Gamo Raka Kumbatayo Nga Gamo Siapai!

YA MO MO RENGBE NA SIAPA WAI GAMO RAKA KUMBATAYO NIKA DU? Kura aboro idi kuti gupai nga i aima ringbisaapai tipa gayo raka kumbatayo angianga gayo asiapai du nanungusa gayo raka ya. Ho i adanga ni ti gayo asásá ya, i nambupaha nibasa kini berẽ gupai nga wiripai ho berewe rengbe yo ka mangaha te. I naya “i aasianga ha fere mi da ti agi asásá re te!”

Rago nagberã ti agu akurayo ho i abi gupai ni nga, pai ho rengbe boro ka mangaha tipa agu arungo gbiati gu irairaapai namanga rogo gi zegino ani araka rogoho re te. I naasada ka sa gayo raka ni wenehe​—⁠kina agu apai du wa avura, gbegberẽ mangaapai, gu gberãngo naye be gu mangaapai nga ga ome zegino, gbiati akaza kini gberesi gu ome i amangaha ti aregbo dunduko. I kini tona ka sana tiyo nga, ‘Tipagine mi ambusa tire ti ni?’.

Kina rengo du ngaha nga, kura apai rogo raka ima rengba ka du na gbegberẽ sangbanaha kurii agu apai mo aberãpa mangaha. (Batungusipai 9:​11) Wa vura duhe wo, mo na kina siapai be ro tipa gupai du tipa gamo nyenye raka kumbatayo. Nirengo, Ziazia Kekeapai nayugo gupai nga, gamo raka kumbatayo nabi kina gamo siapai. Mo bingo gupai si agumbaha.

Moize nangia bangbembatayo fu rimbasa aYisaraere agumbapai fu aboro ho i aambeda ni ka rimo ku rogo Ringara Mokido nga: “Mi ringbisi unga na wenepai fu roni ni gi uru re, na kpio na gbegberẽpai; oni sía unga, oni ki nye ni ungaroni, oni na awironi a, ka akpi nyemu Yekova gaoni Mbori, ka agia fugoko, ka aka kuti ko.”​—⁠Pa Fu Rugute ni Ue he 30:​15, 19, 20.

“Mi ringbisi unga na kpio fu roni, maku na motiwa, si du oni sía unga.”​—⁠Pa Fu Rugute ni Ue he 30:1

Ni rengo! Mbori akusi aYisaraere be sunge akanga ringara Ezipeta yo na ki moi pa raka gbua na ngbarago barangba yo rogo Ringara Mokido. Ono si aadunga nga gipai re nika manga nibasa fuyo te. Tipa i gbia agu amaku re, si aida i “sía unga.” Wai gu i arengbe ka sia ha? ‘Ni kpi yo nyemu Mbori, kini gi fugoko, na kini ka kuti ko.’

Areme, kina gu ngbatunga siapai re du barangbaro, na gu siapai mo nika mangaha nika yugo gupai du tipa gamo raka kumbatayo. Ka mo sia ka kpinyemu Mbori, kini degeturo kuti agu apai ko apehe foro, na kini ka kuti ko, gere nika yugo gupai nga mo ima sia unga​—⁠ka raka nyenye kindi rogo paradizo auru kpotosende ane. Ono ginipai agi apai re akodaha ni basasa?

SIA KA KPINYEMU MBORI

Nyemuse nga bangua sino Mbori. Ga Mbori toro adu ku gii gu mokedi nangia Yoane ko kepai nga, “Mbori nga nyemuse.” (1 Yoane 4:⁠8) Mbiko gi ndupai re, ho i asana Yesu ni tipa gu rugute susi, ko aya: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ.” (Matayo 22:37) Si naida mburu gaani ndikidi pagume na Mbori du rii nyemuse angianga kungbo gunde beko ya. Ono tipagine si aida ani sia ka kpinyemuko ti ni?

Ga Yekova nyemuse tipa aboro wakina ga avungu agude koyo du awiriyo ni. Wa vura du yo ni kpakpa aboro, agu avungu agude du na nyemuse naruga awiriyo, kini ngarasi yo, kini undo yo, na kini rugu yo mbiko i naida i du na ngbarago na ki du na diabese rogo raka. Ginipai avungu agude aida awiriyo mangihe fuyo? I naida awiriyo kpinyemu yo na kini degetuyo kuti agu apai i ayugoho fuyo tipa gayo undo. Ya mo si arunga ani yugu gaani tambuahe fu gu Barani du ni rengberengbe ko tipa agu apai ko namangihe furani te?

MO GI FUGOKO

Rogo gu fugo i ake Ziazia Kekeapai rogoho ni bambataha, gu fugo nga ‘gia’ dedede, nakoda gupai nga “giasangba.” Anga gipai re ani naaida ka gumbaha ho ani naagumba gupai ni fu gude nga, “Mo gisangba avunguro” te? Wakina gure, ka gia fugo Mbori nayugo pa wirika ani pai tipa ko na kini gisangba gupai ko agumbaha furani. Wa duhe nga, ani arengbanga ka gia ndikidi fugo Mbori te, ani nagia fugoko ni geda ani Ziazia Kekeapai na kini mangi agu apai ani awirikaha rogo Fugo ko nga Ziazia Kekeapai.​—⁠1 Yoane 5:⁠3.

Tipa ka yugo nyaka pa gia ani fugo Mbori, Yesu agumbapai ti kura regbo sa nga: “Boro anye nga ni ungani mbiko kina riahe te, ono mbiko agu apai dunduko naye ngba Mbori yo.” (Matayo 4:⁠4) Kina wai nyaki pa gu riahe nga ga borose furani, kinawo nyaki pa dia ani inohe tipa Mbori berewe ki susi a. Tipagine? Gu tatamanatatamana Bakindo nangia Soromo asakirogo gipai yo re nga: “Tatamana nabanda boro a wa marã nabanda boro; ono gu pai ngba inahe ti ni susi si nga tatamana nabanda unga gu ni du na inahe.” (Batungusipai 7:​12) Inohe gbiati tatamana be Mbori ima rengba ka banda rani areme na ki undo rani tipa ani mangi asiapai ni tatamana nga gu nika ndu na ani ku rogo gu nyenye unga du kumbatayo.

KA KUTI KO

Mo natingida gu ga Yesu kpiapai ani ni wisigihe rogo gu kekeapai ye mbata fu gere, ho ko aya ni: “Gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.” (Matayo 7:​13, 14) Ka ani aandu ngba gu gene re, ani ima rengba ka gbia undo ti du ani mbembedi na agu arugapai nga ga gu boro du na inohe ka ani aida ka da ti​—⁠gu raka nyeanye kindi. Mbiko gipai re, ani na wene ndupai berani ka mbeda na Mbori. (Atambuahe 16:⁠8) Ono, wai gu rengbe ani ka manga gupai re?

Rogo aˈuru dunduko, dungu apai duho si aida ani mangihe na kura dungu apai ani akpinyemu ka amangaha. Agi apai re rengbe ka fu rirani si ki sa gupai nga, ka ani dunga na regbo berewe tipa ka berã pa gupai Mbori akpinyemu ani mangihe ya. Si nga ndu gupai Ziazia Kekeapai atingida rani ti ni na gupai nga: “Si du ka oni angéra angera wenengaĩ ti ni wa oni nata, wa zanga tatamana te, wa kina iratatamana. Oni ki banda gaoni saa tipa manga apai, bambiko rago gbegberẽ.” (AEfeso 5:​15, 16) Ani nambeda na Mbori ni sa ani gaani pagume na ko ni gu nyanyakipa pai du furani rogo gaani raka.​—⁠Matayo 6:​33.

GAMO SIAPAI

Wa vura duhe nga, pai ho rengbe mo ka mangaha tipa ka sa raka fu gamo aboro kumbatayo wenengai te, Ziazia Kekeapai nayugo gupai nga gu Barani nga ga ngbangbaturũ ko nga, Yekova Mbori, ima kpinyemu rani ni yugoko gupai furani ko akpinyemu ani mangihe. Mo bingo afugo gu nebi nangia Mika:

“Ako boro, ko yugu gu he foro ngba angba; gine Yekova aida be ro? a nga kina manga pai ni ruruhe, na ka kpi nyemu weneringise, na ka ta ni umbasitise na ga Mbori, te!”​—⁠Mika 6:⁠8.

Ya mo mo adia ga Yekova yambahe ka ta na ko na ki gbia gu nyenye amaku ko na kido paha fu agu aboro napeka ko? Gamo siapai du!