Oni Wiriki gu Kpiapai Nga ga Anebi​—Mika

1. Gini sanahe si awira gupai nga Mika awakanaha berãko yo, ono tipagine gako tungusapai aadunga ti ni gbua ya?

¹ ‘Digido gi gbegberẽ zegino ani araka rogoho re nika da ti gini regbo?’ Isoke, gu nebi nangia Mika aima wakana gu sanahe re berãko yo ho ko aatakapande ga Yekova sapangbanga ni kurii agu aKindo nangia ga Yisaraere gbiati Yuda. Ono tie, gako tungusapai aadunga gbua te. Rogo gu garã nangia 740 M.B.K., mbu Mika kindi ni ungako, gupai Yekova agumbaha nisangbanebi tipa Somorona ada ti rengo. (Mika 1:6, 7) Kusa, i agbarasi Yerusarema rogo gu garã nangia 607 M.B.K. (Mika 3:12) Wai rengbe ani ka wirika Mika ti gi gaani regbo re wa ani apido Yekova ko ye ka sapangbanga gi zegino re?

2. Wai, na tipagine du ani ti ni na zerangbaduse wa ani apido ga Yekova uru?

² Oni Du na Zerangbaduse: Mika akepai ki ya: “Ono tipa re, mi angéra koyo du Yekova ni, mi asúnguda Mbori nga gi bata.” (Mika 7:7) Anga Mika asungu asungo gbua ki kpira beko kaa pido digido gu zegino ko atakipandehe te. Ko aamangasunge kakaka ni ga Yekova nebi. Wa ani apido ga Yekova uru, si naida ani ‘naamanga ziazia apai na sinombori’ kakaka. (2 Pet. 3:11, 12) Ga Yekova zerangbaduse nambu regbo fu aboro tipa i saberã. (2 Pet. 3:9) Sidu, si naida ani mangipai kuti gu rugute du rogo Ziazia Kekeapai nga ani wiriki gu zerangbaduse nangia ga anebi.​—Yak. 5:10.

3. Tipagine si aida ani sana Yekova ti ni tipa gako ziazia toro?

³ Oni Kido Kuti gu Ome Yekova Afuhe: Wa si avura du vurũ nga gu sunge Mika aamangaha aima nyaka, ko angere kina koyo du Yekova ni tipa ko fu ome fuko tipa ko mangihe. (Mika 3:8) Yekova ima inoho nga ani naida aida na gu ome ko afuhe, si du ko angarasa rani ti ni rogo Fugoko nga ani kido kuti gu ome ko afuhe. Ko nafu ome fu aboro kpaima tipa i digisi agu asunge nga ga siokrasia du yó na ni. (Tam. 84:5, 7; Yes. 40:28-31) Ya mo Yekova afunga ome foro tipa mo mangi ziazia sunge? Ya mo mo nakpara fu Yekova dedede kaa sanako tipa gako ziazia toro nga gu du na ome ti ni kisusi?​—Rk. 11:13.

4. Ga Mika gene raka namaa gini wene kpiapai furani areme?

⁴ Rogo gako raka yo dunduko, gupai gu nebi nangia Mika aperesipaha mbatayo nga manga gupai Mbori akpinyemuhe. Ko adiberã ka nye niruruko wa si avura du vurũ nga ko aaraka dagba agu aboro gayo mangaapai adu ni irairaha. Wakina gure a, aregbo dunduko ani agbia tirani na agu apai namaa gaani idapase ngbapai. Sidu, ani nyakasi gaani diaberã ka ta “na rimo Yekova gaani Mbori nye anye kindi.”​—Mika 4:5.