Nunga mambu momo malenda kukakidila mu yuku mu kimvuka kimona

WUME keta baluka kimvuka? Enati buawu, bulendakana mawu kikinina ziphova zi Jean-Charles, nioni tubidi ti: “Dikala diambu diphasi mu yuku mu kimvuka kimona, yo yawu thangu bue simbidila bukhati khati bu kipheve bu batu boso ba dikanda diaku.” Mu thangu baludi buangu kivuanda, bulendakana mawu tomba kisalu kimona, nzo yi vuanda, bulendakana sonikisa bana baku mu zinzo nkanda zimona, yuku mu klima yo yilenda ba yiviakana ayi ko bedi, yuku mu phila yi nzingulu ayi yuku mu zunga kimona kisadila kisalu ki tsamununu.

Nicolas ayi Céline badengana diambu diphasi diphila nkaka. Bakikinina kiyeko kioki Beteli yi France yibavana mu kuenda mu kimvuka kimona. Batubidi ti: “Bilumbu bitheti biba phasi, bila tueba yindulanga bakundi bo tubika. Tuisi tumu fika ba ko nguizani yingolo ayi bakhomba ba kimvuka kieto kimona.”a Mu tadila mambu maphasi momo meta kuiza ba ngeyo kuenda mu kimvuka kimona, bue wulenda yukulu? Mbi batu bankaka balenda tula mu diambu di bavana lusadusu? Mu phila mbi wulenda kindusulu ayi ngeyo phe bue wulenda kindisila kimvuka?

ZITSIKUDUKUSU ZIYA ZIOZI ZILENDA KUSADISA WUNUNGA DIAMBU BENI DIPHASI

Khomba mosi wunketo vundidi muingi katanga Bibila mu thangu kalembo sadi kisalu kitotula bima mu zikarto. — Tudila Yehova Ntima

1. Tudila Yehova ntima. (Nku. 37:5) Kazumi, ku Japon wutula 20 ki mimvu mu kimvuka kiandi ayi wuyiza botuka mu kimvuka beni mu thangu bavana nuni’andi mitasio. Mu phila mbi “kayekudila [nzil’andi] kuidi Yehova”? Tubidi ti: “Ndikamba Yehova mambu moso momo meba kuthatisanga bila tsisi ndieba monanga, ndieba kimonanga banga minu veka ndidi ayi ndieba kitatikisanga mu mayindu. Kadika khumbu yoyi ndieba kubutudilanga, niandi weba kuphananga zingolo ziozi ndiba phuila.”

Bue tulenda yonzudila kadulu kitudila Yehova ntima? Banga kuandi phila yoyi nti wukadila phuila yi nlangu ayi mbozi muingi wuyonzuka, minu kieto phe kifueti dikulu bumboti muingi kibaka bu yonzukila. Nicolas, nioni tutekidi tubilanga, wuyiza bakula ti yindudila mu buphinda kifuani ki Abalahami, ki Yesu, ayi ki Polo—ba bakala bobo bakiyimina mu mambu mawombo mu diambu di vanga luzolo lu Nzambi—kunkindisa kaluta tudila lusadusu lu Yehova ntima. Ba na programi yi kadika lumbu yindongokolo yi Bibila yi ngeyo veka, maku sadisa wununga mambu momo mabalukidi mu luzingu luaku ayi maku sadisa phe wubaka makaba ma kipheve momo wulenda kamba kuidi batu ba kimvuka kiaku kimona.

Nkulutu mosi wu kimvuka wulembo wa mintueni miodi mi bakhomba ba babakala bo balembo mmonisa phila yoyi beta sadila bisadulu bi odio ayi video mu Nzo yi Kipfumu. — Kadi dedikisa kimvuka kioki bedi ayi kimvuka kiaku kimona

2. Manga dedikisa kimvuka kiaku kimona ayi kimvuka kiaku kithama. (Mpo. 7:10) Jules wumona luviakunu lunneni lu nzingulu mu thangu kabotuka ku Benin mu kue zingila ku Etats-Unis. Bambukidi moyo ti: “Ndiba na phuila yi kamba nioso kuandi mutu nioni ndieba dengananga disolo di luzingu luama.” Bo kayiza bakula ti mambu ma luzingu luandi mo kayuku ti madi maviakana ayi momo kaye bata, wuyiza tona kitula va niandi veka mu kimvuka kiandi kimona. Kumanima, mu thangu kayiza zaba bumboti mboti bakhomba ba babakala ayi ba baketo, wuyiza balula mbueno’andi. Tubidi ti: “Ndieta wilukila ti koso kuandi kuma widi va mbata ntoto, batu phila mosi kuandi kaka bakadila. Zimbembo kuandi ayi phil’awu yivangila mambu biawu kuandi biviakini. Kikinina batu mu phila yoyi badidi, dikala diambu dimfunu.” Manga kifu ki dedikisa kimvuka kiaku kimona ayi kimvuka kiaku kithama. Anne-Lise nioni widi n’zibudi nzila tubidi ti: “Ndisi kuenda ko mu kimvuka kimona mu diambu di ndietombi mambu momo ndibika mu kimvuka kiama kithama. Ndiyenda mu kimvuka kimona muingi ndiebakula mambu mamona.”

Bakulutu phe bafueti kebila kifu kidedikisa kimvuka kiawu kithama ayi kimvuka kiawu kimona. Yisi ko ti phila yoyi bamvangila mambu bo yidi yiviakana ayi kimvuka kioki wuba, buna basi zaba ko diatisa mambu. Madi ba diambu dinduenga wuteka zaba phila yoyi mambu meta diatila mu kimvuka beni tuamina wuvana mayindu maku. (Mpo. 3:1, 7b) Bulutidi mboti wumonisa kifuani, va buangu kikuika mayindu maku mu kimvuka kiaku kimona.—2 Ko. 1:24.

Bakhomba buadi ba babakala balembo sukula nela mu Nzo yi Kipfumu. — Wukivani

3. Kukivana mu kimvuka kiaku kimona. (Flp. 1:27) Thangu yeta tombana ayi zingolo mu kue zingila kuma kunkaka, vayi didi diambu dimfunu mu kutakananga mu zikhukutukunu zi kimvuka—va kimosi ayi bakhomba zi kimvuka kiaku kimona—mu kondo viokisa bilumbu. Enati bakhomba zi kimvuka kiaku kimona bammonanga ko voti mu phasi beta kumuena, bue balenda kusadisila? Lucinda, nioni wuye zingila kumbanza yimosi yinenni ku Afrique du Sud ayi bana bandi buadi ba baketo, bambukidi moyo ti: “Baphana dilongi ti ndikivana buwombo mu kimvuka kiama kimona, ndibimanga mu kisalu ki tsamununu ayi bakhomba ba kimvuka beni, ayi ndivananga mimvutu mu zikhutukunu. Tubue vana phe nzo’eto muingi yitudulungu zikhutukunu zi kisalu ki tsamununu.”

“Sala mu kithuadi” mambu ma kimvuka ayi bakhoma ba babakala ayi ba baketo mu kimvuka kiaku kimona, maku sadisa wubaka lukindusu ayi ngeyo phe mawu baka diluaku di kindisila bakhomba. Anne-Lise, nioni tutekidi tubilanga, bankindisa kuidi bakulutu katomba bimanga mu kisalu ki tsamununu ayi mutu woso mu khati kimvuka. Mamboti mbi kabaka? Tubidi ti: “Diba diambu dimfunu diodi ditsadisa ndifika yuka mu kimvuka beni.” Mu buela, ngeyo kukivananga mu bisalu banga kombula voti sukula nzo yi Kipfumu, yawu mayi monisa ti wulembo tadila kimvuka kiaku kimona banga kimvuka kiaku. Bobuawu wunluta kivanina buwombo mu kimvuka beni, buawu phe bakhomba ba babakala ayi ba baketo bakuiza fika yukulu ayi ngeyo, ayi mawu mona ti bawu badi dikanda diaku.

Bakhomba buadi ba bakala ayi baketo bawu balembo yangalala mu thangu balembo dia va kimosi. — Tula bukundi bumona

4. Baka bakundi bamona. (2 Ko. 6:11-13) Tudila batu thalu yidi phila mosi yimboti yibakila bakundi, diawu bakanga thangu tuamina lukutukunu lutona ayi kumanima ma lukutukunu mu fikamanga batu bankaka ayi longuka kubazaba. Tula ngolo wuzaba mazina mawu. Ngeyo bambukilanga moyo mazina ma bakhomba ayi ngeyo banga zanti, yawu mayi tula ti bakhomba ba kimvuka kiaku kimona babika mona phasi mu kufikama ayi mayi tula phe lutula bukundi bumona ayi bumboti.

Vabuangu ki kukitatikisa mu diambu di bakikinina, wukizabikisa kuidi bakhomba ziaku ba babakala ayi ba baketo mu phila yoyi wididi. Tula banga phila butudila Lucinda, nioni tubidi ti: “Tuyika na bukundi bungolo bila tubaka diyindu di kubatedisa ku nzo’eto.”

“LUKIYAKULANGA BENO NA BENO”

Batu bankaka beta mona tsisi kota mu Nzo yi Kipfumu yoyi yiwedi na batu bobo bakambulu zaba. Bue busadisila batu bamona bo bizidi mu kimvuka kiaku? Thumu Polo wukindisa ti “Lukiyakulanga beno na beno banga phila Kristu kaluyakudila.” (Lom. 15:7) Mu sokudila Kristu, bakulutu balenda sadisa batu bamona mu kimvuka bakimona ti ba bayembi bumboti. (Tala en ankadre “Mbi bilenda kusadisa wununga baluka kimvuka mu phila yimboti.”) Diawu, mutu woso, buba bana balezi, kalenda sadisa batu bamona bafika yuku mu khati kimvuka.

Mbi bilenda kusadisa wununga baluka kimvuka mu phila yimboti

Diambu diodi wufueti vanga: Wukisoludila bumboti mboti na bakulutu ba kimvuka kioki widi, ayi bakulutu ba kimvuka kioki tidi kuenda, mu kubakamba dati yoyi tidi kuendila mu kimvuka beni ayi kubavana adressi yi buangu kio wukuiza vuandanga ayi kubavana numero yaku. Ba sikididi ti zebi buangu kioki kikala nzo yi Kipfumu yi kimvuka kioki tidi kuenda ayi zithangu zi lukutukunu. Mu lukutukunu luaku lutheti, wukizabikisa kuidi bakulutu ayi kuidi batu bankaka ba kimvuka beni.

Mbi bakulutu bafueti tula: Sekretere yi kimvuka kioki bedi, kafueti tinda mu kimvuka kioki weka nkuenda mu kondo viokisa thangu nkanda wu mambu momo matadidi ayi fishe yaku yi kisalu ki tsamununu. Komite yi kisalu yi kimvuka kioki wedi, yifueti kukotisa mu nsualu woso mu grupi yi kisalu ki tsamununu. Madi ba diambu dimboti ntuadisi yi grupi yi kisalu ki tsamununu katula visiti kuidi minsamuni mimona miomi mizidi mu kimvuka.

Yakula batu bankaka kidi kadulu kiyamba banzenza, vayi yilenda tombana phe tuvana lusadusu lo lufueni. Khomba mosi wunketo, mu kifuani, wuvana thangu’andi yimfunu wombo mu diambu di sadisa khomba mosi wumona nio wuyiza mu kimvuka kiawu mu kummonisa buala buawu ayi mu kunsadisa kazaba bue bukadila takisi (Transport) ku buala beni. Diambu diodi khomb’eto wu nketo katula disimba ntima wu khomba beni ayi dinsadisa kafika yuku.

DILUAKU DI YONZUKILA

Bo buawu dikonki dilembo yonzukila, buawu dieta yubudila zikhumbu ziwombo tuamina mavavi mandi matona dumuka. Bobuawu phe, mu thangu mebaluka kimvuka, wufueti botula tsisi yoso yoyi yikukakidila wubika sala kisalu ki Yehova. Nicolas ayi Céline bakikinini ti: “Baluka kimvuka yidi formasio yimboti. Yuku batu bamona ayi bibuangu biviakana, kueta kutukindisa tuyonzula bikadulu bimona.” Jean-Charles, nio tuketidi tubilanga vathonono, tubidi phila yoyi dikanda diandi dibakila mamboti mu diambu beni: “Mu kimvuka kieto kimona, bana beto bame luta yonzuka mu kipheve ayi bame luta fikama kuidi Yehova. Kumanima ma mua zingondi kuandi, muan’eto wunketo wuyiza tona tula zidevuare mu zikhutukunu zikhati tsika sabala ayi muan’eto wubakala wuyiza ba nsamuni nioni ka kabeki ko mbotama.”

Mu kifuani, mbi wulenda tula enati nzingulu’aku yilembo kakidila mu kue buedi mioko kuma koko kuidi phuila yi minsamuni? Wulenda luta kukivana buwombo mu kimvuka kiaku mu luta sadila mambu momo batumonisini mu disolo diadi? Tudila Yehova ntima, wukivani buwombo mu mambu ma kimvuka mu baka zikhubukulu zisala kisalu ki tsamununu ayi batu bankaka, ayi tula kikundi kuidi batu bobo kababedi ko bakundi baku voti luta yonzula bukundi ayi batu bobo bakala bakundi baku. Wulenda baka diyindu divana lusadusu lufuana kuidi batu bamona bo bankuiza mu kimvuka kiaku voti bobo badi mu phuila? Bo luzolo kidi dimbu kioki kieta monika kuidi Bakristu bakiedika, mu kondo finda phaka luawu malu sadisa mu ndionzukulu’aku yi kipheve. (Yow. 13:35) Wulenda ba sikididi ti “makaba maphila yoyi mawu mammonisanga Nzambi khini.”—Ebe. 13:16.

Kadiambu ko zithatukusu ziwombo, bakristu bawombo banunga kuenda mu kimvuka kimona—ngeyo phe wulenda kubutudila! Anne-Lise sudikisidi ti: “Baluka kimvuka kutsadisa ndiluta zibuka.” Kazumi wuyika kikinina ti: “Baluka kimvuka kulenda tula ti tumona lusadusu lu Yehova mu phila yoyi ka tutekidi bumuena ko.” Ayi Jules bue kakimuena mu thangu kabaluka kimvuka? Tubidi ti: “Tula bukundi bumona ayi batu bo ndiye bata mu kimvuka, kutsadisa ndikimona banga kuawu kuandi ndikala tona thama. Mu lumbu kiphila yayi, ndiyika kimoni pfika pfika ayi kimvuka kiama ayi phasi ndilenda mona mu bue kubotuka.”

a Mawu baka mayindu mankaka mu disolo “Lolenge ya kolónga mposa ya kozonga na mboka kati na mosala ya Nzambe” mu Nzo yi Nkengidi wu 15 Mai 1994, mu dingala.