Yisaka Adi Baweene Dee

MO INI gu dee du rogo gi sura re? Rimori nga Rebeka. Na gu kumba ri aye ka gbiako re nga Yisaka. Ri nandu kadu ni diako. Wai gipai re amangi?

Ba Yisaka nga Abarayama aaida ka dia wene dee fu wiriko. Ko aaidanga Yisaka di dee dagba agu adee naadu Kanana yo te, bambiko i anaairiso kungbo ambori. Abarayama ayambu gako moyambu sa ki ya fuko: ‘Mi naida mo ndu koyo du agumere ni Arana yo ki di dee yo fu wire nga Yisaka.’

Si du ga Abarayama moyambu adi akameri ti ni bawe ki ndu gu gbanga nunguro re. Ho ko ambedi ni koyo du agume Abarayama ni, ko asungu barii guga. Nyemu du naadu, ti gu regbo agu adee naadu rogo gu rago re anaandu ka tu ime guga yo. Si du ga Abarayama moyambu akpari ti ni fu Yekova ki ya: ‘Gu paranga dee nika fu ime fere na gimi akameri a, mo idihe ya ri duni gu ri sia mo ri fu Yisaka.’

Ka si aimanga ya Rebeka ki ye ka tu ime. Ho gu moyambu re asana ri ni tipa mbirimbiri ime, ri afuhe fuko. Na ri ki fu ime fu gako akameri naadu na gomoro ime a. Gure angia nyanyaki sunge bambiko akameri nambira bakere ime.

Ho Rebeka anyasi gipai re ni, ga Abarayama moyambu asana ri tipa rimo bari. Ko asana ri a singia ko rengbe ka ra kpuyo yo ni gu yuru re. Ri akaragapai ki ya: ‘Rimo buba nga Betuere, na bambu kinaho rengbe mo arengba ka ra rogoho.’ Ga Abarayama moyambu aima ino gupai nga Betuere angia wiri unvura Abarayama nga Naora. Si du ko akuku sande ti ni ki tambua Yekova tipa paye ko na ko kina fuo agume Abarayama.

Rogo gu yuru re, ga Abarayama moyambu ape gupai ko aye na ni fu Betuere na Rabana nangia kawiri Rebeka. I dunduko aidi gupai nga Rebeka ndu andu na ga Abarayama moyambu kadu ni dia Yisaka. Ginipai Rebeka agumbaha ho i sana ri ni? Ri aya, ‘Ii,’ ri naida aida ka ndu. Rogo gu kura girorago, i adakpa akameri ki tona gayo gbanga nduge ku Kanana yo.

Ho i adani, nyemu naadu. Rebeka abi kumba ko nita ati yo. Yisaka du naadu. Ko adu na ngbarago ka bi Rebeka. Nako nga Sara akpi agarã biata kusayo, na ko adu na gberãrago kindi mbiko gipai re. Ono Yisaka aye ka kpinyemu Rebeka gbe, na ko kidu na ngbarago berewe.