WISIGOPAI 8

Agu Akpiapai Nayugopai

Matayo 13:34, 35

MEMEPAI: Mo mbakadi gamo yugopai ni manga mo sunge na taata akpiapai nga gu rengbe ka ngba ti aboro tipa ka yugo nyanyaki memeapai fuyo.

Mo sia agu akpiapai du taata. Wakina Yesu, mo mangisunge na agu akpiapai aboro nainihe tipa ka saka nyanyakipa rengo fuyo, na taata apai tipa ka sakapai tipa kpakarakpakara apai. Ka mo rimisingo gu futufutuapai nika sa aboro i zanga giarogo gu kpiapai re ya. Mo mangi ome tipa gupai nga agu apai du rogo gamo kpiapai nindu sa na gupai mo ayugoho tipa gupai nga ka aboro gbenga berãyo kusayo mbiko gu kura kungboapai adunga sunge ti ni ya ya.

Mo ningereke angereka. Mo bi agu apai namanga rogo zegino, mo wisigi agu awaraga nga ga aKristano, na ki degeturo kuti wene abayugupai. Wa mo nikaa mangaha wo, mo moiberãro fuo agu akpiapai rengbe mo ka mangasunge na ni tipa ka mbakada gamo yugopai. Mo igi agu akpiapai re na mo.
Mo berẽkurii agu apai rengbe yo ka gbia undo ti ni. Mo sia agu akpiapai du na mangapai rogoho rengbe ka ngba ti agu aboro mo afura fuyo. Mo du na rubangirise nga gamo kpiapai abanga gberãrago watadu ka fu pazee te.
Mo yugu memepai. Mo gbeberã ro kuti gu memeapai du rogo gu kpiapai re, angianga kuti futufutu apai ya. Si naida mo inihe nga gu boro nadegatuni nika tingida gu kpiapai re atingida na gu memepai ni nawirikihe rogoho.