Ya Mo Ziazia Kekeapai Gbua Wakina gu Kura Abuku?

“Ziazia Kekeapai dunduko si aye be ga Mbori Toro si ki rengbe tipa yugopai . . . , ya ga Mbori boro du ziazia, aũ manga wene apai dunduko ki du be ni.”—2 TIMOTEO 3:16, 17.

GU KURA aboro kinaho aidanga kuti gupai du kuari re tipa Ziazia Kekeapai ya. Ginipai du tipa ro tigamo? Gini bipai dagba agu abipai du kusende re du mo nani tipa Ziazia Kekeapai?

• Si nga gu buku i akehe ngba wene gene

• Si gbua nga buku sa dagba gu dungu ziazia abuku du ti ni

• Si nga buku apaturẽ nga gu ani awirikapai rogoho tipa sino mangaapai

• Si nga Fugo Mbori

Gu kura sanahe nga, Ya mo nyakipa gu bipai anyaka du boro nani tipa Ziazia Kekeapai? Oni bingo gupai Ziazia Kekeapai agumbaha tipa tihe kini yaa: “Bambiko agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.” (ARomo 15:4) Ziazia Kekeapai nagumba gupai nga i akehe tipa si rugu rani, si fu wasa furani, na ki fu maabangirise furani.

Ono ka si nidu nga Ziazia Kekeapai gbua nga gu buku i akehe ngba wene gene watadu si gbua nga buku sa dagba gu dungu ziazia abuku du ti ni, ya mo ka mo kido kutini tipa si nungusi ro na gamo aborokporo si ki vura du vurũ nga gupai si agumbaha, si kia ti gupai mo aberãha nga si ru? Ka Ziazia Kekeapai nidu gbua nga buku apaturẽ, ya mo ka mo gbia wasa gbiati maabangirise be agu amokido du rogoho?

Agu aboro naima wirika Ziazia Kekeapai, i ima ida kuti gupai na kpotoyo yo dunduko nga si nga Fugo Mbori. Tipagine? Gini apai nasa gupai nga Ziazia Kekeapai du kia ti kura abuku? Ani nahõpai bero mo makia agu apai bisue du tipa Ziazia Kekeapai nga gu nasaha si du kia nga gu du rogo gu kekeapai naye tifuo gere.