Angapa Yerusarema

MO BINGO gu sunge namanga ane re. AYisaraere nadua angapa nga ga Yerusarema. Ho Bakindo Nebukadenesara agbarasi Yerusarema ni agarã 152 kusayo ti gi regbo re, ko akuadi angapa nga ga Yerusarema ki zo gu bakporo re kusayo. AYisaraere aaduanga agu angapa re berewe ho i ayego ni Babera yo te.

Ya mo agu aboro re aagundenga wa i araki tipa badungu agarã zanga angapa patiyo te? Nirengo, i aagunde agunde. Avurayo arengbe ka zubo yo ni kina ipo. Ono gi kumba nga Nemaya re naundo aboro awere i dua agu angapa re kubaha. Ya mo mo ini da nangia Nemaya?

Nemaya angia ngbatunga Yisaraere naye rogo gu bakporo nga Susana, yo aMorudekai na Esetere aaraka ni. Nemaya aamangasunge kua bakindo yo, sidu, si rengbe arengba kadu nga ko angia wene bakurea aMorudekai na Nakindo Esetere. Ono Ziazia Kekeapai apenga gupai nga Nemaya amangisunge fu kumbaku Esetere nangia Asuerose te. Ono ko amangisunge fu gu bakindo naye tifuo Asuerose rimoko angia Arutasasata.

Mo tingidi gupai nga, Arutasasata du nangia gu wene bakindo nafu ahe fu Ezara ko ndu ka manga sunge yekaru na ni. Ono Ezara aaduanga angapa Yerusarema kubaha te. Ani bingo gupai namangi nga gu nasa gupai nga Nemaya mangi gi sunge re.

Agarã mangi awere 13 fuo fu Arutasasata ahe fu Ezara ko ndu ka manga sunge yekaru na ni. Nemaya nga bakere bafuinga fu Bakindo Arutasasata. Gure nga ko nanaafu imekakue fu bakindo, na kini bi gupai nga boro aukanga he ku rogoho nga gu rengbe ka imo bakindo te. Si angia banyanyakipa sunge.

Rogo kura uru sa, wirina Nemaya nangia Anania na kura akumba aye Yisaraere yo ka bi Nemaya. I apepa gu kpakarapai fuko aYisaraere adu rogoho, na wai angapa Yerusarema adu kindi ni gburuwagburuwaha. Gipai re afu bakere gberarago fu Nemaya ko ki kpari fu Yekova tipaha.

Rogo kura uru sa, bakindo abi gupai nga Nemaya adu na gberarago. Ko ki sanako ki ya: ‘Tipagine du mo ti ni na gberarago?’ Nemaya ki ya fuko ko na gberarago mbikopa Yerusarema na pa angapaha nga gu du kindi ni gburuwagburuwaha. Bakindo ki ya: ‘Ginipai mo aidaha tie?’

Nemaya ki karagaha ki ya: ‘Mi naida mo idihe fere mi ndu ku Yerusarema yo tipa ka dua angapaha.’ Sino Bakindo Arutasasata aima ngba gbe. Ko aidihe fu Nemaya ko ndu, na ko aundo ko ko gbia angua tipa kura asunge. Nibasa fuo da Nemaya Yerusarema yo, ko apepa gupai ko andu na ni fu aboro. Gupai re angba tiyo i ki ya: ‘Ani tona sunge.’

Ho avura aYisaraere abi angapa ni si nisono kuari, i aya: ‘Ani nika ndu ka imoyo, gayo sunge ki ru.’ Ono Nemaya agi gipai re, ko ki fu abasape na abaso fu abamangisunge. Ko ki ya fuyo: ‘Ka oni gundenga be avurarani ya. Oni sovura tipa awirinaroni, tipa awironi, tipa adiaroni, na tipa gaoni akporo.’

Aboro adu na bakere ngarã. Gayo abaso na abasape adu na kina yo uru na yuru wa i aamangasunge. Sunge angapa anyasi vuru arame 52 gbua. Aboro ki tona ka raka zanga gunde. Nemaya na Ezara ayugu ga Mbori andiko, na aboro ki du na ngbarago.

Ono apai aadunga wakina gu si adu mbata fu i zi aYisaraere ku Babera yo te. Bakindo Parasa du naazogarago kurii Yerusarema, na aboro dunduko si aidi i nigisangbako. Ono Yekova akidohe nga ko nika keda vovo bakindo akeda, na gi vovo bakindo re nika ye na zereda fu aboro. Da nga gu bakindo re? Agarã asusi wa 450 aboro kini ru ka ino da nga gu bakindo re na wai ko nika ye na zereda ku auru kpotosende. Fuoho, i avungu gu gude paru anyaki gbe. Ani bingo gu pangbanga re.