Ani Ata Kina Rogo Gaani Rengo!
“Mi tigimi, mi ata kina rogo gi rengo.”—TAM. 26:11.
1, 2. Ginipai Eyobo agumbaha tipa padu ko niʹirarengo, na ginipai Ziazia Kekeapai ayugoho tipa ko rogo Eyobo kapita 31?
MBATA kusayo, i anaahasa ahe ahasa tipa ka bi barõaha. I anidua ngua sangi kusendeyo ki wagi ngua ngbagoroho. I anaahasa kpatamarã ti ngba gu ngua re kubani ki hasi kuraha ti ngbaha kubani. I animoi guhe i aida ka bi barõaha kurogo kpatamarã sa, i ki moi mbia kurogo gu kuraha. Si aidi ga Mbori aboro niringbisi ahe nzunzu zanga biriki.—Snz. 11:1.
2 Ho gu ga Mbori kumba nangia Eyobo aduni rogo rungosi be Satana, ko ayaa: “[Yekova] ringbisi re rogo nzunzu ũringbisahe, Mbori ini pa gi du ni irarengo!” (Eyo. 31:6) Eyobo agumba dungu apai rengbe ka sa gu boro nata rogo rengo watadu nakakuti ruru mangaapai ní du rogo asada. Ono Eyobo aima diabe gako asada, a wa yuguyo ho rogo Eyobo kapita 31. Gako wene kpiapai rengbe ka sa rani ani mangipai wakina ko a, na ki pepai wagu Davide apehe ki yaa: “Mi tigimi, mi ata kina rogo gi rengo.”—Tam. 26:11.
3. Tipagine duhe ti ni ninyanyakipa pai ani du niruru rani fu Mbori rogo kikindigi apai yo na rukutu apai a?
3 Wa kere asada avura ye sa Eyobo, ko anye kindi niruruko fu Mbori. Na dungu aboro nayawee Eyobo nga gu boro nzunzu nakakuti rurupai asada ki vura manga ní kina wai vurũ. Arungosi amanganga rani wakina gu namangi Eyobo teketeke te. Ono wa vura duhe wo, ka ani aida ka yugo gupai nga ani nakakuti ruru mangaapai na ani nasongoda ga Mbori bakere pagbia, ani duwa ka ani du niruru rani rogo kikindigi apai yo na rogo rukutu apai yo a.—Oni gedi Ruka 16:10.
Si Aidanga Ani Mangi Wasiwasi Apai Te
4, 5. Wa Eyobo aidi ka kakuti ruru mangaapai, gini mangaapai ko anehe?
4 Tipa ani nye niruru rani fu Yekova, ani duwa ka ani kakuti gu gako arugute nazahe ti wasiwasi mangaapai, a wa Eyobo akakuti ni. Ko ayaa: “Mi azunga he na bangire; waĩ tie ka mi ngere ka bi ngasu de? ‘Ká ngbadure agumba soki fu de, ka mi aru ki sungu pa ngbadimo kuare; si du ka diare sá ahe tie ti ni fu kura boro, kura aboro nugadi ku ri ri.’ ”—Eyo. 31:1, 9, 10.
5 Wa Eyobo aidi ka nye niruruko fu Mbori, ko aaidanga ka dua bangiriko ti dee na nyemuri te. Wa ko angia kumbakudee, ko aabanga nyemuko ti gu dee nga devurukporo te, na ko aakpingo nyemu diakumba a te. Ti regbo gu ga Yesu tungusapai nadu rii bagangara yo, ko afura nyanyakii tipa kodaba, na agu aboro naida ka kakuti ruru mangaapai, si naida i moi gu fugoko re kuriyó yo.—Oni gedi Matayo 5:27, 28.
Ka Oni Birikingo Aboro Ya
6, 7. (a) A wa Mbori amangihe tipa Eyobo, gine Mbori amangasunge nani ka ringbisa rani? (b) Tipagine si aidanga ti ni ani duni airabiriki watadu airanangahe ya?
6 Ka ani aida kadu ni agu aboro nata rogo rengo watadu naka kuti ruru mangaapai, si aidanga ani naabiriko aboro te. Asanza 3:31-33 nayaa: “Ka mo nikpi nga boro zuu ya, ka mo nisia nga gu sino sa nga gani ya; bambiko irakeretu [“irabiriki,” NW ] nga kere gbegberẽ boro bangiri Yekova; ono ruru boro du rogo gako pa du zukazuka. Ga Yekova motiwa du ri ga gbegberẽ aboro bambu, ono ko nafu maku ku ri ga agu yo kporo nga ruru yo.” Eyobo ayaa: “Ni rengo, mi ata nga na pa zire te, ndure aipo nga sa nangahe a te. [Yekova] ringbisi re rogo nzunzu ũringbisahe, Mbori ini pa gi du ni irarengo!” (Eyo. 31:5, 6) Yekova naringbisa aboro dunduko rogo “nzunzu ũringbisahe.” A wa Mbori aringbisi Eyobo, Mbori namangasunge na gako rurupai ka ringbisa rani ka bihe singia ani ni agu aboro nakakuti ruru mangaapai.
7 Ka ani duni airabiriki watadu airanangahe, gure nga ani anyenga niruru rani fu Mbori te. Agu aboro nakakuti ruru mangaapai ‘nambu gu okooko apai nga ga zee’ na i “ata nga rogo biriki” te. (2 Kor. 4:1, 2) Ono na ka ani biriki kuarani idipase rogo fugo yo watadu rogo mangaapai yo, si ki sa gupai nga ní zungodi Mbori azungodi tipa undo? Sangbanaha du nigbegberẽhe furani! Bake apapara Atambuahe abibia ki yaa: “Mi nakpara fu Yekova rago gi fudifudipai, ya ko karaga pai fere: ‘Ako Yekova, mo bâtasi mbisimore be gumba zire ni ngbare, na be mirã nangahe.’ ” (Tam. 120:1, 2) Si ngba angba ani naatingida gupai nga, Mbori rengbe arengba ka ngera ku kpotoraniyo, ki ‘asadi berãrani na kpotoraniyo’ ka ino singia ani nga agu aboro nzunzu nga ga rurupai yó.—Tam. 7:8, 9.
Oni Naamangapai na Aboro Ngba Wene Gene
8. Wai Eyobo anaamanga kura aboro?
8 Tipa ani nye niruru rani, si naida ani duwa Eyobo, nanaamanga aboro ngba ruru gene, kidu na umbasitise, na kini berẽpa aboro. Ko ayaa: “Ka si du wa mi agindiga pa gi moyambu nga kumba watadu gu ri nga de, ho i akpakana he ni fere; gini pai tie mi ka manga ho Mbori ka guari ni kuti re? A nga gu ko namangi re ku rukumbu yo namangi ni a, te? A nga boro sa namangi rani ku rukumbu yo, te?”—Eyo. 31:13-15.
9. Gini asino Eyobo ayuguhe rogo gako mangaapai na gako amoyambu, na wai si aida ani naamangapai rogo gi bangiriba re?
9 Si nawira gupai nga, si anaadunga nimbumbupai ka sarangbanga ti rago Eyobo te. I anaawisigo ngbanga ngba ruru gene, na zavura akanga, i anaakusa ngbanga akusa kuti abairayo. Eyobo anaamanga gako amoyambu ngba ruru gene na ninunga. Ka ani aida kaa ta rogo rurupai, ani duwa ka ani duna ngbatunga agu asino re, gbe ka si du nga ani nga abaakumba rogo gu dungurati nga ga aKristano.
Oni Duni Aboro Gamahe, Ni Aboro Ngbaduse Te
10, 11. (a) Wai ani aino ya Eyobo angia wene sino boro? (b) Eyobo 31:16-25 natingida rani na gini arugute du rogo Ziazia Kekeapai i afuhe kusa?
10 Eyobo angia wene sino boro, angianga iraringi watadu boro ngbaduse ya. Ko ayaa: “Ka mi aka na gu he be rurungbura aboro i akpi nyemu he, watadu manga ga adekurugbo maabangirise si nyasi, watadu mi ri gi bete riahe ni sa re, ka wirinyaure ari nga ha ya; . . . ka mi bi gu ni kpi be zingo roko; . . . ka ngia mi tumba bere kuti awirinyaure, bambiko mi abi gi undahe ngbadimo bakporo; si rengbe ka bazunga pagore zutuka ti gore, bere ki mo ti bazungaha.” Ka Eyobo aya fu dahabu wee: ‘Mo mi akida kutiro,’ ka ko adunga niboro ruru mangaapai te.—Eyo. 31:16-25.
11 Gu fugo Eyobo re natingida rani na gupai gu bawiriki nangia Yakoba apehe ki yaa: “Ziazia idapambori barangba gaani Mbori, Barani, nga gu agberã nga ya nga gere, nga ka ndu ka bi awirinyaure na adekurugbo rogo gayo rungo, ki nibanda tini be zegino, ka birikoho adu nga ti ni ya.” (Yak. 1:27) Si natingida rani a na gu rugute Yesu afuhe ki yaa: “Ka oni dí nga ngbiti ahe ya; bambiko i aringbisa nga ungaboro na gani ahe te.” Fuo gumba Yesu gipai re, ko agumba kpiapai tipa kumukokumuko kumba nangia boro ngbaduse nga guko ‘naakumukongo fu Mbori ya.’ (Ruka 12:15-21) Tipa ani duni agu aboro nakakuti ruru mangaapai, si aidanga ani duni aboro ngbaduse watadu kpihe te. Agi apai re nga irisokpiahe bambiko gu boro duna ngbaduse, ní namaa ngbaduni tipa kina guhe ní aidaha, ka ngbaduni adunga koyo du Yekova ni ya. (Koro. 3:5) Ani arengbanga kadu ni aboro ruru mangaapai ka ani ngia aboro ngbaduse te!
Oni Kakuti Ndikidi Irisombori Nyanyakii
12, 13. Gini kpiapai Eyobo amoihe nibipa irisokpiahe?
12 Agu aboro nakakuti ruru mangaapai, i ambunga ziazia irisombori te. Eyobo aamanganga ha wo te, mbiko ko ayaa: “Ka mi abi uru ho si akĩ ni, watadu diwi nata rogo imaima rago, ngbadure ki nigumba soki ni gbuko, ngbare ki nyoro bere; gere adu ni gu irairapai ka abasapungbanga fu mbusa tipa ha, bambiko si wa ka mi amangi pa zire fu Mbori du ari yo.”—Eyo. 31:26-28.
13 Eyobo aairisongo kura he te. Ka ngbadukoyo andu koyo du kura he ní ariyo, wa diwi, ‘ngbako ki nyoro beko’ nisino iriso guhe re, ka ko angia irisikpiahe, na ka ko amangi pa ziree fu Mbori. (Pa Rug. 4:15, 19) Tipa ani nye niruru rani fu Mbori, ani duwa ka ani ne irisokpiahe.—Oni gedi 1 John 5:21.
Ka Oni Imisinga Aboro Ya; Ka Oni Dunga Niʹairabiriki Ya
14. Wai ani aino ya Eyobo aadunga nigu boro naimisa akurani te?
14 Eyobo aangianga gu boro naimisa akurani te, na ko aangianga iigira boro te. Ko aima ino nga agu apai re rengbe arengba ka sako ka ko dunga nigu boro nata rogo rengo yo ya, mbiko ko ayaa: “Ka mi angi tipa gu gbarasahe namanga gu ni naasoga re, watadu sambua tire ho gbigbitapai agbia ni ni; ono mi ambu nga ngbare sa ingapai nisana he tipa ungani ni motiwa te.”—Eyo. 31:29, 30.
15. Tipagine duhe ti ni nigbegberẽpai ani ngi ho gbegberẽpai agbia gu boro ni nasoga rani?
15 Eyobo anaanginga ho gbegberẽpai amanga gu boro ni nasoga ko te. Asanza 24:17, 18 nafura tipa gipai re niyaa: “Ka mo ngi nga ho vuraro niti ni ya, ka kpotoro yo awása nga ho ni nakotoka ni a ya; Yekova ka bihe, si ki gberẽ ti ko, ko ki di gako zinga ti ni ku sa yo.” Wa duhe nga Yekova naino gupai aino du ngbadu boro yo, ko ima ino singia boro nangi mbiko gu gbegberẽpai gbia kurani, na Yekova aidanga na ngbatunga gupai re te. (Snz. 17:5) Mbori ini wai ka mangapai na agu aboro nasoga rani, bambiko ko nayaa: “Pa irabape nga gimi.”—Pa Rug. 32:35.
16. Ka ani ngia airarungo, wai rengbe ani ka dia aboro kugume?
16 Eyobo anaadia aboro kugume wenengai. (Eyo. 31:31, 32) Ka ani vura du niʹairarungo, ani rengbe arengba ka ‘dia aboro kugume.’ (Rom. 12:13) Ka wirihe vura du kina tooni, ani rengbe arengba ka ngbabehe na akuarani, mbiko Ziazia Kekeapai nayaa: “Ri kpepasio yo du nyemuse ni, ngba ki susi ti ri babagara nzeme, yo du kina sogote ni.” (Snz. 15:17) Ka ani ari wiri taata riahe na gu boro nakakuti ruru mangaapai wa ani, nyemuse kidu ho, si rengbe ka sa gu riahe re si nziri gbe, na ani ki gbia undo a rogo toro yo.
17. Tipagine si aidanga ani asadi ti ni ka oka kere ingapai ya?
17 Agu aboro Eyobo anaadia yó kugume anaagbia nyakasaro agbia rogo toro yo, bambiko irabiriki nangia ko te. Ko aadunga wa agu azangasinombori narimi nigbuko kurogo gu dungurati nga ga aKristano nadu rogo bambata sa kama agarã te, nga aguyo ‘naazomia aboro ka bi mosoro.’ (Yuda 3, 4, 16) Na Eyobo aokanga gako ‘irairapai ku ngbadukoyo’ mbiko gunde be aboro te. Ko aima ida Mbori wisigi ko, na ko aima ida ka kusa gu irairapai kadu tiko. (Eyo. 31:33-37) Ka ani mangi kere ingapai, ka ani asadingo ka okaha mbiko gunde be zee watadu gbarasarimo ya. Wai rengbe ani ka yugo gupai nga ani naʹasada tirani ka nye niruru rani? Ani nayugoho ni ino ani pa gaani irairapai, ki saberã rani, ki gbata undo rogo toro yo, na ki asaditirani tipa ka mbakada gupai nagberẽ.—Snz. 28:13; Yak. 5:13-15.
Eyobo Ambu Tiko I Asadiko
18, 19. (a) Tipagine rengbe ani ka ya ti ni wee Eyobo aamanganga boro gbegberẽe te? (b) Ginipai Eyobo aima ida ka mangaha wa ka si adu nga boro kusi ngbanga kutiko gani pai kingia rengo?
18 Eyobo angia irarengo na ko anaamanga aboro wenengai, si du ko aya ti ni wee: “Ka gi sende akpari ni zinga kuti re, gaha soposopo adue ki nikpari wa sa; ka mi ari gaha zuzu ahe zanga ngbe he, ki mangi aira ha i kpiki; kina akiwe kúru yo ku ba nganu, na abafuafu ku ba tunga kura he wa mapunga.” (Eyo. 31:38-40) Eyobo aadianga ga boro sende beni ngbaome te, na ko anaamanganga gako abamangisunge gbegberẽe te. Wakina ko a, si naida ani nye niruru rani fu Yekova rogo kikindigi apai yo na rukutuhe a.
19 Eyobo afura kubangiri abakureako nadu biata gbiati Eriu tipa wai ko araki gako raka. Eyobo ayawee gu boro kadu na pai ngbani nibi gu raka ko arakihe, nga gu ko ake paha ki ke ‘rimoko’ ti ni, ní ye ka gumbaha. Ka boro aye ki kusi ngbanga kutiko si ki kuru nga ko angia ingahe, ko aima ida ka gbia mbusa. Sidu, Eyobo agumba gako apai dunduko, kini sungudi Mbori ku saringbanga ko. Si ki ta da ku ane, ‘ga Eyobo fugo ki digi.’—Eyo. 31:35, 40.
Oni Rengbe Arengba ka Kakuti Rurupai
20, 21. (a) Gine naundo Eyobo ko kakuti gako ruru mangaapai? (b) Wai rengbe ani ka sonosa nyemuse tipa Mbori?
20 Gupai nasa Eyobo ko kakuti rurupai nga, ko akpinyemu Mbori, na Mbori ki kpinyemuko a na ki undoko. Eyobo aya fu Mbori wee: “Mo naafu unga fere na weneringise, ga bandahe abanda torore.” (Eyo. 10:12) Kurigure, Eyobo aduna nyemu aboro tiko, na ko aini ya ka boro aká na weneringise be akurani, gure nga ní nambupa gunde ti Guko duna tandu apai du. (Eyo. 6:14) Agu aboro nakakuti ruru mangapai, i nakpinyemu Mbori na kini kpinyemu kura aboro.—Mt. 22:37-40.
21 Ani rengbe ka sonosa nyemuse tipa Mbori nigeda ani Fugoko na aʹuru dũ na kini berẽkurii gupai si agumbaha furani tipa ko. Si naida aida a ani sambuo Yekova rogo kpee yo na kini tambuako tipa gu weneapai ko amangaha furani. (Frp. 4:6, 7) Si naida aida a ani naabibia fu Yekova na kini gbia undo mbiko koda ani tirani na gako aboro. (Eb. 10:23-25) Na gaani nyemuse nika kio akio a ka ani andu tipa tungusapai kini yugupa “gako bata.” (Tam. 96:1-3) Ka ani amangaha wo, ani nyeanye niruru rani kini ta rogo gaani rengo yo, a wa gu bake atambuahe amangihe nabibia ki yaa: “Si ni wene he fere ka mbeda na Mbori; mi moi Gbia nga Mbori ni gi bagbuko.”—Tam. 73:28.
22, 23. Wangia ani agu aboro nasongoda ga Yekova bakere pagbia, wai du gaani mangaapai wakina gu nangia ga agu airisi Yekova nadumbata?
22 Yekova naafu asunge nibakiakia fu agu aboro nakakuti rurupai. Noa ambakadi bakurungba, na ko angia “batungusi rurupai.” (2 Pet. 2:5) Yosua andu na aYisaraere ku Ringara Mokido yo, na gupai naundo ko ko mangi gipai re angia, ko anaageda “kitabu rugute . . . uru na yuru” na kini mangi sangbaha. (Yos. 1:7, 8) Agu aKristano nadu rogo bambata sa kama agarã asa aboro ni abawiriki, na i anaadungura tiyo dedede ka wisigo Ziazia Kekeapai.—Mt. 28:19, 20.
23 Ani nasongoda ga Yekova bakere pagbia na ki kakuti ruru mangaapai nitungusa ani rurupai, nisa ani aboro ni abawiriki, nimanga ani sangba Ziazia Kekeapai, na nikoda ani tirani na akuarani aidipase tipa agu adunguratise nga ga dungurati na tipa kikindigi adunguratise. Agu apai re naundo rani ani du ngangaraa, kidu nyanyakii rogo toro yo, na kini mangi gupai Mbori akpinyemuhe. Agi apai re anyakanga kisusi omerani te bambiko ani nagbia undo be gu Barani du ngbangbaturũ yo na be Wiriko. (Pa Rug. 30:11-14; 1 Aba. 8:57) Kurigure, ani nagbia undo be agu “awirina” du rogo zegino dunduko, nga aguyo nata rogo rurupai yo a na kini irisi Yekova nigayo Bakere Gbia.—1 Pet. 2:17.
[Gu kpiahe du ti kpewaraga 31]
Gaoni Karagapai Nga Gine?
• Wai si aida ani naabi gu ga Yekova arugute du tipa ne wasiwasi mangaapai?
• Gini asino Eyobo ngbaa tironi gbe?
• A wa duhe rogo Eyobo 31:29-37, wai ga Eyobo mangaapai adu?
• Tipagine duhe ti ni nga ani rengbe arengba ka nye niruru rani fu Mbori?