Oni Wiriki gu Kpiapai Nga ga Anebi​—Osea

1. Gini sanahe si awira gupai nga oni aima sana tironi na ni?

¹ Isoke, fuo berã mo kurii ga Yekova wene sino gbiati gako inapai, mo aima sana tiro na gu sanahe nga, ‘Gini apai mi naima ida ka mbu paha tipa ka manga gupai Yekova aidaha?’ (Tam. 103:2-4; 116:12) Osea amangi kina gupai Yekova aya fuko ko mangihe, wa si avura du vurũ nga si aidi ko mbupa kura gako apai ambu. Wai rengbe ani ka wirika Osea?

2. Wai rengbe ani ka wirika ga Osea kpiapai ni kpatagara ani kuti tungusapai?

² Oni Tungusipai Ho Adunga Ragoho ni Ya: Osea aatakapande ga Mbori pangbanga gbe fu gu kindo nangia ga aYisaraere naadu na angbatunga bawe, nga gu ba i ambedi ka nyasa riipa ndikidi irisombori rogoho. Bakindo Yerobama gu Ue Ko amangi gupai naadu ni gbigbitaha barabangiri Mbori na ki ndu ku mbatayo na gu iriso nga ga wiri bagara nga gu Yerobama gu Bambata Ko atonaha. (2 Aba. 14:23, 24) Agu abakindo nangbefuo gure andu kindi ku mbatayo kaa zeresa aboro rogo toro yo daho i agbarasi gu kindo ni nangia ga aYisaraere naadu na angbatunga bawe, rogo 740 M.B.K. Ono wa Osea avura kaa raka dagba gi airisi kungbo ambori re, ko anye ni ruruko na ki mangisunge ni nebi tipa agarã 59. Ya mo ani diberã kaa tungusapai wo na agarã dunduko, si ki vura du vurũ nga ani nagbia agu aboro adunga na nyemupai tiyo ya watadu agu aboro nasoga rani asoga?​—2 Tim. 4:2.

3. Wai ga Osea raka ayugu kpia ga Yekova inapai?

³ Oni Berẽpa ga Yekova Inapai: Yekova arugu Osea nga ko di “debäri” ni diako. (Osea 1:2) Wa diako nangia Gomere avura vunga kumbagude fuko vurũ, si nawira gupai nga ri aima ye ka vunga kura awiri badia berewe ue. Pa mbu Osea pai fu diako ayugu pa ga Yekova bakere inapai fu agu aboro nyakarii nangia aYisaraere ho i asaberã ni. (Osea 3:1; Rom. 9:22-26) Ya mo ani rengbe ka mbu pa agu apai ngba tirani gbe tipa ka yugopai fu aboro tipa ga Yekova inapai?​—1 Kor. 9:19-23.

4. Gini apai rengbe ani ka mbupaha tipa ka mangasunge fu Yekova?

⁴ Kura ga Yekova amoyambu ambupa gayo wene asunge tipa ka kpara gu regbo re tipa tungusapai. Agu akurayo adiberã ka nye zanga rogatise watadu zanga vungu tipa ka manga agu apai nga ga Kindo. Ho boro aberã pa ga Osea raka ni, ní rengbe ka ya ku kpotoni yo wẽ, ‘ka mi mangingo gupai ko amangihe re te.’ Ono tie, ka ani abi gu ga Yekova weneringise arẽnga aboro tipaha ya na nyanyakipa ha na ki kido kuti gako ziazia toro tipa si fu ome furani, Yekova rengbe arengba ka mangasunge na ani rogo dungu agene wakina Osea.​—Mt. 19:26; Frp. 2:13.