Oni Sovura Kuti Gu Sino Mangaapai Nga Ga Gu Zegino Apai A’ariatihe A’aria Rogoho
“Ani adi gu Toro nga ga Mbori, gu nga ga zegino te.”—1 AKORINDO 2:12.
1. Rogo gini agene i anangi Eva?
“WO NINANGI re.” (Bambata Pai 3:13) Rogo gu bete afugo re, gu bambata dee nangia Eva a’asadi tiri ka sakarogo ndu gupai nasa ri ri samungu kuti Yekova Mbori. Gupai ri agumbaha re angia kina rengo, ono tie, si akusanga gori kusayo ti gu irairapai ri amangihe re te. Ga Mbori toro adu kugii gu mokedi nangia Pauro ko ki ke gupai kusa nga: ‘Eva i anangi ri.’ (1 Timoteo 2:14) Woo anangi ri ri idi kuti gupai nga, basasangba Mbori, nga ka rí gu zuzu ngua Mbori azahe ti rihe, aundo ri aundo, si ki sa ri wa Mbori. Gu boro nazomia ri ri rí gu zuzu ngua re, anangi ri ananga a ya woo nangia ni. Ri ainonga gupai nga Satana Bakitingbanga du naafura rogo woo yo te.—Bambata Pai 3:1-6.
2. (a) Wai Satana aingisa aboro areme? (b) Gine nga gu ‘toro nga ga zegino,’ na gini asanahe ani ka wisigoho awere?
2 Natona ti rago aAdamu na Eva, Satana anye kindi kuti nanga aboro. Nirengo, ko nga “banangi aboro kpotosende yo dunduko.” (Yugoti 12:9) Ko a’arianga gako abirĩ ki di gu kuraha te. Wa vura duhe nga ko amanganga sunge berewe na ndikidi woo te, ko nye kindi kuti oka tiko. Satana namangasunge na bete agu ambaro nafu wasa, aũgbandaka apangbangaa, gbiati gu kura agene ka ingisa aboro i idi kuti gupai nga, i na zingo tipa ga Mbori arugute te na ka i gbianga undo a behe te. Ga Bakitingbanga tua nga ga nanga aboro ima sonosa gu sino mangaapai nga ga samungu rogo aboro yo kuti agu andiko nga ga Ziazia Kekeapai na kuti agu arugute adunga ngburungburu ya rogo arago dunduko. Ziazia Kekeapai naya tipa gi sino mangaapai re wee si nga ‘gu toro nga ga zegino.’ (1 AKorindo 2:12) Gi toro watadu sino re na ome maapai ti ni kurii agu aida, asino berã, na gu mangaapai nga ga agu aboro ainonga Mbori ya. Wai aboro ayugo gu sino re, na wai rengbe ani ka sovura kuti gaha gbegbere ome maapai kurii aboro? Ani bingo wai rengbe ani ka mangaha.
Ruru Mangaapai Nago Ago Kusayo
3. Tipagine gu sino mangaapai nga ga zegino namoipai ti ni ti gi gaani regbo re?
3 Rogo gi gaani regbo re, gu sino mangaapai nga ga zegino nakio kina kumbatayo. (2 Timoteo 3:1-5) Si nawira, oni ima bi gupai nga, ruru mangaapai nago ago kusayo. Ziazia Kekeapai nasakarogo ndu gupai duhe ti ni wo. Fuo i sigira ga Mbori Kindo ngbangbaturũ yo rogo 1914, vura arikito yo nibasa. I adibe Satana na gako adaimona rogo gu vura re na i ki bafu yo ku auru kpotosende. Fuo ima ngbadu Satana, ko kini mo ka kiiso gako tua nga ga nanga aboro rogo zegino dunduko. (Yugoti 12:1-9, 12, 17) Rogo agu agene dunduko rengbe ko ka mangasunge ngbaha, ko na’asada tiko ka ‘ingisa siasia aboro.’ (Matayo 24:24) Wa du ani niga Mbori aboro, ani nga gako bangua sásá. Ko na’asada tiko ka gbarasapa rani rogo toroyo tipa ka ani agbianga ga Yekova weneringise ya na ki gbarasipa gu gaani maabangirise du ani nani tipa gbia nyenye unga.
4. Wai ga Yekova amoyambu abi Ziazia Kekeapai, na wai zegino abihe?
4 Satana na’asada tiko ka payasipa Ziazia Kekeapai, nga gu nyanyakipa buku nayugopai fu rani tipa Bakusirani nga boro nyemuse. Ga Yekova amoyambu nakpinyemu Ziazia Kekeapai na kini bihe na kikiipaha. Ani ini gupai nga, si nga gu Fugo Mbori gako toro adu kugiipa kehe, angianga fugo aboro ya. (1 ATesaroniko 2:13; 2 Timoteo 3:16) Ono tie, gu zegino nga ga Satana naida ani berẽ gupai dukia ti gure. Nikpiapai, gu tonatona afugo du rogo gu buku nabisirapa Ziazia Kekeapai nayaa: “Anga wiripai ho du ‘niziaziaha’ tipa Ziazia Kekeapai te, na anga si a nga ‘fugo Mbori te.’ Anga agu asanto ga Mbori toro adu kugii yo nakekehe te, ono agu abarumbatayo rogo pambori nadu na nyemu zoga aboro tiyo nakekehe.” Agu aboro naida kuti ngbatunga agu afugo re rengbe taata ka ti kurogo gu gbina nga ga nangahe nga, i ngbariyo ka irisombori ngba agu agene ngba bangiriyo, watadu ka zanga irisoko.—Asanza 14:12.
5. (a) Ginipai bakeke abuku agumbaha tipa agu apambori sangbaha aye rogo Ziazia Kekeapai? (b) Wai du bete agu aberã nga ga zegino kia ti gupai Ziazia Kekeapai agumbaha, nga gu berã rengbe na arago dũ? (Oni kodi gupai du rogo sanduki ti gu kpewaraga ye fuo gere.)
5 Pa bisirapa Ziazia Kekeapai ngburungburu na rogo gu gene adunga ngburungburu ya, gbiati gu biriki agu aboro amangaha naya i nasongoda sangbaha, ima sa badungu aboro i naabasapa pambori, kodihe na gu pambori sangbaha aye rogo Ziazia Kekeapai. Rogo aũgbandaka apangbangaa na dagba wene abawirikipai, pambori ni gupai i abasapaha abasa. Kumba sa nga bakeke abuku ayaa: “Aboro abinga gu pambori nga ga aYuda na gu nga ga aKristano, nga agu apambori narimi kurogo gu sino raka ngbaa ti aboro niwenehe te. Ka boro vura bi agi apambori re rogo gu bangiriba ngbaaha rogo gbe, si nga gupai nangba ti kina adumbata; ka boro bihe rogo gu bangiriba gberehe rogoho gbe, ni nabi gupai nga, si nga guhe regboho aima nyasa, niguhe nakandasi gu sono nga ga inohe na kini kisi gene sona be birĩ-inohe. Vuru agu agarã susi, gi sogote du aboro nani kuti Ziazia Kekeapai re asono si ki sa yo i naasawia agu aboro nasongoda sangbaha na kini sogo yo.” Gi sogote re natona dedede ti agu aboro nayawee Mbori ti ni te nga agu aboro “namanga kina ruka rogo gayo bera yo.”—ARomo 1:20-22.
6. Gine nga gu bipai nga ga aboro zegino tipa asino kodaba nga gu Mbori asogaha?
6 Sidu tie, si airiwonga ka bi gupai nga, aboro nanyaga tiyo kina kusayo kindi ti ga Mbori andiko nga ga ruru mangaapai te. Nikpiapai, Ziazia Kekeapai naringbisapa kodaba kumba na kurani ni “wasiro.” (ARomo 1:26, 27) Si nayawee a agu aboro namanga meteka gbiati bäri, i adianga kumbo ga Mbori Kindo te. (1 AKorindo 6:9) Wa vura duhe wo, rogo dungu aringara, anga aboro nabi agu asino kodaba re nikina agu apai daada tipa aboro naamangaha sa te, ono i nayugoho a rogo abuku, rogo amagazini, rogo abia, rogo asinima, na rogo aterevizioni ni agu apai ngba angba. Agu aboro nafura tipa ngbatunga agu apai re ya ngbanga bibihe te, i nabiyo ni agu aboro du berã yo nikina umbaha, ni agu aboro nasarangbangaa akurayo, ni agu aboro nye kina sayo tigayo baraho du akurayo ni na vovo aberã. Kuba gupai nga aboro zegino bi ga Mbori andiko nigu mangaapai nga ga nyemuse tipa yo, i nabihe ni agu ahe nakiso kina gene beyo sa gene ranirii na ngbarago.—Asanza 17:15; Yuda 4.
7. Gini asanahe si aida ani sana tirani nani?
7 Rogo gu zegino aboro asogote ga Mbori pai rogoho nyanyakii susi gu nidu mbata, si adu nipatatamana tipa rani ani makia kina boro gaani aberã na gaani sino mangaapai. Ti kura aregbo, si naida gupai berani nga, ani ta kparakpee kini wisigi tirani zanga nanga tirani na gupai nga, ani agbisanga kusayo tooni tooni ti ga Yekova berã gbiati gako andiko te. Nikpiapai, ani rengbe ka sana tirani ki yaa: ‘Mi nagbia ngbarago be guhe ka mi aima nehe bakuru kusayo? Mi tona kaa umbasipa gu mangaapai Mbori asogaha? Mi awere na gu sino tire nga ga bi agu apai nga ga toro na paha gbua tooni ti gu mi anabihe mbata? Ya mo gu gene mi araka ngbaha nayugo gupai nga mi namaa agu apai nga ga Kindo mbata rogo gimi raka?’ (Matayo 6:33) Ngbatunga gu wisigotise re nika undo rani ani sovura kuti gu sino du ti aboro zegino.
Ka Oni ‘Bitikpanga Kusayo’ Ya
8. Gine nga sangbana bitikpa boro kusayo ti Yekova?
8 Gu mokedi nangia Pauro akepai fu akurako aKristano ki yaa: “Ani . . . fu berãpase . . . kakaka susi tipa agi apai i agi he re, rago ka da ani ki bitikpa pati he.” (AEbere 2:1) Gu bakurungba bitikpa kusayo ti gu gene ka si naandu ngbaha, si adanga rogo gu ba si andu kurogoho te. Ka bakamaha amaanga bangiriko kuti gu wege naya na gu ngiri ime nafu ya, gako kurungba rengbe taata ka bitikpa kusayo ki susi wene ba rugusa akurungba si ki da kongo dagba mbia pangba ime yo. Teketeke wa kina gure a, ka ani amaanga bangirani fuo gu nyanyakipa arengo nga Fugo Mbori ya, ani rengbe taata ka bitikpa ti Yekova na gaani kurungba nga ga toro ki da vagadi. Tipa pai wa ngbatunga gure rengbe ka manga rani, anga si nga ani nambu rengo ambu naabaha dunduko mbata si nika manga te. Nirengo, dungu aboro ambunga Yekova wa ma-bangirise na kita inoaino kini mangihe te. Dedede, i narimiso tiyo tooni tooni kurogo gupai nika aria berã yo kusayo ti maaha fuo Fugo Mbori. Zanga i rugutiyo nani, i nabitikpa ki ti kurogo ingapai. Wa kina gu bakama kurungba nara ara, ngbatunga agu aboro re azinganga rame yo te da kinaho apai naima gbera ni dunduko.
9. Rogo gini agene Yekova afu maku fu Soromo?
9 Ani wisiginga gu gene raka nangia ga Soromo. Yekova asiapa zogorago fuko ni bakindo kurii aYisaraere. Mbori aidihe fu Soromo ko dua yekaru na ki ruguko ko keke apapara Ziazia Kekeapai. Yekova afura na ko ti aregbo ue na ki fu kumuko fuko, na worimo gbiati pazereda regbo gako zogarago. Kurii apai dunduko, Yekova afu maku fu Soromo nga ga bakere tatamana. Ziazia Kekeapai nayaa: “Mbori afu tatamana na rugatinapai fu Soromo susi ba ringbisa ha, kpotoko yo ahi ahi be weneringise, wa kina gu ngume du ti pangba baime. Si du ga Soromo tatamana akii akia ki susi gu tatamana nga ga agu awiri aboro naadu ku uroyo dunduko, na gu tatamana nangia ga aEzipeto dunduko a.” (1 Abakindo 4:21, 29, 30; 11:9) Nirengo tie, boro rengbe ka berã ya, kangia si aidi boro nye niruru ni fu Mbori, Soromo kadu. Ono, wa si avura du wo, Soromo abitikpa ki ti kurogo samungu kuti ndikidi pambori. Wai gupai re aru ka manga?
10. Gini arugute Soromo akpa ti irisaha, na sangbanaha angia gine?
10 Soromo aima ino ga Mbori aNdiko sirisiri na ki girogoyo wenengai gbe. Zanga kapa, si aida ko du na kparakpara nyemu agu arugute tiko i amoihe tipa agu aboro nikaa da ni abakindo aYisaraere. Dagba agu arugute re, gu sa ayaa: “[Bakindo] aroga nga dungu ade te, ngbaduni ka sa tihe.” (Pa Fu Rugute ni Ue he 17:14, 17) Wa gu ziazia arugute re avura du, Soromo arogodi adee saba kama, na adebadia biata kama. Dungu agi adee re anairiso kungbo ambori. Ani ainonga ndu gupai Soromo arogodi dungu adee ti ni wa gure te, na ani ainonga wai a ko arugusi gupai re bangiri aboro te. Ono gupai ini ani he nga ko abasa ga Mbori arugute nadu nikekehe ziazia. Sangbana gipai re amangi nzunzu a wa Yekova aima gumbaha. Ani nagedaha were: “[Adia Soromo a]sa kpotoko yo fuo kura kungba ambori.” (1 Abakindo 11:3, 4) Gipai re aamanga tooni tooni, sidu gu gako tatamana Mbori afuhe fuko ki gbataka kusayo riko yo. Ko abitikpa kusayo ti ndikidi irisombori. Fuo bete regbo kusa, gu nyemupai nadu ti Soromo ka fu ngbarago fu agu adiako nangia apagano re agbisi gu nyemu giasangba Yekova kusayo gbiati gu nyemu fu ngbarago fuko nadu tiko. Nairiwo wai gupai re agbere, mbiko kina boro Soromo nangia gu boro nakepai mbata ki yaa: “Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti re”!—Asanza 27:11.
Gu Sino Mangaapai Nga ga Zegino na Ome ti Ni
11. Wai guhe ani amaaha ku rirani yo amangasunge na gaani berã?
11 Gu kpiapai nga ga Soromo nayugo gupai fu rani nga, si nikerepai ani berẽ ya mbiko gupai nga ani ima ino rengo, agu aome maapai kurise nga ga zegino arengbanga ka mangapai na gaani berã te. A wa ndikidi riahe amangapai amanga na kpotorani, kinawo a duhe tipa “agu apai ani amaaha ku berã rani yo,” si namangapai amanga nani. Agu apai ani amaaha ku berã rani yo, si na ome kurii gaani berãpai na bipai. Ni ino agu abasunge nambakada ahe ka bagaha nga wo du gipai re, i namangasunge na abirioni adorari rogo agarã nibasasa kaa takapande gayo bagibagiahe. Agu abatakipande bagibagiahe duna diabese rogo gayo sunge, i namangasunge na agu afugo nga ga abiapai gbiati yugo gu kpiaahe ngbaa ti agu aboro nika ngbeka gayo ahe. Abatakipande bagibagiahe ima ino gupai nga, geda pahe kina bara sa watadu bara ue azomianga boro ni oro fuo he ka ngbehe te. Ono tie, pa bi yo gu takapande bagibagiahe re vuru gbanga regbo, si nasa yo i bihe ni agu ahe ngba angba tipa boro du nani beni. Takapande bagibagiahe namangasunge amanga, wa ka si naadunga wo ya, anga boro ho ka gbarasi gani marã genehe yo te. Si na bakere ome ti ni ka maapai kurii aboro yo.
12. (a) Wai Satana amaapai kurii ga aboro berã? (b) Gine nayugo gupai nga, Satana rengbe arengba ka maapai kurii aKristano?
12 Wa kina abatakipande ahe, Satana naurugo gako aberã rogo agu agene ngba ti aboro, mbiko ko ima ino gupai nga, fuo bete regbo, ko nika gbe aboro agbe kuti gako berã. Rogo ambaro nafu wasa na rogo gu kura agene, Satana nananga aboro i idi kuti gupai nga, wenepai nga gbegberepai na gbegberepai nga wenepai. (Yesaya 5:20) Zavura kina ndikidi aKristano, i aima zio rogo gi ga Satana tua nga ga nangahe re. Ziazia Kekeapai naza rani niyaa: “Ono Toro nagumba ha zukazuka ya rogo kusa rago agu yo nikati ku sa yo ti idapase, niidi pa agu atoro nga airanangahe, na gu yugopai nga ga adaimona, rogo ga agu aboro biriki yo nagumba zire, sangbakpotoyo yo ki du na sirõ be ngidiri marã.”—1 Timoteo 4:1, 2; Yeremaya 6:15.
13. Gine nga agbegbere kpamiatise, na ginipai gaani akpamiatise amanga rani nani?
13 Ani dunduko gu sino mangaapai nga ga zegino narengbe arengba ka mera fuo rani. Ga Satana abirĩ maapai kurii aboro na bakere ome ti ni. Ziazia Kekeapai nazungodi rani nitatamana niyaa: “Ka i nángi nga roni ya: ‘Gbegberẽ kpamiatise nagbarasa wene sino.’” (1 AKorindo 15:33) Gbegbere kpamiatise nakoda ahe dunduko watadu aboro dunduko, zavura rogo dungurati vurũ, si kini sa boro ni yugu gu sino mangaapai nga ga zegino. Ka ani berẽ gupai nga, gbegbere kpamiatise arengbanga ka imisa rani te, ya mo anga si sa wa kina gu digisopai nga, wene kpamiatise arengbanga ka undo rani te tee? Nairiwo wai ka gupai re ira! Ziazia Kekeapai nagumba gupai re ziazia ho si ayani wee: “Gu boro nata na boro tatamana ni adú ni iratatamana a, ono gu badiata nga ga mumungo aboro, ima azía yo wa sa.”—Asanza 13:20.
14. Rogo gini agene rengbe ani ka sovura kuti gu sino mangaapai nga ga zegino?
14 Tipa ani sovura kuti gu sino mangaapai nga ga zegino, si naida ani naakpamia tirani na kina airatatamana, nga agu aboro namangasunge fu Yekova. Si naida ani hiisi berã rani na agu apai rengbe ka sonosa gaani idapase. Gu mokedi nangia Pauro akepai ki yaa: “Agu apai du ni rengo, agu apai rengbe na irisa, agu apai du ni ruru he, agu apai du ni wene sino, agu apai nangba bangirise, agu apai i naya ti ni si ngba; ka ngia ziazia pai du ho, ka ngia he ho rengbe i fu tambuahe ti ni, oni bérẽ pa agi apai re.” (AFiripoio 4:8) Ni agu aboro i akusi yo na gu tandu nga ga sia wenepai watadu gbegberepai ka mangaha, ani rengbe arengba ka diaberã tipa gupai ani aida ka wisigoho. Ani sianga kina agu apai ti aregbo dunduko nika mbedisa rani koyo du Yekova ni.
Ga Mbori Toro na Bakere Ome ti Ni
15. Wai agu aKristano nadu Korinda yo adu kia ti gu kura aboro naaraka rogo gu bakporo re?
15 Ga Mbori ziazia toro nayugo gene fu Ndikidi aKristano si kini sa yo i du kia ti agu aboro gu sino mangaapai nga ga zegino aingisa yo. Aboro gu dungurati nadu Korinda yo du Pauro ake gako waraga fuyo ho ko ayani wee: “Ani adi gu Toro nga ga Mbori, gu nga ga zegino te; ani ini agu apai Mbori nafu fu rani gbua.” (1 AKorindo 2:12) Korinda angia gu bakporo naima rindo kurogo gu sino mangaapai nangia ga zegino. Gu wasiro nangia ga agu aboro bakporo re agbere gbe si ki sa aboro i naagumba gu fugo tipaha nga, “i ima sa ro ni boro Korinda,” rogoyo angia “mo ima manga wasiro.” Satana aima vurasi bangiri agu aboro naaraka rogo gu bakporo re. Nisangbana gupai re, anga wiripai ho i ainingo ho tipa ndikidi Mbori te. (2 AKorindo 4:4) Wa si avura du wo, Yekova amangisunge na gako ziazia toro ka zaka bangiri bete aboro Korinda, kini undo yo i gbia gu inohe nga ga rengo. Gako toro afõngbaduyo yo na kini yugu gene fuyo i mangi a’ariapai rogo gayo raka tipa wa ka ko idi na gayo pai i rengbe ka gbia gako maku. (1 AKorindo 6:9-11) Wa gu sino mangaapai nangia ga zegino avura du na ome ti ni, ga Yekova toro adu na ome ti ni susi ga gu sino mangaapai nangia ga zegino.
16. Wai rengbe ani ka dia ga Mbori toro na ki bandaha?
16 Kina gu bangisapai re namanga areme. Ga Yekova ziazia toro niguhe kii omehe kisusi agu ahe dunduko du rogo haurago, na ko nafuhe gbua na kpaima fu agu aboro dunduko nasanahe tipaha rogo idapase. (Ruka 11:13) Ono tie, tipa ani rengbe ka gbia ga Mbori toro, si naida ani mangi kura apai susi gu gbua nga ka sovura kuti gu sino mangaapai nga ga zegino. Si naida ani naawisigo Fugo Mbori dedede na kini mangi sangbaha rogo gaani raka tipa gaani sino berã du wa kina gako. Ka ani mangi gupai re, Yekova anyakasa rani anyakasa ani ru nyanyakii kuti agu abirĩ rengbe Satana ka mangasunge nani tipa ka gbarasa parani rogo toroyo.
17. Rogo gini agene rengbe gu pangbangaa namangi tipa Roto ka fu wasa fu rani?
17 Wa vura duhe nga aKristano nipapara zegino te, i kina rogo zegino. (Yoane 17:11, 16) Anga boro ho sa dagbarani rengbe ka ne gu sino mangaapai nga ga zegino naabaha dunduko te, mbiko si rengbe kadu nga ani namangasunge watadu ani naraka na agu aboro adunga nyemu Mbori tiyo ya watadu adunga nyemu gako arugute tiyo ya. Ani naberã wa gu Roto aaberã, nga gu kumba gu mangaapai naadunga kuti andiko ya ‘aarungosi ko’ na kini fudi ko, nga agu apai agu aboro nadu Sodomo yo aamangaha ko aaraka dagbayo? (2 Petero 2:7, 8) Kangia wo duhe, ani rengbe arengba tie ka gbia wasa. Yekova abanda Roto na ki batasi ko, sidu, ko rengbe arengba ka manga kina gu bangisapai re tipa rani a. Gu Barani nga boro nyemuse nabi agu apai abi du tipa rani na ki ini pai tipaha a, sidu ko rengbe arengba ka fu gu undo gbiati ome fu rani ani aidaha tipa ani rengbe ka bandatirani rogo toroyo. (Atambuahe 33:18, 19) Ka ani kido kubeko na kini kido kutiko, na kini kpari fuko, ko aundo rani aundo ani sovura kuti gu sino mangaapai nga ga zegino, ka agu apai du tipa rani vura kpakara wai vurũ.—Yesaya 41:10.
18. Tipagine si aida ti ni ani banda gaani ngbanyaa dagbarani na Yekova?
18 Rogo gu zegino ima nyagatihe kusayo ti Mbori na Satana anangaha, ani, niga Yekova aboro, i fu maku fu rani nga gu inohe nga ga rengo. Fuo du apai were tipa rani, ani nagbia gu ngbarago gbiati zereda adunga be aboro zegino ya. (Yesaya 57:20, 21; AGaratio 5:22) Ani nabi gu iiriwo maabangirise nga ga nyenye unga rogo Paradiso na nyanyakipaha, yo gu sino mangaapai nga ga gi zegino nasamba asamba re nika dunga ni berewe ya. Sidu tie, ani bandanga pa gaani kikiipa ngbanyaa dagbarani na Mbori na kini sinziri rago ka mbakada gupai ka duho naida ka sa rani ani bitikpa kusayo rogo toroyo. Ani mbedi koyo du Yekova ni susi gu nidu mbata, na ko aundo rani aundo ani sovura kuti gu sino mangaapai nga ga zegino.—Yakoba 4:7, 8.
Oni Rengbe ka Sakarogoyo?
• Rogo gini agene Satana nanangi aboro na ki ingisi yo?
• Wai rengbe ani ka ne bitikpa kusayo ti Yekova?
• Gine nayugo gupai nga, gu sino mangaapai nga ga zegino, si na bakere ome ti ni?
• Wai rengbe ani ka dia gu toro nga ga Mbori na ki bandaha?
[Gu sura du ti kpewaraga 24]
GU TATAMANA NGA GA ZEGINO NA VURA KUTI GU NGA GA MBORI
Anga pai ho nga kina ku rengo te, aboro nisayo nasa gayo apai nirengo.
“[Fugo Mbori] nga rengo.”—Yoane 17:17.
Ka oni aida ka ino rurupai watadu irairapai, oni kido kuti gaoni aberã.
“Kpotoboro yo nangi ahe ki susi ahe dunduko, si na kere kaza.”—Yeremaya 17:9.
Kumuko nga gu banguapai naye na ngbarago.
“Gu pai nga ga boro si rogo ni yo te, gu boro nata, pa ruga gani apai si rogo ni yo te.”—Yeremaya 10:23.
Mo mangi gupai mo aida ka mangaha.
“Nyemu marã nga tarã ngbatunga gbegberẽapai dũ.”—1 Timoteo 6:10.
[Gu kpiahe du ti kpewaraga 23]
Soromo abitikpa kusayo ti ndikidi irisombori na ki sa tiko fuo kungbo ambori