Agu Agene Mbori Afu Wasa Ngbaha

Gu mokedi nangia Pauro afura tipa Yekovaa ya ko “nga Mbori wasa dunduko nafu wasa fu rani rogo gaani gberãngbi yo dunduko.” (2 AKorindo 1:3, 4) Si du, Ziazia Kekeapai nakido rani nga Mbori rengbe naundo rani dunduko, na gberãngo ho rengbe ka gasa gu Barani du ngbangbaturũ yo ka ko arengbanga nafu wasa furani ya te.

Rengo ngaha nga, tipa ani gbia wasa, si naida ani mangipai amanga. Wai rengbe munganga ka undo rani ka si du nga ani amanganga mbakadapai tipa ka biko te? Gu nebi nangia Amosa asanahe nga: “A nga aboro ue nata gene sa, kina gu ka i ringbisi pa ha mbata te?” (Amosa 3:3) Ziazia Kekeapai nangarasa rani nga: “Oni mbédi na Mbori, ko ki mbedi na oni.”​—Yakoba 4:8.

Wai rengbe ani ka du na kido nga Mbori nika mbeda ambeda na ani? Bambatapai nga, ko nape gupai furani dedede nga ko naida ka undo rani. (Oni bi gu sanduki du pati gi kekeapai re.) Uepai nga, ani ima bi wai nzunzu Mbori afu wasa fu agu aboro naraki bakuru kusayo na ti gi gaani regbo re a.

Kina wai dungu aboro areme agbata undo be Mbori, Bakindo Davide aima gbiatiko na dungu akpakarapai. Ko akpari fu Yekova nga “Mo gi pa gimi akpesarawati, ho mi ka akpara ni foro ku ari tipa undahe.” Ya mo Mbori agi gako kpee? Ii. Ko aya berewe: “Yekova nga gi ome nga gi vurakube; kpotoreyo nakida kuti ko; si ki unda re, kpotore yo ki ningi.”​—Atambuahe 28:2, 7.

GA YESU BANGIRIBA NIBIPA FU WASA FU AGU ABORO DUNDUKO DU NA RUNGO

Mbori aidi gupai nga Yesu ye ka fu wasa fu aboro. Dagba agu asunge Mbori afuhe fuko, si adu nga Yesu nika ‘voda agu yo ngbaduyo akua’ na “ka ngarãsa agu yo dunduko nakpara kpenunga.” (Yesaya 61:1, 2) Awa i afura tipaha, Yesu adu na bakere nyemu agu aboro “nambu dunduko, ki du na rõrõi tindiro.”​—Matayo 11:28-30.

Yesu afu wasa fu aboro ni fu ko agu arugute nga ga tatamana, kini mangiyo ngba zezeredi gene, na kini husi gayo akaza ti kura aregbo. Rogo kura uru sa, boro ngbataka akpari fu Yesu ki ya: “Ka mo kpi nyemu he, mo húsi re ahusa.” Nunga ko azi Yesu ko ki ya: “Mi nakpi nyemu he; mo hú.” (Marako 1:40, 41) Na gu kumba nadu na ngbataka ki hu be gako kaza.

Wa vura duhe nga, Wiri Mbori auru kpotosende areme tipa kaa fu wasa fu aboro ni basasa te. Ono Bako nga Yekova, “nga Mbori wasa dunduko,” nafu wasa kindi fu agu aboro na idaha. (2 AKorindo 1:3) Ani bingo agene biama Mbori afu wasa furani ngbaha.

• Ziazia Kekeapai. “Bambiko agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.”​—ARomo 15:4.

• Ga Mbori Ziazia Toro. Ngbutuko fuo kpio Yesu, agu adungurati nga ga aKristano arimi ku rogo zereda. Mbiko gine? “Ki ta ta na gunde Gbia na gu wasa nga ga Ziazia Toro.” (Amokedi 9:31) Ziazia toro nga gu ome mangaapai nga ga Mbori du na bakere ome ti ni. Mbori ima rengba ka mangasunge na ni tipa ka fu wasa fu aboro rogo abangiriaba dunduko.

• Kparakpee. Ziazia Kekeapai na ngarasa rani nga “Ka oni ídi nga fu pai si fudi roni wa sa ya.” Kuba gure, si naya, “ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã.”​—AFiripoio 4:6, 7.

• Akuarani aKristano ima rengba ka du ni gu wene abakurearani rengbe ka du ni mburu wasa furani. Gu mokedi nangia Pauro afura tipa gako abadia sunge nga i angia mburu “wasa” ti aregbo “arungo na agberãngbi dunduko.”​—AKorosaio 4:11; 1 ATesaroniko 3:7.

Ono mo rengbe nabaka bangiro nga, wai rengbe agi apai re ka du ni rengo dunduko. Ani wisigingo bete akpiapai awere nga ga agu aboro naagbiatiyo na agu akpakaraapai ani nifura tipaha ti tonatonaha. Wakina agu aboro re, mo nika bi gupai nga Mbori nadigiso gako bawene kidohe kindi nga: “Wa gu boro nani angarãsa ni, wo mi ka angarãsa roni.”​—Yesaya 66:13.