Minsamu mimbote mbi mitadidi mabundu e?

1. Mabundu moso madi makiedika e?

Mu mabundu moso, batu ba ntima mbote badi. Nsambu mbote widi ti Nzambi weta bamona ayi wukukibanzanga mu diambu diawu. Vayi diambu di kiadi, tona thama, beta sadila mabundu muvanga mambu mambimbi. (2 Kolinto 4:3, 4; 11:13-15) Zilapolo zimimuangisi tsangu zimonisa ti mabundu mankaka meta kota mu mambu matsisi ma terorisme, mu vonda batu ba dikanda dimosi, mimvita, ayi sangisa zinyitu ayi bana bafioti ayi kubabebisa. Mambu momo meta vana kiadi kiwombo kudi batu beta kuikila Nzambi mu ntima wumvimba!​—Tanga Matayi 24:3-5, 11, 12.

Dibundu dikiedika dieta yayisa Nzambi, vayi mabundu ma luvunu meta fingisa dizina diandi. Mabundu beni ma luvunu malonganga ko zingindu zi Bibila banga malongi ma luvunu mu Nzambi ayi mu batu bo bafua. Vayi Yehova katidi batu bazaba kiedika mu diambu diandi.​—Tanga Yehezekeli 18:4; 1 Timoteo 2:3-5.

2. Minsamu mimbote mbi mitadidi mabundu e?

Diambu dikiese didi ti, Nzambi kavunanga ko mu mabundu momo meta tuba ti beta kunzola koso beta zola kuawu nza yayi yi Satana. (Yakobi 4:4) Bibila kieta tedila mabundu moso ma luvunu “Babiloni dia Dinene.” Babiloni yiba mbanza mosi mu thangu yi thama kutonina lusambulu lu luvunu va nima Khuka nlangu mu mbandu Noa. Fioti kuandi fisiedi, Nzambi makasukisa mabundu moso meta vuna batu ayi meta vanga batu phasi.​—Tanga Tsongolo 17:1, 2, 5, 16, 17; 18:8.

Nsamu wunkaka wumbote widi: Yehova kasi zimbakana ko batu bo badi ntima mbote bo bakidi mu mabundu ma luvunu mu nza yamvimba. Wulembu kuba kupikisa mu phila kalembu balongila kiedika.​—Tanga Mika 4:2, 5.

3. Batu ba ntima mbote mbi bafueti tula?

Yehova weta kukibanza mu diambu di batu bo banzolanga kiedika ayi mambu mambote. Wulembu kuba tombi batotuka mu mabundu ma luvunu. Mutu nio weta zola Nzambi weta kikinina baluka mu kunyangindika.​—Tanga Tsongolo 18:4.

Mu thangu baklisto batheti, thangu batu bo baba ntima mboti bawa nsamu wumbote kudi zintumua, bakikinina mawu mu kiese. Yehova wubalonga phila yimona yituadisila luzingu luawu, luzingu lumosi lu kiese, lo luidi mfunu ayi vuvu. Badi bifuani bietu bimbote, bila bakikinini nsamu wumbote muphila batudila Yehova vabuangu kithete mu luzingu luawu.​—Tanga 1 Tesalonika 1:8, 9; 2:13.

Mu dikanda di minsambidi miandi, Yehova wulembo yambi batu boso babika mabundu ma luvunu. Ti kikinini fikama ku Yehova, ma wuba nkundi andi, ma wukota mu dikanda dimona di minsambidi mi Yehova bo betazolana, ayi wela baka moyo wu mvu ka mvu.​—Tanga Malako 10:29, 30; 2 Kolinto 6:17, 18.

4. Bue Nzambi kela vanina batu ba makanda moso kiese?

Widi nsamu wumbote mu zaba ti fioti fisiedi, Nzambi makasambisa mabundu ma luvunu. Yawu yela manisa ziphasi zioso mu nza yimvimba. Mabundu ma luvunu mela lembu vuna batu nzila ayi mela lembu kubavasa. Batu boso bela kupama mu sambila Nzambi mosi kaka yikiedika.​—Tanga Tsongolo 18:20, 21; 21:3, 4.