთხვევაშე? შილებე ჩქინ თოლით ვა ბძირათ, მუჭო შისრულებ იეჰოვაშ არძა დუნაპირებ, მარა აბრაამცალო მოთვინებას გეგმიფრჩქინანთ-და, შემლებნა დარწმუნებულ ვორდათ, ნამდა იეჰოვა დუმაჯილდოვენა ამდღა დო უმოს კურთხევეფით ემოფშანა მომავალს, მუჟამსით დემკვიდრენთ დუნაპირებ ახალ ქვეყნიერებას (მარ. 10:29, 30). w23.08 24 ¶14

ახალგაზრდობას მეფე უზია თანდაბალ პიროვნება რდჷ. თის ღორონთიშ შიშ გურშა ბაღანობაშე ენუდვეს დო მუშ სიცოცხლეშ უმენტაშ წანეფს იეჰოვა კურთხევეფს ვარკენდჷ თის (2 მატ. 26:1—4). თიქ ბრელშა გიორჯგინ ნტერეფს დო გამანგარ იერუსალიმ (2 მატ. 26:6—15). მუშო ოკო რაგად, უზია ბედნერ იჸუაფუდ თიშ გურშენ, ნამდა ღორონთ ელურდჷ დო ოხვარუდ თის (ეკლ. 3:12, 13). უზია, მუჭოთ მეფე, მერჩქვანელ რდჷ შხვეფშა მითითებეფიშ მეჩამას დო ხალხშა თიშ კარნახის, მუ მუჭო ოკო აკეთესკო. შილებე ზუსტას ათეშენ მეჩჷ ართშა მუშ დუდის თიშე უმოსიშ კეთებაშ უფლება, ვინემ სინამდვილეს უღუდ. თიქ ართ დღას იეჰოვაშ ტაძარშა გემნორთჷ დო სამსხვერპლოს საკმელიშ ჭუალა მინდომ, მუდგაშ უფლება მეფეეფს ვა უღდეს (2 მატ. 26:16—18). მღვდელმთავარ აზარიაქ ირნერო ეცად, ვა გაკეთებაფუკო თენა, მარა მეფექ მანგარო გერისხჷ. სანარღოთ, თეცალ საქციელით უზიაქ ხაზ გეგნუსვჷ თი ხოლოშიან ურთიერთობას, ნამუთ იეჰოვაწკუმა წანეფიშ დინახალე უღუდ დო მიოდინუ თიშ მიმართ ართგურობა. თე ირფელიშ გურშენ იეჰოვაქ დასაჯ, მუდგაშ შედეგო მეფე უზია ღურაშახ კეთროვან რდჷ (2 მატ. 26:19—21). უზიას თანდაბლობა ვა უდინუაფუდკონ, თიშ ცხოვრება თაშ ვეშჷ დო ბრელით უჯგუშ იჸუაფუდ. w23.09 10 ¶9, 10

პეტრე მოციქულს მუშ სისუსტეეფწკუმა ბრძოლა თიშ უკულ ხოლო უხვადუდ, მუთ თიშა წმინდა შურქ გეგნორთჷ დო ცხებულ ქრისტიანო გინირთჷ. ახ. წ. 36 წანას ღორონთიქ პეტრე წინადაუცვეთელ უცხოტომელშა, კორნელიუსშა, მიდაშქვჷ. თე უცხოტომელქ იეჰოვაშ წმინდა შურ მიღჷ დო ცხებულ ქრისტიანო გინირთჷ. მუჟამსით პეტრექ თენა ქოძირ, ქიმეხვად, ნამდა ღორონთ ვეგმირჩქინანს გიშაკერძაფას დო უცხოტომელ ქრისტიანეფს ხოლო შეულებნა რდან ქრისტიანულ კრებაშ ნაწილ (საქ. 10:34, 44, 45). თეშ უკულ, პეტრეს თავისფალო უღუდ ურთიერთობა უცხოტომელეფწკუმა დო თინეფწკუმა ართო ჭკუმუნდჷ ოჭკუმალს, მუდგას აიშახ მუთუნით ვაკეთენდჷ. მარა ნამთინე იუდეველ ქრისტიან ფიქრენდჷ, ნამდა უცხოტომელეფწკუმა ართო ოკო ვა ჭკუმესკო. მუჟამსით თი ქრისტიანეფქ, მიდგას თეცალ დამოკიდებულება უღუდეს, ანტიოქიაშა გენორთეს, პეტრექ თინეფიშ შიშით უცხოტომელ და დო ჯიმალეფწკუმა ართო ჭკუმუა მიოტუ. პავლე მოციქულქ პეტრეშ თვალთმაქცობა ქოძირუნ, არძაშ წოხოლე ქიმეჩ შენიშვნა (გალ. 2:13, 14). მართალ რე, პეტრექ ხოლო ართშა მეჩირთჷ, მარა დუდ ვემუდვალ თეშა დო ვემუტებ სისუსტეეფშა ბრძოლა. w23.09 22 ¶8

თე საკითხეფშე დაფიქრებაშ უკულ შილებე ქოძირით, ნამდა ნამთინე კუნთხუს გაუჯგუშება გოსაჭირნა. თაშ ქორენ-და, გურ ვეგიტახათ, მუშენდა, მუჭოთ პეტრე მირაგადუნა, „უფალ კეთილ რე“. ათეშენ, დარწმუნებულ რდათჷ, ნამდა თინა ქიმგეხვარებნა (1 პეტ. 2:3). თეს გეძინელ, მოციქულ პეტრე მარწმუნენა, ნამდა „ღორონთ . . . მუშით გათენს თქვან მომზადებას. თინა გურშა ელაიკინანა“. ართ დროს, პეტრე მუშ დუდის თიშ ღირსო ვემირჩქინანდჷ, ნამდა ღორონთიშ სქუაშ გვერდით ჸოფედუკო (ლუკ. 5:8). მარა იეჰოვაშ დო იესოშ ელარნათ თიქ დუდ ვემუდვჷ მუშ სისუსტეეფს დო ბოლოშა იესოშ ართგურ მიმაჸუნალ რდჷ. შედეგო, თიქ ღორონთშე დიდებულ ჯილდო მიღჷ. პეტრეშო „ჩქინ უფალიშ დო მარსხებელიშ, იესო ქრისტეშ, მარადიულ სამეფოშ“ კარქ ფართას გინჯჷ (2 პეტ. 1:11). თქვა ხოლო, პეტრეცალო, სისუსტეეფს დუდის ვემუდვანთ დო თქვან მომზადებას იეჰოვას გათებაფუანთ-და, ღორონთშე დიდებულ ჯილდოს, მარადიულ სიცოცხლეს მიღენთ დო ქიმიოჭირინუანთ რწმენაშ საბოლა მიზანს — რსხებას (1 პეტ. 1:9). w23.09 31 ¶16, 17

კარავს ხვალე ართ ეშაღობილ ოზე უღუდ, სოდეთ ხვალე მღვდელეფ მინიშეს დო ასრულენდეს მუნეფიშ მოვალეობეფს. ოზეს გედგუდ სპილენძიშ სამსხვერპლო, ნამდგას მსხვერპლის გიოჭუანდეს დო წყარით ეფშა სპილენძიშ აუზ, სოდეთ მღვდელეფ მუნეფიშ წმინდა მსახურებაშ დოჭყაფაშახ ხე დო კუჩხის იბონუნდეს (გამ. 30:17—20; 40:6—8). ამდღა ცხებულეფ ონდო ქრისტეწკუმა ართო მღვდელეფო მსახურებას დიჭყანა, დედამიწას ართგურო მსახურენა იეჰოვაშ სულიერ ტაძარიშ დინახალენ ოზეს. წყარით ეფშა სპილენძიშ აუზ, ნამუთ კარავს დო ტაძარეფს რდჷ, არძა ქრისტიანს გუმოშინანა, მუსხით მნიშვნელოვან რე, ვორდათ ზნეობრივო დო სულიერო წმინდეფ. მუშ რაგად შილებე „ანაყუ ხალხშე“? სო ასრულენა თინეფ წმინდა თაყვანიშმცემლობას? მოციქულ იოანექ ხილუას ძირჷ, ნამდა თინეფ გერდეს „ღორონთიშ ტახტიშ წოხოლე“ დო „დღაშ დო სერით“ ასრულენდეს წმინდა მსახურებას იეჰოვაშ სულიერ ტაძარიშ გალენ ოზეს (გამოცხ. 7:9, 13—15). გურ სიმარდულით მაფუნა ეფშა, ნამდა მიღნა პატი, თაყვან ფცათჷ იეჰოვას თიშ დიდებულ სულიერ ტაძარს. w23.10 28 ¶15, 16

ხოლო ართ საშვალება, მუდგაშ ჭყოლოფათ იეჰოვა ძალას მარზენა, რე ჩქინ ძვირფას უხუცესეფშე მეღებულ მოხვარა (ეს. 32:1, 2). ათეშენ, მუჟამსით ოწუხებელიშ გურშენ გურ შეგეჭირებნა, ალალას ქუდურაგადეთ უხუცესეფს დო ქეჩით, მუს გინაფლენთ. თინეფს მთელ გურით ოკონა, ელაიდირთან. ათეშენ, ვა თქუათ ვარია მოხვარაშე დო გეგმირჩქინით მარდულობა. რშუდან, თე ართგურ ქომოლკათაშ საშვალებათ იეჰოვა გამანგარენა დო ძალეფით ეგოფშანა. ბიბლიაშა გერსხილ მომავალიშ იმენდ — იჸინო თენა მარადიულ ცხოვრება ზეცას დო ვარ სამოთხეთ გინორთელ დედამიწას — ძალეფით ემოფშანა დო მოხვარნა, გუვაგრძელათ იეჰოვაშ მსახურება (რომ. 4:3, 18, 19). თე დიდებულ იმენდ მარზენა ძალას, ნამდა გავურზათ სირთულეეფს, იფქადაგათ სახიოლო ამბე დო შევასრულათ ჩქინდა მოჩამილ არძანერ დავალება (1 თეს. 1:3). მორთ ასე გუვარჩუათ, მუჭო გამანგარ მომავალიშ იმენდიქ პავლე მოციქულ. თის მოწინააღმდეგეეფ ავიწროენდეს, თხოზუდეს, მანგარ გლახათ ოქცუდეს დო მინშა თიშ სიცოცხლე საფრთხეშ თუდო რდჷ (2 კორ. 4:8—10). პავლექ ძალა მიღჷ დო ზეცას მარადიულ ცხოვრებაშ იმენდშა გეგნიღ ყურადღება (2 კორ. 4:16—18). თინა ფიქრენდჷ თე იმენდშე დო შედეგო „შინაგან პიროვნება ირდღას იახალებ“. w23.10 15, 16 ¶14—17

ქოფიქრენსო იეჰოვა, ნამდა ასე რე შესაფერის დრო, ქუპასუხას ჩქინ ოთხუალს? მუჟამსით ბლოცულენთ, ჩქი შილებე ფიფქრენდათ, ნამდა სასწრაფოთ მოსაჭირნა ლოცვაშე პასუხიშ მეღება. მარა სინამდვილეს იეჰოვას უჩქჷ, მუჟამ რე თეშო არძაშ უჯგუშ დრო (ებრ. 4:16). მუჟამსით პასუხის ხეთეშე ვა ბღებულენთ, შილებე იფიფქრათ, ნამდა იეჰოვაქ ვარია თქუ ჩქინ ოთხუალიშ შესრულებაშე, ვარინ უბრალოთ, შილებე ფიქრენდას, ნამდა დიო ვა რე შესაფერის დრო, ქეშემსრულან თინა, მუთ ფთხით. მაგალთო, ახალგაზრდა ჯიმა, იეჰოვას ლახალაშე სქილიდაფას თხინსჷ, მარა თიშ ჯამრთელობა ვეუჯგუშებ. მუქ შილებე მოხვადას ღორონთ თე ოთხუალს ქეშუსრულენს-და? შილებე სატანას თიშ რაგადიშ ოჭიშიქ ქიმიაჩას, ნამდა თე ჯიმა იეჰოვაქ ლახალაშე დასქილიდუნ თიშენ აგრძელენს თიშ მსახურებას (იობ. 1:9—11; 2:4). თიქ ხოლო ოკო ირაგადუას, ნამდა იეჰოვას უკვე დოდგინელ აფჷ დრო, მუჟამ დასქილიდუას ადამიანეფ ირნერ ლახალაშე (ეს. 33:24; გამოცხ. 21:3, 4). თე დროშ მოულაშახ ოკო ვეველდათ, ნამდა იეჰოვა სასწაულებრივო დუმოსქილიდუანა ლახალაშე. ათეშენ, უჯგუშ იჸუაფუდ, თე ჯიმას იეჰოვაშა ძალა დო შინაგან სიმშვიდე ქუთხუდკო, ნამდა ლახალაშ უმკუჯინუო, გაგრძელკო თიშ ართგურო მსახურება. w23.11 24 ¶13

მართალ რე, სამსონქ მანგარო მეჩირთჷ, მარა მუშ შეცდომაშა დუდ ვემუდვალ დო იშენით ოცადუდ, შეასრულკო იეჰოვაშ ნება. თინა ირნერ შესაძლებლობას გორუნდჷ, ნამდა შეასრულკო იეჰოვაშე მეღებულ დავალება დო იბრძოლკო ფილისტიმელეფიშ წინააღმდეგ (მსაჯ. 16:28—30). თიქ იეჰოვას თხუ: „ქომუჩ ძალა, ღორონთ, ნამდა მანგიორ გინუგე ფილისტიმელეფს“. ჭეშმარიტ ღორონთიქ ქიმირჩქილუ სამსონიშ ოთხუალ დო კინ ქიმეჩ განსაკუთრებულ ძალა. შედეგო სამსონქ თეშ გემანგარ, ნამდა თე შემთხვევას თიშე უმოს მეტ ფილისტიმელ ჸვილ, ვინემ თეიშახ უჸვილ. მართალ რე, სამსონქ დაშებულიშ გურშენ გლახა შედეგეფ მიღჷ, მარა იშენით ვემუტებ იეჰოვაშ ნებაშ შესრულება. თენა ჩქინო ხოლო მაგალით რე. მუდგაინ შეცდომა მუმალენა დო თეშ გურშენ შეგონებას მიბღენთ ვარდა პასუხიშმგებლობას მივოდინუანთ-და, ჩქი ხოლო სამსონცალო ოკო მიფქცუათ დო ვემვოტუათ იეჰოვაშ ნებაშ შესრულება. რშუდან, ჩქინ მოჸოროფე ღორონთ ირიათო მზათ რე, მაპატუან (ფსალმ. 103:8, 9). შეცდომეფიშ უმკუჯინუო, იეჰოვა კინ ქომჩანა ძალას თიშ ნებაშ შეიოსრულებერო, მუჭოთ თენა სამსონიშ შემთხვევას აკეთ. w23.09 6 ¶15, 16

მოთვინებას მოჸუნს „ღორონთიშ მოწონა“. მუშო ოკო რაგად, თენა ვა ნიშნენს, ნამდა იეჰოვა ბედნერ რე, მუჟამსით განსაცდელეფს დო სირთულეეფს ხვადუთ. თიშა ხიოლ თის მოუღ, ნამდა მოთვინებათ ურზუთ თე ირფელს დო ბოლოშა თიშ ართგურ სქიდუთ. გურშა ელამკინანა თიშ რჩქინა, ნამდა ჩქინ გიმორჩქინელ მოთვინებათ იეჰოვას გურს უხარენთ (ფსალმ. 5:12). მუჭოთ ფშუნა, აბრაამქ მოთვინებათ გურზჷ განსაცდელეფს, მუდგაშ შედეგო ღორონთიშ მოწონა მიღჷ. იეჰოვაქ თინა მართალ კოჩო დო მუშ მეგობარო მირჩქინ (დაბ. 15:6; რომ. 4:13, 22). თენა თაშ იჸუაფ ჩქინ შემთხვევას ხოლო. ღორონთშე მოწონაშ მეღება დამოკიდებულ ვა რე თიშა, მუსხის ვორთუთ იეჰოვაშ მსახურებას ვარდა მუ პასუხიშმგებლობეფ მიღნა ორგანიზაციას. იეჰოვაშე მოწონას ბღებულენთ, მუჟამსით სირთულეეფს მოთვინებათ ურზუთ დო ბოლოშა ართგურ ფსქიდუთ. მნიშვნელობა ვა უღჷ, მუ ასაკიშ ვორეთ ვარდა მუ სიტუაცია დო შესაძლებლობეფ მიღნა, თითოულს შემლებნა, მოთვინებათ გურზათ სირთულეეფს. თაშ ნამდა, ასე განსაცდელიშ წოხოლე ქიგერეთ დო თის მოთვინებათ ქურზუთ-და, თქვან დუდის ხშირას ქუგაშინით, ნამდა უკვე გიღნა ღორონთიშ მოწონა. თიშ რჩქინა, ნამდა იეჰოვაშ მოწონა მიღნა ძალეფით ემოფშანა დო უმოსო ამანგარენს ჩქინ იმენდის. w23.12 11 ¶13, 14

ქრისტიან ქომოლკოჩიქ ოკო გავითარას კომუნიკაციაშ უნარ. თი პიროვნება, მიდგას თე უნარ გავითარებულ აფჷ, ყურადღებათ ურჩქილე შხვეფს დო არჩქილე თინეფიშ (იგავ. 20:5). თეს გეძინელ, პიროვნებაშ ხუმაშ ტონით, სახეშ გამომეტყველებათ დო ჟესტეფით გებულენს, მუს გინაფლენს თინა. ხალხწკუმა ურთიერთობას დრო ვეგმურთით-და, თე ირფელ ვადგაგურენა. ადამიანეფწკუმა ურთიერთობა ირიათო ელექტრონულ მოწყობილობეფით დო წერილეფით ქოიღნან-და, გაიჭირდუნა თინეფწკუმა პირისპირ ურთიერთობა. ათეშენ ირნერო ეცადით, ადამიანეფს პირისპირ ეჩუათ (2 იოან. 12). სულიერო მოწიფულ ქომოლკოჩის ოკო შეულებდას, მუჭოთ მუშ დუდიშ, თეშ ოჯახიშ ეჯუმალა (1 ტიმ. 5:8). ირფელ გაკეთით, ნამდა ქიდიგურუათ თიცალ მუდგარენ, მუთ მიგეხვარებნა სამუშაშ შიბას (საქ. 18:2, 3; 20:34; ეფეს. 4:28). ირნერო ქეცადით, ნამდა გიღდან თიცალ კოჩიშ სახელ, მით ბრელს ხანდენს დო დოჭყაფილ საქმე ბოლოშა მეჸუნს. თაშ ქიმიქციებუთ-და, უმოს შანს გაღვენუნა, ქიშუათ სამუშა დო ვემიოდინუათ თინა. w23.12 27 ¶12, 13

ბიბლია მიშინუანს „იეჰოვაშ დღას“, მუჭოთ დროს, მუჟამსით თინა ნტერეფს განაჩენს გეგშუღანს, შხვა სიტყვეფით ქოფთქუათინ, განადგურენს თინეფს დო დერსხენს მუშ ხალხის. ულირს, იეჰოვას თეცალ მუდგანერ ბრელშა უკეთებ დო ჩქინ დროს ხოლო გაკეთენს (ეს. 13:1, 6; ეზეკ. 13:5; სოფ. 1:8). მუჟამსით პოლიტიკურ ლიდერეფ „დიდ ბაბილონს“ ქიგიანთხუნა, თეთ ქიდიჭყაფუ „იეჰოვაშ დღა“, ნამდგას მაჸუნუ „არმაგედონიშ ომ“. თე „დღას“ გინუსქიდათინ ამდღარშე ოკო დიბჭყათ მომზადება დო მუჭოთ იესოქ მიწის საჭირო რე, „დიდ გაჭირებაშო“ ირიათო „მზათ ვორდათ“ (მათ. 24:21; ლუკ. 12:40). თესალონიკელეფშა მეჭარილ პირველ წერილს, მოციქულ პავლექ გიმირინუ შხვადოშხვა შედარება, ნამდა ქიმეხვარკო ქრისტიანეფს, მზათ ჸოფედესკო იეჰოვაშ დღაშო, მუჟამსით თინა გასამართლენს არძას. პავლეს უჩქუდ, ნამდა იეჰოვაშ დღა თიმ წუთის ვა დოდირთუდ (2 თეს. 2:1—3). მარა, თიქ იშენით ელუჩ ჯიმალეფს, მემზადესკო თი დღაშო თეშ, ითამ თიშ მოულაშა ართ დღა მეძუდკო. ჯგირ იჸუაფ, თე რჩევა ჩქი ხოლო ფშუდან. w23.06 8 ¶1, 2

იაპონიაშ დედაქალაქ ტოკიოს, 1970-იან წანეფიშ ბოლოს, 60-სართულიან შენობა აშენეს. თე ქალაქის მიწისძვრეფ ხშირას ხვადუდ, ათეშენ ხალხის აფიქრუაფუდ, ქუგურზუდ დო ვარ თე შენობა მიწისძვრეფს. მუჭო აშენეს თინა? ინჟინერეფქ თეშ მანწყის, ნამდა თე შენობაქ მიწისძვრაშ დროს მყარას ქიგედირთკო დო, თეწკუმა ართო, ქუდაჸუნკო სეისმურ ბიძგეფს. შილებე ირაგადუას, ნამდა ქრისტიანეფ ხოლო თე მაღალ შენობას მოგენა. მორთ ქიგებგათ, მუშენ იფჩიებუთ თეს. საჭირო რე, ქრისტიან ქოთ მტკიცას გერდას დო ქოთ დუხუჯუას სიტუაციას. მაგალთო, მუჟამსით საქმე ოხუ ღორონთიშ კანონეფიშ დო მითითებეფიშ მეჸუნას, თიქ სიმტკიცე ოკო გიმირჩქინას. მართალ რე, ქრისტიან ირიათო მზათ რე, რდას მორჩილ დო ვედას კომპრომისშა, მარა თეწკუმა ართო, საჭირო რე, გეგმირჩქინას გონიერება დო ქუმუხუჯუას სიტუაციას, მუჟამსით თენა აუცილებერ რე (იაკ. 3:17). ქრისტიან, ნამდგას თეცალ გაწონასწორებულ დამოკიდებულება აფჷ გავითარებულ, ვართ ზედმეტო მკაცრ იჸუაფ დო ვართ ირფელიშ დათმობაშა ურს. w23.07 14 ¶1, 2

იესოს გარზებელქ აჸუ სატანა ეშმაკიშ გამოცდეფშა, მიდგაქ ირნერო ეცად, მიოჩილითუკო ქრისტე დო უწუ, ნამდა ღორონთიშ მანგიორო მუს ემსახურუკო (მათ. 4:1—11). სატანას მიზანო უღუდ, იესოს ქუდაშებაფუკო დო ცოდამო გინართინუკო, ნამდა ვეშიალებუკო ჩქინ გიშაჸიდირქ. დედამიწას მსახურებაშ დროს იესოქ შხვა ბრელ გამოცდას ხოლო შეხვად. მაგალთო, თის ნტერეფ თხოზუდეს დო თიშ ჸვილუას ოცადუდეს (ლუკ. 4:28, 29; 13:31). თეს გეძინელ, იესოს გარზებელ აფუდ მუშ არასრულყოფილ მიმაჸუნალეფიშ შეცდომეფშა (მარ. 9:33, 34). ხვალე თენა ვარინ, ონდო დოჸვილუნდეს, აწამეს დო გიაძიცენდეს. ბოლოს თინა ნტერეფქ თიცალ ღურათ დასაჯეს, მუდგათ მანგარო დამცირეს დო ნინათ ვეიჭარენ ფერ ჭუა ქიმიორინუეს (ებრ. 12:1—3). მუჟამსით თინა წამებაშ ძელს ქიმკაჭკადეს, თე ქიანაშმადიდა ჭუაშა იეჰოვაშ უმშო, ხვალე აჸუ გარზებელქ (მათ. 27:46). არგამა რე, ჩქინ გიშაჸიდირალო, იესოს ქიანაშ ჭუა დო ოტანჯებელშა აჸუ გარზებელქ. გურ იესოშ ჸოროფათ ემაფშაფუნა, მუჟამსით ფიფქრენთ, ნამდა წუთით ვა დაფიქრებენ თეშ გაწირ მუშ სიცოცხლე ჩქინ საჯგირობუოთ. w24.01 10, 11 ¶7—9

მოთვინება მოხვარნა, ჯგირ ურთიერთობა მიღდან შხვეფწკუმა. თე თვისებაშ ჭყოლოფათ, ვემშვაჭკირუთ შხვეფს ჩიებაშ დროს დო ყურადღებათ მურჩქილუანთ თინეფს (იაკ. 1:19). მოთვინება მშვიდობას ხოლო უნწყუნს ხეს. მაგალთო, მუჟამსით განერვიანებულ ვორეთ, თე თვისება მოხვარნა, უდუფიქრებუო ვემიფქცუათ დო ვა ფთქუათ თიცალ მუდგარენ, მუთ ორაგადე ვა მაფუდეს. თეს გეძინელ, მოთვინებას გეგმიფრჩქინანთ-და, ადვილო ვამმალედან იჸი გურ, მუჟამსით მიდგარენ გურს ქელმოჭუანა დო თიშ მანგიორო, ნამდა თეცალ პიროვნებას მანგიორ გინუგათ, შემალებენა მუთვინათ დო მთელ გურით ვაპატუათ (კოლ. 3:12, 13). მოთვინება უჯგუშ გადაწყვეტილებეფიშ მეღებას ხოლო მოხვარნა. მომთმენეფ ქიპჸუაფუთ-და, ხეთეშე ვეგნობჭყვიდუნთ მუდგარენს. თეშ მანგიორო, ჯგირო დეფიფქრებუთ დო უკულ გეგნობჭყვიდუნთ, მუშ კეთება იჸუაფ არძაშ უჯგუშ. მაგალთო, სამუშას ქობგორუნთ-და, შილებე ქიგებდირთათ ცდუნებაშ წოხოლე — დევეთანხმათ თი სამუშას, ნამდგას პირველო შემოფთავაზენა. მომთმენეფ ქიპჸუაფუთ-და, დროს გეგმურთუნთ დაფიქრებას. მაგალთო, სო დო მუსხი ხანს მაჸინა ომუშებელ დო მუჭო იმოქმედენს თე სამუშა ოჯახ დო იეჰოვაწკუმა ჩქინ ურთიერთობაშა. ვეფჩქარენთ დო მოთვინებას გეგმიფრჩქინანთ-და, დუდის ეუჩილითუანთ გლახა გადაწყვეტილებაშ მეღებას. w23.08 22 ¶8, 9

არასწორ სურვილეფწკუმა ბრძოლაშ დროს შილებე გურქ გოიტირხას. თიმწკუმა იეჰოვაშა მეჩამილ პირობაშ გოშინა მიგეხვარებ ებრძოლე თეცალ სურვილეფს. მუჭო? მუჟამსით დუდის უძღვინენთ იეჰოვას, ვარიას იფჩიებუთ ჩქინ დუდშე, მუთ ნიშნენს, ვარია თქუე სქან სურვილეფშე დო მიზნეფშე, ნამუთ ვა მოწონს იეჰოვას (მათ. 16:24). თაშ ნამდა, მუჟამსით გამოცდაშ წოხოლე გერექ, ოფიქრებელ ვა გაფჷ, მუჭო მიქცუე; სი უკვე გინოჭყვიდ, ირნერ სიტუაციას იეჰოვას გუხარე გურ დო თინა აკეთე, მუთ თიშ ართგურო დოსქილადას მიგეხვარებ. თეშნერო, იობცალო, ნამდგაქ მანგარ დიდ განსაცდელეფ გინიღ, სი ხოლო იჩიებუქ: „ვა უღალატენქ ღორონთის!“ (იობ. 27:5). w24.03 9 ¶6, 7

ჸოროფაშ ღორონთ, იეჰოვა, ჩქინწკუმა რე (2 კორ. 13:11). იეჰოვა ჩქინდე თითოულით პირადო რე დაინტერესებულ დო შემლებუნა ბჯერდან, ნამდა თიშ ჸოროფა ფთხილანა (ფსალმ. 32:10). მუთ უმოსის ფიფქრენთ თიშ გიმორჩქინელ ჸოროფაშე, თით უმოს რეალურ პიროვნებათ გინირთუ იეჰოვა ჩქინო დო უმოსო ვეახლოებუთ. თენა მოხვარუნა, თავისფალო დურაგადუათ ლოცვას დო ქუწუათ, მუჭო მოსაჭირუნა თიშ ჸოროფა. შემლებუნა თავისფალო ვეჩუათ ჩქინ ოწუხებელშენ, მუშენდა ბჯერა, ნამდა ბოლოშა არჩქილე ჩქინ დო აუცილებერო ქიმმეხვარებუნა (ფსალმ. 145:19). მუჭოთ ჩხურუშ დროს დაჩხირიშ სიტიბა მოჰამუნა, თეშნერო, იეჰოვაშ ჸოროფა უჰამუანს ჩქინ გურს, მუჟამსით სირთულეეფ მიღუნა. იეჰოვაშ ძალიერ ჸოროფა გურშა ემქექუანა დო დუდის მშვიდას მოგინაფუანა. თაშ ნამდა, ბედნერეფ ოკო ვორდათ, მუშენდა იეჰოვას უჸორთ. ათეშენ მორთჷ, თიშ ჸოროფას ფსალმუნმაბირეშ სიტყვეფით ქუპასუხათ: „მიჸორს იეჰოვა“! (ფსალმ. 116:1). w24.01 31 ¶19, 20

იესო ხვალე თის ვა ურაგადუდ ადამიანეფს, ღორონთის იეჰოვა ჯოხონია; ებრაელეფს თეშით უჩქუდეს ღორონთიშ სახელ. იესოქ არძაშ უჯგუშო ეუნწყჷ ადამიანეფს, მუნერ პიროვნება რდჷ იეჰოვა (იოან. 1:17, 18). მაგალთო, ებრაულ წერილეფს ჭარუდ, ნამდა იეჰოვა მოჭყოლოფე დო გაჭირებაშ გურშა მიმაღალარ ღორონთ რე (გამ. 34:5—7). მარა იეჰოვაშ თე თვისებეფქ ხოლო უმოს არგამათ ქიძირ იესოშ მოჸუნაფილ იგავშე შარას ეჩილათირ სქუაშ გურშენ. მუჭოთ თე იგავშე ბგებულენთ, მუჟამსით მუმაქ შორშე თოლ ქუმუკინდუ ჸუდეშა დორთელ სქუას, ნამუთ ნარღენდჷ მუშ საქციელს, ირულ, გურშა ქიხუტოლუ, გოჯუნ დო მთელ გურით ქაპატუ თის. მუმაშ საქციელ მოხვარუნა, უჯგუშო ქენვანჭათ, მუნერ მოჭყოლოფე რე იეჰოვა დო მუნერო შეულებ მიშართას შხვაშ მდგომარეობაშა (ლუკ. 15:11—32). არგამა რე, იესოქ ქიმეხვარ შხვეფს თიშ ძირაფას, მუნერ პიროვნება რე იეჰოვა. w24.02 10 ¶8, 9

იეჰოვა გურშა ეუქექუანს დო ამანგარენს თი პიროვნებას მიდგას ოწუხებელ უღჷ. მუჭო შემლებნა მივაჸუნათ იეჰოვაშ მაგალითის? ართ-ართ საშვალება, მუდგათ შემლებნა გურშა მიბღათ შხვეფიშ გაჭირება დო ეუქექუათ თინეფს, თინა რე, ნამდა გუვავითარათ თვისებეფ, ნამუთ მანგარ ხოლოს რე გურიშ ექექაფაწკუმა. მორთ ასე ქიფჩუათ ნამთინე თე თვისებაშენ. მუ მიმეხვარებნა, ირდღას ჸოროფათ ეუქექუათ გურშა შხვეფს? (1 თეს. 4:18). თეშო საჭირო რე, გუვავითარათ თიცალ ძვირფას თვისებეფ, მუნერით რე ჯიმალურ ჸოროფა დო სიკეთე (კოლ. 3:12; 1 პეტ. 3:8). მუჭო მიმეხვარებნა თე თვისებეფ? მუჟამსით შხვეფიშ გაჭირებაშ გურშა მეღალა დო თიწკუმა დაკავშირებულ თვისებეფ ჩქინ პიროვნებაშ ნაწილო გინმირთუ, ძალიერ სურვილ მიღნა, ირნერო ქიმვეხვარათ დო ქელუდირთათ თინეფს, მით იტანჯებნა. მუჭოთ იესოქ თქუ: „ჯგირ კოჩ ჯგირს იჩიებ, მუშენდა თიშ გურ ჯგირით რე ეფშა“ (მათ. 12:34, 35). თაშ ნამდა, საჭირო დროს და დო ჯიმალეფშა გურიშექექაფა ჸოროფაშ გიმოხანტუაშ ართ-ართ მნიშვნელოვან საშვალება რე. w23.11 10 ¶10, 11

ქუმოკონა ბიბლიურ წინასწარმეტყველებეფს ქინვანჭათ-და, საჭირო რე, ქიფთხუათ მოხვარა. ქიმიპჸუნათ თეცალ მაგალით. წერმიდგინით, ნამდა თიცალ ადგილს რეთჷ, სოდეთ აიშახ დღას ვა ჸოფეთ ნარინა. მარა თქვანწკუმა ართო თიცალ მეგობარ რე, მით თექიანობას ჯგირო იჩინენს დო ზუსტას უჩქჷ, სო რეთჷ დო სოიშახ მეიჸუნანა თითოულ შარა. მუშო ოკო რაგად, გოხიოლდან იჸი, ნამდა თინა თქვანწკუმა რე. იეჰოვა ხოლო თე მეგობარცალ რე. თის ჯგირო უჩქჷ, მუ დროს ფცხოვრენთ დო მუ მელნა წოხოლე. თაშ ნამდა, ბიბლიურ წინასწარმეტყველებეფს ქინვანჭათინ, თანდაბლურო ოკო ფთხუათ იეჰოვას მოხვარა (დან. 2:28; 2 პეტ. 1:19, 20). ჯგირ დო მოჸოროფე მშობელცალო, იეჰოვას ხოლო ოკო მუშ სქუალეფს ბედნერ მომავალ უღუდან (იერ. 29:11). მარა ადამიანეფიშ გინაწონს, იეჰოვას შეულებ მომავალ ქიწინასწარმეტყველას დო თე ირფელქ ზუსტას შისრულას. თიქ ბიბლიაშ მაჭარალეფს მუშ სიტყვას წინასწარმეტყველებეფ ინაჭარაფუ, ნამდა მიჩქუდესკო თი მოვლენეფიშ გურშენ, ნამუთ მომავალს მოხვადუ. w23.08 8 ¶3, 4