Oni Raki Wa “Tata Aboro” Rogo Gi Gbegberẽ Zegino Re

“Agi yo re . . . ki nikusi he ya aboro kura ringara nangia yo, ni tata aboro ri gi zegino re.”​—EB. 11:13.

1. Ginipai Yesu apehe tipa apefuoko nibipa zegino?

YESU aya tipa gako abawiriki wee: “Agi yo du zegino re.” Ono ko ki ya berewe wee: “Aboro zegino nga yo te, wa kina re adu nga ni boro zegino ya.” (Yo. 17:11, 14) Sidu, Yesu aima yugo gu bangiriba gbaiga si aida gako ndikidi abawiriki du rogo nibipa “gi zegino” du mbori he nga Satana re. (2 Kor. 4:4) Wa vura duhe nga i naraka rogo gi gbegberẽ zegino re, si aidanga i du ni aboro zegino te. Sidu agu apai du tipa yó rogo gi zegino re, si naida si duwa ga ‘nungunungu aboro, na tata aboro.’​—1 Pet. 2:11.

I Araki wa “Tata Aboro”

2, 3. Tipagine rengbe ani ka ya ti ni wee Enoka, Noa, Abarayama gbiati Sara araki wa ‘aboro kura ringara, nitata aboro rogo gu ringara i aata rogo’?

² Bakuru kusayo, ga Yekova ruru amoyambu adu kia ti agu azanga sinombori i aaraka dagbayo. Mbata fu Ime Akangbii, Enoka na Noa “anata na Mbori.” (Bam. P. 5:22-24; 6:9) I dunduko adu ningangara abatungusipa ga Yekova sapangbanga kurii ga Satana gbegberẽ zegino. (Oni gedi 2 Petero 2:5; Yuda 14, 15.) Si nga ndu gupai Enoka “angba angba [ti ni] bangiri Mbori” na Noa “ki du ziazia dagba arika ngbatungako” yo.​—Eb. 11:5; Bam. P. 6:9.

³ Ani ima rengba ka wirikapai ti gu kpiapai nangia ga Abarayama na Sara. Ho Mbori ayani fuyo wee i guari Ura yo rogo gu ringara nangia ga aKasado, i agisangba ko. I aima ida ka mbu kpuyo ka raka rogo kungbo ringara. (Bam. P. 11:27, 28; 12:1) Gu mokedi nangia Pauro akepai ki yaa: “Mbiko idapase Abarayama agi sangba Mbori ho i ayambu ko ni, ko ndu ku rogo gu ba ko ka dia ha ni gako; ko ki guari ka ndu, ka ko aina nga ho ko andu ku ho ni ya. Mbiko idapase ko amoi kporo rogo gu ringara nga ga kidohe, wa rogo gu ringara nangia nga gako ya, ki nisungu rogo abamburoko na Yisaka na Yakoba a, nangia adikumbo gu kidohe wa sa na ko.” (Eb. 11:8, 9) Pauro aya berewe tipa gu ga Yekova ruru amoyambu re wee: “Agi yo re nakpi rogo idapase, ka i adia nga akidohe ya, ono i abi he mbata yo ki nipoi kuti ni tuturũ, ki nikusi he ya aboro kura ringara nangia yo, ni tata aboro ri gi zegino re.”​—Eb. 11:13.

Zahe fu AYisaraere

4. Gini zahe Yekova afuhe fu aYisaraere mbata fu ko fu ringara fuyo?

⁴ Ho atita Abarayama nga aYisaraere atona ka nge ni, Mbori asayo ni rikaaboro, ki fu andiko fuyo gbiati ringara. (Bam. P. 48:4; Pa Rug. 6:1) Si aidanga bangiri aYisaraere go ti gupai nga gu ringara re angia ga Yekova te. (Pa Mot. 25:23) Wa i avura ka mangasunge na gu ringara re, si aidi i irisi ga Yekova arugute. Kurigure, si aidi i tingidi gupai nga “boro anye nga ni ungani bambiko kina riahe te,” na gu wene ahe naadu beyo dunduko, si anaaye be Yekova. (Pa Rug. 8:1-3) Si nangia ndu gupai Yekova afu zahe ti ni fuyo mbata fu ko fu ringara fuyo ki yaa: “Ho Yekova gaoni Mbori ka ye ni na oni ku rogo gu ringara ko azunga he fu abaroni, nga Abarayama, na Yisaka, na Yakoba, ka fu he fu roni, nga bakere abaakporo ni wene he, nga gu oni adudua nga ha ya, na abambu hi ahi na wene ahe, nga gu oni ahisa nga ha na ni ya, na agu adueime ni getekegeteke he, oni ageteka nga ha ya, aati bakakue na agua aeraya, nga gu oni arũka nga ha a ya, oni aniri he ki nimbiki, oni ki nibanda tironi bangironi ka go ti Yekova.”​—Pa Rug. 6:10-12.

5. Tipagine Yekova agindigo aYisaraere ti ni, na gini vovo rikaaboro ko asiayo?

⁵ Gi zahe re aadunga gbua nga kungbopai te. Ti regbo Nemaya, riko nga ga aRevi atingidi gupai nizee namangi tifuo aYisaraere di Ringara Mokido. Tifuo aYisaraere tona kaa raka tii wene abambu na kidu na wene ariahe gbiati ime kakuẽ beyo kpaima, “i ari he, ki mbiki, ki nikindigi akindiga.” I asamungu kuti Mbori, na kini imi agu anebi ko aakeda yó i naafu zahe fuyo. Si du Yekova agindigo yó ti ni kube avurayo. (Oni gedi Nemaya 9:25-27; Osea. 13:6-9) Kusa, ho aRomo aazoga aYisaraere ni, aYisaraere aimi Masiya nga guko Mbori akidopa ko! Yekova agindigo yó ki sia vovo rikaaboro, nga agu aYisaraere nga ga toro yó.​—Mt. 21:43; Amo. 7:51, 52; Gara. 6:16.

“Aboro Zegino Nga yo Te”

6, 7. (a) Ginipai Yesu apehe tipa apefuoko nibipa zegino? (b) Tipagine si aidanga ndikidi aKristano du ti ni nipapara gi ga Satana zegino re ya?

⁶ A wa i niyuguhe ti tonatona gi kekeapai re, Yesu Kristo nga rii gu dungurati nga ga aKristano aima yugo gupai gbaiga nga si naida apefuoko du nikparakparayo ti gi ga Satana gbegberẽ zegino re. Ngbutuko mbata fu kpioko, ko aya fu gako abawiriki wee: “Ka oni du ni aboro zegino, ka aboro zegino nakpi nyemu gayo aboro; ono bambiko wa adu nga oni ni aboro zegino ya, mi asia roni asia zegino, si aboro zegino asoga roni ti ni.”​—Yo. 15:19.

⁷ Kusa, aKristano atona kaa maapai kini raki rogo dungu aba rogo zegino ho aRomo azogarago ni. Si aidi ka akristano dunga nipapara zegino ya. Si aidi i ká gu gene raka nangia ga agu aboro naadu patiyo. Si aidi i du nikparakparayo rogo agu aba dunduko i aaraka rogoho. Agarã wa 30 tifuo kpio Yesu, gu mokedi nangia Petero akepai fu agu aKristano naadu rogo bambata sa kama agarã ki yaa: “Abadiangba, mi nazungadi roni wa du nungunungu aboro nga oni, nga tata aboro, oni né gu nyemuahe nga ga borose, nga gu naso vura na mbisimo. Gaoni mangapai ki du ni wene he ku bangiri aGendiria.”​—1 Pet. 1:1; 2:11, 12.

8. Ginipai bake kuru apangbanga sa agumbaha nayugo gupai nga agu aKristano naadu rogo bambata sa kama agarã aadunga ni aboro zegino te?

⁸ Agu aKristano naadu ti regbo gu zogarago nangia ga aRomo, i araki wa “tata aboro.” Bake kuru apangbanga sa aya wee i anaarungosi yó nikerehe dedede. Ko aya i anaakitangbaanga yó ki ya i aidanga kuti Mbori te mbiko i anaarimisongo tiyo kurogo agu apumbo nangia ga ziree pambori te. I anaayamba yó nga “asogo ngbatunga aboro” bambiko i anaakodanga tiyo na agu aboro naadu patiyo rogo agu ambaro na apumbo nangia ga apambori nahi be ziree iriso gbiati wasiwasi mangaapai te.

Ka Ani Kanga Kuti Gi Zegino Re Ya

9. Wai ani ayugo gupai nga ani asoganga ngbatunga aboro te?

⁹ Ginipai tigaha du tipa rani areme? Nibipa “gi gbegberẽ zegino re,” si naida ani adu a wakina agu aKristano naadu mbata. (Gara. 1:4) Mbikopa du ani nikparakpara rani, si nasa dungu aboro ka i rugunga tiyo na gaani gene raka ya. Gu kura aboro nasoga rani asoga. Ono ani “asogo ngbatunga aboro” wa kura aboro aberãha te. Ani nayugo gupai nga ani nakpinyemu aboro akpi ni ndu ani kaa tungusa wene pangbanga nga ga ga Mbori kindo fuyo kini tanga nani ti akporo dunduko. (Mt. 22:39; 24:14) Ani natungusapai tipa ga Yekova Kindo mbiko ani idi kuti gupai nga si nika gberesa gu zogarago nga ga awiri aboro naabaha barambeda. Gi Kindo du Yesu nga gaha Bakindo re, si nikaye na ruru vovo zogarago.​—Dan. 2:44; 2 Pet. 3:13.

10, 11. (a) Wai ani amangasunge na gi zegino re ku gene? (b) Gini bete agene aKristano amanganga sunge na gi zegino re dudunguro ngbaha ya?

¹⁰ Wa duhe nga gi ga Satana zegino re nika digo barambeda, awere nga gu regbo si aida ani asadi kaa raka fiõfiõ raka te. Si naida ani mangisunge na agu afugo Pauro nayaa: “Ono gumba mi gere fu roni, ya rago guru, ya fuo gere agu yo . . . nangbe ahe, ki du wa ka he adu nga be yo ya. Agu yo namanga pai na gi zegino re ki du wa ka i aka nga kuti pa gi zegino re ya; bambiko pa gi zegino re nago ago.” (1 Kor. 7:29-31) Ono wai ani amangasunge na zegino areme? Ani namangasunge na zegino nimanga ani sunge na gu vovo birĩ-ino-mangaahe nasona kumbatayo na aũfugo tipa kaa gbandaka wene pangbanga nga ga Kindo rogo zegino dunduko. Na ani namangasunge na gi zegino re a tipa kaa gbia marã u undo rani. Ani nangbe kina agu ahe zingoho amanga rani rogo raka yo. Ono ani akanga kuti gi zegino re watadu ka rimiso tirani kurogoho yo dudunguro te. Gipai re nayugo gupai ngawee, anga marã, agu ahe du berani, gaani sunge, nga agu ahe nyakipaha gbe furani rogo gaani raka yo te.​—Oni gedi 1 Timoteo 6:9, 10.

¹¹ Gu kura gene aKristano amangasunge na zegino ngbaha ku gene, si nga ka zanga nyakasapa kina pa bakere wirikapai. Badungu aboro rogo zegino naberã gupai nga, si naida boro nyasi yunivasiti ka gbia wene sunge, tipa kaa zio rorõi marã. Ono wa ngia ani tata aboro, ani aberãnga wa yó te. Ani amanganga ome tipa ka ‘gbata bakere apai tipa tirani’ te. (Yere. 45:5; Rom. 12:16) Wangia ani apekefuo Yesu, si naida ani mangisunge na gu gako rugute nayaa: “Ka oni dí nga ngbiti ahe ya; bambiko i aringbisa nga ungaboro na gani ahe te.” (Rk. 12:15) Si naida paranga aKristano tingidi gupai nga, gupai nyakipaha gbe nga iriso Yekova. Si naida i wirikipai rengbe arengba tipa ka ngerafuo tiyo na tipa wa ka i du na rengba beyo ka mangasunge fu Yekova na ‘kpotoyo yo dunduko, na mbisimoyo, na omeyo, na berãyo dunduko.’ (Rk. 10:27) Ka i mangihe wo, i nika ‘kumuko fu Mbori.’​—Rk. 12:21; oni gedi Matayo 6:19-21.

Ka Oni Bakingo Bangironi Tipa Aũzegino Ya

12, 13. Wai pa manga ani sunge na agu afugo Yesu du rogo Matayo 6:31-33 akpara rani ti aboro zegino?

¹² Gu bipai du ga Yekova amoyambu nani tipa aũzegino, si kia ti ga aboro zegino. Yesu aya fu apefuoko wee: “Ka oni wísigi nga pai ki ya, ‘Gine ani ka ri he?’ na, ‘Gine ani ka mbira ha?’ na, ‘Gini roko ani ka ukadi tirani na ni?’ ya. Bambiko aGendiria nagbata agi ahe re dunduko; bambiko Baroni du ngbangbaturũ yo ini he ya oni nara mbiko agi ahe re dũ. Ono oni gbáta gako ngbi mbata, na gako rurupai; i ki kpamia agi ahe re dunduko fu roni kuti ni.” (Mt. 6:31-33) Mbiko agu apai namangi rani rogo gaani raka, badungu rani naima da kuti gupai nga gupai Yesu apehe re, rengo du. Gu Barani du ngbangbaturũ yo nafu agu ahe afu ani aidaha ti aregbo dũ.

¹³ “Sinombori gbia kuti zereda nga bakere mosoro.” (1 Tim. 6:6) Ga aboro zegino bipai tigayo kia. Nikpiapai, ho paranga aboro amanga rogatise ni, dunguyo naida kadu na agu ahe dunduko i aidaha, abambu nga gu du na ngbatunga ahe dunduko rogoyo, wene tarambiri, na gu vovo aũsunge nakura wa kompiuta, terefuni, na agu akuraha. Ono tipa agu aKristano tigayo naraka wa tata aboro, i naza tiyo aza ti bakere nyemu ahe, kini ngbe kina gu daada tipa ka undoyo. Nirengo, si niwenepai ka bi gupai nga dungu aKristano agberesanga gayo regbo na gayo marã gene ahe yo te, i namangasunge fu Yekova gbe na gu regbo re gbiati omeyo. Aguyo namangasunge ni abazakigene, aguyo Betere yo, aguyo namangasunge ni agu ababiapai ninaata ata watadu ni amokedi. Nairiwo gu ngbarago du ani nani tipa gu sunge awirinarani amangaha fu Yekova re!

14. Ginipai rengbe ani ka wirikaha ti gu ga Yesu sanza du tipa bami tunga?

¹⁴ Rogo gu ga Yesu sanza du tipa bami tunga, ko aya, “berã pa zegino, na gu nanga he nga ga ũkumuko” ima rengba ka kandasi ga Mbori pai kpotorani yo, si ki sa gupai nga ka ani zuku nga ya. (Mt. 13:22) Ka ani aaraka wa tata aboro rogo gi zegino re, si nika undo rani ani ne gu gbina re. Kurigure, si naundo rani bangirani du “ni ruru he” watadu ani gbe berãrani tipa ga Mbori Kindo ki moihe rogo bambata ba rogo gaani raka.​—Mt. 6:22.

“Zegino Napaya Apaya”

15. Ginipai gu mokedi nangia Yoane apehe tipa zegino?

¹⁵ Gu nyanyaki ndupai du ndikidi aKristano ti ni wa “tata aboro” rogo gi zegino re nga, i ima ida kuti gupai nga Yekova ima mbeda ka gberesa gi ga Satana zegino re. (1 Pet. 2:11; 2 Pet. 3:7) Ani nayugo gupai nga gi zegino re nika digo barambeda ngba gu gene ani araka ngbaha. Gu mokedi nangia Yoane arugu akurako aidipase ka i kpingo nyemu zegino watadu agu ahe du rogoho ya, bambiko “zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni nye anye kindi.”​—1 Yo. 2:15-17.

16. Wai rengbe ani ka yugo gupai nga ani kia?

¹⁶ Yekova aya fu aYisaraere wee, ka i gisangbako, i nikadu ‘ni gako wene ũkumuko dagba kura rika aboro zegino dunduko.’ (Gate 19:5) Ho aYisaraere anaagiasangba Mbori ni, gayo iriso na gayo gene raka anidu kia ti ga kura aboro. Wakina gure areme a, Yekova ima kpara aboro i du nigako yó, nga aguyo du kia ti aboro gi ga Satana zegino re. Ziazia Kekeapai nayawee: “Niraba rani ya, ani ta mbu agu apai zanga sinombori na gu nyemuahe nga ga zegino nidu na rugatise, na rurupai, na sinombori, rogo gi zegino du awere re; ki ningere tipa gu betedi maabangirise nga ye gu taarimo nga ga gaani bakere Mbori na Batasirani Yesu Kristo; nafu tiko tipa rani, ya ko tumo rani be irairaapai dunduko, ki nigirisi gu rika aboro tipa ko i du ni gako yo, nidu ngangarã tipa manga agu apai ngba angba.” (Tito 2:11-14) Agi “aboro” re nga mbedimbedi aKristano na ga Yesu amirioni “kura akandoro,” ko aundoyo na kini songodi yó.​—Yo. 10:16.

17. Tipagine mbedimbedi aKristano na kura akandoro nika abiranga tiyo ti ni mbiko wa i araki nitata aboro rogo gi gbegberẽ zegino re ya?

¹⁷ “Gu betedi maabangirise” du fu mbedimbedi aKristano nga ka zogorago na Kristo ngbangbaturũ yo. (Rev. 5:10) Gu maabangirise tipa kura akandoro nga ka raka nyeanye kindi auru kpotosende. Ho gu maabangirise re nika digiso tihe ni tipa kura akandoro, i adunga berewe nitata aboro rogo gi gbegberẽ zegino re te. I adu na wene abambu beyo na wene ariahe gbiati mbirimbiri ahe. (Tam. 37:10, 11; Yes. 25:6; 65:21, 22) Bangiriyo agonga ti Yekova wa bangiri aYisaraere ago tiko te. I nikaa tingida gupai atingida nga agu ahe dube yó dunduko, Yekova du si aye beko nga gu “Mbori du ri kpotosende dunduko.” (Yes. 54:5) Mbedimbedi aKristano watadu kura akandoro abiranga tiyo mbiko wa i araki nitata aboro rogo gi gbegberẽ zegino re te.

Gaoni Karagapai Nga Gine?

• Rogo gini gene gu ruru aboro nadumbata araki wa tata aboro?

• Wai gu sino mangapai nga ga agu aKristano nadumbata adu nibipa zegino?

• Wai gu ndikidi aKristano amanganga sunge dudunguro na gi zegino re ya?

• Tipagine ani ka abiranga tirani ti ni mbiko wa ani araka nitata aboro rogo gi gbegberẽ zegino re ya?

[Gu sura du ti kpewaraga 21]

Agu aKristano nadumbata arimisongo tiyo kurogo zuũ na wasiwasi ambaro te