Oni Mbedi Na Mbori

Wasa fu Agu Aboro du Kpotoyo yo na Rungo

“MI ABERẼ gupai nga ka Yekova kpingo nyemu re watadu ka ida na mi te.” Kristano sa nape gupai du kuari re nga guri naasota nikerehe be kaza bakere gberarago rogo gari raka. Ri adakuti gupai nga Yekova tuturũu tiri. Ya mo turũ Yekova aturã nzunzu na agu airisiko rengbe kadu na bakere gberarago? Ani nagbia gu karagapai nga ga wasa rogo agu afugo ga Mbori toro adu kugii bake papara Atambuahe nangia Davide ko kehe, a wa duhe rogo Atambuahe 34:18.

Davide aima ino gu ome rengbe bakere gberarago kadu nani kurii irisi Yekova. Ho Davide aduni niparanga, ko anaaotoka kuari be Bakindo Saura naagbata ko tipa ka imoko. Davide agbata bagbuko rogo gu ba ko aberẽ gupai nga ka Saura danga rogoho te. Ko andu ku Gata yo nangia gu gbata nga ga avura aYisaraere, nadu rogo ga aFereseto ringara. Fuo Davide ini gupai nga aboro gu ringara re ima inoko, ko amangi tiko wa irapopo tipa ka bata. Nibipa wai ko abati be bakindo gu ringara re, ko asambuo Yekova tipa batasa ko, na ki ke Atambuahe 34.

Ya mo Davide abi gupai nga Yekova tuturũ ti agu aboro duna bakere gberarago tiyo watadu na rungo? Ko akepai ki yaa: “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.” (Veresi 18) Ani bingo wai agu afugo re afu wasa na maabangirise.

“Yekova du mbembedi.” Buku sa naya tipa gi fugo re wee “si nayugopa wai gbia adegatuko, na kini sinzirirago, na kidu ti aregbo dũ na nyemu ka undo na ka batasa gako aboro.” Si nafu kido ka ino gupai nga Yekova nasinziri gako aboro asinziri. Ko nabi agu akpakarapai abi namangayo ti gi ‘gbegberẽ aregbo’ re, na ki ini agu apai du ngbaduyo yo wenengai.​—2 Timoteo 3:1; Amokedi 17:27.

‘Agu aboro du kpotoyo yo na rungo.’ Gu kura bakeapai sa agumba gupai rogo gako buku nga, rogo kura angbatunga, gu ‘boro du kpotoni yo na rungo,’ ní nga gu boro aboro akpingo nyemuni ya. Ono agi afugo bake atambuahe amangisunge nani re nayugopa gu “bakere gberarago du boro nani.” Nirengo, zavura ruru airisi Mbori rengbe arengba ti kura aregbo ka gbiatiyo na kere kpakarapai nga gu rengbe ka sa gupai nga kpotoyo yo duna rungo.

‘Agu aboro toroyo aima be ingapai.’ Agu aboro kpotoyo yo azera watadu duna bakere gberarago, i ima rengba ka bi tiyo kusende si ki sa gupai nga ka i dunga na kandara wiri maabangirise berewe ya. Buku sa du tipa agu aboro nasa fugo Ziazia Kekeapai agumba gupai nga, i rengbe ka mangasunge na gi fugo re tipa “agu aboro adunga na maabangirise tipa wenepai kumbatayo ya.”

Wai Yekova abi ‘agu aboro du kpotoyo yo na rungo’ na ‘aguyo toroyo aima be ingapai’? Ya mo ko turũ aturã tiyo, na kini berẽ gupai nga i arẽnga tipa ko kpinyemuyo na kini degetuko fuyo te? Wagusa te! Wakina gu bagude duna nyemuse naaka wirini na kini fu wasa furu ho du u ni rogo gberarago, Yekova mbembedii na agu airisiko nakpara fuko tipa undo. Ko na kakaka nyemu ka fu wasa fuyo na ka nyakasa aguyo kpotoyo yo arungo, na toroyo aima be ingapai. Ko ima rengba kafu tatamana fuyo na ome tipa i dibe gu fudifudiapai dunduko namanga yó.​—2 AKorindo 4:7; Yakoba 1:5.

Si angba gbe oni berẽpa wai rengbe oni ka mbeda na Yekova. Gi Mbori nga ga nunga ko re nakido rani nga: “Mi naraka . . . na gu boro du na toro rungo ti ni na umbasitise, ka ungasi toro aboro umbasitise, na ka ungasi kpoto agu yo yo du ni rungorungo yo.”​—Yesaya 57:15.