LẸ́TÀ JÉMÍÌSÌ

1 Jémíìsì,+ ẹrú Ọlọ́run àti ti Jésù Kristi Olúwa, sí ẹ̀yà méjìlá (12) tó wà káàkiri:

Mo kí yín!

2 Ẹ̀yin ará mi, tí oríṣiríṣi àdánwò bá dé bá yín, ẹ ka gbogbo rẹ̀ sí ayọ̀,+ 3 kí ẹ mọ̀ pé ìgbàgbọ́ yín tí a dán wò ní ti bó ṣe jẹ́ ojúlówó tó máa mú kí ẹ ní ìfaradà.+ 4 Àmọ́ ẹ jẹ́ kí ìfaradà ṣe iṣẹ́ rẹ̀ láṣeparí, kí ẹ lè pé pérépéré, kí ẹ sì máa ṣe ohun tó tọ́ nínú ohun gbogbo, láìkù síbì kan.+

5 Torí náà, tí ẹnikẹ́ni nínú yín ò bá ní ọgbọ́n, kó máa béèrè lọ́wọ́ Ọlọ́run,+ ó sì máa fún un,+ torí ó lawọ́ sí gbogbo èèyàn, kì í sì í pẹ̀gàn*+ tó bá ń fúnni. 6 Àmọ́ kó máa fi ìgbàgbọ́ béèrè,+ kó má ṣiyèméjì rárá,+ torí ẹni tó ń ṣiyèméjì dà bí ìgbì òkun tí atẹ́gùn ń fẹ́ káàkiri. 7 Kódà, kí ẹni náà má rò pé òun máa rí ohunkóhun gbà lọ́dọ̀ Jèhófà;* 8 aláìnípinnu ni onítọ̀hún,+ kò sì dúró sójú kan ní gbogbo ọ̀nà rẹ̀.

9 Àmọ́ kí arákùnrin tó rẹlẹ̀ máa yọ̀* torí a gbé e ga,+ 10 àti ọlọ́rọ̀ torí a ti rẹ̀ ẹ́ sílẹ̀,+ torí ó máa kọjá lọ bí òdòdó inú pápá. 11 Bí oòrùn ṣe máa ń mú ooru tó ń jóni jáde tó bá yọ, tó sì máa mú kí ewéko rọ, tí òdòdó rẹ̀ á já bọ́, tí ẹwà rẹ̀ tó tàn sì máa ṣègbé, bẹ́ẹ̀ náà ni ọlọ́rọ̀ máa pa rẹ́ bó ṣe ń lépa ọrọ̀.+

12 Aláyọ̀ ni ẹni tó ń fara da àdánwò,+ torí tó bá rí ìtẹ́wọ́gbà, ó máa gba adé ìyè,+ tí Jèhófà* ṣèlérí pé òun máa fún àwọn tí ò yéé nífẹ̀ẹ́ Rẹ̀.+ 13 Tí àdánwò bá dé bá ẹnikẹ́ni, kó má ṣe sọ pé: “Ọlọ́run ló ń dán mi wò.” Torí a ò lè fi ibi dán Ọlọ́run wò, òun náà kì í sì í dán ẹnikẹ́ni wò. 14 Àmọ́ àdánwò máa ń dé bá kálukú nígbà tí ìfẹ́ ọkàn rẹ̀ bá fà á mọ́ra, tó sì tàn án jẹ.*+ 15 Tí ìfẹ́ ọkàn náà bá ti gbilẹ̀,* ó máa bí ẹ̀ṣẹ̀; tí ẹ̀ṣẹ̀ náà bá sì ti wáyé, ó máa yọrí sí ikú.+

16 Ẹ̀yin ará mi ọ̀wọ́n, ẹ má ṣe jẹ́ kí ẹnikẹ́ni ṣì yín lọ́nà. 17 Gbogbo ẹ̀bùn rere àti gbogbo ọrẹ pípé wá láti òkè,+ ó ń wá látọ̀dọ̀ Baba àwọn ìmọ́lẹ̀ àtọ̀runwá,+ ẹni tí kì í yí pa dà, tí kì í sì í sún kiri bí òjìji.*+ 18 Ìfẹ́ rẹ̀ ni pé kó fi ọ̀rọ̀ òtítọ́ mú wa wá,+ ká lè di oríṣi àkọ́so kan nínú àwọn ohun tó dá.+

19 Ẹ̀yin ará mi ọ̀wọ́n, ẹ mọ èyí: Ó yẹ kí gbogbo èèyàn yára láti gbọ́rọ̀, kí wọ́n lọ́ra láti sọ̀rọ̀,+ kí wọ́n má sì tètè máa bínú,+ 20 torí ìbínú èèyàn kì í mú òdodo Ọlọ́run wá.+ 21 Torí náà, ẹ mú gbogbo èérí àti gbogbo ohun tó jẹ mọ́ ìwà burúkú* kúrò,+ kí ìwà tútù yín sì mú kí ọ̀rọ̀ tó lè gbà yín là* fìdí múlẹ̀ nínú yín.

22 Àmọ́, ẹ máa ṣe ohun tí ọ̀rọ̀ náà sọ,+ ẹ má kàn máa gbọ́ ọ lásán, kí ẹ wá máa fi èrò èké tan ara yín jẹ. 23 Torí tí ẹnikẹ́ni bá ń gbọ́ ọ̀rọ̀ náà, àmọ́ tí kò ṣe é,+ ẹni yìí dà bí èèyàn tó ń wo ojú ara rẹ̀* nínú dígí. 24 Torí ó wo ara rẹ̀, ó lọ, ó sì gbàgbé irú ẹni tí òun jẹ́ lẹ́sẹ̀kẹsẹ̀. 25 Àmọ́ ẹni tó bá ń fara balẹ̀ wo inú òfin pípé+ tó jẹ́ ti òmìnira, tí kò sì yéé wò ó, kì í ṣe olùgbọ́ tó ń gbàgbé, àmọ́ ó ti di olùṣe iṣẹ́ náà; ohun tó ń ṣe á sì máa múnú rẹ̀ dùn.+

26 Tí ẹnikẹ́ni bá rò pé òun ń jọ́sìn Ọlọ́run,* àmọ́ tí kò ṣọ́ ahọ́n rẹ̀ gidigidi,*+ ṣe ló ń tan ọkàn ara rẹ̀ jẹ, asán sì ni ìjọsìn rẹ̀. 27 Ìjọsìn* tó mọ́, tí kò sì ní ẹ̀gbin lójú Ọlọ́run àti Baba wa nìyí: láti máa bójú tó àwọn ọmọ aláìlóbìí+ àti àwọn opó+ nínú ìpọ́njú wọn,+ ká sì máa pa ara wa mọ́ láìní àbààwọ́n nínú ayé.+

2 Ẹ̀yin ará mi, bí ẹ ṣe di ìgbàgbọ́ Jésù Kristi, Olúwa wa ológo mú, ṣé kì í ṣe pé ẹ tún ń ṣe ojúsàájú?+ 2 Tí ẹnì kan bá wá sí ìpàdé yín, tó wọ àwọn òrùka wúrà sí ìka rẹ̀, tó sì wọ aṣọ tó dáa gan-an, àmọ́ tí tálákà kan tó wọ aṣọ tó dọ̀tí náà wọlé wá, 3 ṣé ẹ máa fi ojúure wo ẹni tó wọ aṣọ tó dáa gan-an, tí ẹ máa sọ pé, “Jókòó síbi tó dáa yìí,” tí ẹ sì máa wá sọ fún tálákà náà pé, “Ìwọ wà lórí ìdúró” tàbí, “Jókòó síbẹ̀ yẹn lábẹ́ àpótí ìtìsẹ̀ mi”?+ 4 Tí ẹ bá ń ṣe bẹ́ẹ̀, ṣé kì í ṣe pé kẹ́lẹ́gbẹ́mẹgbẹ́ ti wà láàárín yín nìyẹn,+ tí ẹ sì ti di adájọ́ tó ń dá ẹjọ́ burúkú?+

5 Ẹ fetí sílẹ̀, ẹ̀yin ará mi ọ̀wọ́n. Ṣebí àwọn tí aráyé kà sí tálákà ni Ọlọ́run yàn pé kí wọ́n jẹ́ ọlọ́rọ̀ nínú ìgbàgbọ́+ àti ajogún Ìjọba náà, èyí tó ṣèlérí fún àwọn tó nífẹ̀ẹ́ rẹ̀?+ 6 Síbẹ̀, ẹ ti tàbùkù sí tálákà. Ṣebí àwọn ọlọ́rọ̀ ló ń ni yín lára,+ tí wọ́n sì ń fà yín lọ sí ilé ẹjọ́? 7 Ṣebí wọ́n máa ń sọ̀rọ̀ òdì sí orúkọ rere tí ẹ̀ ń jẹ́? 8 Tí ẹ bá ń mú ọba òfin ṣẹ bó ṣe wà nínú ìwé mímọ́ pé, “Kí o nífẹ̀ẹ́ ọmọnìkejì rẹ bí ara rẹ,”+ ẹ̀ ń ṣe dáadáa gan-an ni. 9 Àmọ́ tí ẹ bá ṣì ń ṣe ojúsàájú,+ ẹ̀ṣẹ̀ lẹ̀ ń dá, òfin sì ti dá yín lẹ́bi* pé ẹlẹ́ṣẹ̀ ni yín.+

10 Torí tí ẹnikẹ́ni bá ń pa gbogbo Òfin mọ́ àmọ́ tó ṣi ẹsẹ̀ gbé nínú ọ̀kan, ó ti rú gbogbo òfin.+ 11 Torí ẹni tó sọ pé, “O ò gbọ́dọ̀ ṣe àgbèrè,”+ ló tún sọ pé, “O ò gbọ́dọ̀ pààyàn.”+ Nígbà náà, tí o ò bá ṣe àgbèrè àmọ́ tí o pààyàn, o ti di arúfin. 12 Ẹ máa sọ̀rọ̀ kí ẹ sì máa hùwà bí àwọn tí a máa fi òfin àwọn tó wà lómìnira* dá lẹ́jọ́.+ 13 Torí ẹni tí kì í ṣàánú kò ní rí àánú gbà nígbà ìdájọ́.+ Àánú máa ń borí ìdájọ́.

14 Ẹ̀yin ará mi, kí ni àǹfààní rẹ̀, tí ẹnì kan bá sọ pé òun ní ìgbàgbọ́ àmọ́ tí kò ní àwọn iṣẹ́?+ Ìgbàgbọ́ yẹn ò lè gbà á là, àbí ó lè gbà á?+ 15 Tí arákùnrin tàbí arábìnrin èyíkéyìí ò bá láṣọ,* tí wọn ò sì ní oúnjẹ tó máa tó wọn jẹ lóòjọ́, 16 síbẹ̀ tí ẹnì kan nínú yín sọ fún wọn pé, “Ẹ máa lọ ní àlàáfíà; kí ẹ rí aṣọ fi bora, kí ẹ sì yó dáadáa,” àmọ́ tí ẹ ò fún wọn ní ohun tí ara wọn nílò, àǹfààní kí ló jẹ́?+ 17 Bákan náà, ìgbàgbọ́ nìkan láìsí àwọn iṣẹ́ jẹ́ òkú.+

18 Àmọ́ ẹnì kan lè sọ pé: “Ìwọ́ ní ìgbàgbọ́, èmí sì ní àwọn iṣẹ́. Fi ìgbàgbọ́ rẹ hàn mí láìsí àwọn iṣẹ́, màá sì fi ìgbàgbọ́ mi hàn ọ́ nípa àwọn iṣẹ́ mi.” 19 O gbà pé Ọlọ́run kan ló wà, àbí? O ṣe dáadáa gan-an ni. Àwọn ẹ̀mí èṣù pàápàá gbà, jìnnìjìnnì sì bò wọ́n.+ 20 Àmọ́ ṣé o tiẹ̀ mọ̀ pé ìgbàgbọ́ kò wúlò láìsí iṣẹ́, ìwọ èèyàn lásánlàsàn? 21 Ṣebí a ka Ábúráhámù bàbá wa sí olódodo nípa àwọn iṣẹ́ lẹ́yìn tó mú Ísákì ọmọ rẹ̀ lọ sórí pẹpẹ?+ 22 Ẹ rí i pé ìgbàgbọ́ rẹ̀ hàn kedere nínú àwọn iṣẹ́ rẹ̀, àwọn iṣẹ́ rẹ̀ sì sọ ìgbàgbọ́ rẹ̀ di pípé,+ 23 a sì mú ìwé mímọ́ náà ṣẹ tó sọ pé: “Ábúráhámù ní ìgbàgbọ́ nínú Jèhófà,* a sì kà á sí òdodo fún un,”+ a sì wá ń pè é ní ọ̀rẹ́ Jèhófà.*+

24 Ṣé ẹ wá rí i pé àwọn iṣẹ́ la fi ń ka èèyàn sí olódodo, kì í ṣe ìgbàgbọ́ nìkan. 25 Bákan náà, ṣebí àwọn iṣẹ́ ló mú kí á ka Ráhábù aṣẹ́wó pẹ̀lú sí olódodo, lẹ́yìn tó gba àwọn òjíṣẹ́ lálejò, tó sì ní kí wọ́n gba ọ̀nà míì jáde?+ 26 Lóòótọ́, bí ara láìsí ẹ̀mí* ṣe jẹ́ òkú,+ bẹ́ẹ̀ ni ìgbàgbọ́ láìsí àwọn iṣẹ́ jẹ́ òkú.+

3 Ẹ̀yin arákùnrin mi, kí púpọ̀ nínú yín má ṣe di olùkọ́, torí ẹ mọ̀ pé a máa gba ìdájọ́ tó wúwo* jù.+ 2 Nítorí gbogbo wa ni a máa ń kọsẹ̀* lọ́pọ̀ ìgbà.+ Tí ẹnì kan kì í bá ṣi ọ̀rọ̀ sọ, á jẹ́ pé ẹni pípé ni, ó sì lè kó gbogbo ara rẹ̀ níjàánu. 3 Tí a bá fi ìjánu sí ẹnu àwọn ẹṣin kí wọ́n lè ṣègbọràn sí wa, gbogbo ara wọn là ń darí pẹ̀lú. 4 Ẹ tún wo àwọn ọkọ̀ òkun: Bó tiẹ̀ jẹ́ pé wọ́n tóbi gan-an, tí atẹ́gùn tó le gan-an sì máa ń gbé wọn kiri, ìtọ́kọ̀ tó kéré gan-an la fi ń darí wọn síbi tí ẹni tó ń darí ọkọ̀ bá fẹ́ kó lọ.

5 Bẹ́ẹ̀ náà ni ahọ́n jẹ́ ẹ̀yà ara tó kéré, síbẹ̀ ó máa ń fọ́nnu gan-an. Ẹ wo bí iná tí kò tó nǹkan ṣe lè jó igbó kìjikìji run! 6 Bákan náà, ahọ́n jẹ́ iná.+ Ahọ́n dúró fún ayé àìṣòdodo lára àwọn ẹ̀yà ara wa, torí ó máa ń sọ gbogbo ara di aláìmọ́,+ ó sì máa ń dáná sí gbogbo ìgbésí ayé* ẹ̀dá, iná Gẹ̀hẹ́nà* á sì sun òun náà. 7 Torí àwọn èèyàn máa ń kápá gbogbo ẹran inú igbó àti ẹyẹ àti ẹran tó ń fàyà fà* àti ẹ̀dá inú òkun, wọ́n sì ti kápá wọn. 8 Àmọ́ kò sí èèyàn tó lè kápá ahọ́n. Aláìgbọràn ni, ó sì ń ṣeni léṣe, ó kún fún májèlé tó ń pani.+ 9 Òun la fi ń yin Jèhófà,* Baba wa, síbẹ̀ òun la tún fi ń gégùn-ún fún àwọn èèyàn tí a dá ní “àwòrán Ọlọ́run.”+ 10 Ẹnu kan náà tí èèyàn fi ń súre ló tún fi ń gégùn-ún.

Ẹ̀yin ará mi, kò yẹ kó máa rí bẹ́ẹ̀.+ 11 Omi tó ṣeé mu* àti omi tó korò kì í jáde láti orísun kan náà, àbí ó ń ṣe bẹ́ẹ̀? 12 Ẹ̀yin ará mi, igi ọ̀pọ̀tọ́ ò lè mú èso ólífì jáde tàbí kí àjàrà mú èso ọ̀pọ̀tọ́ jáde, àbí ó lè ṣe bẹ́ẹ̀?+ Bẹ́ẹ̀ ni omi iyọ̀ ò lè mú omi tó ṣeé mu jáde.

13 Ọlọ́gbọ́n àti olóye wo ló wà láàárín yín? Kó fi ìwà rere rẹ̀ hàn nínú bó ṣe ń fi ìwà tútù ṣe àwọn iṣẹ́ tó fi hàn pé ó gbọ́n. 14 Àmọ́ tí ẹ bá ń jowú gidigidi,+ tó sì ń wù yín láti máa fa ọ̀rọ̀,*+ ẹ má ṣe máa fọ́nnu,+ ẹ má sì máa parọ́ mọ́ òtítọ́. 15 Èyí kì í ṣe ọgbọ́n tó wá láti òkè; ti ayé ni,+ ti ẹranko àti ti ẹ̀mí èṣù. 16 Torí ibikíbi tí wọ́n bá ti ń jowú tí wọ́n sì ń fa ọ̀rọ̀,* ìdàrúdàpọ̀ àti gbogbo nǹkan burúkú máa ń wà níbẹ̀.+

17 Àmọ́, ọgbọ́n tó wá láti òkè á kọ́kọ́ jẹ́ mímọ́,+ lẹ́yìn náà, ó lẹ́mìí àlàáfíà,+ ó ń fòye báni lò,+ ó ṣe tán láti ṣègbọràn, ó máa ń ṣàánú gan-an, ó sì ń so èso rere,+ kì í ṣe ojúsàájú,+ kì í sì í ṣe àgàbàgebè.+ 18 Bákan náà, ibi tí àlàáfíà bá wà+ la máa ń gbin èso òdodo sí fún àwọn tó ń wá àlàáfíà.*+

4 Ibo ni ogun àti àwọn ìjà tó wà láàárín yín ti wá? Ṣebí inú ìfẹ́kúfẹ̀ẹ́ ara tó ń bá yín* fínra ló ti wá?+ 2 Ó ń wù yín, síbẹ̀ ẹ ò ní in. Ẹ̀ ń pààyàn, ẹ ò sì yéé ṣojúkòkòrò, síbẹ̀ ọwọ́ yín ò tẹ̀ ẹ́. Ẹ̀ ń jà, ẹ sì ń jagun.+ Ẹ ò ní torí pé ẹ ò béèrè. 3 Nígbà tí ẹ sì béèrè, ẹ ò rí gbà torí ohun tí kò dáa lẹ fẹ́ fi ṣe, ṣe lẹ fẹ́ lò ó fún ìfẹ́kúfẹ̀ẹ́ ara yín.

4 Ẹ̀yin alágbèrè,* ṣé ẹ ò mọ̀ pé bíbá ayé ṣọ̀rẹ́ ń sọni di ọ̀tá Ọlọ́run ni? Torí náà, ẹnikẹ́ni tó bá fẹ́ jẹ́ ọ̀rẹ́ ayé ń sọ ara rẹ̀ di ọ̀tá Ọlọ́run.+ 5 Àbí ẹ rò pé lásán ni ìwé mímọ́ sọ pé: “Ẹ̀mí tó ń gbé inú wa ń mú ká máa jowú ṣáá”?+ 6 Àmọ́ inú rere àìlẹ́tọ̀ọ́sí tí Ó ń fi hàn tóbi ju èyí lọ. Ìdí nìyẹn tí ìwé mímọ́ fi sọ pé: “Ọlọ́run dojú ìjà kọ àwọn agbéraga,+ àmọ́ ó ń fi inú rere àìlẹ́tọ̀ọ́sí hàn sí àwọn onírẹ̀lẹ̀.”+

7 Torí náà, ẹ fi ara yín sábẹ́ Ọlọ́run;+ àmọ́ ẹ dojú ìjà kọ Èṣù,+ ó sì máa sá kúrò lọ́dọ̀ yín.+ 8 Ẹ sún mọ́ Ọlọ́run, á sì sún mọ́ yín.+ Ẹ wẹ ọwọ́ yín mọ́, ẹ̀yin ẹlẹ́ṣẹ̀,+ kí ẹ sì wẹ ọkàn yín mọ́,+ ẹ̀yin aláìnípinnu. 9 Ẹ banú jẹ́, ẹ ṣọ̀fọ̀, kí ẹ sì sunkún.+ Kí ẹ̀rín yín di ọ̀fọ̀, kí ayọ̀ yín sì di ìbànújẹ́. 10 Ẹ rẹ ara yín sílẹ̀ ní ojú Jèhófà,*+ ó sì máa gbé yín ga.+

11 Ẹ̀yin ará, ẹ má sọ̀rọ̀ tí kò dáa nípa ara yín mọ́.+ Ẹnikẹ́ni tó bá ń sọ̀rọ̀ tí kò dáa nípa arákùnrin kan tàbí tó ń dá arákùnrin rẹ̀ lẹ́jọ́, ó ń sọ̀rọ̀ tí kò dáa nípa òfin, ó sì ń dá òfin lẹ́jọ́. Tí o bá wá ń dá òfin lẹ́jọ́, o ò pa òfin mọ́, kàkà bẹ́ẹ̀ onídàájọ́ ni ọ́. 12 Ẹnì kan ṣoṣo ni Afúnnilófin àti Onídàájọ́ wa,+ ẹni tó lè gbà là, tó sì lè pa run.+ Àmọ́ ìwọ, ta ni ọ́ tí o fi ń dá ọmọnìkejì rẹ lẹ́jọ́?+

13 Ẹ gbọ́, ẹ̀yin tí ẹ̀ ń sọ pé: “Lónìí tàbí lọ́la, a máa rìnrìn àjò lọ sí ìlú yìí, a máa lo ọdún kan níbẹ̀, a máa ṣòwò, a sì máa jèrè,”+ 14 bẹ́ẹ̀ sì rèé, ẹ ò mọ ohun tó máa ṣẹlẹ̀ sí yín lọ́la.+ Torí ìkùukùu ni yín, tó máa ń wà fúngbà díẹ̀, lẹ́yìn náà tí á pòórá.+ 15 Kàkà bẹ́ẹ̀, ó yẹ kí ẹ sọ pé: “Tí Jèhófà* bá fẹ́,+ a máa wà láàyè, a sì máa ṣe tibí tàbí tọ̀hún.” 16 Àmọ́ ẹ̀ ń gbéra ga, ẹ sì ń fọ́nnu. Gbogbo ìfọ́nnu bẹ́ẹ̀ burú. 17 Torí náà, tí ẹnì kan bá mọ bí a ṣe ń ṣe ohun tó tọ́, síbẹ̀ tí kò ṣe é, ẹ̀ṣẹ̀ ni.+

5 Ẹ gbọ́, ẹ̀yin ọlọ́rọ̀, ẹ sunkún, kí ẹ sì pohùn réré ẹkún torí ìbànújẹ́ tó máa bá yín.+ 2 Ọrọ̀ yín ti jẹrà, òólá* sì ti jẹ àwọn aṣọ yín.+ 3 Wúrà àti fàdákà yín ti dípẹtà, ìpẹtà wọn máa jẹ́ ẹ̀rí lòdì sí yín, ó sì máa jẹ ẹran ara yín. Ohun tí ẹ kó jọ máa dà bí iná ní àwọn ọjọ́ ìkẹyìn.+ 4 Wò ó! Owó iṣẹ́ tí ẹ ò san fún àwọn òṣìṣẹ́ tó kórè oko yín ń ké jáde ṣáá, igbe tí àwọn olùkórè ń ké fún ìrànwọ́ sì ti dé etí Jèhófà* Ọlọ́run àwọn ọmọ ogun.+ 5 Ẹ ti gbé ìgbé ayé gbẹdẹmukẹ, ẹ sì ti tẹ́ ara yín lọ́rùn ní ayé. Ẹ ti bọ́ ọkàn yín yó ní ọjọ́ pípa.+ 6 Ẹ ti dáni lẹ́bi; ẹ ti pa olódodo. Ṣebí ó ń ta kò yín?

7 Nítorí náà, ẹ̀yin ará, ẹ ní sùúrù, títí di ìgbà tí Olúwa máa wà níhìn-ín.+ Ẹ wò ó! Àgbẹ̀ máa ń dúró kí ilẹ̀ mú èso tó ṣeyebíye jáde, ó máa ń ní sùúrù títí òjò àkọ́rọ̀ àti òjò àrọ̀kẹ́yìn á fi rọ̀.+ 8 Kí ẹ̀yin náà ní sùúrù;+ ẹ mọ́kàn le, torí ìgbà tí Olúwa máa wà níhìn-ín ti sún mọ́lé.+

9 Ẹ̀yin ará, ẹ má ṣàríwísí* ara yín, kí a má bàa dá yín lẹ́jọ́.+ Ẹ wò ó! Onídàájọ́ ti wà lẹ́nu ilẹ̀kùn. 10 Ẹ̀yin ará, ẹ jẹ́ kí àwọn wòlíì tó sọ̀rọ̀ ní orúkọ Jèhófà*+ jẹ́ àpẹẹrẹ fún yín nínú jíjìyà ibi+ àti níní sùúrù.+ 11 Ẹ wò ó! A ka àwọn tó ní ìfaradà sí aláyọ̀.*+ Ẹ ti gbọ́ nípa ìfaradà Jóòbù,+ ẹ sì ti rí ibi tí Jèhófà* jẹ́ kó yọrí sí,+ pé Jèhófà* ní ìfẹ́ oníjẹ̀lẹ́ńkẹ́ tó pọ̀ gan-an,* ó sì jẹ́ aláàánú.+

12 Ju gbogbo rẹ̀ lọ ẹ̀yin ará mi, ẹ má ṣe búra mọ́, ì báà jẹ́ ọ̀run tàbí ayé lẹ fi búra tàbí ìbúra èyíkéyìí míì. Àmọ́ kí “Bẹ́ẹ̀ ni” yín jẹ́ bẹ́ẹ̀ ni, kí “Bẹ́ẹ̀ kọ́” yín sì jẹ́ bẹ́ẹ̀ kọ́,+ kí a má bàa dá yín lẹ́jọ́.

13 Ṣé ẹnikẹ́ni wà láàárín yín tí nǹkan nira fún? Kó má ṣe dákẹ́ àdúrà.+ Ṣé ẹnikẹ́ni wà láàárín yín tí inú rẹ̀ ń dùn? Kó máa kọ sáàmù.+ 14 Ṣé ẹnikẹ́ni ń ṣàìsàn láàárín yín? Kó pe àwọn alàgbà+ ìjọ, kí wọ́n gbàdúrà lé e lórí, kí wọ́n fi òróró pa á+ ní orúkọ Jèhófà.* 15 Àdúrà ìgbàgbọ́ sì máa mú aláìsàn náà* lára dá, Jèhófà* máa gbé e dìde. Tó bá sì ti dẹ́ṣẹ̀, a máa dárí jì í.

16 Nítorí náà, ẹ máa jẹ́wọ́ àwọn ẹ̀ṣẹ̀ yín+ fún ara yín láìfi ohunkóhun pa mọ́, kí ẹ sì máa gbàdúrà fún ara yín, ká lè mú yín lára dá. Ìrawọ́ ẹ̀bẹ̀ olódodo lágbára gan-an.*+ 17 Ẹni tó máa ń mọ nǹkan lára bíi tiwa ni Èlíjà, síbẹ̀, nígbà tó gbàdúrà taratara pé kí òjò má rọ̀, òjò ò rọ̀ sórí ilẹ̀ náà fún ọdún mẹ́ta àti oṣù mẹ́fà.+ 18 Ó tún gbàdúrà, òjò sì rọ̀ láti ọ̀run, ilẹ̀ wá mú èso jáde.+

19 Ẹ̀yin ará mi, tí a bá mú ẹnikẹ́ni láàárín yín ṣìnà kúrò nínú òtítọ́, tí ẹlòmíì sì yí i pa dà, 20 kí ẹ mọ̀ pé ẹni tó bá yí ẹlẹ́ṣẹ̀ pa dà kúrò nínú ìṣìnà+ rẹ̀ máa gbà á* lọ́wọ́ ikú, ó sì máa bo ọ̀pọ̀lọpọ̀ ẹ̀ṣẹ̀ mọ́lẹ̀.+