Wai Rengbe Ani Ka ‘Súnguda Mbori’?

1. Ginipai rengbe ka sarani ani zingi kuti Yekova?

GA SATANA zegino arimi ku rogo gaha yangara arame rogo gu garã nangia 1914 ho Yesu adani ni bakindo ngbangbaturũ yo. Vura amangi ngbangbaturũ yo Yesu ki ba Satana na gako adaimona ku sende no ni sangbanaha. (Oni gedi Yugoti 12:7-9.) Satana ima ino gupai nga “kina bete rago nye fu ko.” (Yugo. 12:12) Ono dungu agarã ima susa wa gu “bete rago” re atona, na gu kura aboro ima rengba ka berãha nga, gu yangada arame re ima dia gbanga regbo. Wa ani asungudo Yekova tipa ko mangipai, ya mo ani ima zinga nga ani aidanga ka hipai berewe te?

2. Gini asanahe ani nika wisigopai tipaha rogo gi kekeapai re?

² Zanga zerangbaduse ima rengba ka sarani ani mangi gupai ani ka bira tirani ti ni kusa. Ginipai rengbe ka undo rani ani du na gbanga hipai? Gi kekeapai re nika undo rani ani mangihe wo ka ani karagapai kuti agi asanahe re. (1) Ginipai rengbe ani ka wirikaha tipa zerangbaduse ti gu kpiapai nangia ga gu nebi nangia Mika? (2) Gini gopai nika yugo gupai nga digido gi yangara arame re ima da? (3) Wai rengbe ani ka yugo gupai nga ani na ngbarago tipa ga Yekova gbanga hipai?

GINIPAI RENGBE ANI KA WIRIKAHA TI GA MIKA KPIAPAI?

3. Ginipai namangi Yisaraere yo ti rago Mika?

³ Oni gedi Mika 7:2-6. Gu ga Yekova nebi nangia Mika abi gupai nga aYisaraere atona ka zera yeye rogo toro yo, na ti rago gu Bakindo nangia Aza i aima zera gbegberẽ rogo toro yo. Mika aringbisi agu aYisaraere naadunga ni ruruyo ya kuti “nguruza” na “ndugu kiwe.” A wa nguruza watadu ndugu kiwe narengbe ka oga gu boro nandu rogoho, kinawo a agu aYisaraere re anaamanga gbegberẽ fu aboro. Gu iraira mangapai re aakio kina ku mbatayo na ka nyemuse adunga berewe dagba aborokporo ya. Fuo ino Mika gupai nga pai ho ka ko mangihe tipa gipai re te, ko akpari fu Yekova na ki pidi ko tipa ko mangipai kutini. Mika adu na kido nga Yekova nika mangapai amanga kuti gipai re ti gu regbo ngbatiko.

4. Gini akpakarapai ani naagbia tirani na ni?

⁴ Wakina Mika, ani naraka dagba agu aboro naberã kina patiyo. Dungu aboro nga “airazanga ziaziapai, airasakparakpa.” (2 Tim. 3:2, 3) Si naba kina gberarago tirani ho gaani abadiasunge, akuarani sukuru yo, na gaani amurakporo aberã kina patiyo ni. Wa vura duhe wo, kura ga Mbori amoyambu kinaho du na kpakaraapai tiyo. Yesu aya gako abawiriki nika gbiatiyo na asogote be gayo aborokporo, na ko amangisunge na afugo wakina gu du rogo Mika 7:6 tipa ka yugo nyakapa gako pangbanga na ni. Ko aya: “Mi aye ka maa kangu dagba ba gude na wirini, na dagba degude na nani, na dagba de na nakumbari; avura boro angia kina gani aborokporo.” (Mt. 10:35, 36) Nagberẽhe nga boro nihi arungosi na sawiahe be kina agumeni nga aguyo adu nga na ní rogo idapase yo ya! Ka ani agbiatirani na ngbatunga kpakarapai wa gure, ka ani mbunga tirani fuhe ya. Kuba gure, si naida ani nye ni rururani na kini pidi Yekova tipa ko mangipai tipa gipai re. Ka ani asanako tipa gako undo, ko nika fu gu ome na tatamana nika undo rani tipa ani hipai.

5, 6. Wai gu Yekova afu maku fu Mika, ono ginipai Mika aabingoho ya?

⁵ Yekova afu maku fu Mika tipa gako hipai. Mika abi wai gu gbegberẽ zogarago nangia ga Bakindo Aza adigi na wai ko akpi. Ko abi wai wiri Aza nangia Bakindo Izikiya azogorago kubako na ki karaga ndikidi irisombori kubaha. Gu sangbanebi Yekova agumbaha vurube Mika tipa gbarasa Somorona adigisitihe ho aAsuro aru nguru ni pati gu kindo nga ga aYisaraere naadu ku nodiyo yo.​—Mika 1:6.

⁶ Ono tie, Mika aabingo agu apai dunduko Yekova agumbaha fuko si nidigisitihe te. Ni kpiapai, Mika aya: “Ti yangara arame ya gu bagangara nga ga ga Yekova bambu i ambákada ha ni bagbanga ha ki susi abaagangara dunduko, si adú ni tumbatumba ha ku ari ki susi agangara dunduko; aboro andú koyo, dungu arikaaboro ayé, ki ya: ‘Oni yé, ani ndú ku ri ga Yekova bagangara yo.’” (Mika 4:1, 2) Mika aima kpi mbata fu gu sangbanebi re digisitihe. Wa si avura du wo, ko aima diaberã ka nye ni ruruko fu Mbori dati kpio aboro ki vura nimangi kina gini apai patiko vurũ. Nibi gipai re Mika aya: “Aboro dunduko ata ni ba sa sa na rimo gayo mbori, ono ani atá na rimo Yekova gaani Mbori nye anye kindi.” (Mika 4:5) Mika adu na zerangbaduse ti regbo kpakaraapai bambiko ko adu na kido nga Yekova nika digiso gako akidohe nabaha dunduko. Gu ruru nebi re akido kuti Yekova.

7, 8. (a) Gini nduapai du berani tipa kadu na kido kuti Yekova? (b) Ginipai nika sa regbo si susi ni ipo bangirani?

⁷ Ya mo kina gu bangisa kido re du ani na ni kuti Yekova? Ani na wene nduapai berani kadu gu kido re. Ani ima bi bambata digisidigisi papara ga Mika sangbanebi. Rogo “yangara arame” amirioni aboro dagba angbatunga yo na afugo yo ima dunguratiyo kurii “gu bagangara nga ga ga Yekova bambu.” Wa vura duhe nga airisi Yekova adu mbata dagba agu angbatunga nanaasoga tihe, i ima ‘táka gayo abasape ni marã sopabino,’ na i “awírika nga pa sovura” te. (Mika 4:3) Si ni pa momu furani kadu dagba ga Yekova zezeredi aboro yo.

⁸ Si nirengo nga, ani naida Yekova digisi gi gbegberẽ sino raka re ni ipo. Ono wa vura duhe wo, si naida ani du na zerangbaduse, na kini bi apai kina wai ko abihe. Ko ima sia gu uru ko nika sapangbanga aboro vurube “gu kumba ko aasia paha fu ko,” nga Yesu Kristo. (Amo. 17:31) Ono mbata fu gipai re mangi, Mbori nafu momu fu rikaaboro dunduko tipa i gbia gu “inahe nga ga rengo,” na ki mangipai kutini tipa ka bata. Ga aboro raka ngbapai awere. (Oni gedi 1 Timoteo 2:3, 4.) Ka ani aundo aboro i gbia gu inohe nga ga Mbori, ga Yekova uru sapangbanga nika ye ni kina boro ipo bangirani. Nirengo gipai re nika manga wa kina ikpirogumba. Nairiwo gu ngbarago ani kadu na ni tipa tungusa ani pai kakaka ho gu regbo re kada ni!

GINI APAI NIKA YUGO GUPAI NGA DIGIDO ZEGINO IMA MBEDA?

9-11. Ya mo 1 ATesaroniko 5:3 digisitihe? Oni sakinga rogoyo.

⁹ Oni gedi 1 ATesaroniko 5:1-3. Barambeda ku mbatayo aboro nika ya: “Zereda, ngba barani angba”! Ka ani aidanga gipai re tunguo rani atunguo ya, si naida “ani nikparia rago ki nirugu tirani.” (1 Tesa. 5:6) Tipa ka undo rani ani nangera angera kindi rogo toro yo, ani wisigingo bete apai tipa agu apai nika sa gupai nga aboro takipande pazereda na ngbabase.

¹⁰ Fuo nyasa gu kikindigi avura ue namangi rogo zegino, aboro aida zereda. Fuo bambata vura, i asigira gu riigbu nga Kodatise Nga ga Aringara na gu maabangirise nga si ye na zereda. Kusa fuo gu ue vura nga ga zegino, kura riigbu akuru nga Yu-eni na gu maabangirise nga si nika ye a na zereda ku rogo zegino. Aboro birĩ-zogarago na abarumbatayo rogo pambori aamaabangiriyo nga agi ariigbu re nika ye na zereda fu aboro. Ni kpiapai, rogo 1986, Yu-eni aya gu garã re angia garã nga ga zereda rogo zegino dunduko. Rogo gu garã re, abazogo rogo dungu aringara na agbia apambori adungura tiyo ku rogo gu bakere Kanisa Nga ga Katoriko rogo gu gbata nga Assisi Itaria yo ka kpara tipa zereda.

¹¹ Ono tie, anga gu zereda na ngbabase i afura tipaha re na agu akura i nafura tipaha nangia digisidigisi gu sangbaanebi du rogo 1 ATesaroniko 5:3 te. Tipagine pe ani gipai re ti ni wo? Bambiko gu “gberãngbi” i nagumba paha rogoho si ata manganga te.

12. Ginipai ini ani he tipa gupai i nika takapandehe nga “Zereda, ngba barani angba”?

¹² Ada nika takapande gupai nga “Zereda, ngba barani angba”? Ginipai agu agbia pambori naya i nga aKristano gbiati gu kura apambori nika mangaha? Wai kura abazogo ni kadu ni kodikodi yó ku rogo gipai re? Ziazia Kekeapai afura nga tipa gipa re te. Gupai ini anihe nga ka i vura takapandepa gipai re wai watadu ka si vura ruaru bangiri aboro wai, anga rengo ni kangiaha te. Gi zegino re nika nye kindi kina kutiibe gu ome nga ga Satana. Si ima zirã na si nika nye kinawo. Si adu furani ni gbegberẽpai ka ani zanga banda tirani ti gi ga Satana zogarago re na ki idi kuti gi gako takapande apai re!

13. Tipagine amaraika na ká ti ni na agu awege du tipa gbarasahe?

¹³ Oni gedi Yugoti 7:1-4. A wa ani asungudo gu sangbaanebi du rogo 1 ATesaroniko 5:3 si digisitihe, amaraika zadi agu awege nga ga bakere gberãngbi. Ginipai i asungudoho? I nasungudo gu nyanyakipa pai gu mokedi nangia Yoane afura tipaha nga pa dikohe ti gu mbedimbedi yo “nga ga gaani Mbori amoyambu.” Ho i nika dikohe ni ni yangaraha ti mbedimbedi aKristano, agu amaraika re nika za beyo ti gu wege nga ga gbarasahe. Ginipai nika manga fuo gure?

14. Ginipai nayugo gupai nga regbo gbarasa Bakere Babera ima Mbeda?

¹⁴ I nika gbarasa Babera Duna Bakere Ome Ti Ni, nga ziree pambori. “Aboro, na rimbasa aboro, na arikaaboro, na ngbatunga afugoyo” adu nga na ome tipa ka undoho te. Ani nabihe abi nga digidoho ima mbeda kada. (Yugo. 16:12; 17:15-18; 18:7, 8, 21) Nirengo, apangbanga nayugoho ayugo awere nga aboro nabisira agbia pambori abisira tipa agu apai i mangaha. Wa vura duhe wo, agu abarumbatayo du Babera yo abingo tiyo nga i rogo kerepai te. Nairiwo gu iraira bipai du yó na ni re! Tingbafuo gu takapandepai nga “Zereda, ngba barani angba” re, aboro birĩ-zogarago nika zubo ziree pambori na ki wege he kusayo dunduko. Ani abingo Bakere Babera berewe te! Nirengo, si furani ni wenepai tipa ani sungudi ka bi wai gipai re nika manga.​—Yugo. 18:8, 10.

WAI RENGBE ANI KA YUGO GAANI TAMBUAHE TIPA GA MBORI ZERANGBADUSE?

15. Tipagine Yekova nahipai ti ni tipa ngbanga regbo?

¹⁵ Wa vura duhe nga aboro airisanga rimo Mbori te, ko na nasungudo gu regbo rẽarẽ tipa ka mangapai kutini. Yekova aidanga ka gbarasa agu aboro du na wene ngbaduyo yó te. (2 Pet. 3:9, 10) Ya mo kina gu bangisa bipai re du ani na ni? Mbata fu ga Yekova uru da, ani rengbe ka yugo gaani tambuahe tipa gako zerangbaduse rogo agi agene du kusende re.

16, 17. (a) Tipagine si aida ani undo agu aboro ti ni naima zera ti iriso Yekova? (b) Tipagine si aida i karagatiyo ti ni ni ipo fuo Yekova?

¹⁶ Oni undo agu aboro naima zera. Yesu ape gupai nga si ni pa ngbarago ngbangbaturũ yo ho ingiingi kandoro akaraga tiru ni. (Mt. 18:14; Rk. 15:3-7) Si tie ziazia nga, Yekova naberãpa agu aboro aberã nayugo gayo nyemuse tipa rimoko, ka si vura du vurũ nga i ima zera ti irisoko. Ho ani aundo agu aboro re ni i karagatiyo ku rogo dungurati, gure nga ani sa Yekova na amaraika i du na ngbarago.

¹⁷ Ya mo mo dagba agu aboro naima zera? Si rengbe kadu nga boro amangi ro na pai rogo dungurati na mo ki mbu koda tiro na ga Yekova riigbu ni sangbana gipai re. Wa duhe nga bete aregbo ima susa, mo sananga tiro nga: ‘Ya mo gimi raka ni wenehe awere, na mi na ngbarago? Ya mo Yekova du namangi re na pai, watadu kpakpa boro? Ya mo Yekova amangingo re na pai ka imisa re?’ Nirengo, Yekova naamanga kina agu apai du ni wenehe tipa rani dedede. Ka si vura du nga ani arakanga kuti gaani kparatise fuko te, ko naida ani gbia ngbarago agbia ti gu wene apai ko amangaha. (Yak. 1:16, 17) Ga Yekova uru nika da barambeda. Awere nga gu regbo si aida ani karaga tirani fuo gu Barani du ngbangbaturũ yo na ku rogo dungurati nga gu wene ba si aida ani du rogoho ti gi yangara arame re.​—Pa Rug. 33:27; Eb. 10:24, 25.

18. Tipagine si aida ani gisangba agu aboro ti ni nangbembatayo furani?

¹⁸ Oni undo agu aboro nangbembatayo rogo apai yo. Nidu Yekova nga wene Babanda akandoro, ko nangerafuo rani na kini banda rani. Ko ima sia Wiriko ko du ni Baira Babanda akandoro. (1 Pet. 5:4) Agu abaakumba du rogo agu adungurati bangehe naima susa 100,000 nangerafuo ga Mbori akandoro ni basasa dunduko. (Amo. 20:28) Ka ani agiasangba agu abaakumba re wa i angbembatayo rogo apai yo, gure nga ani nayugo gaani tambuahe tipa agu apai dunduko Yekova na Yesu namangihe furani.

19. Tipagine si aida ani mbedi ti ni na akuarani?

¹⁹ Oni mbedi na akuaroni. Rogo gipai re yo nga gine? Ho i azubo abanzengere ni i kidu ni gbandakagbandaka yó, i nadunguratiyo dunduko ku rogo bangisa ba sa tipa ka fõ gu ome avurayo nika rẽnga na ni ya. Satana nazubo ga Mbori aboro kina ku mbatayo. Awere nga gu regbo si aida ani naasovura kuti awirinarani te. Si nga gu regbo si aida ani mbedi koyo du akuarani ni, ki zanga kaa maaberã rani fuo gayo azangarengba, na kidu na kido nga Yekova nika ngbe angbe furani ku mbatayo.

20. Ginipai si aida ani mangihe awere?

²⁰ Ani dunduko ningerenga angera kindi rogo toro yo na kini sungudi Yekova! Ani sungudi gu regbo na zerangbaduse i nika ya “Zereda, ngba barani angba” na ho i nika dikohe ni ni yangara ti mbedimbedi aKristano. Tifuo gure, agu amaraika du biama nika za beyo ti awege gbarasahe, na Bakere Babera kidu ni gbarasigbarasihe. Wa ani asungudo gi iriwopai re si mangi, ani degenga turani adega kuti agu apai agu aboro nangbembatayo rogo ga Yekova riigbu nikaa gumbaha. Ani mbedi na akuarani ki ká na gene be bakitingbanga na adaimona. Awere nga gu regbo si aida ani mangipai kuti gupai bake atambuahe agumbaha nga: “Oni nyáki, kpotoroni yo ki ngarã, agu roni dunduko namaa bangironi kuti Yekova!”​—Tam. 31:24.