Oni Wiriki gu Kpiapai Nga ga Anebi—Amosa

1. Wai rengbe gu kpiapai nga ga Amosa ka ngarasa rani?

¹ Ya mo uru ho mo abingo tiro nga mo arẽnga na sunge tungusapai te bambiko mo aawirikanga pai gbe te watadu mo asono rogo rungorungo kporo? Ka si du nga pai aima manga ro wo, mo gbia wasa awere tie ti gu kpiapai nga ga Amosa. Ko angia babanda akandoro na ki ngia basopo bino, ono Yekova afu ome fuko tipa ko takipande nyanyaki pangbanga. (Amosa 1:1; 7:14, 15) Teketeke a, Yekova namangasunge na agu aboro du na umbasitise ti gi gaani regbo re. (1 Kor. 1:27-29) Gini kura apai nibipa gaani sunge tungusapai rengbe ani ka wirikaha ti gu kpiapai nga ga gu nebi nangia Amosa?

2. Tipagine rengbe ani arengba ti ni ka ru nyanyakii ti regbo sogote gene tungusapai yo?

² Oni Ru Nyanyakii Ti Regbo Sogote: Ho Amasaya, nga gu ko nanaairiso kpia wiri bagara, kidu ni boromotumo rogo gu ga aYisaraere kindo naadu ku nodiyo naadu na angbatunga bawe abi Amosa ni ko nigumba pai ni sangbaanebi, gupai ko agumbaha, si adu sa wa ka ko aya: ‘Mo guari ane! Mo mburani nisarani! Ani na kina gaani pambori!’ (Amosa 7:12, 13) Ho Amasaya andu ni ka kitangbaanga Amosa fu Bakindo Yerobama wa ka ko rugusi Amosa ti gako sunge, ko aˈaria fugo gu nebi re ki gumba kurapai kia fu bakindo. (Amosa 7:7-11) Ono gipai re abanga gunde ti Amosa te. Areme, kura abarumbatayo rogo pambori kinaho ninaa kitangbaanga rani fu abazogo tipa i rungosi rani. Ono wa vura duhe wo, Yekova nakido rani nga anga ũvura ho aboro nika tumbaha sa rani si kidu na nyenye diabese te.​—Yes. 54:17.

3. Gu pangbanga ani agumbaha areme, si na gini apaparaha?

³ Oni Takipande ga Mbori Sapangbanga na Agu Amaku Nika Du Kumbatayo: Wa si avura du nga Amosa atakipande sapangbanga kuti gu kindo nangia ga aYisaraere naadu na angbatunga bawe, ko adigisi gu kitabu du rogo Ziazia Kekeapai na rimoko ti ni re na ga Yekova mokido nga i akaragatiyo akaraga ku rogo gayo ringara na Yekova ki fu maku fuyo kpaima. (Amosa 9:13-15) Zavura ani areme a, ani nafura afura tipa ga Mbori “rago sapangbangaa,” ono si nga papara gu ‘wene pangbanga nga ga kindo’ si aida ani takipande he. (2 Pet. 3:7; Mt. 24:14) Pa gbarasa Yekova gbegberẽ aboro ti regbo Aramegido nika za gene tipa kpotosende da ni paradizo.​—Tam. 37:34.

4. Tipagine du ani ti ni na kido nga ani rengbe arengba ka manga gupai Yekova akpinyemuhe?

⁴ Zanga kapa, tungusa gu pangbanga nga ga Kindo rogo gi zegino aboro asogaha asoga rogoho re naba asada fu gaani diaberã ka raka ringbisihe kuti gaani kparatise fu Yekova na gaani diaberã ka manga gupai Yekova akpinyemuhe. (Yo. 15:19) Wa vura duhe wo, ani na gu kido nga Yekova nikaa undo rani aundo kindi tipa ani naamanga gupai ko akpinyemuhe a wa ko aundo Amosa.​—2 Kor. 3:5.