Agu Aboro Rẽ Tipa Wiri Kandoro Ngbe Kumbatayo Fuyó Koyo Du Agugaabi Aime Unga Ni
“Wiri Kandoro . . . angbé ku mbata yo fu yo koyo du agugaabi aime unga ni.”—YUGO. 7:17.
1. Ginipai Fugo Mbori ayugoho tipa mbedimbedi aKristano, na gini sunge Yesu afuhe fuyó?
FUGO Mbori nayawee mbedimbedi aKristano, nga ‘ruru kangara moyambu,’ i nangerakurii ga Kristo sunge auru kpotosende. Ho Kristo awisigi gu “moyambu” re ni rogo 1918, ko abi gu mbedimbedi aKristano re auru kpotosende niruruyo bambiko i aafu gu “riahe” nga ga toro fu gako aboro ti regboho. Si kita duwo, Kristo nga Bairayo kini asiapa “gako ahe dunduko” fuyó. (Oni gedi Matayo 24:45-47.) Rogo gi gene re, mbedimbedi aKristano namangasunge fu gu kura airisi Yekova auru kpotosende ane.
2. Ga Yesu ahe nga gine?
2 Bairahe nangerakurii gani ahe dunduko, na ní rengbe ka mangasunge nani kina wai ní aidaha. Agu ahe nga ga Yesu Kristo, nga gu Bakindo Yekova amoiko, si nakoda agu apai dunduko du auru kpotosende nabipa Kindo. Gure nakoda “bakere rimbasa aboro” a, nga aguyo gu mokedi nangia Yoane abiyo rogo yuguyugupai yo. Yoane afura tipa gupai ko abihe re ki yaa: “Oni ngére, mi ki bi bakere rimbasa aboro, ka boro ageda nga yo wa sa ya, dagba rika aboro dunduko, na angbatunga yo, na aboro, na angbatunga afugo dunduko, i arundu barangba mbatabakindo, na barangba Wiri Kandoro, ni ukadiukadi yo ni pusi remu, akpe mbira ki du be yo.”—Yugo. 7:9.
3, 4. Gini bawene apai Mbori namangihe tipa bakere rimbasa aboro?
3 Agu aboro du rogo gu bakere rimbasa re, i du dagba agu aboro Yesu ayambu yó nga “kura akandoro.” (Yo. 10:16) I namaabangiriyo ka raka nyeanye kindi auru paradizo kpotosende. I naa kido nga Yesu “angbé ku mbata yo fu yo koyo du agugaabi aime unga ni,” na “Mbori awéga aume dunduko ti bangiriyo.” Mbiko gi maabangirise du yó nani re, i ima ‘zunda gayo aremu, ki vurusihe nikure Wiri Kandoro.’ (Yugo. 7:14, 17) I na idapase kuti ga Yesu motumo, si ki tadu wo, Mbori kini biyo ni agu aboro ukadi tiyó na ‘pusi remu.’ Mbori nabiyo nigu ruru aboro nga abadiangbako, a wa si adu tipa Abarayama.
4 Kurigure, wa duhe nga Mbori nabi bakere rimbasa aboro niruru aboro, i rengbe ka maabangiriyo nga i nika bata abata ho Mbori nika gbarasa gi zegino re ni ti regbo bakere gberãngbii. (Yak. 2:23-26) I rengbe ka mbeda na Yekova, na wa du yó nibadona, kidu naa kido nga i nika bata abata ti regbo gu vura nga Aramegido. (Yak. 4:8; Yugo. 7:15) Bakere rimbasa aboro na ranirii beyo te, ono i namangasunge tiibe gu Bakindo du ngbangbaturũ yo nga Yesu, gbiati agu awirinako du nimbedimbediyo niziazia toro.
5. Wai agu aboro du rogo bakere rimbasa aundo agu awirina Kristo du nimbedimbediyo nitoro?
5 Mbedimbedi aKristano aima gbiatiyo na dungu asogote be Satana, na i nikaa gbiatiyo nani a kindi. Wa vura duhe wo, si naida i niikido kuti agu abadiangbayo nga bakere rimbasa aboro tipa undo. Bange mbedimbedi aKristano awere tooni gbua auru kpotosende, ono badungu akutu vovo aboro narimo ku dagba bakere rimbasa aboro na agarã dũ. Mbedimbedi aKristano arengbanga kaa ngerakurii agu adungurati nga ga aKristano dunduko nibasasa du bangehe wa 100,000 rogo zegino te. Si ki tadu were, undo sa dagba agu akuraha mbedimbedi aKristano agbiaha be kura akandoro nga, agu akumba rẽ-na-sunge, i namangasunge ni abaakumba rogo adungurati. I nangerafuo gu badungu amirioni aKristano du awere Yesu aʹasia payó fu ‘ruru kangara moyambu.’
6. Wai Yesaya afura tipa gu undo mbedimbedi aKristano agbiaha be agu abadiangbayo nga kura akandoro?
6 Gu undo mbedimbedi aKristano agbiaha be agu abadiangbayo nga kura akandoro, gu nebi nga Yesaya aima fura tipaha. Ko ayaa: “Ya Yekova wẽ: ‘Gu ũkumuko nga ga Ezipeta [“agu abamangisunge nga ga Ezipeta yó i atumongo yó ya,” NW] ayé foro na gu bagibagi ahe nga ga Etiopia, na aSeba nga gbangagbanga aboro, i ayé fuo ro ki du ni gamo yo, i apéka fuo ro.’” (Yes. 45:14) Ka pepai nimasaku, agu aKristano duna maabangirise ka raka auru kpotosende, i napekafuo mbedimbedi aKristano na gayo Riigbu Bipasunge, kini ndu kina kuti gayo rugapai. Wangia gu kura akandoro “agu abamangisunge i atumongo yó ya,” i nafutiyo na gayo ahe na ngbaduyó yo dũ ka manga gu sunge tungusapai Yesu afuhe fu agu apefuoko du nimbedimbediyo nitoro.—Amo. 1:8; Yugo. 12:17.
7. Agu aboro du rogo bakere rimbasa nagbia rabahe awere tipa ginipai?
7 Wa agu aboro du rogo bakere rimbasa asongoda agu awirinayo nga mbedimbedi aKristano, i nagbia rabahe tipa kadu ni agu aboro nika maamburu gu riigbu nga ga aboro tingbafuo Aramegido. Si naida mburu gu riigbu re nyaki anyaka gbe, na si naida agu aboro nikadu rogoho duni agu aboro duna nyemu sunge tiyó tipa kaa ndu kina kuti agu apai dunduko Bairayo nikaa ruga yó kuti ni. AKristano dunduko nibasasa du na momu beyo tipa ka yugo nani nga gayo Bakindo nga Kristo, ko rengbe arengba ka mangasunge naayó. Wa du ní na idapase awere na kini ndu kina kuti agu apai i aruga ní kuti ni, si nayugo gupai nga ní nika ida aida na agu arugute Bakindo nika fuhe funi rogo vovo zegino.
Gu Idapase Nga ga Bakere Rimbasa Aboro
8, 9. Wai agu aboro du rogo bakere rimbasa ayugopa gayo idapase?
8 Bakere rimbasa aboro nga abadiangba mbedimbedi aKristano, i nayugopa gayo idapase ngba dungu agene. Nibambatapai, i nasongoda mbedimbedi aKristano rogo tungusa gu wene pangbangaa du tipa ga Mbori Kindo. (Mt. 24:14; 28:19, 20) Uepai nga, i nafutiyo kutiibe agu arugapai nga ga Riigbu Bipasunge.—Eb. 13:17; oni gedi Zekaraya 8:23.
9 Biatapai nga, i nasongoda mbedimbedi aKristano niraka yó ringbisihe kuti ga Yekova bangua arugute. I naʹasadatiyo kadu na “nyemuse, na ngbarago, na zereda, na hipai, na mangapase, na weneringise, na du ngangarã, na zera, [na] rugatise.” (Gara. 5:22, 23) Areme, ngenga agu aboro duna agu asino re tiyó te, bambiko badungu aboro namanga kina agu apai nga ga “borose.” Ono wa vura du zegino wa gure, agu aboro du rogo bakere rimbasa, i ima diaberã ka ne “bari, na pa meteka, na wasiro, na irisa kpiaahe, na soroka, na asogote, na kpata, na aringo, na azinga, na kpika pai, na kparaka, na kparakpara pai, na kpiboro, na kpibuda, na do pumbo gbarakagbaraka, na tunga agi apai re.”—Gara. 5:19-21.
10. Ginipai agu aboro du rogo bakere rimbasa nadiberã tipaha?
10 Wa duhe nga kpakpa aboro nga ani, si rengbe kadu nikpakarapai tipa boro du na agu asino tiní nga zuzu toro, ki mbu agu amangaapai nga ga borose, na ki dibe gu zomiahe du rogo gi ga Satana zegino re. Wa vura duhe wo, ani aidanga ka mbu agu arungbura du tirani gbiati zerakpotoseyo, watadu agu apai ani arengbanga ka mangaha ya si zeresi ome gaani idapase watadu ka zeresa gaani nyemuse tipa Yekova te. Ani ini gupai nga, Yekova nika manga gupai amanga ko agumbaha, nga ka banda bakere rimbasa aboro ti regbo bakere gberãngbii.
11. Gini abirĩ Satana naamangasunge ngbaha tipa ka zeresa gu idapase nga ga aKristano?
11 Wa vura duhe wo, si naida ani naangera angera kindi, bambiko gu ndikidi vurarani nga Bakitingbanga, ko aidanga ka mbu rani taata te. (Oni gedi 1 Petero 5:8.) Ko rengbe ka mangasunge na abasamungu kuti ndikidi pambori tipa ka sa rani ani idi kuti gupai nga, agu ayugopai ani aida kuti ni, zire ayugopai du. Ko anaamangaha amanga wo mbata, ono ka ko adunga na diabese ya. Teketeke a, wa vura duhe nga kura aregbo kinaho arungosi naaga na sunge tungusapai kusayo, si naamanga dedede nga, agu aboro i naarungosiyo, gayo idapase naanyaka anyaka be arungosi. Sidu, Satana namangasunge kindi na agu agene ko aberãha nga si rengbe ko ka zeresa gaani idapase ngbaha. Ko namangasunge na gu gberarago du ani nani. Pauro arugu agu aKristano nadu rogo bambata sa kama agarã tipa gipai re niyaa: “Oni mákia pako [nga Kristo] wenengaĩ nga gu ko nahi pa gu gumbarimo nga ga aboro ingapai kutiko.” Tipagine ko aya ti ni wee i makia pa Kristo? Ko agumba nduhe ki yaa: “Oni ka du na mbugo tigaoni, ki nirungbura rogo gaoni aberã.”—Eb. 12:3.
12. Wai agu arugute du rogo Ziazia Kekeapai anyakasa agu aboro kpotoyo yo nazere?
12 Ya mo oni aberãnga pa mbu iriso Yekova ti kura regbo sa? Ya mo kura aregbo ho oni naabi tironi nga oni amanganga gupai nzunzu si aida oni mangihe te? Ka si duwo, ka oni mbunga Satana ko rimi rogo gu bangiriba re tipa ka sa roni oni mbu iriso Yekova ya. Ka oni awisigo Ziazia Kekeapai wenengai, kini kpari fu Mbori kakaka, kini ndu kupati adunguratise dedede, na kini sungu na agu aboro du oni rogo idapase sa naayó, si rengbe ka nyakasa roni na ki undo roni ka oni ‘rungburanga ya.’ Yekova aima manga mokido ki yawee ko nikaa fu ome afu furani, na si naida ani kido akido kuti gu fugoko re. (Oni gedi Yesaya 40:30, 31.) Oni naaberãpa agu asunge nga ga aKristano. Ka oni funga tironi sa gu kungboapai nagbarasa regbo ya, ono oni berãpa undo kura aboro. Ka oni amanga agi apai re, oni gbia ome agbia tipa ka hi gberarago watadu zerakpotoseyo.—Gara. 6:1, 2.
I Nika Kura Rogo Bakere Gberãngbii Kurogo Vovo Zegino
13. Gini sunge napido agu aboro nika bata ti regbo Aramegido?
13 Tingbafuo Aramegido, badungu gu iraira aboro i nika zingisa yó, si nika ida i yugu ga Yekova agene fuyó. (Amo. 24:15) Si nika ida i wirikipai tipa ga Yesu motumo tumorii; kurigure, si nika ida i yugupai fuyó i duna idapase kuti gu motumo re tipa ka gbia agu aundo du ti ni. Si nika ida i mbu agu aberã i adu nani mbata nga ga zire pambori na ki mbu gu gene i aaraka mbata ngbaha. Si nika ida i wirikipai tipa ka ukadi tiyó na vovo borose nga gu i aino ndikidi aKristano ti ni. (Ef. 4:22-24; Koro. 3:9, 10) Agu aboro du rogo bakere rimbasa nikadu ti gu regbo re nikina ungayo, i nikadu na bakere sunge beyo. Nairiwo gu ngbarago i nikadu nani tipa ka manga gu sunge re fu Yekova, ho i kaa dunga ni na agu ambugo na fudifudiapai du rogo gi gbegberẽ zegino re ya!
14, 15. Oni gumbapa agu apai agu aboro nika wirikaha nika bata ti regbo bakere gberãngbii naapa gu aguyo i nika zingisa yó nika gumbaha.
14 Gu ga Yekova ruru amoyambu nakpi mbata fu Yesu mangisunge auru kpotosende ane, badungu apai a kinaho si nika ida i wirikihe ti gu regbo re. I nika ino gu Masiya i akidohe tipa ko, nga gu ko i aima digo nisungudi ko, ono ka i abingo ko ya. Ho i aaraka ni, gayo raka aima yugo gupai nga i ima ida Yekova rugu yó. Oni makianga pa gu ngbarago aboro nikadu nani tipa ka undo agu akurayo re, nikpiapai, ka sakarogo wai yo fu Daniere agu asangbanebi ko akekehe adigi, nga gu ko akekehe ka ko agianga rogoyo ya.—Dan. 12:8, 9.
15 Nirengo, wa duhe nga agu aboro i nika zingisa yó bekpio i nika ino badungu apai berani, ani nikadu adu a na badungu asanahe ngbarani ka sasana yó nani. I nika takapande agu apai furani du rogo Ziazia Kekeapai ki sakirogoyo wai si amangi sirisiri dunduko. Oni berẽnga pa gu ngbarago ani kadu nani ka gia futufutuapai tipa Yesu ngba gu wiri unvura nako nangia Yoane Bafu Bapatiza! Agu apai ani ka wirikaha be gu ruru adezire re nika undo rani ani girogo Fugo Mbori yo wenengai gbe susi gudu awere. Gu ga Yekova ruru amoyambu naaima kpiko bakuruyo, kodihe na aguyo nakpiko awere, i nika gbia “wene zingabekpio.” I atona gayo sunge fu Yekova rogo gi zegino du Satana kuriihe re. Nairiwo gu ngbarago i nikadu nani ka tona gayo sunge berewe rogo bawene zezeredi vovo zegino!—Eb. 11:35; 1 Yo. 5:19.
16. Ringbisihe kuti sangbanebi, wai Regbo Sapangbangaa nikadu?
16 Ti Regbo Sapangbangaa, regbo kinaho i nika zaka akitabu. Si i nikaa mangasunge nani gbiati Ziazia Kekeapai ka sapangbangaa agu aboro dunduko nikaa raka tipa ka bi aguyo rẽ na nyenye unga. (Oni gedi Yugoti 20:12, 13.) Mbata fu digo Regbo Sapangbangaa, aboro dunduko nibasasa nika duadu na bakere regbo beyo tipa ka sia gu bangiriba i aida ka ru rogoho nibipa gu ngbangaa du tipa gu bakere pagbia nga ga Yekova. Ya mo boro aida na ga Mbori Kindo tipa Wiri Kandoro ngbe kumbatayo funi koyo du “agugaabi aime unga ni”? Watadu ní nika ká ga Mbori Kindo aká? (Yugo. 7:17; Yes. 65:20) Mbata fu Regbo Sapangbangaa digi, agu aboro du auru kpotosende dunduko nikadu na momu beyo ka siapai, zanga gu ingaapai ani adihe ti atitarani fudi yó, watadu gbegberẽ zegino. Boro ho nika rengba ka yawee runga gu ngbangaa Yekova nika saraha ti digidoho te. Kina gbegberẽ aboro sa Yekova nika gbarasayo nyeanye kindi.—Yugo. 20:14, 15.
17, 18. Gini bawenepai mbedimbedi aKristano na gu kura akandoro asungudo Regbo Sapangbangaa tipaha?
17 Wa duhe nga Mbori aima bi mbedimbedi aKristano ya i rẽarẽ i fu Kindo fuyó, aguyo du areme auru kpotosende, i nasungudo gu regbo i nika zogarago ti Regbo Sapangbangaa na nyemuhe. Nairiwo gu bakere momu mangi fuyó re! Gu maabangirise du yó nani re, si nasayo i ndu kuti gu rugute Petero afuhe fu agu awirinayo nadu rogo bambata sa kama agarã ki yaa: ‘Oni fú tironi nyanyakii tipa pa yamba roni da ti rengo na pa sia roni a, bambiko ka oni amanga agi apai re, oni atinga wa sa te; bambiko kina a wo i ka fu rima wenengaĩ gbe furoni kurogo gu nyenye ngbii nga ga gaani Gbia, nga Batasirani Yesu Kristo.’—2 Pet. 1:10, 11.
18 Gu kura akandoro nangi na agu awirinayo du nimbedimbediyo nitoro. I ima diaberã kaa songoda yó asongoda kindi. Wadu yó ni abadiangba Mbori areme, si nasa yó i mangi agu asunge dunduko fu Mbori rengbe ome yó nani. Ti Regbo Sapangbangaa, i nikadu na bakere ngbarago kaa ndu kuti ga Mbori arugapai wa Yesu nikaa ndu naayó koyo du agugaabi aime unga ni. Niyangaraha tie, Yekova nika biyo ya i rẽarẽ tipa kadu nigako amoyambu auru kpotosende nyeanye kindi!—Rom. 8:20, 21; Yugo. 21:1-7.
Oni Natingidaha?
• Ga Yesu ahe nga gine?
• Wai agu aboro du rogo bakere rimbasa aundo agu awirinayo du nimbedimbediyo nitoro?
• Gini asunge bakere rimbasa aboro agbia ngbarago mbiko mangaha, na giniapai i amaabangiriyo tipaha?
• Wai oni abi Regbo Sapangbangaa?
[Gu kpiahe du ti kpewaraga 29]
Agu aboro du rogo bakere rimbasa, i aima zunda gayo aremu ki vurusihe nikure Wiri Kandoro
[Gu kpiahe du ti kpewaraga 31]
Giniapai oni asungudo agu aboro naima kpiko i gumbaha furoni?